Abɩya jìgə̀ Zwida payuu tə pɩ̀ʋ́
13
1 Zwerobʋamə pàrɩ̀ tə bɩna nana nii nə, Abɩya jìgə̀ Zwida payuu tə pɩ̀ʋ́. 2 Ʋ dí pàrɩ̀ tə bɩna batwa, Zwerizalɛmə nə. Ʋ nuu yɩrɩ yà nə yɩ Mikaya, ʋ ga yɩ Uriyɛlə bʋ̀á. Uriyɛlə yɩ Gibeya tíú. Kʋ̀ʋ̀ yɩn Abɩya də Zwerobʋamə pwə́rə́ wa. 3 Abɩya vəli kʋ̀ʋ̀ tə də kwatara babɩran 400 000, ba nə ta kʋ̀ʋ̀ ba mɩ. Zwerobʋamə də twi kʋ̀ʋ̀ tə də kwatara babɩran 800 000, ba nə ta kʋ̀ʋ̀ ba mɩ.4 Abɩya zàn ʋ zɩgɩ Semarayimə paan tə yuu, ka nə wulə Efərayimə pɛɛn nagwanaa tə wa, ʋ bòrì ʋ kə Zwerobʋamə də Yɩzərayɛlə lɩ̀à tə mama nə, ʋ wʋ́: «Á cʋga à con! 5 Á yəri də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ twá də nimarʋ kʋ nə wàrɩ̀ kʋ cʋ̀gà, ʋ ma pa Yɩzərayɛlə pàrɩ̀ tə Davidə də ʋ bɩ̀á tə nə naaa? 6 Yá Nebatə bìú Zwerobʋamə, ʋ nə yɩ Davidə bìú Salʋmʋn tʋtʋnʋ, zàn ʋ zɩga ʋ yuu tíú tə nə. 7 Ləzwənywanan də ləzwənyalan twi ba kun ʋ con, ba pa ʋ də́ dɩ̀àn Salʋmʋn bìú Robʋamə yuu wa. Robʋamə yà yɩ ləzwəndʋn, ʋ nə yəri yoo yáá, kʋ pa ʋ wà dɩ̀àn zɩgɩ ba yáá con. 8 Sɩ́ʋ́n nə, á bʋŋa də á wá ta á zɩgɩ pàrɩ̀ tə nə, Ba-Yígúrə́-Jə-Tiu nə pɩn Davidə dwíí tə nə. Á yɩ kwatara púlí nəfarʋ, á ga jə sɩ́án nabiə tə, Zwerobʋamə nə fwa ʋ pa aba, sə ka ya á yɩɩ. 9 Á dɩŋɩ Ba-Yígúrə́-Jə-Tiu joŋwana tə nə yɩ Aron bɩ̀á, də Levi dwíí tə. Yá á dàń kúrí joŋwana duən, ndə dwíə́ nəkaran* tə nə tʋŋa nətʋ, lʋʋ níə́ tə duən wa. Lìù mama nə twi də nababiə, də pabɩran barpɛ, sə ʋ yà joŋwanʋ, mə ʋ nə ʋ jìgə̀ joŋwanʋ, won tə yɩrɩ kʋ nə tà Yɩɩ. 10 Nə mʋ̀ yɩ Ba-Yígúrə́-Jə-Tiu nə yɩ nə Yɩɩ, nə ga wà wá vɩ nə dʋgʋ. Nə mʋ̀ con, joŋwana tə nə tʋŋa ba pɩn Ba-Yígúrə́-Jə-Tiu nə yɩ Aron dwíí, də Levi dwíí. 11 Yá ba mʋ̀ nə fwa jwəŋə ba sʋ̀rɩ́*, jɩjʋ də didəni mama, ba pɩn Ba-Yígúrə́-Jə-Tiu nə. Ba sʋ̀rɩ́ wusinə tə lwán nə ywán, ba tuŋə dipɛn tabɩlʋ yuu, kʋ nə yɩ parɩ, ba ga sʋ̀rɩ́ sɩ́án canzɩlʋ tə cànán tə didəni mama. Cɩ́gá, nə mʋ̀ yɩ nə twá kʋ tə nə, Ba-Yígúrə́-Tiu, ʋ nə yɩ nə Yɩɩ, nə pɩn nii sə kʋ tʋn. Yá á mʋ̀ vɩga Yɩɩ tə ʋ nə yɩ cɩ́gá. 12 Nəŋə, Yɩɩ wulə də nəba, ʋ wulə nə yáá, nə ga jə ʋ joŋwana tə, sə ba wúrí nabwanan ba zɩgɩ á nə. Yɩzərayɛlə bɩ̀á ba, á dànà ká ta kʋ̀ʋ̀ də Ba-Yígúrə́-Jə-Tiu, ʋ nə yɩ á nyɩna-ba Yɩɩ. Cɩ́gá, á bá də́ dɩ̀àn.»
13 Kʋ máŋá təntə wa, Zwerobʋamə pɩn kwatara púlí don səgə kʋ twá kwa, kʋ va kʋ cɩ̀ Zwida kwatara tə kwa con. Zwida kwatara tə dàń yà wulə Yɩzərayɛlə kwatara tə yáá con, kwatara púlí təntə ga cɩ̀ ba kwa con. 14 Zwida kwatara tə lwarɩ də ba mɛ sə ba ta kʋ̀ʋ̀ tə ba yáá con, də ba kwa con mama. Ba bon ba kə Ba-Yígúrə́-Jə-Tiu nə, Yɩɩ joŋwana tə ga wúrí nabwanan tə. 15 Zwida kwatara tə mà kʋ̀ʋ̀ cə̀rí. Yá ba cə̀rí tə pɩn Ba-Yígúrə́-Jə-Tiu pa Zwerobʋamə, də Yɩzərayɛlə lɩ̀à tə mama pìí ba kə ba kwa, Abɩya də Zwida kwatara tə yáá con. 16 Yɩzərayɛlə kwatara tə dəri Zwida kwatara tə yáá con, yá Yɩɩ ken ba Zwida kwatara tə jɩɩn wa. 17 Abɩya də ʋ kwatara tə dí dɩ̀àn zənzən ba yuu wa, ba gʋ ba kwatara babɩran 500 000. 18 Yɩzərayɛlə lɩ̀à tə dí cavɩra zənzən kʋ dɩɩn tə nə, Zwida dwíí tə ga də́ dɩ̀àn, ba nə jələ Ba-Yígúrə́-Jə-Tiu yuu wa, ʋ nə yɩ ba nyɩna-ba Yɩɩ yɩrɩ.
19 Abɩya dɩŋɩ Zwerobʋamə kwa, ʋ jon tɩan tə nə yɩ Betɛlə də kʋ nii tibii, də Yeswana də kʋ nii tibii, də Efəron də kʋ nii tibii. 20 Zwerobʋamə kʋ́ʋ̀ wà pìí ʋ na dɩ̀àn Abɩya máŋá tə wa. Kʋ kwa nə, Ba-Yígúrə́-Jə-Tiu mà wá, yá ʋ tɩga. 21 Yá Abɩya mʋ̀ dɩ̀àn kwɛn tə súrí. Ʋ swe kana fugə də banɩa. Ʋ lɩrɩ bibara sapʋa də bələ, də bikana fugə də bardʋ.
22 Ba pʋ́pʋ́nɩ́ Abɩya tʋ̀tʋ̀nán tə gɩganɩ, də kʋ tə ʋ nə tʋn, də kʋ tə ʋ nə swɩ̀n, ba tún Yɩɩ nii sʋ̀sʋ̀nʋ̀ Yido sagɩ tə wa, kʋ nə gwìń yìə̀n də̀ń.
23 Abɩya tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Davidə sadiyuu tə wa. Ʋ bìú Asa nə dí pàrɩ̀ tə ʋ yuu nə. Asa pàrɩ̀ tə máŋá wa, lʋʋ nii tə yɩn sìə́ wa bɩna fugə.