1 Pɛ̀gá 20

Siiri pɩ̀ʋ́ Bɛn-Hadadə púə́ Samari tɩʋ tə ʋ kə sə ʋ ta

1 Siiri pɩ̀ʋ́ Ben-Hadadə, ken ʋ kwatara mama duən yáá nə. Ʋ yà jə də səsen, də səsen kòrə̀n, yá Pɛ̀gá fɩtwa də bələ yà wulə də wá. Ʋ vəli ʋ pú Samari tɩʋ tə ʋ kə, sə ʋ ta kʋ. 2 Ʋ tʋn lɩ̀à tɩʋ tə wa, ʋ pa ba swɩ̀n Yɩzərayɛlə pɩ̀ʋ́ Akabə con, 3 ʋ wʋ́: «Nə̀ń Bɛn-Hadadə nii sʋgʋ: N wárʋ́ tə, də n sɩ́án tə yɩ à mʋ̀ nə tɩ. N kana tə, də n bɩ̀á tə nə ziən yɩ à mʋ̀ nə tɩ. 4 Yɩzərayɛlə pɩ̀ʋ́ tə ma pa ba le wá, ʋ wʋ́: «N mʋ̀ pɩ̀ʋ́ tə, n nə yɩ à yuu-tiu, à wá twá n nii tə nə. À də won tə mama à nə jə, yɩ n mʋ̀ nə tɩ.» 5 Bɛn-Hadadə tʋntʋna tə kʋ́ʋ̀ pìí ba bà nɛɛ bələ nii nə, ba swɩ̀n, ba wʋ́: Nə̀ń Bɛn-Hadadə nii sʋgʋ: À tʋn à pa ba swɩ̀n n con, sə n pa nə n wárʋ́ tə, də n sɩ́án tə, də n kana tə, də n bɩ̀á tə. 6 Jwɩan máŋá ka tə wa, à wá tʋn à tʋ̀tʋ̀nà n con. Ba wá gwìń n dìə̀ tə, də n tʋ̀tʋ̀nà tə dìì tə, yá ba wá tì won tə mama kʋ nə jə funə kʋ pa mʋ́, ba ja kɛ̀ń.»

7 Yɩzərayɛlə Pɩ̀ʋ́ tə dàń bon lʋʋ nii tə nəkwɩna tə mama, ʋ swɩ̀n ba con, ʋ wʋ́: «Á tətə na kʋ nəpon, də bɛɛ wà tə yɩ ʋ pɩ̀à nəba də lwanɩ. Cɩ́gá, ʋ dí yáá ʋ tʋn lɩ̀à, sə ba jon à kana, də à bɩ̀á, də à wárʋ́, də à sɩ́án, yá à yà wà vɩ̀!» 8 Nəkwɩna tə mama, də lalʋʋ tə mama dàń swɩ̀n Akabə con, ba wʋ́: «Dàn ká tan ʋ con, dàn ká sɛ̀ kʋ!» 9 Akabə dàń swɩ̀n Bɛn-Hadadə tʋntʋna tə con, ʋ wʋ́: «Á vələ á swɩ̀n à yuu-tiu pɩ̀ʋ́ Bɛn-Hadadə con, də à wá tʋn kʋ tə mama, ʋ nə təntən ʋ pa ba swɩ̀n à con tə, yá kʋ tə mʋ̀ ʋ nə swɩ̀n nətən, à wàrɩ̀ kʋ à sɛ̀.» Tʋntʋna tə vəli ba swɩ̀n kori təntə, Bɛn-Hadadə con.

10 Bɛn-Hadadə kʋ́ʋ̀ tʋn ʋ pa ba swɩ̀n Akabə con, ʋ wʋ́: «À wá ta Samari à cʋ̀gʋ̀ mɩ́ámɩ́án. Pùrə́n tətə bá ya lá, kʋ nə wá sú à kwa lalʋʋ tə jɩɩn. À nə wà kʋ tʋn, sə woŋwanan tə cʋ̀gʋ̀ à yáá də à kwa.» 11 Yɩzərayɛlə pɩ̀ʋ́ tə le, ʋ wʋ́: «Á swɩan Bɛn-Hadadə con, də lìù tə ʋ nə vələ kʋ̀ʋ̀, wà mɛ sə ʋ də́ barɩ, ndə lìù nə ta kʋ̀ʋ̀, ʋ də́ dɩ̀àn, ʋ pìí ʋ bɩ̀àn.»

12 Bɛn-Hadadə nì sʋgʋ təntə, də ʋ də pɛ̀gá tə duən tə yà wulə ba nywɩn gànsìlə́ tə də̀ń nə. Ʋ dàń swɩ̀n ʋ kwatara tə con, ʋ wʋ́: «Á kənə á sírí, sə á ta kʋ̀ʋ̀ tə.» Yá ba dàń nan ba cɩ̀ ba zɩga tɩʋ tə yáá nə, sə ba ta kʋ.

Yɩzərayɛlə pɩ̀ʋ́ Akabə dí dɩ̀àn Siiri pɩ̀ʋ́ Bɛn-Hadadə yuu wa

13 Yɩɩ nii sʋ̀sʋ̀nʋ̀ don dàń twi ʋ yí Yɩzərayɛlə pɩ̀ʋ́ Akabə yɩra, ʋ swɩ̀n, ʋ wʋ́: «Nə̀ń kʋ tə Ba-Yígúrə́-Jə-Tiu nə swɩ̀n, lalʋʋ kʋ tə mama n nə na nətən, à wá kə kʋ n jɩɩn wa zə̀n kʋ tə, yá n dàń wá lwarɩ də, à mʋ̀ nə yɩ Ba-Yígúrə́-Jə-Tiu.» 14 Akabə bwe, ʋ wʋ́: «Kʋ wá twá də wàà, ʋ ma kə ba à jɩɩn wa?» Yɩɩ nii sʋ̀sʋ̀nʋ̀ tə le, ʋ wʋ́: «Ba-Yígúrə́-Jə-Tiu swɩ̀n də, kʋ wá twá də kwatara tə, nagwanɛɛ yáá tɩ̀án tə nə kúrí. Akabə kʋ́ʋ̀ bwe, ʋ wʋ́: «Wàà nə wá sinti kʋ̀ʋ̀ tə?» Yɩɩ nii sʋ̀sʋ̀nʋ̀ tə le, ʋ wʋ́: «N mʋ̀ nə.» 15 Akabə dàń gàlɩ̀ kwatara tə, nagwanɛɛ yáá tɩ̀án tə nə kúrí, də ba yɩ lɩ̀à 232. Kʋ kwa nə, ʋ gàlɩ̀ Yɩzərayɛlə lʋʋ kwatara tə mama, də ba yɩ lɩ̀à 7000.

16 Ba dàń nan yɩcaʋ gùlú máŋá wa, ba ta Bɛn-Hadadə də pɛ̀gá fɩtwa də bələ tə, ba yà nə twi, sə ba san wa, ʋ də ba dàń yà ga wulə ba nywɩn sana ba bʋbʋnɩ, gànsìlə́ tə də̀ń nə. 17 Kwatara tə nagwanɛɛ yáá tɩ̀án tə nə kúrí, nə dí yáá ba nan. Bɛn-Hadadə tʋn lɩ̀à, sə ba ywàń ba jə́n. Yá ba twi ba swɩ̀n ʋ con, ba wʋ́: «Bara nan Samari wa.» 18 Ʋ swɩ̀n, ʋ wʋ́: «Ba nə yɩ ba nan, sə ba lòrì sìə́, á jana ba də ba nəŋə, ba nə kʋ́ʋ̀ yɩ ba nan, sə ba ta kʋ̀ʋ̀ tə, á jana ba də ba nəŋə.» 19 Kwatara tə nagwanɛɛ yáá tɩ̀án tə nə kúrí, də Yɩzərayɛlə lɩ̀à kwatara tə, nə púə́ ba kwa dàń nan tɩʋ tə wa. 20 Ba lìù mama gʋa lìù dʋŋa tə wa. Siiri tɩ̀án tə dàń gʋa tɩa, ba dəri, Yɩzərayɛlə lɩ̀à tə ga pú ba kwa ba dɩŋɩ. Siiri pɩ̀ʋ́ Bɛn-Hadadə yɩ səsən ʋ dɩ̀gà, ʋ də səsədɩra tə duən ma wànɩ́ ba dəri ba jɛ́n. 21 Yɩzərayɛlə pɩ̀ʋ́ tə dàń gʋa ba səsen tə, ʋ ga cʋ̀gʋ̀ ba səsen kòrə̀n tə. Mə nətʋ nə ʋ dí dɩ̀àn Siiri tɩ̀án tə yuu wa zənzən.

22 Yɩɩ nii sʋ̀sʋ̀nʋ̀ tə dàń twi ʋ yí Yɩzərayɛlə pɩ̀ʋ́ tə yɩra, ʋ swɩ̀n, ʋ wʋ́: «Vəli, pa n jɩɩn dàn, n ga bʋ́n n na kʋ tə n nə mɛ sə n fwa. Cɩ́gá, bɩnɩ nə, Siiri pɩ̀ʋ́ tə wá pìí ʋ bà ʋ ta mʋ́.»

Akabə kʋ́ʋ̀ ta Siiri tɩ̀án ʋ də́

23 Siiri pɩ̀ʋ́ tə tʋ̀tʋ̀nà swɩ̀n ʋ con, ba wʋ́: «Yɩzərayɛlə lɩ̀à Yɩɩ tə yɩ pɛɛn Yɩɩ. Kʋ mʋ̀ nə pɩn, ba dɩ̀àn ma doni nəba. Nə vələ nə ta ba vara tə wa, yá nə wá də́ dɩ̀àn ba yuu wa! 24 Sɩ́ʋ́n nə, tʋn yoo kʋ tə. Yá pɛ̀gá tə vàn nə, n ga kə nagwanɛɛ yáá tɩ̀án tə ba yuu nə. 25 N tətə dàń tanɩ kwatara púlí don, ndə ba tə nə, n nə kwɩ̀n ba nə kʋ̀ʋ̀ tə wa. Tanɩ səsen, də səsen kòrə̀n tə nə dáá, ndə diyáá nyiən tə nə. Nə dàń wá ta ba vara tə wa, yá nə wá də́ dɩ̀àn ba yuu wa!» Bɛn-Hadadə dàń sɛ̀ ba kwìə̀ tə, ʋ ga tʋn nətʋ.

26 Bɩnɩ tə kʋ nə dánɩ́ lá, Bɛn-Hadadə gàlɩ̀ Siiri tɩ̀án kwatara tə, ʋ ga ja ba ʋ nan ʋ va Afɛkə, sə ba ta Yɩzərayɛlə lɩ̀à tə. 27 Akabə də gàlɩ̀ Yɩzərayɛlə kwatara tə, ʋ pa ba wodirən, ba də ga nan ba vələ, sə ba jəri Siiri tɩ̀án kwatara tə. Yɩzərayɛlə kwatara tə vəli ba kə ba dəkuu, Siiri tɩ̀án kwatara tə yáá con. Ba pwɛ̀ púlə́ bələ, ndə bʋtubii bələ bʋ̀nɩ̀ nə, yá Siiri tɩ̀án tə mʋ̀ yà súə́ lʋʋ nii tə.

28 Yɩɩ tʋtʋnʋ tə kʋ́ʋ̀ twi, ʋ yí Yɩzərayɛlə pɩ̀ʋ́ tə yɩra, ʋ swɩ̀n, ʋ wʋ́: «Nə̀ń kʋ tə Ba-Yígúrə́-Jə-Tiu nə swɩ̀n: Siiri tɩ̀án tə wʋ́ à mʋ̀ Ba-Yígúrə́-Jə-Tiu yɩ pɛɛn Yɩɩ, à tà vara Yɩɩ. Kʋ mʋ̀ yɩrɩ, à wá kə ba lalʋʋ kʋ tə mama n jɩɩn wa, yá á dàń wá lwarɩ də, à mʋ̀ nə yɩ Ba-Yígúrə́-Jə-Tiu.» 29 Ba kwatara púlə́ bələ tə dàń zɩgɩ duən yáá con, dɩan barpɛ, ba ma ywàŋá duən. Barpɛ nii dɩɩn tə nə, kʋ̀ʋ̀ tə nyɩ́n kʋ zàn, yá dɩɩn nədʋ wa, Yɩzərayɛlə lɩ̀à tə gʋa Siiri tɩ̀án tə bara 100 000, ba nə vəli də nɛɛ. 30 Ba gɩganɩ tə dəri ba zʋ Afɛkə tɩʋ tə wa, yá tɩʋ tə bírə́ tʋa ba bara 27 000 yuu wa, ba yà nə ga.

Bɛn-Hadadə mʋ̀ yà dəri ʋ zʋ tɩʋ tə wa, ʋ səgə dìì dìyɛ́ɛ́ wa.

Akabə tún nɩmarʋ də Siiri pɩ̀ʋ́ Bɛn-Hadadə

31 Bɛn-Hadadə tʋ̀tʋ̀nà tə swɩ̀n ʋ con, ba wʋ́: «Nə nì də Yɩzərayɛlə lɩ̀à pɛ̀gá tə tʋŋa wʋywaŋʋ* lɩ̀à yɩra. Nə wá vwa ganlwaran nə tàŋá nə, nə zɩn nə jɩ̀àn nə yuu wa, nə ga nan nə va Yɩzərayɛlə pɩ̀ʋ́ tə con. Kʋ wàá kʋ pɩn ʋ yá mʋ́, ʋ ba mʋ́ gwɩ.» 32 Ba tì ganlwaran ba vwa ba tàŋá nə, ba zɩn ba jɩ̀àn ba yuu wa, ba ga zàn ba va Yɩzərayɛlə pɩ̀ʋ́ tə con. Ba swɩ̀n ʋ con, ba wʋ́: «N tʋtʋnʋ Bɛn-Hadadə lòrì sə n yá, sə ʋ mɩɩ ya lʋʋ wa.» Akabə le, ʋ wʋ́: «Ʋ mɩɩ tə siŋə naaa? Ʋ yɩ à nubiu.» 33 Bɛn-Hadadə lɩ̀à tə dàń twá sʋgʋ təntə nə, ba swɩ̀n, ba wʋ́: «Kʋ yɩ cɩ́gá, Bɛn-Hadadə cɩ́gá yɩ n nubiu!» Akabə swɩ̀n, ʋ wʋ́: «Á vələ á ja wá, á ja bà.» Bɛn-Hadadə dàń nan ʋ bà ʋ con, yá Akabə pɩn ʋ zʋ pɩ̀ʋ́ səsen kòrù tə wa. 34 Bɛn-Hadadə swɩ̀n Akabə con, ʋ wʋ́: «À wá pìí à pa mʋ́ tɩan tə, à nyɩna yà nə jon n nyɩna con. N wàá n lʋʋ wiən n yoli Damasə nə, ndə à nyɩna yà nə yoli nə lʋʋ wiən Samari nə nətʋ.» Akabə swɩ̀n, ʋ wʋ́: «À wá tún nimarʋ də mʋ́, à ga yá mʋ́, sə n vìí.» Ʋ tún nimarʋ də wá, ʋ ga yá wá, ʋ pa ʋ vìí.

Yɩɩ bɩrɩ də Akabə wà zəni fwa

35 Ba-Yígúrə́-Jə-Tiu pɩn Yɩɩ nii sʋ̀sʋ̀nà dwíí tə wa lìù don swɩ̀n ʋ don con, ʋ wʋ́: «Mà nə!» Yá bɛɛ tə vɩga sə ʋ mà wá. 36 Ʋ dàń swɩ̀n ʋ con, ʋ wʋ́: «N nə wà Ba-Yígúrə́-Jə-Tiu kori tə cʋgʋ yɩrɩ, máŋá tə n nə wá kɛ̀ń n yá nə, gəru wá ja mʋ́.» Yá máŋá tə ʋ cɩ́gá nə kɛ̀ń ʋ yá Yɩɩ nii sʋ̀sʋ̀nʋ̀ tə, gəru jɩn wá kʋ gʋ.

37 Yɩɩ nii sʋ̀sʋ̀nʋ̀ tə kʋ́ʋ̀ nɩ bɛɛ don, ʋ swɩ̀n ʋ con, ʋ wʋ́: «Mà nə!» Kʋ bɛɛ təntə mà wá ʋ caŋɩ. 38 Yɩɩ nii sʋ̀sʋ̀nʋ̀ tə dàń ja gankɩkala ʋ pú ʋ yáá nə, ʋ ga va ʋ zɩga cwəŋə tə nii nə, pɩ̀ʋ́ Akabə nə wá tì.

39 Máŋá tə pɩ̀ʋ́ tə nə kɛ̀ń, Yɩɩ nii sʋ̀sʋ̀nʋ̀ tə mà cə̀rə́, ʋ kə pɩ̀ʋ́ tə nə, ʋ wʋ́: «À yuu-tiu, à yà wulə kʋ̀ʋ̀ tə titəŋi wa à tɛ, də nə̀ń lìù don nə, ʋ ja bandiə lìù, ʋ bà ʋ pa nə, ʋ ga swɩ̀n, ʋ wʋ́: “Cɩ̀ bɛɛ wa tə nə. N nə pɩn ʋ jɛ́n, n mɩɩ nə n wá ma ŋwɩ́n wá, nə à yə̀ə́ n wá ŋwɩ́n nə də səbilurən 3 000.” 40 Máŋá tə à mʋ̀ n tʋtʋnʋ tə nə wulə à tʋŋa tɩa tə mama, bandiə lìù tə dəri ʋ jɛ́n.» Yɩzərayɛlə pɩ̀ʋ́ tə ma swɩ̀n, ʋ wʋ́: «Mə kʋ nə n tətə swɩ̀n, n tətə nə jɩn n tɩ̀àn n pa.» 41 Kʋ máŋá tə tətə wa, Yɩɩ nii sʋ̀sʋ̀nʋ̀ tə súrí gankɩkala tə ʋ yáá nə. Yá Yɩzərayɛlə pɩ̀ʋ́ dàń lwarɩ də, ʋ yɩ Yɩɩ nii sʋ̀sʋ̀nà tə wa lìù don. 42 Ʋ swɩ̀n pɩ̀ʋ́ tə con, ʋ wʋ́: «Ba-Yígúrə́-Jə-Tiu nə swɩ̀n, ʋ wʋ́: N nə yá bɛɛ tə à yà nə ken n jɩɩn sə n gʋ, n pa ʋ jɛ́n tə yɩrɩ, n mʋ̀ nə wá tɩ ʋ yuu nə, n lalʋʋ tə ga wá tɩ, ʋ lalʋʋ tə yuu nə.» 43 Yɩzərayɛlə pɩ̀ʋ́ tə dàń pìí ʋ va Samari də pucʋnɩ də lɩŋa.