Zozafatə jìgə̀ Zwida dwíí tə pɩ̀ʋ́
17
1 Asa tɩan kwa nə, ʋ bìú Zozafatə nə dí pàrɩ̀ tə ʋ yuu nə. Ʋ zɩgɩ Yɩzərayɛlə lɩ̀à payuu tə nə də dɩ̀àn. 2 Ʋ ken kwatara púlə́ Zwida lʋʋ nii tɩan tə mama wa, tə nə yɩ dɩ̀àn dəkuu bwálá, ʋ tún kwatara yun tɩ̀án Zwida lʋʋ nii tə mama wa, də Efərayimə tɩan tə wa, ʋ nyɩna Asa yà nə ta ʋ jon. 3 Ba-Yígúrə́-Jə-Tiu yɩn də Zozafatə. Cɩ́gá, ʋ yà twá ʋ nɩbɛɛ Davidə təntən tʋtʋnɛɛ tə nə. Ʋ wà pìí ʋ bon ʋ kə woŋwanan Baalə tə nə. 4 Ʋ ken dɩ̀àn ʋ pɩ̀à ʋ nɩbɛɛ Yɩɩ tə, ʋ ga twá yìə̀n tə nə, Yɩɩ təntə nə pɩn nii tə yuu wa. Ʋ wà kʋ tə Yɩzərayɛlə lɩ̀à yà nə tʋŋa tə nə twá. 5 Ba-Yígúrə́-Jə-Tiu pɩn Zozafatə pàrɩ̀ tə ja dɩ̀àn, Zwida dwíí tə mama ga ja zìlə́ wiən ba twi, ba pɩn Zozafatə nə. Ʋ nɩ jɩjə zənzən, ba ga zìlí wá zənzən də. 6 Ʋ twá Ba-Yígúrə́-Jə-Tiu coŋi tə nə, də ʋ bɩcan mama, yá ʋ pɩn jwəŋə dədwələn* tə, də woŋwanʋ Aswera* daceli tə nyʋn Zwida lʋʋ nii tə wa.7 Ʋ pàrɩ̀ tə bɩna batwa nii nə, ʋ tʋn ʋ tʋ̀tʋ̀nà Bɛn-Hayilə, də Abədiyasə, də Zakari, də Netaneyɛlə, də Miswe, sə ba va ba kàrɩ̀ lɩ̀à tə, Zwida lʋʋ nii tə wa. 8 Ʋ tʋn Levi dwíí tə lɩ̀à, sə ba kwe ʋ tʋ̀tʋ̀nà tə. Lɩ̀à təntə nə yɩ Swemaya, də Netanɩa, Zebadɩa, də Asayɛlə, də Swemiramɔtə, də Zonatan, də Adoniya, də Tobiya, də Tɔbə-Adoniya, kʋ dàń súrí Yɩɩ joŋwana Eliswama, də Yoramə nə. 9 Ba tì Ba-Yígúrə́-Jə-Tiu nii sagɩ tə, ba ja twá Zwida lʋʋ nii tə wa, ba ma kàrɩ̀ lalʋʋ tə mama.
Zozafatə jìgə̀ dɩ̀àn tíú
10 Ba-Yígúrə́-Jə-Tiu fən zʋa payun tə mama nə kɩkarɩ Zwida lʋʋ nii tə, yá payuu nədʋ tətə wà kʋ̀ʋ̀ tɛ də Zozafatə. 11 Filisi tɩ̀án ja zìlə́ wiən, də ba lanpo səbiu, ba ja bà ba pa Zozafatə nə. Arabə-ba də ja vanmɩnɩ, tə nə yɩ pabɩran 7 700, də bʋtɩlan 7 700, ba ja bà.
12 Zozafatə dɩ̀àn dàń kwɛn tə súrí wuuu. Ʋ lwə̀ dɩ̀àn dəkuu bwálá, də tɩan Zwida lʋʋ nii tə wa, sə ʋ ma tún wodirən.
13 Ʋ yà tún wodirən zənzən Zwida lʋʋ nii tɩan tə wa, ʋ ga jə kwatara babɩran Zwerizalɛmə wa. 14 Nə̀ń nətʋ tə, ba nə twá ba dwíə́ tə nə, ba ma gàlà ba. Zwida dwíí tə wa, ba kwatara mʋ̀rʋ̀ yáá tíú nə yɩ Adəna. Kwatara babɩran 300 000 yà wulə də wá. 15 Ʋ səpuni nə, kʋ yɩ kwatara mʋ̀rʋ̀ yáá tíú Yohanan. Kwatara 280 000 yà wulə də wá. 16 Ʋ də sapuni nə, kʋ yɩ Zikəri bìú Amasɩa, ʋ nə tʋŋa ʋ pɩn Ba-Yígúrə́-Jə-Tiu nə də ʋ fɩra. Kwatara babɩran 200 000 yà wulə də wá. 17 Bɛnzwamɛn dwíí tə wa, kʋ yɩ kwatarʋ babɩʋ Eliyada, ʋ nə yɩ kwatara 200 000, ba nə jə twɛn də natanan, yáá tíú. 18 Ʋ səpuni nə, kʋ yɩ Yehozabadə, ʋ nə yɩ kwatara 180 000, ba nə tanɩ sə ba ta kʋ̀ʋ̀, yáá tíú. 19 Mə ba mʋ̀ nə yɩ kwatara tə, ba nə tʋŋa ba pɩn pɩ̀ʋ́ tə nə, Zwerizalɛmə nə. Kʋ dàń súrí ba tə nə, pɩ̀ʋ́ tə yà nə ken Zwida dɩ̀àn dəkuu bwálá tə mama wa.