Asa ta kʋ̀ʋ̀ də Yɩzərayɛlə pɩ̀ʋ́ Baswa
16
1 Asa pàrɩ̀ tə bɩna fɩtwa də bardʋ nii nə, Yɩzərayɛlə pɩ̀ʋ́ Baswa vəli ʋ ta kʋ̀ʋ̀ də Zwida dwíí tə. Ʋ lwə̀ Rama tɩʋ tə, ʋ ma fwa dɩ̀àn dəkuu bwálɩ́, sə ʋ ma cɩ̀ Zwida pɩ̀ʋ́ Asa lɩ̀à tə yáá nə, ba dàn ká twá vàn təntə yuu.2 Asa tì wárʋ́ də sɩ́án Ba-Yígúrə́-Jə-Tiu dìə̀ tə wa, də pɩ̀ʋ́ dìə̀ tə wa, ʋ ma tʋn lɩ̀à Siiri pɩ̀ʋ́ Bɛn-Hadadə con, ʋ nə wulə Damasə nə, sə ba swɩ̀n ʋ con, ba wʋ́: 3 «Nə túŋə́ nimarʋ də duən, ndə à nyɩna də n nyɩna yà nə tún nimarʋ nətʋ. Nə̀ń wárʋ́ də sɩ́án nə à tʋn n nə, sə à ma də́ zìlə́ n yuu wa. N dàń vəli n karɩ n nimarʋ tə, n nə tún də Yɩzərayɛlə pɩ̀ʋ́ Baswa, sə ʋ lɩ ʋ kwatara tə à lʋʋ nii tə wa.»
4 Bɛn-Hadadə sɛ̀ pɩ̀ʋ́ Asa kori tə, ʋ ga tʋn ʋ kwatara yáá tɩ̀án, ba va ba ta Yɩzərayɛlə tɩan tə. Ʋ ta Yion tɩ̀án, də Dan tɩ̀án, də Abɛlə-Mayimə tɩ̀án, kʋ súrí Nefətali nagwanaa tɩan tə mama nə, ba nə túŋə́ wodirən tə wa. 5 Máŋá tə Baswa nə nì kʋ, ʋ dàń yá birinaa tə lwiu nə, sə ʋ ma kɩkarɩ Rama tɩʋ tə. 6 Pɩ̀ʋ́ Asa dàń ja Zwida dwíí tə mama ʋ bà, ʋ ma pɛ̀ kapana tə də baŋɩ tə, Baswa yà nə ma lwe Rama tɩʋ tə. Pɩ̀ʋ́ Asa ja tə ʋ ma lwà Geba də Misəpa tɩan tə.
Asa ken Yɩɩ yinarʋ Hanani bandiə wa
7 Kʋ máŋá təntə wa, Yɩɩ yinarʋ Hanani twi Zwida payuu pɩ̀ʋ́ Asa con, ʋ swɩ̀n, ʋ wʋ́: «N nə jələ Siiri pɩ̀ʋ́ tə yuu wa, n ga wà Ba-Yígúrə́-Jə-Tiu, ʋ nə yɩ n Yɩɩ tə yuu wa jələ yɩrɩ, Siiri pɩ̀ʋ́ kwatara tə jon ba tɩ̀àn n jɩɩn wa. 8 Kuswəa də Libi tɩ̀án yà yɩ kwatara púlí nəfarʋ nədʋ, ba ga jə səsen kòrə̀n, də səsədɩra kapʋpʋ. Yá də kʋ nətʋ mɛ, Ba-Yígúrə́-Jə-Tiu ken ba n jɩɩn wa, n nə jələ ʋ yuu wa yɩrɩ. 9 Cɩ́gá, Ba-Yígúrə́-Jə-Tiu ywàŋá tɩa tə yuu mama, sə ʋ ma san lɩ̀à tə nə, ba nə swə wá də ba bɩcanɩ mama. Yoo kʋ tə wa, n tʋn ləyəri. Cɩ́gá, kʋ nə zɩgɩ zə̀n, n dàń wá ta kʋ̀ʋ̀.»
10 Asa lɩŋa zàn Yɩɩ yinarʋ tə yuu wa, ʋ ga pa ba kə wá bandiə wa, ʋ sʋ̀ràn təntə nə pɩn ʋ lɩŋa zàn ʋ yuu wa zənzən yɩrɩ. Kʋ máŋá təntə tətə wa, Asa fɩfɩn ʋ lalʋʋ tə wa lɩ̀à duən də.
Asa pàrɩ̀ tə yígúrə́
11 Ba pʋ́pʋ́nɩ́ Asa tʋ̀tʋ̀nán tə nə sinti nətʋ, kʋ va kʋ yí tə yígúrə́, ba tún Zwida də Yɩzərayɛlə pɛ̀gá sagɩ tə wa. 12 Asa pàrɩ̀ tə bɩna fɩtwa də nʋgʋ nii nə, nɛɛ yayɩgʋ jɩn wá, kʋ yoo nə cà zənzən. Yá də kʋ nətʋ mɛ, ʋ tə wà Ba-Yígúrə́-Jə-Tiu sáŋʋ́ pɩ̀à, kʋ yɩ dɩmʋtʋra sáŋʋ́ nə ʋ pɩ̀à. 13 Asa tɩga, ʋ pàrɩ̀ tə bɩna sapwilə də nədʋ nii nə, yá ba gùrì wá ʋ nyɩna-ba con, ba nə dí yáá ba tɩ. 14 Ba gùrì wá libəri tə don wa, ʋ yà nə pɩn ba kʋ̀ Davidə sadiyuu tə wa. Ʋ tɩgɩ tə yɩ ba tún gədoo yuu, kʋ nə súə́ də wusinə də tɩralɩ, lɩ̀à tə nə fwa tɩralɩ nə taa kʋ yɩrɩ ba fwa. Ba sʋ̀rɩ́ wusinə tə nə dáá zənzən, ba ma pa wá dun.