Yɩzərayɛlə pɩ̀ʋ́ Akabə də Zwida pɩ̀ʋ́ Zozafatə ta Siiri tɩ̀án
18
1 Pɩ̀ʋ́ Zozafatə nɩ jɩjə də dun zənzən. Ʋ swe Yɩzərayɛlə pɩ̀ʋ́ Akabə bʋ̀á, sə ʋ də ba dwíí tə marɩ duən nə. 2 Bɩna bagalɩ nii nə, ʋ twi Yɩzərayɛlə pɩ̀ʋ́ Akabə con, Samari nə. Akabə gʋa vanmɩnɩ də vanfaran kapʋpʋ, ʋ pa Zozafatə də lalʋʋ tə nə, ba nə wulə də wá. Kʋ kwa nə, ʋ sugu Zozafatə, sə ba va ba ta Ramɔtə tɩʋ tə, kʋ nə wulə Galadə nagwanaa tə wa. 3 Yɩzərayɛlə pɩ̀ʋ́ Akabə swɩ̀n Zwida pɩ̀ʋ́ Zozafatə con, ʋ wʋ́: «N wá bà n san nə, sə nə ta Ramɔtə tɩʋ tə, Galadə nagwanaa tə wa?» Zozafatə le Yɩzərayɛlə pɩ̀ʋ́ tə, ʋ wʋ́: «À də mʋ́ yɩ nədʋ, à lalʋʋ tə də n lalʋʋ tə yɩ nədʋ, nə wá va kʋ̀ʋ̀ tə də mʋ́.Akabə Yɩɩ nii sʋ̀sʋ̀nà tə bɩrɩ də ʋ wá də́ dɩ̀àn
4 Zozafatə tə swɩ̀n Yɩzərayɛlə pɩ̀ʋ́ tə con, ʋ wʋ́: «À lòrì sə n dí yáá n bwe Ba-Yígúrə́-Jə-Tiu, n jə́n.» 5 Yɩzərayɛlə pɩ̀ʋ́ tə ken Yɩɩ nii sʋ̀sʋ̀nà tə duən yáá nə, ba nə yí ndə biənɩa nə, ʋ bwe ba, ʋ wʋ́: «Nə mɛ sə nə va nə ta Ramɔtə tɩʋ tə, Galadə nagwanaa tə wa, nə à yə̀ə́ nə wà mɛ sə nə va lá?» Ba le wá, ba wʋ́: «Vəli, Yuu-Tiu wá kə tɩʋ tə n mʋ̀ pɩ̀ʋ́ jɩɩn wa.» 6 Yá Zozafatə bwe, ʋ wʋ́: «Yɩɩ nii sʋ̀sʋ̀nʋ̀ don mama kʋ́ʋ̀ tə̀lə́ yəbə, nə nə wàá ʋ nə nə twá nə ma bwe Ba-Yígúrə́-Jə-Tiu naaa?» 7 Yɩzərayɛlə pɩ̀ʋ́ tə le Zozafatə, ʋ wʋ́: «Bɛɛ nədʋ cɩcɩ nə ga yəbə, nə nə wàá ʋ nə nə twá nə ma bwe Ba-Yígúrə́-Jə-Tiu, yá à mʋ̀ dàń nə culi wá. Cɩ́gá, ʋ bà yozəŋu swɩ̀n à mʋ̀ yuu wa, də kʋ nə tà yolwan. Kʋ bɛɛ tə nə yɩ Yiməla bìú Miswe.» Zozafatə swɩ̀n, ʋ wʋ́: «Dàn ká swɩ̀n nətʋ pɩ̀ʋ́!» 8 Yɩzərayɛlə pɩ̀ʋ́ tə dàń bon ʋ tʋtʋnʋ, ʋ tʋn wá, ʋ wʋ́: «Vəli n ja Yiməla bìú Miswe, n bà yəbə lala.»
9 Yɩzərayɛlə pɩ̀ʋ́ tə, də Zwida pɩ̀ʋ́ Zozafatə yà zʋa ba paganan, ba lìù mama jə̀ə́ ʋ padaʋ yuu, Samari tɩʋ tə mimii nə, Yɩɩ nii sʋ̀sʋ̀nà tə ga wulə ba swɩ̀n Yɩɩ nii sʋ̀ràn, ba yáá con. 10 Kenana bìú Sedesɩasə yà fwa lugu nyʋran, ʋ ga swɩ̀n, ʋ wʋ́: «Ba-Yígúrə́-Jə-Tiu swɩ̀n də n wá ja nyʋran tə tə n ma zwa Siiri tɩ̀án tə wuuu, kʋ va kʋ yí n nə wá zwɛ̀ ba mɩ́ámɩ́án.» 11 Yɩɩ nii sʋ̀sʋ̀nà tə duən tə mama swɩ̀n kʋ sʋgʋ təntə, ba wʋ́: «Vəli n ta Ramɔtə, Galadə nagwanaa tə wa. N wá də́ dɩ̀àn, Ba-Yígúrə́-Jə-Tiu wá kə tɩʋ tə n jɩɩn wa.»
Yɩɩ nii sʋ̀sʋ̀nʋ̀ Miswe swɩ̀n də dʋŋa wá də́ dɩ̀àn Yɩzərayɛlə lɩ̀à yuu wa
12 Lìù tə nə vəli sə ʋ bon Miswe tə, swɩ̀n ʋ con, ʋ wʋ́: «Yɩɩ nii sʋ̀sʋ̀nà tə mama nii yɩ nədʋ, ba ma swɩ̀n yozəŋu ba pɩn pɩ̀ʋ́ tə nə. Pa n də sʋgʋ tə yà ndə ba sʋgʋ tə nə. Swɩ̀n kʋ tə nə ziən!» 13 Miswe le, ʋ wʋ́: «Ba-Yígúrə́-Jə-Tiu wulə, kʋ tə Ba-Yígúrə́-Jə-Tiu, ʋ nə yɩ à Yɩɩ nə wá swɩ̀n à con, mə kʋ mʋ̀ nə à wá swɩ̀n.»
14 Máŋá tə wa, ʋ nə twi ʋ yí pɩ̀ʋ́ tə con, pɩ̀ʋ́ tə bwe wá, ʋ wʋ́: «Miswe, kʋ mɛ sə nə va nə ta Ramɔtə tɩʋ tə, Galadə nagwanaa tə wa, nə à yə̀ə́ nə wà mɛ sə nə va nə ta kʋ?» Miswe le, ʋ wʋ́: «Vələ, á wá də́ dɩ̀àn, Ba-Yígúrə́-Jə-Tiu wá kə tɩʋ tə á jɩɩn wa.» 15 Pɩ̀ʋ́ tə dàń swɩ̀n ʋ con, ʋ wʋ́: «Nɛɛ bagalɩ nə à wá pa n dù də Ba-Yígúrə́-Jə-Tiu yɩrɩ, sə n ma swɩ̀n cɩ́gá à con?» 16 Miswe dàń le, ʋ wʋ́:
«À nɩ Yɩzərayɛlə lalʋʋ tə mama,
də ba laga duən yáá nə, pɛɛn tə yuu wa,
ndə pee nə, tə nə ba payɩrʋ jə.
Yá Ba-Yígúrə́-Jə-Tiu swɩ̀n, ʋ wʋ́:
“Lɩ̀à ba tə ba yuu-tɩan jə.
Ba lìù mama mɛ sə ʋ pìí ʋ va ʋ sàń, də bɩcan sìə́!” »
17 Yɩzərayɛlə pɩ̀ʋ́ tə ma swɩ̀n Zozafatə con, ʋ wʋ́: «À wà n con swɩ̀n! Máŋá mama, ʋ bà yozəŋu swɩ̀n ʋ pɩn à mʋ̀ nə, də kʋ nə tà yolwan!» 18 Miswe dàń swɩ̀n, ʋ súrí lá, ʋ wʋ́: «Kʋ ziən, cʋgʋ kʋ tə Ba-Yígúrə́-Jə-Tiu nə swɩ̀n! À nɩ Ba-Yígúrə́-Jə-Tiu, ʋ jə̀ə́ ʋ padaʋ tə yuu wa, ʋ tʋ̀tʋ̀nà tə mama ga zɩga ʋ jɩzən də ʋ jɩgwiə nə. 19 Ba-Yígúrə́-Jə-Tiu swɩ̀n, ʋ wʋ́: “Wàà nə wá gɩgarɩ Akabə, sə ʋ va Ramɔtə, Galadə nagwanaa tə wa, sə ba gʋ wá lá nə?” Tʋtʋnʋ don yàá swɩ̀n yoo don, ʋ don də swɩ̀n kʋ don. 20 Jə̀rə́ don dàń nan ka zɩga Ba-Yígúrə́-Jə-Tiu yáá con, ka ga swɩ̀n, ka wʋ́: “À mʋ̀ nə wá gɩgarɩ wá.” Ba-Yígúrə́-Jə-Tiu bwe ka, ʋ wʋ́: “Nətə nə n wá fwa?” 21 Jə̀rə́ tə le, ka wʋ́: “À wá va à pa pɩ̀ʋ́ tə Yɩɩ nii sʋ̀sʋ̀nà tə mama kʋna kʋ̀nkʋ̀n.” Ba-Yígúrə́-Jə-Tiu le, ʋ wʋ́: “Kʋ yɩ cwəŋə nəzəŋu, sə n ma wànɩ́ n gɩgarɩ wá. Vəli n tʋn kʋ nətʋ tə.” » 22 Miswe tə swɩ̀n, ʋ wʋ́: «Ba-Yígúrə́-Jə-Tiu pɩn jə̀rə́ kə kʋ̀nkʋ̀n n Yɩɩ nii sʋ̀sʋ̀nà ba tə nii wa, yá Ba-Yígúrə́-Jə-Tiu pɩn cwəŋə, sə yolwan yí mʋ́.»
23 Kenana bìú Sedesɩasə dàń fwarɩ ʋ yí Miswe yɩra, ʋ farɩ ʋ pɩpara nə, ʋ ga swɩ̀n, ʋ wʋ́: «Kʋ twá nətə Yɩɩ Siŋu tə ma nan à con, kʋ swɩ̀n n con?» 24 Miswe le, ʋ wʋ́: «Kʋ ziən! N tətə wá lwarɩ kʋ, dɩɩn tə nə, n nə wá twá diyaa, də diyaa wa, n dəri sə n səgə.» 25 Yɩzərayɛlə pɩ̀ʋ́ tə swɩ̀n ʋ tʋ̀tʋ̀nà con, ʋ wʋ́: «Jana Miswe á ja va tɩʋ tíú Amon, də pɩ̀ʋ́ bìú Zʋasə con. 26 Á wá swɩ̀n ba con də à mʋ̀ pɩ̀ʋ́ nə wʋ́, á kənə bɛɛ wà tə bandiə wa, sə á pa wá dipɛn mancɩn mancɩn, də nɩ́á, kʋ ja vələ máŋá tə wa, à nə wá pìí à bà də yazurə.» 27 Miswe swɩ̀n, ʋ wʋ́: «N cɩ́gá nə pìí bà də yazurə, kʋ tà Ba-Yígúrə́-Jə-Tiu nə twá də nə ʋ swɩ̀n.» Ʋ tə swɩ̀n, ʋ wʋ́: «Á mʋ̀ lalʋʋ tə mama, á cʋga!»
Ba gʋa pɩ̀ʋ́ Akabə kʋ̀ʋ̀ tə wa
28 Yɩzərayɛlə pɩ̀ʋ́ tə, də Zwida pɩ̀ʋ́ Zozafatə vəli sə ba ta Ramɔtə tɩʋ, Galadə nagwanaa tə wa. 29 Yɩzərayɛlə pɩ̀ʋ́ tə swɩ̀n Zozafatə con, ʋ wʋ́: «À wá lwàń à zʋ kwatara gànàn, ndə kwatara tə duən mama nə, à ja va kʋ̀ʋ̀ tə wa. Yá n mʋ̀ zʋ n paganan tə.» Mə kʋ twá nətʋ, Yɩzərayɛlə pɩ̀ʋ́ tə ma lwàń ʋ gànàn, ba ga va kʋ̀ʋ̀ tə. 30 Siiri pɩ̀ʋ́ tə yà pɩn nii kʋ tə, ʋ səsen kòrə̀n yáá tɩ̀án tə nə, ʋ wʋ́: «Á dànà ká ta bisɩmaa, nə à yə̀ə́ nəkwɩa, á tɩa Yɩzərayɛlə pɩ̀ʋ́ tə cɩcɩ.»
31 Máŋá tə Siiri tɩ̀án səsen kòrə̀n yáá tɩ̀án tə nə nɩ Zozafatə, ba swɩ̀n, ba wʋ́: «Kʋ ba tʋ́tʋ̀ná jə, mə Yɩzərayɛlə pɩ̀ʋ́ tə nə.» Ba dàń kɩkarɩ wá, sə ba ta. Zozafatə ma bubwi ʋ kə Ba-Yígúrə́-Jə-Tiu nə, yá ʋ san wá, ʋ yigu ba ʋ kə yiŋʋnɩ də wá. 32 Səsen kòrə̀n yáá tɩ̀án tə nə nɩ də ʋ mʋ̀ nə tà Yɩzərayɛlə pɩ̀ʋ́ tə, ba pìí ba yá wá. 33 Siiri tɩ̀án kwatarʋ don dàń ta cɩɩn, ʋ dʋgʋ vɛɛ, yá cɩɩn tə vəli kʋ twá Yɩzərayɛlə pɩ̀ʋ́ tə kwatara lugu gànʋ̀ tə níə́ tə pwə́rə́ wa, kʋ ja wá. Pɩ̀ʋ́ tə dàń swɩ̀n lìù tə con, ʋ nə kəni ʋ səsen kòrù tə cwəŋə nə, ʋ wʋ́: «Ba caŋɩ nə! Vəvəri səsen tə, n ja nə n nan kʋ̀ʋ̀ tə laŋa wa.» 34 Kʋ dɩɩn tə nə, kʋ̀ʋ̀ tə yɩn dɩ̀àn zəni. Pɩ̀ʋ́ tə yɩ ba kwé wá, ba zɩgɩ yɩɩ nə, ʋ səsen kòrù tə wa, Siiri tɩ̀án kwatara tə yáá con, kʋ va kʋ yí didəni. Yá ʋ tɩga máŋá tə wa yɩɩ nə wulə kʋ zwɩ.