Asa jìgə̀ Zwida payuu pɩ̀ʋ́
14
1 Asa tʋn kʋ tə nə ziən, kʋ ga twá cɩ́gá nə Ba-Yígúrə́-Jə-Tiu yáá con, ʋ nə yɩ ʋ Yɩɩ. 2 Ʋ pɩn dwíə́ nəkaran* tə jwəŋə bwálá tə, də ba jwəŋə dədwələn* tə nyʋn lá. Ʋ mà kapana tə, ba nə zɩn ba zɩgɩ, ʋ lwa, ʋ ga gwəŋə woŋwanʋ Aswera* daceli tə. 3 Ʋ swɩ̀n Zwida dwíí tə con, sə ba pɩ̀à Ba-Yígúrə́-Jə-Tiu, ʋ nə yɩ ba nyɩna-ba Yɩɩ, sə ba ga twá ʋ nii tə nə, də yìə̀n tə nə, ʋ nə pɩn nii tə yuu wa. 4 Ʋ pɩn jwəŋə dədwələn tə, də wusinə jwəŋə bwálá tə nyʋn lá. Yá ʋ pàrɩ̀ tə máŋá wa, payuu tə dàń yɩn sìə́ wa.5 Ʋ lwə̀ tɩan tə nə yɩ dɩ̀àn dəkuu bwálá, Zwida lʋʋ nii tə wa. Cɩ́gá, lʋʋ nii tə yà wulə sìə́ wa, yá kʋ̀ʋ̀ wà lá yɩn kʋ máŋá təntə wa, Ba-Yígúrə́-Jə-Tiu nə pɩn wá sìə́ yɩrɩ. 6 Ʋ swɩ̀n Zwida dwíí tə con, ʋ wʋ́: «Nə lwiə tɩan təntə, sə nə lwà biritaŋʋ, də kwatara dìì, nə ma kɩkarɩ tə, nə ga kə bòrə̀n tə nə swaga, tə mimien tə nə. Lʋʋ nii tə, tə yɩ nə mʋ̀ nyiən. Cɩ́gá, nə pɩ̀à Ba-Yígúrə́-Jə-Tiu, ʋ nə yɩ nə Yɩɩ, nə pɩ̀à wá, yá ʋ pɩn nəba sìə́ bwálɩ́ mama wa. Ba dàń zàn ba lwà tɩan tə nə jə dɩ̀àn.
7 Asa yà jə kwatara 300 000 Zwida dwíí tə wa, ba nə jə natanan nəfaran də cwiən, kʋ súrí kwatara 280 000 nə, Bɛnzwamɛn dwíí tə wa, ba nə jə natanan nəmənbii, ba ga tɛ twɛn. Ba mama yà yɩ kwatara babɩran.
8 Zera, ʋ nə yɩ Kuswəa tíú, twi sə ʋ ta ba də kwatara mʋ̀rʋ̀ dəkurən mʋ̀rʋ̀, də səsen kòrə̀n 300. Ʋ twi ʋ yí Mareswa nə. 9 Asa də ʋ kwatara tə nan ba jeri wá, ba də ga tanɩ sə ba ta kʋ̀ʋ̀ tə, Sefata vara tə wa, kʋ nə bwə́lə́ Mareswa. 10 Asa bon ʋ kə Ba-Yígúrə́-Jə-Tiu nə, ʋ nə yɩ ʋ Yɩɩ, ʋ wʋ́: «N mʋ̀ nə wàá labwanʋ nə n saŋa, ndə n nə wàá ladɩa nə n saŋa nətʋ. Ba-Yígúrə́-Jə-Tiu, n nə yɩ nə Yɩɩ, bà n san nəba. Cɩ́gá, kʋ yɩ n mʋ̀ yuu wa nə jələ. Kʋ yɩ n mʋ̀ yɩrɩ nə twi nə jeri kwatara púlí nəfarʋ kʋ tə. Ba-Yígúrə́-Jə-Tiu, n nə yɩ nə Yɩɩ, dàn ká pa ləzwənə də́ dɩ̀àn n yuu wa.» 11 Ba-Yígúrə́-Jə-Tiu pɩn Asa də Zwida dwíí tə ta Kuswə tɩ̀án tə ba də́, Kuswə tɩ̀án tə ga pìí ba dəri. 12 Asa də ʋ kwatara tə dɩŋɩ ba kwa, ba va ba yí Gerarə, yá ba gʋa Kuswə tɩ̀án tə ba larɩ tɩa, ba lìù mama ga wà wànɩ́ ʋ jon ʋ tɩ̀àn. Cɩ́gá, Ba-Yígúrə́-Jə-Tiu də ʋ kwatara tə ba tɩtaga ba. Asa də ʋ kwatara tə pɛ̀ jɩjə wiən kapʋpʋ. 13 Kʋ kwa nə, ba ta tɩan tə mama, tə nə kɩkarɩ Gerarə tɩʋ tə, ba də́. Cɩ́gá, Ba-Yígúrə́-Jə-Tiu fən yà zʋa tɩan təntə tɩ̀án zənzən. Zwida kwatara tə pɛ̀ jɩjə wiən tə nə wulə tɩan təntə mama wa. Cɩ́gá, jɩjə wiən yà dáá lá, ba nə wàá ba pɛ̀. 14 Ba ta vàná nəcɩra tə də, ba cʋ̀gʋ̀ ba gansilə tə, ba ga ja vanmɩnɩ də nyʋgʋmɛ zənzən. Kʋ kwa nə, ba pìí ba va Zwerizalɛmə.