2 Pɛ̀gá 6

Deriloŋi fwèə́ kʋ tʋ nɩ́á wa

1 Yɩɩ nii sʋ̀sʋ̀nà púlí tə swɩ̀n Elize con, ba wʋ́: «Nə̀ń bwálɩ́ tə nə nə wulə kʋ wa n con yɩ pɩpɩan, kʋ pa nə wàrɩ̀ kʋ wa. 2 Pa nəba cwəŋə, sə nə va Zʋrədɛn mʋnaa tə nii nə, nə lìù mama goŋə yoŋi ʋ ja bà, sə nə ma fwa bwálɩ́ yəbə, nə nə wá ya lá.» Ʋ le, ʋ wʋ́: «Á vələ!» 3 Ba wa lìù don ma swɩ̀n, ʋ wʋ́: «À lòrì mʋ́ sə n kwé nə mʋ̀ n tʋ̀tʋ̀nà tə n ja va.» Ʋ le, ʋ wʋ́: «Awo, à wá va.» 4 Yá ʋ də ba dàń vəli ba yí Zʋrədɛn mʋnaa tə nii nə, ba wulə ba goŋi daran tə. 5 Máŋá tə ba wa lìù don nə wulə ʋ goŋi ʋ yoŋi, ʋ dèrí tə fwèə́ kʋ nan kʋ tʋ nɩ́á tə wa. Ʋ bubwi ʋ wʋ́: «Aaa! À yuu tíú, dèrí tə yɩ à lòrì!» 6 Yɩɩ tʋtʋnʋ tə bwe, ʋ wʋ́: «Yə̀n nə nə kʋ tʋa?» Bɛɛ tə ma bɩrɩ wá bwálɩ́ tə kʋ nə tʋa. Elize dàń goŋi dakukuə, ʋ dɩlɩ kʋ bwálɩ́ tə nə, yá deriloŋi tə zàn kʋ salɩ nɩ́á tə yuu wa. 7 Elize swɩ̀n, ʋ wʋ́: «Ja kʋ n kə n con!» Bɛɛ tə ma te ʋ jɩɩn, ʋ ja kʋ.

Elize pɩn Siiri tɩ̀án kwatara jì lilirən

8 Siiri pɩ̀ʋ́ yà wulə ʋ tɛ kʋ̀ʋ̀ də Yɩzərayɛlə lɩ̀à tə. Ʋ də ʋ tʋ̀tʋ̀nà tə vʋrɩ duən nə, ʋ ga bɩrɩ ba bwálɩ́ tə, ʋ nə pɩ̀à sə ʋ kwatara tə kə ba dəkuu lá. 9 Yɩɩ tʋtʋnʋ tə ma tʋn ʋ swɩ̀n Yɩzərayɛlə pɩ̀ʋ́ tə con, ʋ wʋ́: «Cɩ̀ n tɩ̀àn nə, dàn ká twá kʋ bwálɩ́ təntə nə. Cɩ́gá, Siiri tɩ̀án kwatara tə ken ba dəkuu lá.» 10 Yɩzərayɛlə pɩ̀ʋ́ tə dàń tʋn lɩ̀à ba va ba mɩ̀àn bwálɩ́ təntə, Yɩɩ tʋtʋnʋ tə nə swɩ̀n kʋ yoo. Yɩɩ tʋtʋnʋ tə yàá swɩ̀n bwálɩ́ tə ʋ bɩrɩ Yɩzərayɛlə pɩ̀ʋ́ tə nə, sə pɩ̀ʋ́ tə cɩ̀ ʋ tɩ̀àn nə. Yɩɩ tʋtʋnʋ tə dí yáá ʋ tʋn kʋ nətʋ, nɛɛ kapʋpʋ. 11 Siiri pɩ̀ʋ́ tə bɩcan gugurə. Ʋ bon ʋ tʋ̀tʋ̀nà tə, ʋ swɩ̀n ba con, ʋ wʋ́: «Á bá swɩ̀n nə wa lìù tə nə də́ tɩjaŋa Yɩzərayɛlə pɩ̀ʋ́ tə con, á bɩrɩ nə?» 12 Ʋ tʋ̀tʋ̀nà tə wa lìù don le, ʋ wʋ́: «Lìù nətʋ tə̀lə́ nə wa, à yuu tíú pɩ̀ʋ́! Kʋ dàń nə yɩ Yɩɩ nii sʋ̀sʋ̀nʋ̀ Elize, ʋ nə wulə Yɩzərayɛlə lʋʋ wa! Ʋ mʋ̀ nə wàá sʋ̀ràn tə tətə n nə swɩ̀n n dipənə tə wa, ʋ swɩ̀n ʋ bɩrɩ Yɩzərayɛlə pɩ̀ʋ́ tə nə.» 13 Siiri pɩ̀ʋ́ tə ma swɩ̀n, ʋ wʋ́: «Á vələ á na bwálɩ́ tə ʋ nə wulə, sə à pa ba va ba ja wá.» Ba twi ba swɩ̀n ʋ con də Elize wulə Dotan tɩʋ tə wa. 14 Pɩ̀ʋ́ tə tʋn kwatara púlí nəfarʋ, də səsen, də səsen kòrə̀n, ba va tɩtɩn nə, ba kɩkarɩ tɩʋ tə ba kə titəŋi wa. 15 Yɩɩ tʋtʋnʋ Elize tʋtʋnʋ nan jɩjʋ fuən fuən, ʋ na kwatara tə, də səsen tə, də səsen kòrə̀n tə, tə kɩkarɩ tɩʋ tə. Ʋ swɩ̀n Yɩɩ tʋtʋnʋ tə con, ʋ wʋ́: «Aaa! À yuu tíú, nə wá fwa nətə?» 16 Yɩɩ tʋtʋnʋ tə le, ʋ wʋ́: «Dàn ká pa fən ja mʋ́! Lɩ̀à tə nə wulə də nəba dánɩ́ dwə lɩ̀à tə nə wulə də ba.» 17 Elize lòrì Yɩɩ, ʋ wʋ́: «Ba-Yígúrə́-Jə-Tiu, à lòrì sə n pori ʋ yɩ́á, sə ʋ wànɩ́ ʋ na lá!» Ba-Yígúrə́-Jə-Tiu pori Elize tʋtʋnʋ tə yɩ́á, yá ʋ dàń nɩ də paan tə yuu mama súə́ də səsen, də mən səsen kòrə̀n, tə kɩkarɩ Elize.

18 Siiri tɩ̀án tə nə nyɩ́n ba bɩ̀àn Elize nə, ʋ lòrì Ba-Yígúrə́-Jə-Tiu, ʋ wʋ́: «À lòrì mʋ́ sə n pa kwatara púlí kʋ tə jì lilirən!» Yá Ba-Yígúrə́-Jə-Tiu pɩn ba jì lilirən, ndə Elize nə swɩ̀n kʋ nətʋ. 19 Elize dàń swɩ̀n ba con, ʋ wʋ́: «Cwəŋə tə̀lə́ yəbə. Kʋ tà tɩʋ kʋ tə nə ba bɩrɩ aba. Á pwíə́ à kwa, sə à ja aba à va bɛɛ tə con, á nə pɩ̀à!» Yá Elize dàń ja ba ʋ va Samari tɩʋ tə wa. 20 Máŋá tə ba nə zʋa Samari tɩʋ tə wa, Elize kʋ́ʋ̀ swɩ̀n, ʋ wʋ́: «Ba-Yígúrə́-Jə-Tiu, pori bara ba tə yɩ́á, sə ba pìí ba na lá!» Ba-Yígúrə́-Jə-Tiu pori ba yɩ́á, ba ga na də ba yɩ ba wulə Samari tɩʋ tə titəŋi wa. 21 Yɩzərayɛlə pɩ̀ʋ́ tə nə nɩ ba, ʋ bwe Elize, ʋ wʋ́: «À nyɩna, à mɛ sə à gʋ ba naaa?» 22 Ʋ ma le pɩ̀ʋ́ tə, ʋ wʋ́: «Dàn ká gʋ ba! N nə yàá ta kʋ̀ʋ̀ də n kwatara sɩ̀ʋ́ tə, də n twan tə, n nə jɩn lɩ̀à n kə bandiə wa, n yàá gʋ ba naaa? Pa ba wodiu ba də́, n ga pa ba nɩ́á ba nyʋn. Kʋ kwa nə, sə n yá ba, sə ba pìí ba va ba yuu tíú tə con.» 23 Yɩzərayɛlə pɩ̀ʋ́ tə pɩn ba wodiu zənzən ba də́, ba ga nyʋn. Kʋ kwa nə, ʋ yá ba ʋ pa ba pìí ba va ba yuu tíú tə con. Kʋ nə zɩgɩ máŋá təntə wa, Siiri tɩ̀án kwatara tə kʋ́ʋ̀ wà pìí ba bà Yɩzərayɛlə lʋʋ nii tə wa.

Niən jə Samari tɩ̀án

24 Máŋá don wa, Siiri pɩ̀ʋ́ Bɛn-Hadadə ken ʋ kwatara tə mama duən yáá, ʋ ja va ʋ pú Samari tɩʋ tə nə. 25 Niən dàń yɩn fìú Samari tɩʋ tə wa zənzən. Siiri tɩ̀án púə́ tɩʋ tə nə, kʋ pa bɩ̀nà yuu kwənə yà yɩ wárʋ́ səbilurən sapwɩnɩa, yá nasara gunponi bàń jɩguli yii kwənə yà yɩ wárʋ́ səbilurən bonu.

26 Dɩɩn don nə, Yɩzərayɛlə pɩ̀ʋ́ tə twá tɩʋ tə biritaŋʋ tə yuu ʋ kɛ̀ń, kan don ma bubwi ʋ kə ʋ nə, ʋ wʋ́: «À yuu tíú pɩ̀ʋ́, bà jon nə!» 27 Pɩ̀ʋ́ tə ma bwe wá, ʋ wʋ́: «Ba-Yígúrə́-Jə-Tiu nə wà mʋ́ jon, bɛ̀ɛ̀ nə à wá ma jon mʋ́? Mɩna də divɛn kʋ́ʋ̀ tə̀lə́ sə à ma jon mʋ́.» 28 Pɩ̀ʋ́ tə tə swɩ̀n ʋ con, ʋ wʋ́: «Bɛ̀ɛ̀ nə n pɩ̀à?» Kan tə le, ʋ wʋ́: «Kan wà tə nə swɩ̀n à con, sə nə də́ à bìú tə zə̀n kʋ tə, jwɩan nə, sə nə də́ ʋ də bìú tə. 29 Nə ma sàn à bìú tə nə də́. Yá kʋ tɩpʋrɩ nə, à nə swɩ̀n ʋ con, sə ʋ pa ʋ bìú tə sə nə də́, ʋ mʋ̀ dàń səgə ʋ bìú tə.» 30 Máŋá tə pɩ̀ʋ́ tə nə nì kan təntə sʋ̀ràn tə, ʋ kàrɩ́ ʋ tətə gànàn. Pɩ̀ʋ́ tə yà yɩ ʋ twá biritaŋʋ tə yuu ʋ kɛ̀ń, yá lalʋʋ tə nɩ wá də ʋ zʋa ganlɔɔ, kʋ marɩ ʋ yatana nə, ʋ gànàn tə də̀ń nə. 31 Pɩ̀ʋ́ tə swɩ̀n, ʋ wʋ́: «À nə wà Swafatə bìú Elize yuu goŋi zə̀n kʋ tə, sə Yɩɩ cʋ̀gʋ̀ à yáá də à kwa!»

Yɩɩ nii sʋ̀sʋ̀nʋ̀ Elize swɩ̀n də niən tə wa zwɛ̀

32 Elize yà jə̀ə́ ʋ dìə̀ wa, tɩʋ tɩ̀án tə ga jə̀ə́ ba kɩkarɩ wá. Pɩ̀ʋ́ tə ma tʋn lìù ʋ con. Yá máŋá tə tʋntʋnʋ tə tə nə wà yí, Elize swɩ̀n tɩʋ tɩ̀án tə con, ʋ wʋ́: «Á nəŋə lagʋrʋ bìú wà tə nə, ʋ tʋn lìù sə ʋ goŋə à yuu. Á zurə á yɩra! Máŋá tə tʋntʋnʋ tə nə twi ʋ yí, sə á yigu wá də bòrù tə á kə kàrá wa, á ga sun mimii tə. À manwarɩ à nə̀ń ʋ yuu tíú tə nɛɛ dwana ʋ kwa.» 33 Elize yà tə wulə ʋ swɩ̀n, də nə̀ń tʋntʋnʋ tə ʋ twi ʋ swɩ̀n Elize con, ʋ wʋ́: «Də càn tə tə nə yɩ Ba-Yígúrə́-Jə-Tiu nə pɩn tə yí nəba, bɛ̀ɛ̀ yala nə à kʋ́ʋ̀ wàá à janɩ Ba-Yígúrə́-Jə-Tiu con?»