Ezwipətə pɩ̀ʋ́ Swiswakə ta Zwida payuu tə ʋ də́
12
1 Máŋá tə Robʋamə pàrɩ̀ tə nə nɩ dɩ̀àn, ʋ də tətə ga na dɩ̀àn, ʋ dʋgʋ Ba-Yígúrə́-Jə-Tiu nii tə vàn nə, yá Yɩzərayɛlə lɩ̀à tə də mama twá ʋ nə, ba dʋgʋ kʋ vàn nə. 2 Robʋamə pàrɩ̀ tə bɩna bonu nii nə, Ezwipətə pɩ̀ʋ́ Swiswakə twi ʋ pú Zwerizalɛmə nə də kʋ̀ʋ̀. Kʋ nətʋ tə tʋn Yɩzərayɛlə lɩ̀à nə wà Ba-Yígúrə́-Jə-Tiu nii zìlí yɩrɩ. 3 Ʋ yà jə səsen kòrə̀n 1 200, də səsədɩra 60 000. Kwatara kapʋpʋ, ba nə wàrɩ̀ ba galɩ, yà twá ʋ nə ba bà, ba nə yɩ Libi tɩ̀án, də Sukotə tɩ̀án, də Kuswə tɩ̀án. 4 Ʋ ta Zwida payuu tə tɩan tə nə yɩ dɩ̀àn dəkuu bwálá, ʋ də́, ʋ bà ʋ yí Zwerizalɛmə. 5 Yɩɩ nii sʋ̀sʋ̀nʋ̀ Swemaya dàń ma va ʋ yí Robʋamə, də Zwida dwíí yáá tɩ̀án tə, ba nə kun Zwerizalɛmə nə, Swiswakə nə bɩ̀àn tə yɩrɩ. Swemaya swɩ̀n ba con, ʋ wʋ́: «Nəŋə kʋ tə Ba-Yígúrə́-Jə-Tiu nə swɩ̀n: “Á vɩga nə á dʋgʋ, à də ma vɩ aba á dʋgʋ Swiswakə jɩɩn wa.” » 6 Yɩzərayɛlə yáá tɩ̀án tə, də pɩ̀ʋ́ tə mun ba tɩ̀àn ba ga swɩ̀n, ba wʋ́: «Ba-Yígúrə́-Jə-Tiu yɩ cɩ́gá tíú!» 7 Ba-Yígúrə́-Jə-Tiu nə nɩ də ba mun ba tɩ̀àn, ʋ kʋ́ʋ̀ pìí ʋ swɩ̀n Swemaya con, ʋ wʋ́: «Ba nə mun ba tɩ̀àn tə yɩrɩ, à bá cʋ̀gʋ̀ ba. Máŋá mancɩn wa, à wá pa ba sáŋʋ́ sə kʋ jon ba. À bá pa à lɩŋa tə twá də Swiswakə, tə ma fwi Zwerizalɛmə tɩ̀án yuu wa. 8 Də kʋ nətʋ mɛ, ba tə wá jì Swiswakə ywəŋə, sə ba lwarɩ yoo tə nə wulə ka tʋn ka pa nə, də ka tʋn ka pa lʋʋ níə́ duən pɛ̀gá nə wa.9 Ezwipətə pɩ̀ʋ́ Swiswakə vəli ʋ ta Zwerizalɛmə tɩ̀án. Ʋ pɛ̀ jɩjə wiən tə mama nə wulə Ba-Yígúrə́-Jə-Tiu dìə̀ tə wa, də tə tə nə wulə pɩ̀ʋ́ dìə̀ tə wa. Ʋ pɛ̀ sɩ̀án natanan tə Salʋmʋn yà nə fwa. 10 Pɩ̀ʋ́ Robʋamə dàń fwa cɩnɩan natanan duən, ʋ kə tə bʋʋ wa, ʋ pa kwatara yáá tɩ̀án tə nə, ba yà nə cɩ̀ pɩ̀ʋ́ dìə̀ mimii tə nə. 11 Máŋá mama, pɩ̀ʋ́ tə nə vələ Ba-Yígúrə́-Jə-Tiu dìə̀ tə wa, kwatara yáá tɩ̀án tə yàá ja tə ba bà. Kʋ kwa nə, ba yàá ja tə ba zʋ ba tún mimii nəcɩra tə dìə̀ tə wa.
12 Robʋamə nə mun ʋ tɩ̀àn tə yɩrɩ, Ba-Yígúrə́-Jə-Tiu lɩŋa tə tʋa, sə ʋ dàn ká cʋ̀gʋ̀ wá mɩ́ánmɩ́án. Wozəŋə yà tə wulə Zwida lʋʋ nii tə wa.
Robʋamə pàrɩ̀ tə yígúrə́
13 Pɩ̀ʋ́ Robʋamə nɩ dɩ̀àn Zwerizalɛmə wa, ʋ ga də́ pàrɩ̀. Ʋ yà jə bɩna sapwɩlə də nədʋ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fugə də barpɛ, Zwerizalɛmə nə. Mə kʋ mʋ̀ tɩʋ təntə nə Ba-Yígúrə́-Jə-Tiu kúrí Yɩzərayɛlə dwíə́ tə mama wa, sə ʋ pa ʋ yɩrɩ tə ya kʋ wa. Robʋamə nuu yɩrɩ yà nə yɩ Naman, ʋ ga yɩ Amon dwíí tə bʋ̀á. 14 Ʋ tʋn cʋna, ʋ nə wà Ba-Yígúrə́-Jə-Tiu pɩ̀à də ʋ bɩcan mama yɩrɩ.
15 Ba pʋ́pʋ́nɩ́ Robʋamə tʋ̀tʋ̀nán tə gɩganɩ, tə nə sinti nətʋ, kʋ va kʋ yí tə yígúrə́, ba tún Yɩɩ nii sʋ̀sʋ̀nʋ̀ Swemaya sagɩ tə wa, də Yɩɩ yinarʋ Yido sagɩ tə wa. Zwida dìì tɩ̀án tə də yɩra wulə saga təntə wa. Kʋ̀ʋ̀ yɩn Robʋamə də Zwerobʋamə pwə́rə́ wa, máŋá mama. 16 Robʋamə tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Davidə sadiyuu tə wa. Ʋ bìú Abɩya nə dí pàrɩ̀ tə ʋ yuu nə.