Eli zàn ʋ dɩ̀ Yɩɩ con, Elize ga jon ʋ yuu nə
2
1 Nə̀ń kʋ tə nə tʋn máŋá tə wa, Ba-Yígúrə́-Jə-Tiu nə twá kùlì wa, ʋ tì Eli ʋ ja dɩ̀ yɩɩ nə. Eli də Elize yà nan Giləgalə ba vìrí. 2 Eli ma swɩ̀n Elize con, ʋ wʋ́: «Ba-Yígúrə́-Jə-Tiu tʋn nə Betɛlə nə, n mʋ̀ dàń wá zɩgɩ yəbə.» Elize le ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə, n də mɩɩ tə ga wulə! À bá pìí à yá mʋ́!» Ba mɛ vəli ba yí Betɛlə.3 Yɩɩ nii sʋ̀sʋ̀nà púlí tə ba yà nə wulə Betɛlə nə, nan ba swɩ̀n Elize con, ba wʋ́: «N yə̀ə́ də zə̀n kʋ tə, Ba-Yígúrə́-Jə-Tiu wá tì n yuu tíú tə, ʋ kə yɩɩ nə naaa?» Ʋ le ba ʋ wʋ́: «À də yə̀ə́ kʋ, á pwíə́ á níə́! 4 Eli kʋ́ʋ̀ swɩ̀n Elize con, ʋ wʋ́: «Ba-Yígúrə́-Jə-Tiu tʋn nə Zweriko nə, n mʋ̀ dàń wá zɩgɩ yəbə.» Elize le ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə, n də mɩɩ tə ga wulə! À bá pìí à yá mʋ́!» Ba mɛ vəli ba yí Zweriko.
5 Yɩɩ nii sʋ̀sʋ̀nà púlí tə ba yà nə wulə Zweriko nə, bólí Elize yɩra ba swɩ̀n, ba wʋ́: «N yə̀ə́ də zə̀n kʋ tə, Ba-Yígúrə́-Jə-Tiu wá tì n yuu tíú tə, ʋ kə yɩɩ nə naaa?» Ʋ le ba ʋ wʋ́: «À də yə̀ə́ kʋ, á pwíə́ á níə́! 6 Eli kʋ́ʋ̀ swɩ̀n ʋ con, ʋ wʋ́: «Ba-Yígúrə́-Jə-Tiu tʋn nə Zʋrədɛn mʋnaa tə con, n mʋ̀ dàń wá zɩgɩ yəbə.» Elize le ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə, n də mɩɩ tə ga wulə! À bá pìí à yá mʋ́!» Yá ba mɛ bələ dàń wulə cwəŋə tə wa, ba vəli.
7 Yɩɩ nii sʋ̀sʋ̀nà púlí tə wa lɩ̀à finu twi, ba zɩga ba bwə́lə́ Eli də Elize, ba də bələ tə ga zɩga Zʋrədɛn mʋnaa tə nii nə. 8 Eli dàń ma lɩ ganzwɩdarʋ, ʋ pipini ʋ kə duən nə, ʋ ma mà nɩ́á tə, tə ga pwɛ̀ duən wa, tə va vàn don də vàn don nə. Yá ba mɛ bələ vəli tɩkʋrʋ yuu ba kɛ̀ń. 9 Máŋá tə ba nə bɩn ba zwɛ̀, Eli swɩ̀n Elize con ʋ wʋ́: «Lòrì won tə n nə pɩ̀à, sə à tʋn à pa mʋ́, də Yɩɩ tə wà nə tì ʋ yá mʋ́.» Elize le ʋ wʋ́: «À lòrì sə n pa nə, n Yɩɩ nii sʋ̀sʋ̀nʋ̀ dɩ̀àn tə, dəkurən bələ!» 10 Eli le, ʋ wʋ́: «N lòrì won kʋ yoo nə cà. Yá n dàń nə wànɩ́ n na nə, máŋá tə wa Yɩɩ nə wá tì nə, ʋ yá mʋ́, n wá na kʋ tə n nə lòrì tə. Kʋ nə tà nətʋ mʋ̀, n bá na kʋ tə n nə lòrì tə.»
11 Máŋá tə, ba tə nə wulə cwəŋə tə wa ba vəli, də nə̀ń mən səsen kòrù, də mən səsen nə, tə twi tə pwɛ̀ ba duən nə. Yá Eli dàń twá kùlì wa, ʋ dɩ̀ yɩɩ. 12 Elize nə nɩ kʋ nətʋ tə, ʋ bubwi ʋ wʋ́: «À nyɩna! À nyɩna! N yɩ Yɩzərayɛlə səsen kòrə̀n tə mama, də kʋ səsədɩra tə mama!» Kʋ kwa nə, ʋ kʋ́ʋ̀ ba Eli na. Elize dàń jɩn ʋ tətə gànàn tə ʋ kàrɩ́ duən wa bələ. 13 Ʋ tì ganzwɩdarʋ tə, Eli nə dʋgʋ kʋ tʋ. Kʋ kwa nə, ʋ pìí ʋ va ʋ zɩga Zʋrədɛn mʋnaa tə nii nə. 14 Ʋ ja ganzwɩdarʋ tə Eli nə dʋgʋ kʋ tʋ, ʋ ma mà nɩ́á tə, ʋ ga swɩ̀n ʋ wʋ́: «Ba-Yígúrə́-Jə-Tiu, Eli Yɩɩ tə wulə yə̀n nə?» Ʋ də kʋ́ʋ̀ mà nɩ́á tə, tə ga pwɛ̀ tə va vàn don, də vàn don nə. Yá Elize vəli ʋ kɛ̀ń. 15 Yɩɩ nii sʋ̀sʋ̀nà púlí tə, ba yà nə wulə Zweriko nii nə, nɩ kʋ tə Elize nə tʋn, ba ga swɩ̀n, ba wʋ́: «Yɩɩ nii sʋ̀sʋ̀nʋ̀ dɩ̀àn tə, tə yà nə wulə də Eli, dàń wulə də Elize də.» Ba vəli ba jəri wá, ba tʋ ba nadwana yuu, ʋ yáá con. 16 Ba swɩ̀n ʋ con, ba wʋ́: «Nə̀ń, nə jə babɩran finu ba nə wulə nə titəŋi wa. Ba wá va ba twarɩ n yuu tíú tə! Kʋ wàá də dɩɩn don, Ba-Yígúrə́-Jə-Tiu Siŋu tə nə tì wá, kʋ ja wá kʋ va kʋ dʋgʋ, paan don yuu, nə à yə̀ə́ vara don wa.» Elize swɩ̀n ʋ wʋ́: «Á dànà ká tʋn ba lá!» 17 Yá ba kalɩ wá wuuu, kʋ pa Elize ga ʋ sɛ̀, ʋ wʋ́: «Á pɩan ba va.» Ba dàń tʋn bara finu tə, ba va ba twarɩ Eli dɩan batwa, ba ga wà wá nɩ. 18 Ba pìí ba bà Elize con, də ʋ yà tə wulə Zweriko nə. Ʋ ma swɩ̀n ba con, ʋ wʋ́: «À wà á con swɩ̀n sə á dàn ká va lá?»
Elize kwɛn Zweriko buu don nɩ́á
19 Zweriko tɩ̀án swɩ̀n Elize con, ba wʋ́: «Nə yuu tíú, nə tɩʋ tə ywán ndə n nə na kʋ nətʋ. Yá nə nɩ́á tə ba ziən, kʋ pa nə lʋʋ nii tə wiən ba bɩ.» 20 Ʋ swɩ̀n ba con, ʋ wʋ́: «Á pɩ̀à zʋdʋan á kə nəkuən ka wa, á ja bà á pa nə.» Ba pɩn wá zʋdʋan tə də ka wa nəkuən tə. 21 Ʋ nan ʋ va nabuliyii tə nii nə, ʋ dɩlɩ nəkuən tə nɩ́á tə wa, ʋ ga swɩ̀n ʋ wʋ́: «Ba-Yígúrə́-Jə-Tiu nə swɩ̀n də ʋ kwɛn nɩ́á tə. Tə kʋ́ʋ̀ bá pa lɩ̀à tɩ, tə kʋ́ʋ̀ bá pa wiən ba bɩ.» 22 Kʋ nə zɩgɩ kʋ dɩɩn tə nə, nɩ́á tə jìgə̀ nazəŋə, ndə Elize nə swɩ̀n kʋ nətʋ.
Elize zɩrɩ ʋ kə Betɛlə tɩ̀án bisɩmabarɩ nə
23 Elize nan Zweriko ʋ ma vələ Betɛlə. Máŋá tə ʋ nə wulə cwəŋə wa, bisɩmabarɩ nan tɩʋ tə wa ba wulə ba fʋfʋlɩ wá. Ba yà swɩ̀n ba wʋ́: «Dɩ̀ yupələpo tíú! Dɩ̀ yupələpo tíú!» 24 Elize pìí ʋ ywàń ba, ʋ ga zɩrɩ ʋ kə ba nə, də Ba-Yígúrə́-Jə-Tiu yɩrɩ. Kənyenkurən bələ dàń nan gaʋ tə wa, tə dɩŋa bisɩmabarɩ tə wa lɩ̀à sapwilə də bələ, tə ca duən wa. 25 Elize zɩgɩ lá nə, ʋ va Karəmɛlə paan tə yuu, ʋ kʋ́ʋ̀ pìí ʋ nan Karəmɛlə paan tə yuu, ʋ bà Samari.