Nabɔtə kárá tə də ʋ gʋrɩ yoo
21
1 Tə mʋ̀ yìə̀n təntə kwa nə, nə̀ń yoo tə nə tʋn. Nabɔtə ʋ nə yɩ Zwizəreyɛlə tíú tə yà jə divɛn tɩ̀án kárá, ka wulə Samari pɩ̀ʋ́ Akabə sàń nii nə. 2 Akabə dàń swɩ̀n Nabɔtə con, ʋ wʋ́: «Pa nə n kárá tə, sə à ma fwa dəŋə kárá, cɩ́gá, ka bwə́lə́ à dìə̀ tə yɩra. À wá pa mʋ́ kárá don, ka zəni nə dwə ka, nə à yə̀ə́, n kʋ́ʋ̀ nə pɩ̀à, à wá ŋwɩ́n ka səbiu à pa mʋ́.» 3 Nabɔtə le Akabə, ʋ wʋ́: «Ba-Yígúrə́-Jə-Tiu wá cɩ̀, sə à tì à nyɩna-ba jɩjə tə à pa mʋ́!» 4 Akabə vəli ʋ sàń də pucʋnɩ, ʋ ga sú də lɩŋa, sʋgʋ tə yɩrɩ, Nabɔtə ʋ nə yɩ Zwizəreyɛlə tíú tə nə swɩ̀n ʋ wʋ́: «À bá pa mʋ́ à nyɩna-ba tə jɩjə tə.» Ʋ zʋa ʋ tígə́ ʋ gədo yuu wa, ʋ viviri ʋ yáá ʋ pú bírə́ nə, ʋ ga ba wodiu mama pɩ̀à sə ʋ də́. 5 Ʋ kan Zwezabɛlə twi ʋ yí ʋ yɩra, ʋ bwe wá, ʋ wʋ́: «Bɛ̀ nə pɩn n wulə pucʋnɩ wa, n ga ba wodiu də́?» 6 Ʋ le wá, ʋ wʋ́: «À swɩ̀n Nabɔtə, ʋ nə yɩ Zwizəreyɛlə tíú tə con, à wʋ́: “Pa nə n divɛn tɩ̀án kárá tə, sə à ŋwɩ́n də səbiu, nə à yə̀ə́, ʋ nə pɩ̀à, sə à pa wá divɛn tɩ̀án kárá don, ka bʋʋ wa.” Yá ʋ swɩ̀n, ʋ wʋ́: “À bá pa mʋ́ à divɛn tɩ̀án kárá tə.” » 7 Ʋ kan Zwezabɛlə ma swɩ̀n ʋ con, ʋ wʋ́: «Kʋ tà n mʋ̀ nə də́ pàrɩ̀ Yɩzərayɛlə lɩ̀à yuu wa sɩ́ʋ́n nə naaa? Zàn yɩɩ nə n də́ wodiu sə n pùə́ poli. À mʋ̀ nə wá pa mʋ́ Nabɔtə, ʋ nə yɩ Zwizəreyɛlə tíú kárá tə.»8 Zwezabɛlə pʋ́pʋ́nɩ́ saga Akabə yɩrɩ yuu wa, ʋ mà Akabə jɩtuŋu tə yuu wa. Ʋ tʋn tə saga təntə, ʋ pa tɩʋ tə nəkwɩna tə, də tɩʋ tə yáá tɩ̀án tə nə, ba də Nabɔtə nə wulə ʋ tɩʋ tə wa. 9 Ʋ pʋ́pʋ́nɩ́ saga tə wa, ʋ wʋ́: «Á boŋə lalʋʋ tə, á kə duən nə, sə ba fwa nivori, á ga bon Nabɔtə, sə ʋ mʋ̀ nə yà kʋ yáá. 10 Á dàń pɩan bakʋkwanyɩna bələ, bà ʋ yáá con, ba swɩ̀n ba zɩgɩ ʋ nə, ba bɩrɩ də ʋ mʋ̀ nə zɩrɩ ʋ kə Yɩɩ də pɩ̀ʋ́ tə nə. Kʋ kwa nə, á dàń jana wá á nan tɩʋ tə nii nə, á dɩlɩ wá də kapana á gʋ.
11 Nabɔtə tɩʋ lɩ̀à tə, də nəkwɩna tə, də tɩʋ tə yáá tɩ̀án tə, tʋn kʋ tə Zwezabɛlə nə tʋn ʋ swɩ̀n ba con, ndə kʋ nə pʋ́pʋ́nɩ́ ʋ saga tə wa nətʋ. 12 Ba bon lalʋʋ tə ba kə duən yáá nə, sə ba fwa nivori. Yá ba dàń lɩ Nabɔtə ba kə lalʋʋ tə yáá. 13 Bakʋkwanyɩna bələ tə dàń twi ba zɩga ʋ yáá con. Yá ba swɩ̀n yìə̀n tə tə, ba zɩgɩ ʋ nə, lalʋʋ tə yáá con, ba wʋ́: «Nabɔtə zɩrɩ ʋ kə Yɩɩ də pɩ̀ʋ́ tə nə.» Ba dàń jɩn wá ba ja nan tɩʋ tə nii nə, ba dɩlɩ wá də kapana ba gʋ. 14 Ba tʋn ba swɩ̀n Zwezabɛlə con də ba dɩlɩ Nabɔtə də kapana ba gʋ.
15 Máŋá tə Zwezabɛlə nə nì də ba dɩlɩ Nabɔtə də kapana ba gʋ, ʋ swɩ̀n Akabə con, ʋ wʋ́: «Zàn n jon Nabɔtə, ʋ nə yɩ Zwizəreyɛlə tíú divɛn tɩ̀án kárá tə, ʋ nə vɩga sə ʋ yoli n yuu wa. Cɩ́gá, Nabɔtə kʋ́ʋ̀ tə̀lə́, ʋ tɩga.» 16 Akabə nə nì də Nabɔtə tɩga, ʋ zàn sə ʋ va Nabɔtə ʋ nə yɩ Zwizəreyɛlə tíú divɛn tɩ̀án kárá tə wa, sə ʋ jon ka ʋ ma fwa ʋ nyiən.
Yɩɩ swɩ̀n ʋ zɩgɩ Nabɔtə gʋrɩ tə nə
17 Ba-Yígúrə́-Jə-Tiu swɩ̀n Eli con, ʋ nə yɩ Tiswibə tíú, ʋ wʋ́: 18 «Zàn n va n jəri Yɩzərayɛlə pɩ̀ʋ́ Akabə, ʋ nə wulə Samari nə. Nə̀ń ʋ nə ʋ wulə Nabɔtə divɛn tɩ̀án kárá tə wa, ʋ vəli sə ʋ jon ka, ʋ ma fwa ʋ nyiən. 19 N wá swɩ̀n ʋ con, də à mʋ̀ Ba-Yígúrə́-Jə-Tiu nə swɩ̀n sʋgʋ kʋ tə, à wʋ́: “N gʋa lìù yá n dàń vəli sə n jon ʋ wiən, n ma fwa n nyiən.” Ba-Yígúrə́-Jə-Tiu swɩ̀n sʋgʋ kʋ tə, ʋ wʋ́: “Bwálɩ́ tə wa, kukuri nə dàlɩ̀ Nabɔtə jana tə, mə kʋ bwálɩ́ tə tətə wa nə, kukuri wá dàlà n də jana.” » 20 Akabə swɩ̀n Eli con, ʋ wʋ́: «À dʋŋʋ, n nɩ nə?» Eli le, ʋ wʋ́: «À nɩ mʋ́, n yoli n tɩ̀àn, sə n ma tʋn kʋ tə nə lwara Ba-Yígúrə́-Jə-Tiu yáá con. 21 Nə̀ń, à wá pa basarʋ bà n yuu wa, à wá pa n nyʋn lá nə. À wá pa n dwíí tə nəkwɩna tə, də bìsɩ̀ná tə nyʋn Yɩzərayɛlə dwíí tə wa. 22 À wá pa n dìə̀ jì ndə Nebatə bìú Zwerobʋamə, də Ahɩya bìú Baswa dìì tə nə, n nə zɩ̀n à lɩŋa, n ga pa Yɩzərayɛlə lɩ̀à tə tʋn cʋna yɩrɩ.» 23 Eli tə swɩ̀n, ʋ wʋ́: «Ba-Yígúrə́-Jə-Tiu nə swɩ̀n Zwezabɛlə də con, ʋ wʋ́: “Kukuri wá də́ Zwezabɛlə Zwizəreyɛlə birinaa tə də̀ń nə. 24 Akabə dìə̀ lìù nə tɩga tɩʋ tə wa, kʋ yɩ kukuri nə wá də́ wá, yá ʋ tə də ʋ nə tɩga gaʋ con, kʋ yɩ dələn nə wá də́ wá.»
25 Lìù don wà lá nə yɩn ndə Akabə nə, ʋ nə sóní ka tʋn cʋna Ba-Yígúrə́-Jə-Tiu yáá con. Ʋ kan Zwezabɛlə yà nə kwɛn ʋ yigə wá ʋ kəni tə wa. 26 Ʋ tʋn kʋ tə nə lwara kʋ ja lɛ tɩa nə, ʋ ga pa dun woŋwanan nə, ndə Amon dwíí tə nə, Ba-Yígúrə́-Jə-Tiu nə dɩŋɩ, Yɩzərayɛlə lɩ̀à tə yáá nə.
Akabə mun ʋ tɩ̀àn Yɩɩ yáá con
27 Akabə nə nì Eli sʋ̀ràn tə, ʋ cɩrɩ ʋ gànàn, ʋ ja ganlɔɔ ʋ ma zʋ ʋ tɩ̀àn, ʋ ga fwa nivori. Ʋ yà pə̀ní də kʋ ganlɔɔ tə ʋ yɩra, ʋ ga nə zàn ʋ yàá vəli bʋ̀àbʋ̀à. 28 Ba-Yígúrə́-Jə-Tiu swɩ̀n Eli con, ʋ nə yɩ Tiswibə tíú, ʋ wʋ́: 29 «N nɩ nətʋ Akabə nə cúə́ ʋ tɩ̀àn tɩa à yáá con? Ʋ nə cúə́ ʋ tɩ̀àn tɩa à yáá con tə yɩrɩ, à bá pa basarʋ tə tʋ ʋ dìə̀ tə yuu wa, də ʋ mɩɩ tə wulə lʋʋ wa. À wá pa basarʋ tə bà máŋá tə wa, ʋ bìú tə nə wá də́ pàrɩ̀ tə.