Talɩkwa yìə̀n, Sunɛmə tɩ̀án kan tə yuu wa
8
1 Elize yà swɩ̀n kan tə con, ʋ nə bwin ʋ bìú tə, ʋ wʋ́: «Zàn də n dìə̀ lɩ̀à tə, á pɩ̀à bwálɩ́ don, á va á ya lá. Cɩ́gá, Ba-Yígúrə́-Jə-Tiu pɩn nii sə niən bà, yá tə wá bà lʋʋ nii kʋ tə wa bɩna barpɛ.» 2 Kan tə zàn ʋ twá kʋ tə nə Yɩɩ tʋtʋnʋ tə nə swɩ̀n ʋ con. Ʋ də ʋ dìə̀ lɩ̀à nan ba va Filisi lʋʋ nii wa. Ba fwa bɩna barpɛ lá nə. 3 Bɩna barpɛ tə kwa nə, kan tə pìí ʋ nan Filisi lʋʋ nii tə wa, ʋ bà. Ʋ vəli pɩ̀ʋ́ tə con, ʋ lòrì ʋ dìə̀ tə də ʋ kárá tə. 4 Pɩ̀ʋ́ tə yà wulə ʋ ve də Geyazi, ʋ nə yɩ Yɩɩ tʋtʋnʋ Elize tʋtʋnʋ. Pɩ̀ʋ́ tə swɩ̀n Geyazi con, ʋ wʋ́: «Man yofaran tə mama, Elize nə tʋn n bɩrɩ nə.» 5 Máŋá tə Geyazi nə wulə ʋ maŋa nətʋ Elize nə bwin bisɩmaa don ʋ zɩ̀n tɩan wa, də nə̀ń kan tə Elize nə bwin ʋ bisɩmaa tə nə, ʋ yí lá. Kan tə yà yɩ ʋ twi pɩ̀ʋ́ tə con, sə ʋ lòrì ʋ dìə̀ tə də ʋ kárá tə. Geyazi ma swɩ̀n ʋ wʋ́: «À yuu-tiu pɩ̀ʋ́, nə̀ń kan tətə nə, nə̀ń ʋ bisɩmaa tə də Elize nə bwin ʋ zɩ̀n tɩan wa.» 6 Pɩ̀ʋ́ tə bwe kan tə, kan tə ga man kʋ nə tʋn nətʋ mama, ʋ bɩrɩ pɩ̀ʋ́ tə nə. Kʋ kwa nə, pɩ̀ʋ́ tə pɩn nii ʋ tʋtʋnʋ don nə, ʋ wʋ́: «Pa ba kwàń won tə mama, kʋ yà nə yɩ kan wà tə nyiən, ba pa wá. Pa ba kwàń ʋ kárá tə wiən tə mama, kʋ nə zɩgɩ ʋ viru tə máŋá wa, kʋ bà kʋ yí zə̀n, ba pa wá.»Hazayɛlə wá də́ pàrɩ̀ Siiri lʋʋ nii yuu wa
7 Elize vəli Damasə, də Siiri pɩ̀ʋ́ Bɛn-Hadadə tʋa yayɩgʋ. Ba ma swɩ̀n Bɛn-Hadadə con, ba wʋ́: «Yɩɩ tʋtʋnʋ tə twi yəbə.» 8 Pɩ̀ʋ́ tə ma swɩ̀n Hazayɛlə con, ʋ wʋ́: «Tì zìlə́ wiən, n ja va n ma na Yɩɩ tʋtʋnʋ tə. N wá lòrì wá, sə ʋ bwe Ba-Yígúrə́-Jə-Tiu ʋ jə́n də à yayɩgʋ tə nə wá zwɛ̀, à ga pìí à zàn naaa?» 9 Hazayɛlə dàń tì zìlə́ wiən, də won tə mama kʋ nə ziən Damasə wa, ʋ ja va Elize con. Nyʋgʋma sapwilə nə zɩn zìlə́ wiən təntə. Máŋá tə ʋ nə vəli ʋ yí lá, ʋ mɛ Elize yáá con ʋ zɩga, ʋ ga swɩ̀n, ʋ wʋ́: «N tʋtʋnʋ Bɛn-Hadadə, ʋ nə yɩ Siiri pɩ̀ʋ́ nə tʋn nə n con, sə à bwe mʋ́ à jə́n, ʋ yayɩgʋ tə wá zwɛ̀, ʋ pìí ʋ zàn naaa?» 10 Elize le wá, ʋ wʋ́: «Vəli n swɩ̀n ʋ con də cɩ́gá mama, ʋ yayɩgʋ tə wá zwɛ̀, ʋ zàn! Yá Ba-Yígúrə́-Jə-Tiu dàń nə bɩrɩ nə də cɩ́gá mama, ʋ wá tɩ.» 11 Yɩɩ tʋtʋnʋ tə zɩgɩ ʋ ywàń bwálɩ́ nədʋ zə́n, ʋ ga wulə ʋ kwi. 12 Hazayɛlə ma bwe wá, ʋ wʋ́: «Bɛ̀ɛ̀ nə pɩn n ma kwi, à yuu-tiu?» Elize le, ʋ wʋ́: «Kʋ yɩ à nə yə̀ə́ yolwan tə n nə wá tʋn Yɩzərayɛlə lɩ̀à tə yɩra nə pɩn: N wá sʋ̀rɩ́ ba tɩan tə, ba nə lwà ba kɩkarɩ də biritaŋʋ, n wá gʋ ba ləzwəndʋn tə də kwatara sɩ̀ʋ́, n wá tɩtaga ba bìsɩ́ná tə, n ga wá kàrɩ́ ba kapwe tə.»
13 Hazayɛlə swɩ̀n, ʋ wʋ́: «À mʋ̀ n tʋtʋnʋ tə, à nə yɩ ndə kukurə nə, bɛ̀ɛ̀ dɩ̀àn nə à jə, à ma tʋŋa yofaran nətʋ?» Elize le, ʋ wʋ́: «Ba-Yígúrə́-Jə-Tiu bɩrɩ nə, də n wá də́ Siiri lʋʋ nii tə pàrɩ̀.» 14 Hazayɛlə nan Elize con, ʋ pìí ʋ bà ʋ yuu-tiu tə con. Ʋ yuu-tiu tə bwe wá, ʋ wʋ́: «Bɛ̀ɛ̀ nə Elize swɩ̀n n con?» Hazayɛlə le, ʋ wʋ́: «Ʋ swɩ̀n à con də cɩ́gá mama, n yayɩgʋ tə wá zwɛ̀, n zàn!» 15 Kʋ tɩpʋrɩ nə, Hazayɛlə tì gansara, ʋ li nɩ́á wa, ʋ ma pú pɩ̀ʋ́ tə yáá nə, ʋ pa pɩ̀ʋ́ tə tɩ. Kʋ kwa nə, Hazayɛlə dí pàrɩ̀ ʋ yuu nə.
Yoramə jìgə̀ Zwida payuu tə pɩ̀ʋ́
16 Yɩzərayɛlə pɩ̀ʋ́ Akabə bìú Yoramə pàrɩ̀ tə bɩna bonu nii bɩnɩ tə wa, Zozafatə tə yà yɩ Zwida payuu tə pɩ̀ʋ́, yá ʋ bìú Yoramə də jìgə̀ Zwida payuu tə pɩ̀ʋ́. 17 Ʋ yà jə bɩna fɩtwa də bələ, máŋá tə wa ʋ nə jìgə̀ pɩ̀ʋ́. Yá ʋ dí pàrɩ̀ tə bɩna nana Zwerizalɛmə nə. 18 Ʋ də tʋn yolwana tə Yɩzərayɛlə pɛ̀gá tə nə tʋn, ndə Akabə də ʋ dìə̀ lɩ̀à tə nə. Cɩ́gá, ʋ yà swe Akabə bʋ̀á. Ʋ tʋn kʋ tə nə lwara Ba-Yígúrə́-Jə-Tiu yáá con. 19 Yá Ba-Yígúrə́-Jə-Tiu yà ba pɩ̀à sə ʋ cʋ̀gʋ̀ Zwida payuu tə, ʋ tʋtʋnʋ Davidə yuu yɩrɩ. Cɩ́gá, ʋ yà kàn nii ʋ pa ʋ tʋtʋnʋ Davidə də ʋ dwíí tə nə, də ʋ wa pa Davidə dwíí tə də́ Zwida payuu tə pàrɩ̀, máŋá mama wuuu.
20 Mə Yoramə máŋá tə wa nə, Edomə tɩ̀án zàn ba vɩ sə ba zìlí Zwida payuu tə nii, ba də ga tún ba tətə pɩ̀ʋ́. 21 Yá Yoramə dàń vəli Sayirə də ʋ kwatara səsen kòrə̀n tə mama. Edomə kwatara tə yà twi ba kɩkarɩ Yoramə də ʋ səsen kòrə̀n yun tɩ̀án tə. Yoramə də ʋ kwatara tə zàn tɩtɩkwɩʋn nə, ba ta Edomə kwatara tə, yá Zwida payuu kwatara tə dəri ba va ba sànɩ́ wa. 22 Mə kʋ zɩgɩ nətʋ Edomə tɩ̀án ma jon ba tɩ̀àn Zwida payuu tə jɩɩn wa, kʋ bà kʋ yí zə̀n. Yá kʋ máŋá təntə tətə wa, Libəna tɩ̀án də zàn ba vɩ Zwida payuu tə nii.
23 Ba pʋ́pʋ́nɩ́ Yoramə tʋ̀tʋ̀nán tə gɩganɩ, də kʋ tə mama ʋ nə fwa, ba tún Zwida pɛ̀gá yìə̀n sagɩ tə wa. 24 Yoramə tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Davidə sadiyuu tə wa. Ʋ bìú Ahazɩa nə dí pàrɩ̀ tə ʋ yuu nə.
Ahazɩa jìgə̀ Zwida payuu tə pɩ̀ʋ́
25 Yɩzərayɛlə pɩ̀ʋ́ Yoramə, ʋ nə yɩ Akabə bìú pàrɩ̀ tə bɩna fugə də bələ nii bɩnɩ tə nə, Zwida lʋʋ nii pɩ̀ʋ́ Yoramə bìú Ahazɩa jìgə̀ Zwida payuu tə pɩ̀ʋ́. 26 Ahazɩa jìgə̀ pɩ̀ʋ́ də ʋ jə bɩna sapʋa də bələ. Yá ʋ dí pàrɩ̀ bɩnɩ nədʋ Zwerizalɛmə nə. Ʋ nuu yɩrɩ yà nə yɩ Atali. Atali yà yɩ Yɩzərayɛlə pɩ̀ʋ́ Oməri dwíí tə wa bʋ̀á. 27 Ahazɩa də twá Akabə dìə̀ lɩ̀à tə nabwɩɩ tə nə, kʋ pa ʋ tʋn kʋ tə nə lwara Ba-Yígúrə́-Jə-Tiu yáá con, ndə Akabə dìə̀ lɩ̀à tə nə. Cɩ́gá, ʋ yà swe Akabə dìə̀ tə wa bʋ̀á. 28 Ʋ də Akabə bìú Yoramə twá duən ba va ba ta kʋ̀ʋ̀ də Siiri pɩ̀ʋ́ Hazayɛlə Ramɔtə nə, Galadə nagwanaa wa. Kʋ̀ʋ̀ tə máŋá wa, Siiri tɩ̀án caŋɩ Yoramə. 29 Pɩ̀ʋ́ Yoramə ma pìí ʋ va Zwizəreyɛlə, sə ʋ ywarɩ ʋ nʋran tə, Siiri tɩ̀án nə tún ʋ yɩra, máŋá tə wa, ʋ nə ta Siiri pɩ̀ʋ́ Hazayɛlə, Rama nə. Yoramə bìú Ahazɩa, ʋ nə yɩ Zwida pɩ̀ʋ́ dàń vəli Zwizəreyɛlə, sə ʋ na Akabə bìú Yoramə, ba nə caŋɩ wá yɩrɩ.