21
1 Zozafatə tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Davidə sadiyuu tə wa. Ʋ bìú Yoramə nə dí pàrɩ̀ tə ʋ yuu nə.Yoramə pàrɩ̀ tə yoo
2 Yoramə yà jə nubɩa ba nə yɩ Zozafatə bɩ̀á. Ba mʋ̀ nə yɩ Azarɩya, də Yehiyɛlə, də Zakari, də Azarɩyahu, də Miswɛlə, də Swefatɩa. Ba mama yà yɩ Yɩzərayɛlə pɩ̀ʋ́ Zozafatə bɩ̀á. 3 Ba nyɩna Zozafatə yà pɩn ba zìlə́ wiən zənzən, tə nə yɩ wárʋ́, də sɩ́án, də wiən duən də, tə nə jə funə. Ʋ tə pɩn ba tɩan, tə nə lwə̀ tə kɩkarɩ də bərətaŋʋ Zwida lʋʋ nii tə wa, sə ba tɩnɩ. Yá ʋ yá payuu tə mʋ̀ Yoramə jɩɩn wa, ʋ nə yɩ bikwɩa yɩrɩ. 4 Yoramə dàń dí pàrɩ̀ tə ʋ nyɩna tə yuu nə, ʋ ga pa ʋ pàrɩ̀ tə jə dɩ̀àn. Ʋ pɩn ba gʋ ʋ nubɩa tə mama də kwatara sɩ̀ʋ́, ba ga gʋ Yɩzərayɛlə lɩ̀à yáá tɩ̀án duən də, ba súrí lá. 5 Yoramə yà jə bɩna fɩtwa də bələ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna nana Zwerizalɛmə nə. 6 Ʋ də tʋn yolwana tə Yɩzərayɛlə pɛ̀gá tə nə tʋn, ndə Akabə də ʋ dìə̀ lɩ̀à tə nə. Cɩ́gá, ʋ yà swe Akabə bʋ̀á. Ʋ tʋn kʋ tə nə lwara Ba-Yígúrə́-Jə-Tiu yáá con. 7 Yá Ba-Yígúrə́-Jə-Tiu yà ba pɩ̀à sə ʋ cʋ̀gʋ̀ Davidə dìə̀ tə, nimarʋ tə yɩrɩ, ʋ nə tún də wá. Cɩ́gá, ʋ yà swɩ̀n Davidə con, də ʋ wá pa Davidə də ʋ dwíí tə də́ Zwida payuu tə pàrɩ̀, máŋá mama wuuu.
8 Mə Yoramə máŋá tə wa nə, Edomə tɩ̀án zàn ba vɩ sə ba zìlí Zwida payuu tə nii, ba də ga tún ba tətə pɩ̀ʋ́. 9 Yoramə vəli də ʋ kwatara yun tɩ̀án tə mama, də ʋ kwatara səsen kòrə̀n tə mama. Edomə kwatara tə yà twi ba kɩkarɩ Yoramə də ʋ səsen kòrə̀n yun tɩ̀án tə. Yá Yoramə də ʋ kwatara tə zàn tɩtɩkwɩʋn nə, ba ta ba. 10 Mə kʋ zɩgɩ nətʋ Edomə tɩ̀án ma jon ba tɩ̀àn Zwida payuu tə jɩɩn wa, kʋ bà kʋ yí zə̀n. Yá kʋ máŋá təntə tətə wa, Libəna tɩ̀án də zàn ba vɩ Yoramə nii, ʋ nə kʋ́ʋ̀ ba Ba-Yígúrə́-Jə-Tiu nii zìlí, ʋ nə yɩ ʋ nyɩna-ba Yɩɩ yɩrɩ. 11 Ʋ mʋ̀ Yoramə fwa jwəŋə dədwələn* tətə, Zwida lʋʋ nii pɛɛn tə wa, ʋ pa Zwerizalɛmə tɩ̀án də Zwida dwíí tə pìí ba jʋnɩ woŋwanan. 12 Dɩɩn don nə, ba pɩn Yɩɩ nii sʋ̀sʋ̀nʋ̀ Eli sagɩ Yoramə nə, kʋ nə pʋ́pʋ́nɩ́, kʋ wʋ́: Nə̀ń kʋ tə Ba-Yígúrə́-Jə-Tiu, ʋ nə yɩ n nyɩna Davidə Yɩɩ nə swɩ̀n: «N wà n nyɩna Zozafatə nabwɩɩ tə nə twá, n ma wà n nɩbɛɛ Zwida pɩ̀ʋ́ Asa nabwɩɩ tə nə twá. 13 N pìí twá Yɩzərayɛlə lɩ̀à pɛ̀gá tə nabwɩɩ tə nə, n ga pa Zwida dwíí tə də Zwerizalɛmə tɩ̀án pìí ba jʋnɩ woŋwanan, ndə Akabə dìə̀ lɩ̀à tə nə tʋn nətʋ. N gʋa n nubɩa tə tətə, ba yà nə kʋ́kwà mʋ́. 14 Kʋ mʋ̀ nə pɩn, Ba-Yígúrə́-Jə-Tiu wá pa càn bà n lʋʋ lɩ̀à tə, də n bɩ̀á tə, də n kana tə, də kʋ tə mama n nə jə, yuu wa. 15 Yayɩran kapʋpʋ wá mà n tətə. Yayɩgʋ tə don wá nyàn kʋ súrí dɩɩn mama, kʋ va kʋ yí n lʋran nə wá nan poni nə.»
16 Ba-Yígúrə́-Jə-Tiu yigu Filisi tɩ̀án, də Arabə-ba tə, ba nə yɩ Kuswəa tɩ̀án jənduən, sə ba ta kʋ̀ʋ̀ də Yoramə. 17 Ba twi ba ta Zwida payuu tə, ba zʋ kʋ wa. Ba pɛ̀ jɩjə wiən tə mama nə wulə pɩ̀ʋ́ dìə̀ tə wa, ba ja ʋ bɩ̀á tə də ʋ kana tə, ba súrí lá. Ahazɩa cɩcɩ, ʋ nə yɩ Yoramə bɩ̀á tə wa nəmaa, nə ga ʋ con.
18 Tə mʋ̀ yìə̀n təntə mama kwa nə, Ba-Yígúrə́-Jə-Tiu pɩn lʋran yayɩgʋ mà Yoramə, kʋ nə wàrɩ̀ kʋ zwɛ̀. 19 Yayɩgʋ tə nyàn kʋ súrí dɩɩn mama wuuu, yá kʋ bɩna bələ nii nə, yayɩgʋ tə càn pɩn Yoramə lʋran nan poni nə. Ʋ dí càn zənzən ʋ ma tɩ. Ʋ lʋʋ lɩ̀à tə wà wusinə sʋ̀rɩ́, ba ma zìlí wá, ndə ba nə fwa nətʋ, ba pa ʋ nyɩna-ba nə. 20 Yoramə yà jə bɩna fɩtwa də bələ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna nana, Zwerizalɛmə nə. Ʋ tɩga, yá kʋ wà lìù mama yɩ̀. Ba gùrì wá Davidə sadiyuu tə wa, yá kʋ dàń nə tà pɛ̀gá libərə bwálɩ́ tə wa, ba gùrì wá.