Akabə pɩ̀à sə ʋ pìí ʋ jon Ramɔtə tɩʋ tə
22
1 Kʋ fwa bɩna batwa, kʋ̀ʋ̀ wà Siiri tɩ̀án, də Yɩzərayɛlə lɩ̀à pwə́rə́ wa yɩn. 2 Batwa nii bɩnɩ təntə wa, Zwida pɩ̀ʋ́ Zozafatə twi Yɩzərayɛlə pɩ̀ʋ́ tə con. 3 Yɩzərayɛlə pɩ̀ʋ́ tə swɩ̀n ʋ tʋ̀tʋ̀nà tə con, ʋ wʋ́: «Á yə̀ə́ də Ramɔtə tɩʋ tə, Galadə nagwanaa tə wa yɩ nə mʋ̀ nyiən, yá nə ga yá nə bà kʋ pìí nə joŋə, Siiri pɩ̀ʋ́ tə con?» 4 Ʋ swɩ̀n Zozafatə con, ʋ wʋ́: «N wá bà n san nə, sə nə ta Ramɔtə tɩʋ tə, Galadə nagwanaa tə wa?» Zozafatə le Yɩzərayɛlə pɩ̀ʋ́ tə, ʋ wʋ́: «À də mʋ́ yɩ won nədʋ, n payuu tə, də à payuu tə də yɩ won nədʋ. N səsen tə, də à səsen tə yɩ won nədʋ.Kʋ̀nkʋ̀n Yɩɩ nii sʋ̀sʋ̀nà swɩ̀n də Akabə wá də́ dɩ̀àn ʋ dʋŋa yuu wa
5 Zozafatə swɩ̀n Yɩzərayɛlə pɩ̀ʋ́ tə con, ʋ wʋ́: «Yá sə nə dí yáá nə bwe Ba-Yígúrə́-Jə-Tiu nə jə́n.» 6 Yɩzərayɛlə pɩ̀ʋ́ tə ken Yɩɩ nii sʋ̀sʋ̀nà tə duən yáá nə, ba nə yí ndə biənɩa nə, ʋ bwe ba, ʋ wʋ́: «À mɛ sə à va à ta Ramɔtə tɩʋ tə Galadə nagwanaa tə wa, nə à yə̀ə́, à wà mɛ sə à va lá?» Ba le wá, ba wʋ́: «Vəli, Yuu-Tiu wá kə tɩʋ tə n mʋ̀ pɩ̀ʋ́ jɩɩn wa.» 7 Yá Zozafatə bwe, ʋ wʋ́: «Yɩɩ nii sʋ̀sʋ̀nʋ̀ don mama kʋ́ʋ̀ tə̀lə́ yəbə nə nə wàá ʋ nə, nə twá nə ma bwe Ba-Yígúrə́-Jə-Tiu naaa?» 8 Yɩzərayɛlə pɩ̀ʋ́ tə le Zozafatə, ʋ wʋ́: «Bɛɛ nədʋ cɩcɩ nə ga yəbə nə nə wàá ʋ nə nə twá, nə ma bwe Ba-Yígúrə́-Jə-Tiu, yá à mʋ̀ dàń nə culi wá. Cɩ́gá, ʋ ba yozəŋu swɩ̀n à mʋ̀ yuu wa, də kʋ nə tà yolwan. Kʋ bɛɛ tə nə yɩ Yiməla bìú Miswe.» Zozafatə swɩ̀n, ʋ wʋ́: «Dàn ká swɩ̀n nətʋ pɩ̀ʋ́!» 9 Yɩzərayɛlə pɩ̀ʋ́ tə dàń bon ʋ tʋtʋnʋ ʋ tʋn wá, ʋ wʋ́: «Vəli n ja Yiməla bìú Miswe n bà yəbə lala.»
10 Yɩzərayɛlə pɩ̀ʋ́ tə, də Zwida pɩ̀ʋ́ Zozafatə lìù mama yà zʋa ʋ paganan, ʋ jə̀ə́ ʋ padaʋ yuu, Samari tɩʋ tə mimii yáá kanporu wa, Yɩɩ nii sʋ̀sʋ̀nà tə ga swɩ̀n Yɩɩ nii sʋ̀ràn ba yáá con. 11 Kenana bìú Sedesɩasə, yà fwa lugu nyʋran, ʋ ga swɩ̀n Yɩzərayɛlə pɩ̀ʋ́ tə con, ʋ wʋ́: «Ba-Yígúrə́-Jə-Tiu nə swɩ̀n də, nyʋran tə tə nə n wá ma zwa Siiri tɩ̀án tə wuuu, kʋ va kʋ yí n nə wá zwɛ̀ ba mɩ́ámɩ́án.» 12 Yɩɩ nii sʋ̀sʋ̀nà tə duən tə mama swɩ̀n kʋ sʋgʋ təntə, ba wʋ́: «Vəli n ta Ramɔtə Galadə nagwanaa tə wa. N wá də́ dɩ̀àn, Ba-Yígúrə́-Jə-Tiu wá kə tɩʋ tə n jɩɩn wa.»
Yɩɩ nii sʋ̀sʋ̀nʋ̀ Miswe swɩ̀n də Akabə dʋŋa wá də́ dɩ̀àn ʋ yuu wa
13 Lìù tə nə vəli sə ʋ bon Miswe tə swɩ̀n ʋ con, ʋ wʋ́: «Yɩɩ nii sʋ̀sʋ̀nà tə mama nii yɩ nədʋ, ba ma swɩ̀n yozəŋu ba pɩn pɩ̀ʋ́ tə nə. Pa n də sʋgʋ tə yà ndə ba sʋgʋ tə nə. Swɩ̀n kʋ tə nə ziən!» 14 Miswe le, ʋ wʋ́: «Ba-Yígúrə́-Jə-Tiu wulə, kʋ tə Ba-Yígúrə́-Jə-Tiu nə wá swɩ̀n à con, mə kʋ mʋ̀ nə à wá swɩ̀n.»
15 Máŋá tə wa Miswe nə twi ʋ yí Yɩzərayɛlə pɩ̀ʋ́ tə yáá con, ʋ bwe wá, ʋ wʋ́: «Miswe, kʋ mɛ sə nə va nə ta Ramɔtə tɩʋ tə Galadə nagwanaa tə wa, nə à yə̀ə́ nə wà mɛ sə nə va nə ta kʋ?» Miswe le, ʋ wʋ́: «Vəli, n wá də́ dɩ̀àn, Ba-Yígúrə́-Jə-Tiu wá kə tɩʋ tə n jɩɩn wa!» 16 Pɩ̀ʋ́ tə ma swɩ̀n ʋ con, ʋ wʋ́: «Nɛɛ bagalɩ nə à wá pa n dù də Ba-Yígúrə́-Jə-Tiu yɩrɩ, sə n ma swɩ̀n cɩ́gá à con?» 17 Miswe dàń le, ʋ wʋ́:
«À nɩ Yɩzərayɛlə lalʋʋ tə mama,
də ba laga duən yáá nə, pɛɛn tə yuu wa,
ndə pee nə, tə nə ba payɩrʋ jə.
Yá Ba-Yígúrə́-Jə-Tiu swɩ̀n də,
lɩ̀à ba tə ba yuu-tɩan jə.
Ba lìù mama mɛ sə ʋ pìí ʋ va ʋ sàń də bɩcan sìə́!»
18 Yɩzərayɛlə pɩ̀ʋ́ tə ma swɩ̀n Zozafatə con, ʋ wʋ́: «À wà n con swɩ̀n? Máŋá mama, ʋ bà yozəŋu swɩ̀n ʋ pɩn à mʋ̀ nə, də kʋ nə tà yolwan!» 19 Miswe dàń swɩ̀n ʋ súrí lá, ʋ wʋ́: «Kʋ ziən, cʋgʋ kʋ tə Ba-Yígúrə́-Jə-Tiu nə swɩ̀n! À nɩ Ba-Yígúrə́-Jə-Tiu ʋ jə̀ə́ ʋ padaʋ tə yuu, yá ʋ tʋ̀tʋ̀nà tə mama lanworu tə wa ga zɩga ʋ jɩzən də ʋ jɩgwiə nə. 20 Ba-Yígúrə́-Jə-Tiu swɩ̀n, ʋ wʋ́: “Wàà nə wá gɩgarɩ Yɩzərayɛlə pɩ̀ʋ́ Akabə, sə ʋ va Ramɔtə Galadə nagwanaa tə wa, sə ba gʋ wá lá nə?” Tʋtʋnʋ don yàá swɩ̀n yoo don, ʋ don də swɩ̀n kʋ don. 21 Jə̀rə́ don dàń nan ka zɩga Ba-Yígúrə́-Jə-Tiu yáá con, yá ka swɩ̀n, ka wʋ́: “À mʋ̀ nə wá gɩgarɩ wá.” Ba-Yígúrə́-Jə-Tiu bwe ka, ʋ wʋ́: “Nətə nə n wá fwa?” 22 Jə̀rə́ tə le, ka wʋ́: “À wá va à pa pɩ̀ʋ́ tə Yɩɩ nii sʋ̀sʋ̀nà tə mama kʋna kʋ̀nkʋ̀n.” Ba-Yígúrə́-Jə-Tiu le, ʋ wʋ́: “Kʋ yɩ cwəŋə nəzəŋu, sə n ma wànɩ́ n gɩgarɩ wá. Vəli n tʋn kʋ nətʋ tə.” » 23 Miswe tə swɩ̀n, ʋ wʋ́: «Ba-Yígúrə́-Jə-Tiu ken kʋ̀nkʋ̀n jə̀rə́ n Yɩɩ nii sʋ̀sʋ̀nà tə mama nii wa, yá Ba-Yígúrə́-Jə-Tiu pɩn cwəŋə sə basarʋ yí mʋ́.»
24 Kenana bìú Sedesɩasə dàń fwarɩ ʋ yí Miswe yɩra, ʋ farɩ ʋ pɩpara nə, ʋ ga swɩ̀n, ʋ wʋ́: «Kʋ twá nətə Yɩɩ Siŋu tə ma nan à con, kʋ swɩ̀n n con?» 25 Miswe le, ʋ wʋ́: «N wá na kʋ dɩɩn tə nə, n nə wá twá dìyáá də dìyáá wa, n dəri sə n ma səgə.» 26 Yɩzərayɛlə pɩ̀ʋ́ tə swɩ̀n ʋ tʋtʋnʋ don con, ʋ wʋ́: «Ja Miswe n ja va tɩʋ tíú Amon də pɩ̀ʋ́ bìú Zʋasə con. 27 N wá swɩ̀n ba con də pɩ̀ʋ́ tə nə swɩ̀n ʋ wʋ́: “Á kənə bɛɛ wà tə bandiə wa, sə á pa wá dipɛn mancɩn mancɩn də nɩ́á, kʋ ja vələ máŋá tə wa, à nə wá pìí à bà də yazurə.” » 28 Miswe swɩ̀n, ʋ wʋ́: «N cɩ́gá nə pìí bà də yazurə, kʋ tà Ba-Yígúrə́-Jə-Tiu nə twá də nə ʋ swɩ̀n.» Ʋ tə swɩ̀n, ʋ wʋ́: «Á mʋ̀ lalʋʋ tə mama, á cʋga!»
Ba gʋa pɩ̀ʋ́ Akabə kʋ̀ʋ̀ tə wa
29 Yɩzərayɛlə pɩ̀ʋ́ tə də Zwida pɩ̀ʋ́ Zozafatə dàń vəli Ramɔtə Galadə nagwanaa tə wa. 30 Yɩzərayɛlə pɩ̀ʋ́ tə swɩ̀n Zozafatə con, ʋ wʋ́: «À wá lwàń à zʋ kwatara gànàn tə nə nyən ndə kwatara tə duən mama nə, à ja va kʋ̀ʋ̀ tə wa. Yá n mʋ̀ zʋ n pɩ̀ʋ́ kwatara gànàn tə.» Mə kʋ twá nətʋ Yɩzərayɛlə pɩ̀ʋ́ tə ma lwàń ʋ tɩ̀àn ʋ va kʋ̀ʋ̀ tə. 31 Siiri pɩ̀ʋ́ tə yà pɩn nii kʋ tə ʋ səsen kòrə̀n yáá tɩ̀án fɩtwa də bələ tə nə, ʋ wʋ́: «Á dànà ká ta kwatarʋ, nə à yə̀ə́ kwatara yáá tíú, á tɩa Yɩzərayɛlə pɩ̀ʋ́ tə cɩcɩ.» 32 Máŋá tə wa səsen kòrə̀n yáá tɩ̀án tə nə nɩ Zozafatə, ba swɩ̀n, ba wʋ́: «Kʋ ba tʋ́tʋ̀ná jə, mə Yɩzərayɛlə pɩ̀ʋ́ tə nə.» Ba dàń te ʋ con, ba vələ sə ba ta wá. Yá Zozafatə mà bubwiə ʋ kə ʋ kwatara nə, sə ba san wá. 33 Səsen kòrə̀n yáá tɩ̀án tə nə nɩ də ʋ mʋ̀ nə tà Yɩzərayɛlə pɩ̀ʋ́ tə, ba pìí ba yá wá. 34 Siiri tɩ̀án kwatarʋ don dàń ta cɩɩn vɛɛ, kʋ va kʋ twá Yɩzərayɛlə pɩ̀ʋ́ tə kwatara lugu gànʋ̀ tə níə́ tə pwə́rə́ wa kʋ ja wá. Pɩ̀ʋ́ tə swɩ̀n lìù tə con, ʋ nə kəni ʋ səsen kòrù tə cwəŋə nə, ʋ wʋ́: «Ba caŋɩ nə, viviri səsen tə, n ja nə n nan kʋ̀ʋ̀ tə laŋa wa.» 35 Kʋ dɩɩn tə nə, kʋ̀ʋ̀ tə yɩn dɩ̀àn zəni. Pɩ̀ʋ́ tə yɩ ba kwé wá, ba zɩgɩ yɩɩ nə, ʋ səsen kòrù tə wa, Siiri tɩ̀án kwatara tə yáá con. Yá ʋ tɩga kʋ didəni nii nə. Ba nə cɛn wá tə pɩn, jana tə pàlɩ̀ səsen kòrù tə wa. 36 Yɩɩ zʋrɩ máŋá wa, ba mà cə̀rə́, ba wʋ́: «Lìù mama pìí ʋ va ʋ tɩʋ, ʋ lʋʋ nii wa!» 37 Mə kʋ twá nətʋ, pɩ̀ʋ́ tə ma tɩ, ba ga pìí ba ja wá ba ja bà Samari, ba gùrì lá nə.
38 Máŋá tə ba nə sɩ̀n səsen kòrù tə Samari càrʋ́ tə nii nə, kukuri twi tə dàlà Akabə jana tə, yá kacwaran də twi ba swɛ̀ ba yɩra lá nə, ndə Ba-Yígúrə́-Jə-Tiu yà nə swɩ̀n kʋ nətʋ.
39 Ba pʋ́pʋ́nɩ́ Akabə tʋ̀tʋ̀nán tə gɩganɩ, də kʋ tə mama ʋ nə fwa, də pɩ̀ʋ́ dìə̀ tə ʋ nə lwə̀, ʋ nàn də won, kʋ nə yɩ ndə tuu yelə yɩra nə, də tɩan tə mama ʋ nə lwə̀ yoo, ba tún Yɩzərayɛlə pɛ̀gá yìə̀n sagɩ tə wa. 40 Akabə tɩga, yá ba gùrì wá ʋ nyɩna-ba con, ba nə dí yáá ba tɩ, yá ʋ bìú Ahazɩa nə dí pàrɩ̀ tə ʋ yuu nə.
Zozafatə jìgə̀ Zwida lʋʋ nii pɩ̀ʋ́
41 Asa bìú Zozafatə jìgə̀ Zwida payuu tə pɩ̀ʋ́, Yɩzərayɛlə pɩ̀ʋ́ Akabə pàrɩ̀ tə bɩna banɩa nii bɩnɩ tə wa. 42 Zozafatə yà jə bɩna fɩtwa də bonu, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna sapʋa də bonu Zwerizalɛmə nə. Ʋ nuu yɩrɩ yà nə yɩ Azuba ʋ yɩ Swiləhi bʋ̀á. 43 Ʋ twá ʋ nyɩna Asa nabwɩɩ tə mama nə, ʋ wà pìí ʋ kə ʋ kwa. Ʋ tʋn kʋ tə nə yɩ mənəmənə Ba-Yígúrə́-Jə-Tiu yáá con. 44 Yá də kʋ nətʋ mɛ, jwəŋə dədwələn* tə mʋ̀ wà lá nywɩn. Lalʋʋ tə yà tə fwa jwəŋə, də ba sʋ̀rɩ́ wusinə jwəŋə dədwələn təntə yuu wa. 45 Sìə́ dàń yɩn Zozafatə də Yɩzərayɛlə pɩ̀ʋ́ tə pwə́rə́ wa.
46 Ba pʋ́pʋ́nɩ́ Zozafatə tʋ̀tʋ̀nán tə gɩganɩ, də nətʋ tə ʋ nə tʋn wʋdɩʋ ʋ tʋ̀tʋ̀nán wa, də kʋ̀ʋ̀ wa, ba tún Zwida pɛ̀gá yìə̀n sagɩ tə wa. 47 Ʋ dɩŋɩ kacwaran tə gɩganɩ tə mama ba yà nə ga lʋʋ nii tə wa, kʋ nə zɩgɩ ʋ nyɩna Asa máŋá tə, kʋ ja bà kʋ yí ʋ máŋá tə wa. 48 Edomə lʋʋ nii tə wa, pɩ̀ʋ́ yà tə̀lə́ lá, kʋ yɩ nagwanaa yáá tíú nə Zwida pɩ̀ʋ́ tə lɩ ʋ tún lá. 49 Zozafatə fwa nɩ́á yuu bwərə nəfaran, tə nə vəli yiŋʋnɩ, sə tə va Ofirə lʋʋ nii tə wa, tə pɛ̀ sɩ́án. Yá nɩ́á yuu bwərə tə cʋ̀gʋ̀ nɩ́á tə wa, Esion-Gebɛrə nə, kʋ pa tə wà wànɩ́. 50 Akabə bìú Ahazɩa dàń swɩ̀n Zozafatə con, ʋ wʋ́: «À tʋ̀tʋ̀nà tə də n tʋ̀tʋ̀nà tə wá zʋ nɩ́á yuu bwərə tə wa ba kwé duən ba ja va.» Yá Zozafatə wà sɛ̀. 51 Zozafatə tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá ʋ nyɩna Davidə sadiyuu tə wa. Ʋ bìú Yoramə nə dí pàrɩ̀ tə ʋ yuu nə.
Yɩzərayɛlə pɩ̀ʋ́ Ahazɩa yoo
52 Akabə bìú Ahazɩa jìgə̀ Yɩzərayɛlə payuu tə pɩ̀ʋ́ Samari nə, Zwida lʋʋ nii pɩ̀ʋ́ Zozafatə pàrɩ̀ tə bɩna fugə də barpɛ nii bɩnɩ tə wa. Ʋ dí pàrɩ̀ bɩna bələ Yɩzərayɛlə lɩ̀à yuu wa. 53 Ʋ tʋn kʋ tə nə lwara Ba-Yígúrə́-Jə-Tiu yáá con. Ʋ tì ʋ nyɩna də ʋ nuu nabwɩɩ tə, ʋ tì Nebatə bìú Zwerobʋamə, ʋ nə pɩn Yɩzərayɛlə lɩ̀à tʋn cʋna nabwɩɩ tə. 54 Ʋ tʋa ʋ nadwana yuu ʋ pa dun woŋwanʋ Baalə* nə. Ʋ zɩ̀n Ba-Yígúrə́-Jə-Tiu lɩŋa, ʋ nə yɩ Yɩzərayɛlə lɩ̀à Yɩɩ, ndə ʋ nyɩna tə nə tʋn kʋ nətʋ.