7
1 Elize le, ʋ wʋ́: «Cʋgʋ kʋ tə Ba-Yígúrə́-Jə-Tiu nə swɩ̀n! Ʋ swɩ̀n də jwɩan máŋá ka tə wa, mun kilo fugə də bələ kwənə wá ya səbilugu nədʋ, dipɛn mɩna yiri don mun kilo sapʋa də banɩa ga wá ya səbilugu nədʋ, Samari tɩʋ tə mimii nə. 2 Lìù tə nə daa pɩ̀ʋ́ tə nə, pɩ̀ʋ́ tə nə jələ ʋ yuu wá, ma le Yɩɩ tʋtʋnʋ tə, ʋ wʋ́: «Ba-Yígúrə́-Jə-Tiu nə swə ʋ fwa təkuri lanworu tə wa, kʋ tə n nə swɩ̀n tə wàá kʋ tʋŋa naaa?» Elize pìí ʋ le, ʋ wʋ́: «N wá na kʋ də n yɩ́á, yá n nə bá twá də́ tə.»Siiri tɩ̀án kwatara tə dəri ba yá ba dəkuu bwálɩ́ tə
3 Dayaran banɩa yà wulə tɩʋ tə mimii nə. Ba swɩ̀n duən con, ba wʋ́: «Bɛ̀ɛ̀ nə pɩn nə ma yanɩ bwálɩ́ kʋ tə wa, kʋ vəli kʋ yí nə tɩan? 4 Nə nə wʋ́, nə wá zʋ tɩʋ tə wa, nə wá tɩ lá, wodiu nə kʋ́ʋ̀ tə̀lə́ lá yɩrɩ. Nə nə kʋ́ʋ̀ mɛn bwálɩ́ kʋ tə wa, nə tə wá tɩ. Nə dàń vələ nə pa nə tɩ̀àn Siiri tɩ̀án kwatara tə nə. Ba nə yá nəba sə nə ya lʋʋ wa, nə wá ya lá, ba nə kʋ́ʋ̀ wá gʋ nəba, sə ba gʋ.» 5 Ba dàń zàn didənbibirə nə, ba vələ Siiri tɩ̀án kwatara dəkuu bwálɩ́ tə con. Ba vəli ba yí lá, də lìù mama tə̀lə́ lá. 6 Yuu-Tiu yà pɩn Siiri tɩ̀án kwatara tə nì kwatara səsen kòrə̀n də səsen zizigu, ndə kwatara púlí nəfarʋ zizigu nə. Yá ba dàń swɩ̀n duən con, ba wʋ́: «À nəŋə Yɩzərayɛlə pɩ̀ʋ́ ŋwɩ́n Ɛtə dwíí pɩ̀ʋ́ tə, də Ezwipətə pɩ̀ʋ́ tə, sə ʋ ma ta nəba.» 7 Ba dàń zàn ba dəri kʋ didənbibirə təntə nə, ba ga yá ba gànsìlə́, də ba səsen, də ba bɩnɛ, ba dəkuu bwálɩ́ tə wa. Ba dəri sə ba jon ba mɩɩ. 8 Dayaran tə vəli ba yí Siiri tɩ̀án dəkuu bwálɩ́ tə nə, ba zʋ gànsìlí don wa, ba də́ ba ga nyʋn. Ba pɛ̀ səbiu, də sɩ́án, də gànàn, ba ja va ba səgə. Ba tə pìí ba bà, ba zʋ gànsìlí tə don wa, ba pɛ̀ zɩla, ba ja va ba səgə.
Yɩɩ jon Samari tɩ̀án dʋŋa də niən tə jɩɩn wa
9 Dayaran tə dàń swɩ̀n duən con, ba wʋ́: «Nətən tə tà yozəŋu nə tʋŋa! Zə̀n dɩɩn tə yɩ ŋwɛn nəzəŋu dɩɩn. Nə nə wà kʋ swɩ̀n nə bɩrɩ, nə nə yá sə tɩa pʋrɩ, sə nə ma swɩ̀n kʋ nə bɩrɩ, ba wá kə nəba càn wa. Sɩ́ʋ́n nə, á bɩ̀àn sə nə va nə swɩ̀n kʋ pɩ̀ʋ́ dìə̀ lɩ̀à con.» 10 Ba vəli ba bon lìù don, ʋ nə cɩ̀ tɩʋ tə mimii nə, ba swɩ̀n ʋ con, ba wʋ́: «Nə vəli nə yí Siiri tɩ̀án kwatara dəkuu bwálɩ́ tə nə, yá nə wà lìù mama nɩ lá. Nə wà lìù sʋgʋ nì lá mɩ́ámɩ́án. Səsen də bɩnɛ nə ba vwə lá, ba ga vìí ba yá ba gànsìlə́ tə də.» 11 Lɩ̀à tə nə cɩ̀ tɩʋ tə mimii tə nə bon ba swɩ̀n kʋ nətʋ tə, pɩ̀ʋ́ kàrá lɩ̀à tə con. 12 Pɩ̀ʋ́ tə zàn tɩtɩn tə nə, ʋ swɩ̀n ʋ tʋ̀tʋ̀nà tə con, ʋ wʋ́: «À wá bɩrɩ aba kʋ tə Siiri tɩ̀án tə nə pɩ̀à ba tʋn nə yɩra. Ba yə̀ə́ də niən gwàrɩ̀ nəba. Kʋ mʋ̀ nə pɩn ba yá ba dəkuu bwálɩ́ tə, ba ga va ba səgə kasɔɔ con. Ba dànɩ̀ də nə naŋa tɩʋ tə nii nə, sə ba wànɩ́ nəba ba ja, ba ga zʋ tɩʋ tə wa.» 13 Pɩ̀ʋ́ tə tʋtʋnʋ don swɩ̀n, ʋ wʋ́: «Nə wá ja səsen bonu səsen tə wa, tə nə ga tɩʋ tə wa. Kʋ nə swə kʋ yɩ nətʋ mama, səsen tə də Yɩzərayɛlə lalʋʋ tə mama nə ga tɩʋ tə wa wá tɩ. Ba mama wá tɩ ba zwɛ̀. Nə dàń wá tʋn bara də səsen bonu təntə, sə nə ma lwarɩ kʋ tə nə tʋn.» 14 Pɩ̀ʋ́ tə pɩn ba tanɩ səsen kòrə̀n bələ ʋ ma tʋn lɩ̀à sə ba pú Siiri tɩ̀án kwatara tə kwa. Ʋ swɩ̀n ba con, ʋ wʋ́: «Á vələ á jə́n!» 15 Tʋntʋna tə tì Siiri tɩ̀án kwatara tə nɛɛ, ba va ba yí Zʋrədɛn mʋnaa tə. Ba nɩ gànàn də zɩla kapʋpʋ, Siiri tɩ̀án kwatara tə nə dəri ba yá cwəŋə tə mama wa. Yá tʋntʋna tə pìí ba bà, ba swɩ̀n kʋ pɩ̀ʋ́ tə con.
16 Samari tɩ̀án dàń nan, ba va Siiri tɩ̀án kwatara dəkuu bwálɩ́ tə wa, ba pɛ̀ ba zɩla tə. Mə kʋ zɩgɩ nətʋ mun kilo fugə də bələ kwənə ma jì səbilugu nədʋ, dipɛn mɩna yiri don mun kilo sapʋa də banɩa kwənə ga jì səbilugu nədʋ, ndə Ba-Yígúrə́-Jə-Tiu nə swɩ̀n kʋ nətʋ. 17 Pɩ̀ʋ́ tə yà pɩn nii lìù tə nə, ʋ nə daa pɩ̀ʋ́ tə nə, pɩ̀ʋ́ tə nə jələ ʋ yuu wá, sə ʋ ywàń tɩʋ tə mimii tə yuu. Yá lalʋʋ tə nɩŋɩ wá ba gʋ mimii tə nii nə, ndə Yɩɩ tʋtʋnʋ tə nə swɩ̀n kʋ nətʋ, máŋá tə wa pɩ̀ʋ́ tə nə twi ʋ con. 18 Cɩ́gá, Yɩɩ tʋtʋnʋ tə yà dí yáá ʋ swɩ̀n yoo təntə pɩ̀ʋ́ tə con, ʋ wʋ́: «Jwɩan máŋá ka tə wa, mun kilo fugə də bələ kwənə wá ya səbilugu nədʋ, dipɛn mɩna yiri don mun kilo sapʋa də banɩa kwənə ga wá ya səbilugu nədʋ, Samari tɩʋ tə mimii nə.» 19 Lìù tə nə daa pɩ̀ʋ́ tə nə yà le Yɩɩ tʋtʋnʋ tə, ʋ wʋ́: «Ba-Yígúrə́-Jə-Tiu nə swə ʋ fwa təkuri lanworu tə wa, kʋ tə n nə swɩ̀n tə wàá kʋ tʋŋa naaa?» Elize yà pìí ʋ le, ʋ wʋ́: «N wá na kʋ də n yɩ́á, yá n nə bá twá də́ tə.» 20 Mə yoo təntə cɩ́gá nə yí wá. Lalʋʋ tə nɩŋɩ wá ba gʋ tɩʋ tə mimii nə.