2 Pɛ̀gá 5

Dayarʋ Naman dayaan tə zwɛ̀

1 Naman yà yɩ Siiri pɩ̀ʋ́ kwatara yáá tíú. Ʋ yà nɩ yuywaŋʋ ʋ pɩ̀ʋ́ tə yáá con, pɩ̀ʋ́ tə ga bwɩ ʋ nə zənzən. Cɩ́gá, mə ʋ mʋ̀ nə nə Ba-Yígúrə́-Jə-Tiu twá, ʋ ma pa Siiri tɩ̀án də́ dɩ̀àn. Yá də bɛɛ təntə yà nə jə dun zənzən nətʋ tə mɛ, ʋ yà yɩ dayarʋ. 2 Siiri tɩ̀án kwatara púlə́ duən yà vəli ba ta Yɩzərayɛlə lʋʋ wa, ba ga ja bʋ̀á don ba nan lá ba bà. Bʋ̀á təntə dàń jìgə̀ Naman kan tʋtʋnbʋa. 3 Bʋ̀á tə swɩ̀n kan tə con ʋ nə tɩ wá, ʋ wʋ́: «Aaa! À yuu tíú tə yà nə bwə́lə́ də Yɩɩ nii sʋ̀sʋ̀nʋ̀ tə, ʋ nə wulə Samari nə, ʋ yà wá pa à yuu tíú dayaan tə zwɛ̀!» 4 Naman vəli ʋ swɩ̀n sʋ̀ràn təntə Yɩzərayɛlə lɩ̀à bʋ̀á tə nə swɩ̀n, ʋ bɩrɩ ʋ pɩ̀ʋ́ tə nə. 5 Siiri pɩ̀ʋ́ tə ma swɩ̀n, ʋ wʋ́: «Vəli Samari. À wá tʋn sagɩ Yɩzərayɛlə pɩ̀ʋ́ tə nə.» Naman dàń tì wárʋ́, kʋ nə bwə́lə́ kilo biətwa, də sɩ́án kilo sapwɩtwa, də cànà dɩɩn gànàn fugə, ʋ ga nan ʋ vìí. 6 Ʋ ja sagɩ tə ʋ va ʋ pa Yɩzərayɛlə pɩ̀ʋ́ tə nə. Siiri pɩ̀ʋ́ yà pʋ́pʋ́nɩ́ sagɩ tə wa, ʋ wʋ́: «Máŋá tə n nə nɩ sagɩ kʋ tə, sə n lwarɩ də à mʋ̀ nə tʋn à tʋtʋnʋ Naman n con, sə n zwɛ̀ ʋ dayaan tə.» 7 Máŋá tə Yɩzərayɛlə pɩ̀ʋ́ tə nə kàrɩ̀ sagɩ tə ʋ zwɛ̀, ʋ kàrɩ́ ʋ gànàn ʋ ga swɩ̀n, ʋ wʋ́: «À yɩ Yɩɩ naaa? À wàá à pɩn lìù tɩ, à ga pìí à pɩn wá mɩɩ naaa? Bɛ̀ɛ̀ nə pɩn Siiri pɩ̀ʋ́ ma swɩ̀n sʋ̀ràn tə tə à con, sə à zwɛ̀ bɛɛ dayan? Á nəŋə, ʋ yɩ jara nə ʋ pɩ̀à à nii nə. 8 Máŋá tə Yɩɩ tʋtʋnʋ Elize nə nì də Yɩzərayɛlə pɩ̀ʋ́ tə kàrɩ́ ʋ gànàn, Elize tʋn ʋ swɩ̀n ʋ con, ʋ wʋ́: «Bɛ̀ɛ̀ nə pɩn n ma kàrɩ́ n gànàn? Naman bà à con, yá ʋ wá lwarɩ də Yɩɩ nii sʋ̀sʋ̀nʋ̀ wulə Yɩzərayɛlə lʋʋ wa.» 9 Naman twi ʋ zɩga Elize mimii yáá də ʋ səsen də ʋ səsen kòrù. 10 Elize tʋn tʋntʋnʋ ʋ swɩ̀n Naman con, ʋ wʋ́: «Vəli n swɛ̀ n yɩra nɛɛ barpɛ Zʋrədɛn mʋnaa tə wa, n yɩra yayɩgʋ tə wá zwɛ̀, n ga jì parɩ.» 11 Naman lɩŋa zàn, ʋ ga pìí ʋ vìrí də ʋ swɩ̀n, ʋ wʋ́: «À yà bʋŋa də Yɩɩ nii sʋ̀sʋ̀nʋ̀ tə tətə wá nan à con, ʋ lòrì Ba-Yígúrə́-Jə-Tiu, ʋ Yɩɩ tə, yá ʋ te ʋ jɩɩn, ʋ dwen bwálɩ́ tə nə, kʋ nə yɩ̀ tə, ʋ ga zwɛ̀ à dayaan tə. 12 Abana də Parəparə mʋnɛɛ tə nɩ́á tə Damasə nə, zəni ba Yɩzərayɛlə lʋʋ nɩ́á tə mama dwə naaa? Bɛ̀ɛ̀ nə pɩn à ma ba à yɩra swɛ̀ tə wa, sə à jì parɩ?» Ʋ dàń viviri də lɩŋa, ʋ vìrí. 13 Yá ʋ tʋ̀tʋ̀nà tə bólí ʋ yɩra, ba swɩ̀n ʋ con, ba wʋ́: «À nyɩna, Yɩɩ nii sʋ̀sʋ̀nʋ̀ tə yà nə swɩ̀n sə n fwa won kʋ nə cà, n yà bá fwa kʋ naaa? Yá kʋ yɩ nɩ́á cɩcɩ nə ʋ wʋ́ swɛ̀, sə n ga jì parɩ: N yà mɛ sə n sɛ̀ n fwa kʋ!» 14 Ʋ dàń cúə́ ʋ li ʋ tɩ̀àn Zʋrədɛn mʋnaa tə wa nɛɛ barpɛ, ndə Yɩɩ tʋtʋnʋ tə nə swɩ̀n nətʋ. Yá ʋ jìgə̀ parɩ, ʋ yɩra tə ga jì ndə bisɩmaa yɩra nə.

15 Ʋ də ʋ kwa lɩ̀à tə mama pìí ba bà Yɩɩ tʋtʋnʋ tə con. Máŋá tə ba nə yí lá, ʋ vəli ʋ zɩga Yɩɩ tʋtʋnʋ tə yáá con, ʋ ga swɩ̀n, ʋ wʋ́: «Sɩ́ʋ́n nə, à dàń yə̀ə́ də Yɩɩ tə̀lə́ tɩa yuu bwálɩ́ don mama nə, də kʋ nə tà Yɩzərayɛlə lʋʋ wa. À dàń lòrì mʋ́, sə n jon à mʋ̀ n tʋtʋnʋ tə zìlə́ won.» 16 Elize le, ʋ wʋ́: «À dùə̀ də Ba-Yígúrə́-Jə-Tiu à nə tʋŋa à pɩn wá, à bá jon won mama!» Naman kalɩ wá sə ʋ sɛ̀ ʋ jon, yá ʋ vɩga. 17 Naman dàń ma swɩ̀n, ʋ wʋ́: «N nə vɩga à zìlə́ won tə mʋ̀, à lòrì sə n pa ba lɩ n lʋʋ nii tə tɩran ba pa nə, tə nə mɛ səsen bələ zɩŋʋ. Cɩ́gá, à mʋ̀ n tʋtʋnʋ tə kʋ́ʋ̀ ba pɩ̀à sə à pìí à fwa jwəŋə ba nə sʋ̀rɩ́, nə à yə̀ə́ jwəŋə duən à pa woŋwanan nə, də kʋ nə tà Ba-Yígúrə́-Jə-Tiu cɩcɩ nə. 18 Yá à dàń nə kəni yìə́n lá Ba-Yígúrə́-Jə-Tiu nə, yoo kʋ tə yɩrɩ. Kʋ mʋ̀ nə yɩ máŋá tə à yuu tíú tə nə zʋa, ʋ woŋwanʋ Rimon dìə̀ tə wa, sə ʋ tʋ ʋ nadwana yuu ʋ jʋn kʋ, ʋ mɛ sə ʋ salɩ à vàn yuu. À də ga mɛ sə à tʋ à nadwana yuu Rimon dìə̀ tə wa. À kəni yìə́n lá Ba-Yígúrə́-Jə-Tiu nə, də à nə twá à tʋ à nadwana yuu Rimon dìə̀ tə wa.» 19 Elize swɩ̀n ʋ con, ʋ wʋ́: «Vəli də yazurə.» Naman dàń nan Elize con ʋ vìí.

Dayaan zʋa Gehazi

20 Naman tə yà wà yiŋʋnɩ vəli, də Yɩɩ tʋtʋnʋ Elize tʋtʋnʋ Gehazi bʋ́n ʋ waa con, ʋ wʋ́: «Nə̀ń kʋ nə, à yuu tíú kwɛn Naman, ʋ nə yɩ Siiri tíú, yá ʋ vɩga sə ʋ jon zìlə́ wiən tə Naman nə ja bà. Ba-Yígúrə́-Jə-Tiu wulə! À wá dɩŋɩ ʋ kwa, à jon won ʋ con.» 21 Gehazi dàń púə́ Naman kwa, ʋ dɩŋɩ. Máŋá tə Naman nə viviri ʋ na Gehazi də ʋ dəri ʋ bɩ̀àn, ʋ bɩbarɩ ʋ nan ʋ səsen kòrù tə wa ʋ cú, ʋ va ʋ jəri wá, ʋ ga bwe, ʋ wʋ́: «Kʋ yɩ yazurə?» 22 Ʋ le, ʋ wʋ́: «Kʋ yɩ yazurə! À yuu tíú nə tʋn nə, sə à swɩ̀n n con də, Yɩɩ nii sʋ̀sʋ̀nà púlí tə wa balandʋra bələ nan Efərayimə pɛɛn tə con, ba bà ʋ con sɩ́ʋ́n nətən. Ʋ dàń lòrì sə n pa wárʋ́ kilo fɩtwa, də cànà dɩɩn gànàn bələ, sə ʋ pa ba.» 23 Naman swɩ̀n, ʋ wʋ́: «N dàń zə́n n jon wárʋ́ kilo sapwɩtwa.» Naman kalɩ wá, ʋ pa ba kə wárʋ́ tə kilo sapwɩtwa ganlwaran bələ wa, ʋ súrí cànà dɩɩn gànàn bələ lá, ʋ pa ʋ tʋ̀tʋ̀nà bələ zɩn ba ja ya Gehazi yáá. 24 Ba nə vəli ba yí Ofɛlə* dədolu tə, Gehazi jon wiən tə Naman tʋ̀tʋ̀nà tə jɩɩn wa, ʋ tún ʋ dìə̀ wa, ʋ ga yá ba ba pìí ba vìí. 25 Kʋ kwa nə, Gehazi pìí ʋ bà ʋ yuu tíú Elize con. Elize ma bwe wá, ʋ wʋ́: «Yə̀n nə n nan Gehazi?» Gehazi le, ʋ wʋ́: «À mʋ̀ n tʋtʋnʋ tə wà bwálɩ́ mama vəli.» 26 Yá Elize dàń swɩ̀n ʋ con, ʋ wʋ́: «À pubʋŋa wa, à nɩ bɛɛ tə ʋ nan ʋ səsen kòrù wa ʋ cú, ʋ bà ʋ jəri mʋ́. N bʋŋa də máŋá yí kʋ pa mʋ́ sə n jon səbiu, də gànàn, n ga yə̀ olivə* tɩ̀án kárɩ́, də divɛn tɩ̀án kárɩ́, də vanmɩnɩ, də vanfaran, də tʋtʋnbɩa, də tʋtʋnbwɩɩ naaa? 27 Naman dayaan tə wá tʋ n də n bɩ̀á yɩra máŋá mama wuuu!» Gehazi nan Elize con, də dayaan tʋa Gehazi yɩra, ʋ pɩ̀rɩ̀ ndə nyʋ̀nʋ̀ nə.