Yɩɩ nii sʋ̀sʋ̀nʋ̀ Zwehu caga Zozafatə nii nə
19
1 Zwida pɩ̀ʋ́ Zozafatə pìí ʋ nan kʋ̀ʋ̀ tə ʋ bà ʋ sàń Zwerizalɛmə wa də yazurə. 2 Yɩɩ yinarʋ Hanani bìú Zwehu nan ʋ jeri pɩ̀ʋ́ Zozafatə, máŋá tə ʋ nə naŋa kʋ̀ʋ̀ tə ʋ bɩ̀àn, ʋ swɩ̀n ʋ con, ʋ wʋ́: «Bɛ̀ɛ̀ nə pɩn n ma san wʋlʋnyiən nə? Bɛ̀ɛ̀ nə pɩn n ma swə lɩ̀à tə nə culi Ba-Yígúrə́-Jə-Tiu? Kʋ mʋ̀ yɩrɩ nə, Ba-Yígúrə́-Jə-Tiu lɩŋa zaŋa n yuu wa. 3 Yá ʋ nɩ də n tʋn tʋtʋnzəŋə də. Cɩ́gá, n pɩn woŋwanʋ Aswera* daceli tə nyʋn lʋʋ nii tə wa, n ga pɩ̀à Ba-Yígúrə́-Jə-Tiu də n bɩcan mama.»Pɩ̀ʋ́ Zozafatə tún lɩ̀à ba nə bʋ̀rɩ̀ bʋra Zwida lʋʋ nii tə wa
4 Zozafatə yà wulə Zwerizalɛmə wa. Ʋ nan ʋ kɩkarɩ lalʋʋ tə wa, kʋ nə zɩgɩ Bɛrəsweba, kʋ va kʋ yí Efərayimə pɛɛn tə nə, sə ʋ ma bon ba, ʋ pa ba pìí ba bà Ba-Yígúrə́-Jə-Tiu con, ʋ nə yɩ ba nyɩna-ba Yɩɩ. 5 Ʋ tún lɩ̀à, sə ba bʋ̀rɩ̀ bʋra Zwida lʋʋ nii dɩ̀àn dəkuu tɩan tə mama wa. 6 Ʋ swɩ̀n lɩ̀à tə nə bʋ̀rɩ̀ bʋra tə con, ʋ wʋ́: «Á ywàŋá kʋ tə á nə wá tʋn yuu nə zəni. Cɩ́gá, kʋ tà ləzoni yɩrɩ nə á wá bʋ̀rɩ̀ bʋra tə, kʋ yɩ Ba-Yígúrə́-Jə-Tiu yɩrɩ. Ʋ tətə nə wá ya də aba, máŋá tə wa, á nə bʋ̀rɩ̀ bʋra tə. 7 Á dàń dərə Ba-Yígúrə́-Jə-Tiu fən, sə á cɩ̀ á tɩ̀àn nə də kʋ tə á nə wá tʋn. Cɩ́gá, ŋwɩ̀rɩ̀ wiən, də ka kúrí lɩ̀à duən wa, də ka jon vwiŋə tə̀lə́ Ba-Yígúrə́-Jə-Tiu con, ʋ nə yɩ nə Yɩɩ.»
8 Máŋá tə Zozafatə nə pìí ʋ bà Zwerizalɛmə, ʋ tún Levi dwíí tə, də Yɩɩ joŋwana, də Yɩzərayɛlə dìì tə yáá tɩ̀án Zwerizalɛmə də wa, sə ba bʋ̀rɩ̀ bʋra ndə Ba-Yígúrə́-Jə-Tiu nə pɩ̀à nətʋ. Ba mɛ sə ba bʋ̀rɩ̀ lɩ̀à jara bʋra tɩʋ tə wa. 9 Ʋ pɩn ba nii, ʋ wʋ́: «Á mɛ sə á dəri Ba-Yígúrə́-Jə-Tiu fən, á ma tʋn kʋ nətʋ tə də pùə́ nədʋ, də á bɩcanɩ mama. 10 Á nubɩa tə nə wulə tɩan tə wa nə ja lagʋrɩ yoo ba bà á con, nə à yə̀ə́ Yɩɩ nii tə ka zìlí jara, nə à yə̀ə́ yìə̀n tə Yɩɩ nə pɩn nii sə tə tʋn jara, nə à yə̀ə́ yìə̀n tə Yɩɩ nə pʋ́pʋ́nɩ́ sə ba twá tə nə jara, á mɛ sə á kàrɩ̀ ba, ba dàn ká tʋn cʋna ba zɩgɩ Ba-Yígúrə́-Jə-Tiu nə. Yá Ba-Yígúrə́-Jə-Tiu lɩŋa bá zàn á mʋ̀ də á nubɩa tə yuu wa. Mə nətʋ nə á wá tʋn, sə kʋ pa á tətə dàn ká tʋn cʋna. 11 Á nəŋə Yɩɩ joŋwana yun tɩ̀án nəkwɩa Amariya, ʋ wulə á yáá Ba-Yígúrə́-Jə-Tiu yoo mama wa. Yɩsəmayɛlə bìú Zebadɩa nə wá ywàń Zwida dwíí payuu tə yìə̀n yuu nə. Levi dwíí tə də wulə, sə ba kə aba cwəŋə nə. Á daŋa á jɩ̀àn á tʋn, yá Ba-Yígúrə́-Jə-Tiu wá ya də lɩ̀à tə nə tʋŋa zəni.»