Pɩ̀ʋ́ Asa ta ʋ zɩgɩ woŋwanan nə
15
1 Yɩɩ Siŋu tə cúə́ Obɛdə bìú Azarɩya yuu wa, 2 ʋ ga va ʋ yí pɩ̀ʋ́ Asa, ʋ swɩ̀n ʋ con, ʋ wʋ́: «N mʋ̀ pɩ̀ʋ́ Asa, də Zwida dwíí tə mama, də Bɛnzwamɛn dwíí tə mama, cʋ̀gà à con! Ba-Yígúrə́-Jə-Tiu wulə də aba, máŋá tə wa, á nə wulə də wá. Á nə pɩ̀à wá, ʋ wá pa á na wá. Á nə kʋ́ʋ̀ vɩga wá á dʋgʋ, ʋ də wá vɩ aba ʋ dʋgʋ.3 Kʋ dán zənzən, Yɩzərayɛlə lɩ̀à nə ba cɩ́gá Yɩɩ jə, ba ba Yɩɩ joŋwanʋ jə, ʋ nə kàrɩ̀ ba, ba ga ba Yɩɩ nii tə jə. 4 Yá ba yinəgə tə wa, ba pìí ba bà Ba-Yígúrə́-Jə-Tiu con, ʋ nə yɩ Yɩzərayɛlə lɩ̀à Yɩɩ, ba pɩ̀à wá, yá ʋ pɩn ba na wá. 5 Kʋ máŋá təntə wa, lìù yà wàrɩ̀ bwálɩ́ ʋ vəli, ʋ pìrí ʋ twi də yazurə. Cɩ́gá, lʋʋ níə́ tə yà gugurə zənzən. 6 Lʋʋ nii yàá cʋ̀gʋ̀ kʋ don lʋʋ nii, tɩʋ də yàá cʋ̀gʋ̀ kʋ don tɩʋ, Yɩɩ yà nə twá pucʋnɩ yirə yirə nə ʋ ma gugurə ba yɩrɩ. 7 Á mʋ̀ dàń daŋa á jɩɩn, á dànà ká pa á jɩɩn gwàrɩ̀. Cɩ́gá, ba wá ŋwɩ́n á tʋ̀tʋ̀nán tə ŋwɩ́rán.»
8 Máŋá tə Asa nə nì sʋ̀ràn təntə Yɩɩ nii sʋ̀sʋ̀nʋ̀ Obɛdə nə swìn, ʋ jɩɩn pìí tə dàn, ʋ ga pa woŋwanan tə jɛ́n Zwida dwíí tə mama wa, də Bɛnzwamɛn dwíí tə mama wa, də tɩan tə wa, ʋ nə ta ʋ jon Efərayimə pɛɛn tə wa. Kʋ kwa nə, ʋ pìí ʋ kwɛn Ba-Yígúrə́-Jə-Tiu joŋi bwálɩ́ tə, kʋ yà nə wulə Yɩɩ dìə̀ tə yáá con, ʋ lwà. 9 Ʋ ken Zwida dwíí tə, də Bɛnzwamɛn dwíí tə, də Efərayimə dwíí tə, də manase dwíí tə, də Simeyon dwíí tə mama duən yáá nə. Cɩ́gá, Yɩzərayɛlə lɩ̀à kapʋpʋ yà pìí ba bà ʋ con, máŋá tə ba nə nɩ də Ba-Yígúrə́-Jə-Tiu, ʋ nə yɩ ʋ Yɩɩ tə wulə də wá. 10 Ba kun duən nə Zwerizalɛmə wa, Asa pàrɩ̀ tə fugə də bonu nii bɩnɩ tə cànɩ̀ batwa nii nə. 11 Kʋ dɩɩn tə nə, ba jɩn vanfaran 700, də vamɩnɩ 7 000, vàná tə wa ba nə ta ba jon, ba ma fwa jwəŋə, ba pa Ba-Yígúrə́-Jə-Tiu nə. 12 Ba kàn nii də ba wá pɩ̀à Ba-Yígúrə́-Jə-Tiu, ʋ nə yɩ ba nyɩna-ba Yɩɩ, də ba bɩcan mama, də ba jə̀rə́ mama. 13 Lìù tə mama, ʋ nə ba Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ pɩ̀à, ʋ nə yɩ bisɩmaa, nə à yə̀ə́ nəkwɩa, ʋ nə yɩ bɛɛ, nə à yə̀ə́ kan, ʋ mɛ sə ba gʋ wá. 14 Ba mà cə̀rí, ba ga wúrí nabwanpɩnan, də nabwanvunə, ba ma dù durə təntə, Ba-Yígúrə́-Jə-Tiu yáá con. 15 Zwida dwíí tə fwa pupwən durə təntə yɩrɩ, ba nə dùə̀ də ba bɩcan mama. Ba tətə nə pɩ̀à Ba-Yígúrə́-Jə-Tiu, yá ʋ pɩn ba na wá, ʋ ga pa ba sìə́, ba lʋʋ nii tə mama wa.
16 Pɩ̀ʋ́ Asa jon pɩ̀ʋ́ nuu dun tə tətə, ʋ nuu Maaka con, ʋ nə fwa Aswera* woŋwanʋ tə yɩrɩ. Asa nyʋnyʋgʋ woŋwanʋ təntə, ʋ pa kʋ jì pùrú, yá ʋ sʋ̀rɩ́ kʋ Sedəron vara tə wa. 17 Asa sóní Ba-Yígúrə́-Jə-Tiu də ʋ bɩcan mama, ʋ lʋʋ wúlú mama wa, yá də kʋ nətʋ mɛ, ʋ tə wà wànɩ́ ʋ pa jwəŋə dədwələn* tə nyʋn Yɩzərayɛlə lʋʋ nii tə wa. 18 Asa ja zìlə́ wiən tə ʋ nyɩna yà nə tún ʋ pa Yɩɩ nə, də tə tə, ʋ tətə nə tún ʋ pa Yɩɩ nə, ʋ ja bà Yɩɩ dìə̀ tə wa. Tə mʋ̀ nə yɩ wárʋ́, də sɩ́án, də wiən yirə yirə duən.
19 Kʋ̀ʋ̀ kʋ́ʋ̀ wà lá yɩn, kʋ va kʋ yí Asa pàrɩ̀ tə bɩna fɩtwa də bonu nii bɩnɩ tə.