Elize san kadənu don nə
4
1 Dɩɩn don nə, Yɩɩ nii sʋ̀sʋ̀nà púlí tə kana tə wa kan don bubwi ʋ kə Elize nə, ʋ wʋ́: «À barɩ tə ʋ nə yɩ n tʋtʋnʋ tɩga. N yə̀ə́ də ʋ mʋ̀ n tʋtʋnʋ tə yà dəri Ba-Yígúrə́-Jə-Tiu fən. Yá lìù don nə yà nə jə ʋ jɩŋɩ dàń twi, sə ʋ ja à bɩ̀á bələ tə, ʋ ma fwa ʋ ywə́ŋə́.» 2 Elize swɩ̀n ʋ con, ʋ wʋ́: «Bɛ̀ɛ̀ nə à wàá à fwa à pɩn mʋ́? Bɩrɩ nə won tə n nə jə n dìə̀ wa.» Kan tə ma le, ʋ wʋ́: «À mʋ̀ n tʋtʋnbʋa tə ba won don mama jə à dìə̀ wa, də kʋ nə tà nʋga kwə̀rə̀ nədʋ.» 3 Elize ma swɩ̀n, ʋ wʋ́: «Vəli n lòrì nʋga kòrì woworən n jənduən tə mama con. Lòrì tə n pa tə ya dánɩ́ ndə n nə wàá nətʋ. 4 Máŋá tə n nə zʋa n dìə̀, n wá sun bòrù tə n də n bɩ̀á tə nii nə. N dàń wá lwá nʋga tə n kəni kòrì tə mama wa, n ga janɩ tə tə nə súə́, n túŋə́ vàn nə.» 5 Kan tə nan Elize con ʋ vìí. Ʋ vəli ʋ sun bòrù ʋ də ʋ bɩ̀á nii nə, ba ga janɩ kòrì tə ba pɩn wá, ʋ lwɛ́ nʋga tə tə wa. 6 Máŋá tə kòrì tə mɛ nə súə́, ʋ swɩ̀n ʋ bìú don con, ʋ wʋ́: «Ja kwə̀rə̀ don n pa nə.» Yá ʋ bìú tə le wá, ʋ wʋ́: «Kwə̀rə̀ don kʋ́ʋ̀ tə̀lə́.» Kʋ máŋá tə wa, nʋga tə cən ka zɩgɩ, ka kʋ́ʋ̀ ba lwɛ́. 7 Kan tə vəli ʋ man kʋ ʋ bɩrɩ Yɩɩ tʋtʋnʋ tə nə. Ʋ ma swɩ̀n kan tə con, ʋ wʋ́: «Vəli n yoli nʋga tə n ma ŋwɩ́n n jɩŋɩ tə, n də n bɩ̀á tə ga tì ka gɩganɩ tə, á ma san á tɩ̀àn nə.Sunɛmə tɩ̀án kan don pɩn yipaa bwálɩ́ Elize nə
8 Dɩɩn don nə, Elize vəli ʋ twá Sunɛmə tɩʋ wa ʋ kɛ̀ń, də kan don yà wulə lá, ʋ nə yɩ dun tíú. Kan tə ma lòrì wá pwəpwə sə ʋ bà ʋ də́ wodiu. Kʋ nə zɩgɩ kʋ dɩɩn təntə nə, máŋá mama Elize nə twi ʋ kɛ̀ń, ʋ yàá twá kan tə con, ʋ də́ wodiu. 9 Kan tə swɩ̀n ʋ barɩ con, ʋ wʋ́: «À yə̀ə́ də bɛɛ wà tə, ʋ nə twi ʋ twá nə con máŋá mama, yɩ Yɩɩ tʋtʋnʋ. 10 Nə lwie dəyuu dìə̀ nəmaa, nə kə gədo, də tabɩlʋ, də gólí, də cànʋ́ ka wa. Ʋ nə twi ʋ twá nə con, sə ʋ pə̀ń dìə̀ təntə wa.»
11 Dɩɩn don nə, Elize kʋ́ʋ̀ twi ba con. Yá ʋ dàń dɩ̀gà dəyuu dìə̀ tə wa, ʋ tígə́ lá. 12 Elize swɩ̀n ʋ tʋtʋnʋ Gehazi con, ʋ wʋ́: «Bon Sunɛmə tɩ̀án kan tə.» Gehazi bon kan tə, ʋ bà ʋ zɩga Gehazi yáá con. 13 Elize swɩ̀n Gehazi con, ʋ wʋ́: «Swɩ̀n ʋ con də ʋ tʋn kajaŋa nə yɩra zənzən. Kʋ mʋ̀ yɩrɩ, bɛ̀ɛ̀ nə ʋ pɩ̀à sə nə tʋn nə pa wá? Ʋ pɩ̀à sə nə swɩ̀n ʋ yoo pɩ̀ʋ́ tə con, nə à yə̀ə́ kwatara yáá tíú tə con?» Kan tə le ʋ wʋ́: «À yɩ à wulə à dwíí tɩ̀án tə titəŋi wa, won wà nə mùrì.» 14 Elize ma swɩ̀n Gehazi con, ʋ wʋ́: «Bɛ̀ɛ̀ nə nə wá fwa nə pa kan tə nə?» Gehazi ma le, ʋ wʋ́: «Haya! Ʋ ba bìú jə, ʋ barɩ də ga kwɩn.» 15 Kʋ kwa nə, Elize kʋ́ʋ̀ swɩ̀n, ʋ wʋ́: «Pìí bon kan tə.» Gehazi ma pìí ʋ bon wá, ʋ bà ʋ zɩga mimii tə nii nə. 16 Elize dàń swɩ̀n kan tə con, ʋ wʋ́: «Bɩnɩ nə, máŋá ka tə wa, də n jə bìú n jɩɩn wa.» Yá kan tə dàń pìí ʋ le, ʋ wʋ́: Ɔɔn ɔɔn! À yuu tíú, Yɩɩ tʋtʋnʋ, dàn ká gɩgarɩ à mʋ̀ n tʋtʋnbʋa tə!»
Sunɛmə tɩ̀án kan tə bìú tə yoo
17 Kan təntə jɩn pùə́, ʋ lɩra bibɛɛ, bɩnɩ tə wa kʋ nə dan lá, máŋá təntə tətə wa, ndə Elize yà nə swɩ̀n kʋ ʋ con nətʋ.
18 Bisɩmaa tə bori. Dɩɩn don nə, ʋ vəli ʋ nyɩna con, ʋ yà nə wulə də lɩ̀à, ba tʋŋa fʋʋ. 19 Ʋ swɩ̀n ʋ nyɩna tə con, ʋ wʋ́: «À yuu yɩ̀! À yuu yɩ̀!» Ʋ nyɩna tə ma swɩ̀n ʋ tʋtʋnʋ con, ʋ wʋ́: «Tì wá n ja va n pa ʋ nuu nə.» 20 Tʋtʋnʋ tə tì wá, ʋ ja va ʋ pa ʋ nuu nə. Bisɩmaa tə pə̀ń ʋ nuu tə nɛɛ wa, kʋ va kʋ yí yɩcaʋ gùlú máŋá, yá ʋ dàń tɩga. 21 Kan tə ja bisɩmaa tə ʋ dɩ̀ ʋ tún Yɩɩ tʋtʋnʋ tə gədo yuu, ʋ ga nan, ʋ sun bòrù bisɩmaa tə nii nə. 22 Ʋ bon ʋ barɩ ʋ swɩ̀n, ʋ wʋ́: «À lòrì sə n pa tʋtʋnʋ nədʋ də bɩnakan nədʋ bà à con. À wá dəri à va Yɩɩ tʋtʋnʋ tə con lala, à ga pìí à bà.» 23 Ʋ barɩ tə ma bwe wá, ʋ wʋ́: «Bɛ̀ɛ̀ nə pɩn n ma vələ ʋ con zə̀n? Kʋ tà candʋan, kʋ ma tà sìə́ dɩɩn.» Kan tə le, ʋ wʋ́: «Kʋ yɩ yazurə.» 24 Kʋ kwa nə, ʋ pɩn ba kə ganpuri bɩnakan tə tàŋá wa, ʋ ga swɩ̀n ʋ tʋtʋnʋ tə con, ʋ wʋ́: «Kə bɩnakan tə cwəŋə wa, sə nə vìí. Dàn ká zɩgɩ cwəŋə wa, də à nə wà n con swɩ̀n sə n zɩgɩ.»
25 Kan tə dàń zʋa cwəŋə, ʋ ma vələ Yɩɩ tʋtʋnʋ tə con, Karəmɛlə paan tə yuu wa. Máŋá tə Yɩɩ tʋtʋnʋ tə nə nɩ wá yiŋʋnɩ, ʋ swɩ̀n ʋ tʋtʋnʋ Gehazi con, ʋ wʋ́: «Nə̀ń Sunɛmə tɩ̀án kan tə nə! 26 N dàń dəri n va n jəri wá, n ga bwe n jə́n ʋ də ʋ barɩ də ba bisɩmaa tə yɩra zurə naaa?» Kan tə le Gehazi, ʋ wʋ́: «Nə mɛ yɩra zurə.» 27 Máŋá tə kan tə nə twi ʋ yí Yɩɩ tʋtʋnʋ tə yɩra paan tə yuu wa, ʋ tʋa tɩa ʋ pùrì Yɩɩ tʋtʋnʋ tə nɛɛ nə. Gehazi yí ʋ yɩra sə ʋ ja wá ʋ kə kwa. Yá Yɩɩ tʋtʋnʋ tə swɩ̀n Gehazi con, ʋ wʋ́: «Yá wá, ʋ yɩ pucʋnɩ nə zʋa wá zənzən, Ba-Yígúrə́-Jə-Tiu ga səgə kʋ nə, ʋ wà pɩn à yəni kʋ.» 28 Kan tə dàń swɩ̀n, ʋ wʋ́: «À yuu tíú, kʋ yɩ à mʋ̀ nə lòrì bìú n con naaa? À wà swɩ̀n à wʋ́ dàn ká gɩgarɩ nə?»
29 Elize swɩ̀n Gehazi con, ʋ wʋ́: Kə voru n tàŋá nə, n ga tì à daduu tə, n ja n jɩɩn wa n ja va. N nə jəri lìù, dàn ká jʋn wá. Lìù nə jʋn mʋ́, dàn ká le wá. N nə yí lá, n wá tún à daduu tə bisɩmaa tə yáá wa.» 30 Bisɩmaa tə nuu ma swɩ̀n Elize con, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə, n də mɩɩ tə ga wulə! À bá pìí à vìí à yá mʋ́!» Elize dàń zàn ʋ twá kan tə nə ʋ vìí. 31 Gehazi yà dí ba yáá ʋ va ʋ tún daduu tə bisɩmaa tə yáá wa, yá ʋ wà kori nì, ʋ ga wà mɩmɩnʋ nɩ, kʋ nə bɩrɩ də ʋ bwin. Ʋ pìí ʋ bà ʋ jəri Elize ʋ swɩ̀n ʋ con, ʋ wʋ́: «Bisɩmaa tə wà bwin.»
32 Máŋá tə Elize nə twi ʋ zʋ dìə̀ tə wa, ʋ nɩ də bisɩmaa tə tɩga ʋ tígə́ ʋ gədo tə yuu. 33 Elize zʋa ʋ sun bòrù tə ʋ də bisɩmaa tə nii nə, ʋ ga lòrì Ba-Yígúrə́-Jə-Tiu. 34 Ʋ dɩ̀gà ʋ pə̀ń bisɩmaa tə yuu, ʋ kə ʋ nii bisɩmaa tə nii nə, ʋ kə ʋ yɩ́á bisɩmaa tə yɩ́á nə, ʋ pú ʋ jɩ̀àn bisɩmaa tə jɩ̀àn wa. Ʋ pə̀ń bisɩmaa tə yuu nətʋ, yá bisɩmaa tə yɩra dàń pìí tə cɛn. 35 Elize zàn ʋ yá bisɩmaa tə, ʋ ga kɩkarɩ dìə̀ tə wa. Kʋ kwa nə, ʋ kʋ́ʋ̀ pìí ʋ dɩ̀ ʋ pə̀ń bisɩmaa tə yuu, yá bisɩmaa tə dàń tɩɩn nɛɛ barpɛ, ʋ ga súrí ʋ yɩ́á. 36 Elize bon Gehazi ʋ swɩ̀n, ʋ wʋ́: «Bon Sunɛmə tɩ̀án kan tə.» Gehazi bon kan tə, ʋ bà Elize con, yá Elize swɩ̀n ʋ con, ʋ wʋ́: «Tì n bìú tə!» 37 Kan tə vəli ʋ tʋ Elize yáá con, ʋ pú ʋ yáá tɩa. Kʋ kwa nə, ʋ zàn ʋ tì ʋ bìú tə, ʋ ja nan.
Gwàlà tə nə wàrɩ̀ tə nywɩn yoo
38 Elize pìí ʋ bà Giləgalə. Kʋ máŋá tə wa, də niən yà wulə lʋʋ nii tə wa zənzən. Yɩɩ nii sʋ̀sʋ̀nà púlí tə yà twi ba jə̀ə́ ʋ yáá con. Ʋ swɩ̀n ʋ tʋtʋnʋ tə con, ʋ wʋ́: «Tanɩ nəkənfarʋ, n ma sàn gwàlà, n pa Yɩɩ nii sʋ̀sʋ̀nà púlí tə nə.» 39 Ba wa lìù don zàn ʋ zʋ kasɔɔ wa, sə ʋ pɩ̀à dwavʋran. Ʋ vəli ʋ na gaʋ divɛn tɩ̀ʋ́ bɩ̀á, ʋ kwa ʋ sú ʋ gànʋ̀. Ʋ nə pìí ʋ bà ʋ yí sàń, ʋ goŋi tə ʋ kə gwàlà tə wa, nəkənə tə wa. Ba yà yəri tə nə yɩ won tə. 40 Ba dàń tarɩ tə, ba pa bara təntə nə. Yá máŋá tə, ba nə ken gwàlà tə ba nii, ba bubwi, ba wʋ́: «Yɩɩ tʋtʋnʋ, tɩan wulə nəkənə tə wa!» Yá ba kʋ́ʋ̀ wà wànɩ́ ba nyʋn gwàlà tə. 41 Elize ma swɩ̀n, ʋ wʋ́: «Á fwaga mun á ja bà!» Ʋ twɛ́n mun tə ʋ kə nəkənə tə wa, ʋ ga swɩ̀n ʋ tʋtʋnʋ tə con, ʋ wʋ́: «Fwa wodiu tə n pa bara tə nə, sə ba də́.» Nəkənə tə wa wiən tə dàń yà wá tə də́.
Elize pɩn dipɛn pùlì
42 Bɛɛ don nan Baalə-Swaliswa ʋ bà. Ʋ yà ja ʋ kárá təntən wobɩa dipɛn ʋ bà, sə ʋ pa Yɩɩ tʋtʋnʋ tə nə. Kʋ yɩn dipɛn mɩna yiri don dipɛn dàlá sapʋa, də mɩdʋra ganlɔɔ wa. Elize swɩ̀n ʋ tʋtʋnʋ tə con, ʋ wʋ́: «Tì tə n ma tara lɩ̀à tə, sə ba də́.» 43 Ʋ tʋtʋnʋ tə le, ʋ wʋ́: «À wá fwa nətə à tara tə à pa lɩ̀à bíí nə?» Yá Elize tə swɩ̀n, ʋ wʋ́: «Tì tə n ma tara lɩ̀à tə, sə ba də́. Cɩ́gá, Ba-Yígúrə́-Jə-Tiu swɩ̀n, ʋ wʋ́: “Ba lìù mama wá də́ ʋ sú, yá tə wá ga lá.”» 44 Ʋ tʋtʋnʋ tə tì dipɛn tə ʋ ma tara lɩ̀à tə, yá ba cɩ́gá dí tə ba sú, ba ga tə gɩganɩ lá, ndə Ba-Yígúrə́-Jə-Tiu nə swɩ̀n kʋ nətʋ.