Yoramə jìgə̀ Yɩzərayɛlə payuu tə pɩ̀ʋ́
3
1 Akabə bìú Yoramə jìgə̀ Yɩzərayɛlə payuu tə pɩ̀ʋ́ Samari nə, Zwida pɩ̀ʋ́ Zozafatə pàrɩ̀ tə bɩna fugə də nana bɩnɩ nə. Ʋ dí pàrɩ̀ tə bɩna fugə də bələ. 2 Ʋ tʋn kʋ tə nə lwara Ba-Yígúrə́-Jə-Tiu yáá con. Kʋ dàń nə wà yɩn, ndə ʋ nyɩna də ʋ nuu nə. Ʋ mʋ̀ gwɛrɩ woŋwanʋ Baalə culu kapan tə, ʋ nyɩna tə yà nə zɩ̀n ʋ zɩgɩ yɩɩ nə. 3 Yá ʋ dàń nə tʋn cʋna tə mʋ̀, Nebatə bìú Zwerobʋamə nə pɩn Yɩzərayɛlə lɩ̀à tʋn. Mə ʋ yɩn nətʋ wuuu, ʋ wà lwàń.Pɩ̀ʋ́ Yoramə ta kʋ̀ʋ də Mʋabə tɩ̀án
4 Mʋabə pɩ̀ʋ́ Meswa yà yɩ vàná ʋ kʋnɩ. Ʋ yà ŋwɩ́n lanpo ʋ pɩn Yɩzərayɛlə pɩ̀ʋ́ nə, də pəbii mʋ̀rʋ̀ bíí, də pabɩran mʋ̀rʋ̀ bíí də tə bɔran mɛ. 5 Yá pɩ̀ʋ́ Akabə tɩan kwa nə, Mʋabə pɩ̀ʋ́ tə zàn ʋ vɩ Yɩzərayɛlə payuu pɩ̀ʋ́ Yoramə nii, ʋ nə jon Akabə yuu nə. 6 Pɩ̀ʋ́ Yoramə dàń nan Samari, ʋ pa ba gàlà Yɩzərayɛlə lɩ̀à kwatara tə mama. 7 Ʋ nan ʋ vələ, ʋ ga tʋn ʋ swɩ̀n Zwida pɩ̀ʋ́ Zozafatə con, ʋ wʋ́: «Mʋabə pɩ̀ʋ́ zàn ʋ vɩ à nii. N wá bà sə nə va nə ta ʋ lʋʋ nii tə naaa?» Zozafatə le, ʋ wʋ́: «À wá va kʋ̀ʋ̀ tə də mʋ́. À kwatara tə də wá va, ndə n kwatara tə nə. À səsen tə də wá va, ndə n səsen tə nə.» 8 Ʋ tə swɩ̀n ʋ súrí lá, ʋ wʋ́: «Cwəŋə kà nə nə wá tì?» Yoramə pɩn ba swɩ̀n ʋ con, də ba wá tì Edomə kasɔɔ lanworu cwəŋə tə.
9 Yɩzərayɛlə pɩ̀ʋ́ də Zwida pɩ̀ʋ́ də Edomə pɩ̀ʋ́ nan ba vìí. Ba tì cwəŋə gugolu don, ba fwa dɩan barpɛ ka wa. Ba nɩ́á twi tə zwɛ̀, sə kwatara tə də vàná tə, tə nə wulə ba kwa nyʋn. 10 Yɩzərayɛlə pɩ̀ʋ́ tə dàń ma swɩ̀n, ʋ wʋ́: «Haya! Ba-Yígúrə́-Jə-Tiu yɩ ʋ ja nə mʋ̀ pɛ̀gá batwa tə ʋ bà yəbə, sə ʋ kə nəba Mʋabə tɩ̀án jɩɩn wa.» 11 Yá Zozafatə bwe, ʋ wʋ́: «Ba-Yígúrə́-Jə-Tiu nii sʋ̀sʋ̀nʋ̀ nədʋ tətə tə̀lə́ yəbə, nə nə wàá ʋ nə nə twá, nə bwe Ba-Yígúrə́-Jə-Tiu naaa?» Yɩzərayɛlə pɩ̀ʋ́ tə tʋ̀tʋ̀nà tə wa tʋtʋnʋ don le, ʋ wʋ́: «Swafatə bìú Elize wulə yəbə. Ʋ mʋ̀ yà nə kəni nɩ́á Eli jɩ̀àn nə, ʋ pɩn ʋ sɩ̀n.» 12 Zozafatə swɩ̀n, ʋ wʋ́: «Ʋ mʋ̀ yə̀ə́ kʋ tə Ba-Yígúrə́-Jə-Tiu nə wá swɩ̀n.» Yɩzərayɛlə pɩ̀ʋ́ tə, də Zozafatə də Edomə pɩ̀ʋ́ dàń vəli, ba yí Elize. 13 Elize swɩ̀n Yɩzərayɛlə pɩ̀ʋ́ tə con, ʋ wʋ́: «À də mʋ́ bɛ̀ɛ̀ nə wulə duən nə? Vəli n bwe n nyɩna tə woŋwanʋ nii sʋ̀sʋ̀nà tə, nə à yə̀ə́ n nuu tə woŋwanʋ nii sʋ̀sʋ̀nà tə.» Yɩzərayɛlə pɩ̀ʋ́ tə dàń swɩ̀n ʋ con, ʋ wʋ́: «Ɔɔn ɔɔn! Kʋ yɩ Ba-Yígúrə́-Jə-Tiu nə van nə mʋ̀ pɛ̀gá batwa tə ʋ ja bà yəbə, sə ʋ kə nəba Mʋabə tɩ̀án jɩ̀àn wa.» 14 Elize swɩ̀n, ʋ wʋ́: «À dùə̀ də Ba-Yígúrə́-Jə-Tiu, ʋ nə yɩ kwatara Yɩɩ, à nə tʋŋa à pɩn wá, də kʋ nə tà Zwida pɩ̀ʋ́ Zozafatə yuu yɩrɩ, à yà bá tan n mʋ̀ con mɩ́ámɩ́án. À yà bá ywàń mʋ́ tətə. 15 Sɩ́ʋ́n nə, á jana gwàgʋ́ á bà á pa nə.» Máŋá tə gwàgʋ́ tə nə wulə ʋ dwí, Ba-Yígúrə́-Jə-Tiu dɩ̀àn tə twi Elize yuu wa. 16 Ʋ swɩ̀n, ʋ wʋ́: «Nəŋə kʋ tə Ba-Yígúrə́-Jə-Tiu nə swɩ̀n: “Á kwɩa vɩla kapʋpʋ nacoru kʋ tə wa! 17 Cɩ́gá, à mʋ̀ Ba-Yígúrə́-Jə-Tiu nə swɩ̀n kʋ, á bá na vʋʋ, á ga bá na dwà, yá nacoru kʋ tə wá sú də nɩ́á, sə á də á vanmɩnɩ, də á vanfaran nyʋn.” » 18 Elize tə swɩ̀n ʋ súrí lá, ʋ wʋ́: «Kʋ nətʋ tə yɩ yobiə Ba-Yígúrə́-Jə-Tiu yáá con. Ʋ wá kə Mʋabə tɩ̀án á jɩ̀àn wa. 19 Á wá də́ dɩ̀àn ba tɩan tə mama yuu wa, tə nə jə dɩ̀àn, də ba tɩfaran tə mama yuu wa. Á wá goŋə tɩ̀ʋ́ nəzəŋu mama á dɩ. Á wá sun nabuliyiə tə mama, á ga pɛ̀ kapana, á sú kárɩ́ nəzəŋə tə mama, á ma cʋ̀gʋ̀ tə.» 20 Jɩjʋ nə, pupwən joŋi fwaŋʋ máŋá wa, nɩ́á nan Edomə con tə bà tə sú lʋʋ nii tə mama.
21 Máŋá tə Mʋabə tɩ̀án mama nə nì də pɛ̀gá batwa bɩ̀àn sə ba ta ba, ba ken ba bara tə mama, ba nə bori ba yí kʋ̀ʋ̀ tɛgʋ, duən yáá. Ba dàń vəli ba kun ba lʋʋ nii tə sɩswɩan nə. 22 Mʋabə tɩ̀án zàn jɩjʋ nə, yá máŋá tə yɩcaʋ nə pɛ́n nɩ́á tə yuu con, ba nɩ də nɩ́á tə yɩ nəsɩan ndə jana nə. 23 Ba swɩ̀n, ba wʋ́: «Kʋ yɩ jana! Pɛ̀gá tə yɩ ba pìí ba ta duən, ba za duən də kwatara sɩ̀án ba gʋ. Sɩ́ʋ́n nə, Mʋabə tɩ̀án-ba, nə vələ nə pɛ̀ ba wiən tə!» 24 Yá máŋá tə ba nə vəli ba yí Yɩzərayɛlə lɩ̀à kwatara tə dəkuu tə bwálɩ́, Yɩzərayɛlə lɩ̀à tə zàn ba ta ba, ba də́ dɩ̀àn ba yuu wa, ba ga dəri Yɩzərayɛlə lɩ̀à tə yáá nə. Yɩzərayɛlə lɩ̀à tə zʋa Mʋabə lʋʋ nii tə wa, ba ta Mʋabə tɩ̀án ba də́. 25 Ba mà ba tɩfaran tə ba dɩ, ba lìù mama tì ʋ kapan, ʋ ja va ʋ dɩ Mʋabə tɩ̀án kárɩ́ tə wa ba nə varɩ, ba pa tə sú də kapana. Ba sùń nabuliyiə tə mama, ba ga goŋə tɩ̀ʋ́ nəzəŋu mama ba dɩ. Kʋ twi kʋ ga Kirə-Hareswɛtə tɩʋ tə cɩcɩ. Kwatara tə nə jə kapadɩlɩ kɩkarɩ kʋ də, ba də́ dɩ̀àn kʋ yuu wa. 26 Mʋabə pɩ̀ʋ́ nə nɩ də kʋ̀ʋ̀ tə dwə ʋ dɩ̀àn, ʋ lɩ kwatara biəyarpɛ, ba nə tɛ də kwatara sɩ̀án ʋ súrí ʋ tɩ̀àn nə, sə ʋ ma tún cwəŋə ʋ va ʋ yí Edomə pɩ̀ʋ́ tə. Yá ʋ wà wànɩ́ ʋ tʋn kʋ nətʋ tə. 27 Mʋabə pɩ̀ʋ́ dàń ma ja ʋ bikwɩa tə, ʋ yà nə mɛ sə ʋ də́ pàrɩ̀ tə ʋ kwa nə, ʋ gʋ ʋ sʋ̀rɩ́ tɩʋ tə biritaŋʋ tə yuu wa. Yoo təntə ken Yɩzərayɛlə lɩ̀à tə pucʋnɩ wa zənzən, kʋ pa ba yá Mʋabə pɩ̀ʋ́ tə, ba ga pìí ba va ba lʋʋ nii wa.