Zozafatə dí dɩ̀àn Mʋabə də Amon dwíə́ tə yuu wa
20
1 Kʋ kwa nə, Mʋabə dwíí tə, də Amon dwíí tə, də Mawon tɩ̀án twi, sə ba ta kʋ̀ʋ̀ də Zozafatə. 2 Lɩ̀à twi ba swɩ̀n kʋ Zozafatə con, ba wʋ́: «Lalʋʋ kapʋpʋ nan mʋtɩgʋ tə kwa, Siiri lʋʋ nii tə wa, ba bɩ̀àn sə ba ta mʋ́. Sɩ́ʋ́n nə, ba wulə Asason-Tamarə nə, kʋ nə pɩ̀à kʋ swɩ̀n də kʋ yɩ Eyin-Gedi.»3 Fən zʋa Zozafatə, ʋ ga kúrí ʋ tì, sə ʋ bon ʋ kə Ba-Yígúrə́-Jə-Tiu nə. Ʋ pɩn nii, sə Zwida lʋʋ lɩ̀à tə mama vwa ba nii. 4 Zwida lʋʋ lɩ̀à tə nan tɩan tə mama wa, ba kun duən nə, sə ba lòrì Ba-Yígúrə́-Jə-Tiu sáŋʋ́. 5 Zozafatə zɩgɩ Zwida lʋʋ lɩ̀à tə, də Zwerizalɛmə tɩ̀án tə titəŋi wa, Ba-Yígúrə́-Jə-Tiu dìə̀ tə wa, dəwoo nədʋn tə yáá con, 6 ʋ swɩ̀n, ʋ wʋ́: «Ba-Yígúrə́-Jə-Tiu, n nə yɩ nə nyɩna-ba Yɩɩ, n mʋ̀ nə wulə lanworu tə wa, n mʋ̀ ga nə də́ pàrɩ̀ dwíə́ nəkaran* tə mama payun tə yuu wa. N jə dɩ̀àn də wànʋ́, kʋ pa lìù tə̀lə́, ʋ nə wàá ʋ tɛ ʋ zɩga n nə. 7 Kʋ tà n mʋ̀ nə Yɩɩ tə nə dɩŋɩ lʋʋ nii kʋ tə tɩ̀án, Yɩzərayɛlə lɩ̀à tə yáá con, ba nə yɩ n lɩ̀à, n ga pa kʋ n dabɛɛ Abərahamə dwíí tə nə, sə ba tɩnɩ kʋ máŋá mama naaa? 8 Ba jə̀ń kʋ wa, ba lwà dìə̀ ba pa mʋ́, ba ga swɩ̀n, ba wʋ́: 9 “Yolwan nə yí nəba, kʋ nə yɩ kwatara sɩ̀ʋ́, nə à yə̀ə́ càn, nə à yə̀ə́ tɩan yayɩpwarʋ, nə à yə̀ə́ niən, nə wá zɩgɩ dìə̀ ka tə yáá con, kʋ də̀ń nə yɩ n tətə yáá con. Cɩ́gá, n wulə dìə̀ ka tə wa. Nə wá bon nə kə n nə, sə n bà san nəba, nə jɩgwarʋ tə wa. N dàń wá cʋgʋ nəba, n ga jon nəba.” 10 Sɩ́ʋ́n nə, nə̀ń Amon dwíí tə, də Mʋabə tɩ̀án, də Seyirə pɛɛn yuu lɩ̀à tə nə, ba twi sə ba tà nəba. Máŋá tə nə nɩbara-ba nə nan Ezwipətə lʋʋ nii tə wa, n wà ba nii pɩn, sə ba twá dwíə́ təntə lʋʋ níə́ tə wa ba lɛ. Yá ba twá tə vàn nə ba lɛ, ba wà tə cʋ̀gʋ̀. 11 Nə̀ń ba nə ba twi, sə ba dɩŋɩ nəba ba lɩ n bwálɩ́ tə wa, n nə pɩn nəba, sə ba ma ŋwɩ́n nəba. 12 Nə tíú Yɩɩ, n bá pa n bʋra tə ja ba naaa?» Nə ba dɩ̀àn jə kwatara kapʋpʋ təntə yáá con, ba nə bɩ̀àn sə ba ta nəba, nə ga yəri kʋ tə, nə nə wá fwa. Kʋ mʋ̀ nə pɩn, nə yɩ́á ma cəə n yuu wa.»
Ba-Yígúrə́-Jə-Tiu pɩn Zwida dwíí tə də́ dɩ̀àn
13 Zwida lʋʋ nii lɩ̀à tə mama yà zɩga yɩɩ nə Ba-Yígúrə́-Jə-Tiu yáá con, də ba kana, də ba bɩ̀á. 14 Ba-Yígúrə́-Jə-Tiu Siŋu tə dàń cúə́ Zakari bìú Yahazɩyɛlə yuu wa, lalʋʋ tə titəŋi wa. Zakari yɩ Benaya bìú, Benaya yɩ Yeyɛlə bìú, Yeyɛlə yɩ Matanɩya bìú, Matanɩya yɩ Azafə bìú don, Levi dwíí tə wa. 15 Yahazɩyɛlə swɩ̀n, ʋ wʋ́: «Á cʋga zəni, á mʋ̀ Zwerizalɛmə tɩ̀án, də Zwida lʋʋ nii lɩ̀à tə mama, də n mʋ̀ pɩ̀ʋ́ Zozafatə! Nəŋə kʋ tə Ba-Yígúrə́-Jə-Tiu nə swɩ̀n á con: “Dànà ká pa fən ja aba, dànà ká vɩvaga kwatara púlí nəfarʋ kʋ tə yáá con. Cɩ́gá, kʋ̀ʋ̀ tə tà á mʋ̀ kʋ̀ʋ̀, kʋ yɩ à mʋ̀ Yɩɩ kʋ̀ʋ̀. 16 Jwɩan nə, sə á nan á jeri á dʋŋa tə. Ba wá twá Hasisə cwəŋə dədolu tə yuu ba ma bà. Yá á wá na ba nacoru tə nii nə, Yeruwɛlə kasɔɔ lanworu tə yáá con. 17 Á mʋ̀ nə bá ta ba. Á naŋa á zɩgɩ ba yáá con lá nə. Yá á dàń wá na nətʋ à mʋ̀ Ba-Yígúrə́-Jə-Tiu nə wá jon aba. Á mʋ̀ Zwerizalɛmə tɩ̀án-ba, də Zwida lʋʋ nii lɩ̀à tə, á dànà ká pa fən ja aba, á dànà ká vɩvaga. Jwɩan nə, á naŋa á jeri ba, yá à mʋ̀ Ba-Yígúrə́-Tiu wá ya də aba.”»
18 Zozafatə tʋa ʋ nadwana yuu, ʋ pú ʋ yáá tɩa, Zwerizalɛmə tɩ̀án tə də Zwida lʋʋ nii lɩ̀à tə mama ga tʋ ba nadwana yuu, Ba-Yígúrə́-Jə-Tiu yáá con, sə ba pa wá dun. 19 Kʋ kwa nə, Levi dwíí tə nə yɩ Kehatə bɩ̀á, də Kore bɩ̀á, zàn ba baa gwaran, sə ba ma bʋ Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ.
20 Ba zàn jɩjʋ fuən fuən, ba nan ba vələ Tekʋa kasɔɔ lanworu tə con. Máŋá tə ba nə vìrí, Zozafatə zàn yɩɩ nə, ʋ swɩ̀n ba con, ʋ wʋ́: «Á mʋ̀ Zwerizalɛmə tɩ̀án-ba, də á mʋ̀ Zwida lʋʋ nii lɩ̀à tə, á cʋga à con! Á kənə á waa Ba-Yígúrə́-Jə-Tiu nə, ʋ nə yɩ á Yɩɩ, yá á wá na dɩ̀àn. Á pɩan cɩ́gá ʋ nii sʋ̀sʋ̀nà tə nə, yá á wá də́ dɩ̀àn.»
21 Kʋ kwa nə, ʋ də lalʋʋ tə vʋrɩ duən nə, ʋ ga lɩ gwàgá, ba nə zʋa culu gànàn, ʋ kə ba yáá, sə ba bʋ Ba-Yígúrə́-Jə-Tiu nə, ba wʋ́: «Á bwɩa Ba-Yígúrə́-Jə-Tiu nə. Cɩ́gá, ʋ wʋywaŋʋ tə wulə wuuu, kʋ ba zwɛ̀!»
22 Máŋá tə ba nə wulə ba baa pupwən gwaran təntə, Ba-Yígúrə́-Jə-Tiu gugurə Amon dwíí kwatara tə, də Mʋabə dwíí kwatara tə, də ba tə nə nan Seyirə pɛɛn tə con ba bà, sə ba ta Zwida lʋʋ nii tə. Yá ba tətə dàń pìí ba tɛ duən. 23 Amon dwíí tə, də Mʋabə dwíí tə pìí ba tɛ ba tə nə nan Seyirə pɛɛn tə con. Yá ba gʋa Seyirə pɛɛn con lɩ̀à tə ba zwɛ̀, ba də tətə ga pìí ba gʋ duən ba zwɛ̀.
24 Máŋá tə, Zwida dwíí tə nə twi ba yí bwálɩ́ tə, ba nə wàá kasɔɔ lanworu tə ba nɩ, ba viviri sə ba ywàń dʋŋa tə con, yá ba nɩ də tɩga cɩcɩ nə súə́ lá. Ladʋa də tətə wà wànɩ́, ʋ dəri ʋ jɛ́n. 25 Zozafatə də ʋ kwatara tə twi ba pɛ̀ dʋŋa tə jɩjə tə. Ba nɩ vàná zənzən, də wozəŋə zənzən, də gànàn zənzən, də wiən tə nə jə funə zənzən. Zɩla tə yɩn danɩ, kʋ pa ba pɛ̀ tə wuuu, dɩan batwa, yá ba tə wà wànɩ́ ba pɛ̀ tə mɛ ba ja vìí. 26 Banɩa nii dɩɩn tə nə, ba kun duən nə Beraka vara tə wa, sə ba kə Ba-Yígúrə́-Jə-Tiu lɛ̀ɛ̀. Kʋ mʋ̀ nə pɩn, ba boŋə vara təntə «Beraka vara», də zə̀n mama. 27 Zwida dwíí kwatara tə mama, də Zwerizalɛmə tɩ̀án kwatara tə mama, də Zozafatə ʋ nə wulə ba yáá, dàń pìí ba bɩ̀àn Zwerizalɛmə də pupwən nəfarʋ. Cɩ́gá, Ba-Yígúrə́-Jə-Tiu jon ba ba dʋŋa jɩɩn wa, ba ga sú də pupwən nəfarʋ. 28 Ba dúə́ banan də kwànán, ba wúrí nabwanan, ba ja zʋ Zwerizalɛmə wa, ba va ba yí Ba-Yígúrə́-Jə-Tiu dìə̀ tə. 29 Máŋá tə dwíə́ tə duən payun tə nə nì də Ba-Yígúrə́-Jə-Tiu ta Yɩzərayɛlə lɩ̀à dʋŋa tə, ʋ fən zʋa ba mama zənzən. 30 Mə kʋ zɩgɩ nətʋ Zozafatə ma də́ ʋ pàrɩ̀ tə sìə́ wa. Cɩ́gá, ʋ Yɩɩ tə yà pɩn wá sìə́, bwálɩ́ mama wa.
Zozafatə pàrɩ̀ tə yígúrə́
31 Zozafatə yà jə bɩna fɩtwa də bonu, máŋá tə wa ʋ nə jìgə̀ Zwida payuu tə pɩ̀ʋ́, yá ʋ dí pàrɩ̀ bɩna sapʋa də bonu, Zwerizalɛmə nə. Ʋ nuu yɩrɩ yà nə yɩ Azuba, ʋ ga yɩ Swili bʋ̀á. 32 Ʋ tì ʋ nyɩna Asa nabwɩɩ tə, ʋ tʋn kʋ tə nə ziən Ba-Yígúrə́-Jə-Tiu yáá con. 33 Yá də kʋ nətʋ mɛ, jwəŋə dədwələn* tə tə wà lá nywɩn. Lalʋʋ tə yà tə wà ba bɩcanɩ vwe Yɩɩ nə zənzən, ʋ nə yɩ ba nyɩna-ba Yɩɩ.
34 Ba pʋ́pʋ́nɩ́ Zozafatə tʋ̀tʋ̀nán tə gɩganɩ, tə nə sinti nətʋ, kʋ va kʋ yɩ tə yígúrə́, ba tún Hanani bìú Zwehu tʋ̀tʋ̀nán sagɩ tə wa, kʋ nə wulə Yɩzərayɛlə lɩ̀à pɛ̀gá sagɩ tə wa.
35 Kʋ kwa nə, Zwida pɩ̀ʋ́ Zozafatə ken nimarʋ də Yɩzərayɛlə pɩ̀ʋ́ Ahazɩa, ʋ nə tʋŋa yolwana. 36 Ʋ ken nimarʋ də wá, sə ba fwa nɩ́á yuu bwərə, tə nə mɛ sə tə va Tarəsisə. Ba fwa nɩ́á yuu bwərə təntə Esiyon-Gebɛrə nə. 37 Yá Dodava bìú Eliyezɛrə, ʋ nə yɩ Mareswa tíú, swɩ̀n Yɩɩ nii sʋ̀ràn Zozafatə con, ʋ wʋ́: «N nə ken nimarʋ də Ahazɩa yɩrɩ, Ba-Yígúrə́-Jə-Tiu wá cʋ̀gʋ̀ n tʋ̀tʋ̀nán tə.» Yá nɩ́á yuu bwərə tə cɩ́gá lwa, tə wà wànɩ́ tə va Tarəsisə.