Bələ nii Pɛ̀gá
Yɩzərayɛlə pɩ̀ʋ́ Ahazɩa yɩŋa də ʋ tɩan yoo
1
1 Pɩ̀ʋ́ Akabə tɩan kwa nə, Mʋabə tɩ̀án zàn ba vɩ Yɩzərayɛlə lɩ̀à nii.2 Dɩɩn don nə, pɩ̀ʋ́ Ahazɩa nan ʋ dəyuu dìə̀ təkurə wa, ʋ tʋ tɩa ʋ cʋ̀gʋ̀ zənzən, Samari nə. Ʋ dàń ma tʋn tʋntʋna, ʋ swɩ̀n ba con, ʋ wʋ́: «Á vələ á bwe Ekəron tɩ̀án woŋwanʋ Baalə-Zebubə á jə́n à wá pìí à na yazurə, à tʋrɩ kʋ tə kwa nə naaa?» 3 Ba-Yígúrə́-Jə-Tiu malɩka dàń swɩ̀n Eli con, ʋ nə yɩ Tiswəbe tíú ka wʋ́: «Zàn n va n jəri Samari pɩ̀ʋ́ tʋntʋna tə, n bwe ba n jə́n, kʋ yɩ Yɩɩ tə̀lə́ Yɩzərayɛlə lʋʋ wa, ba ma vələ sə ba bwe, ba lwarɩ yoo Ekəron tɩ̀án woŋwanʋ Baalə-Zebubə con naaa? 4 Kʋ mʋ̀ nə pɩn, nəŋə kʋ tə Ba-Yígúrə́-Jə-Tiu nə swɩ̀n Yɩzərayɛlə pɩ̀ʋ́ tə con. Ʋ bá pìí ʋ zàn ʋ gədo tə yuu, ʋ nə tígə́, ʋ cú tɩa. Cɩ́gá, ʋ wá tɩ, kʋ ba tʋ́tʋ̀ná jə.» Kʋ kwa nə, Eli vìí.
5 Ahazɩa tʋntʋna tə pìí ba bà ʋ con, ʋ ma bwe ba, ʋ wʋ́: «Bɛ̀ɛ̀ nə pɩn á pìí á bà?» 6 Ba le, ba wʋ́: «Bɛɛ don nə twi, ʋ jəri nəba, ʋ swɩ̀n nə con, ʋ wʋ́ nə pìrə́ nə va nə swɩ̀n sʋ̀ràn tə tə n mʋ̀ pɩ̀ʋ́ con, n nə tʋn nəba, də Ba-Yígúrə́-Jə-Tiu nə swɩ̀n də, kʋ yɩ Yɩɩ nə tə̀lə́ Yɩzərayɛlə lʋʋ wa, n ma tʋŋa tʋntʋna, sə ba va ba bwe, ba lwarɩ yoo Ekəron tɩ̀án woŋwanʋ Baalə-Zebubə con? Kʋ mʋ̀ nə pɩn, n bá pìí n zàn n gədo tə yuu, n nə tígə́ n cú tɩa. Cɩ́gá, n wá tɩ, kʋ ba tʋ́tʋ̀ná jə.» 7 Pɩ̀ʋ́ Ahazɩa ma bwe ba, ʋ wʋ́: «Bɛɛ tə ʋ nə twi ʋ jəri aba, ʋ swɩ̀n sʋ̀ràn təntə yà yɩ nətə?» 8 Ba le, ba wʋ́: «Kʋ yɩ bɛɛ ʋ nə zʋa vàná bɔɔ gànʋ̀, ʋ ga vwa tànʋ̀ voru ʋ tàŋá nə.» Ahazɩa dàń swɩ̀n, ʋ wʋ́: «Kʋ yɩ Eli ʋ nə yɩ Tiswəbe tíú!»
9 Pɩ̀ʋ́ tə tʋn kwatara finu yáá tíú, də ʋ kwatara finu Eli con. Ba vəli ba dɩ̀ paan tə yuu, Eli yà nə jə̀ə́ ka yupara wa. Kwatara yáá tíú tə swɩ̀n Eli con, ʋ wʋ́: «Yɩɩ tʋtʋnʋ, pɩ̀ʋ́ tə pɩn nii sə n cú tɩa!» 10 Eli le kwatara finu yáá tíú tə, ʋ wʋ́: «À nə yɩ Yɩɩ tʋtʋnʋ, sə mən nan yɩɩ tə cú tə də́ n də kwatara finu tə, tə gʋ.» Lala də mən nan yɩɩ tə cú tə də́ ʋ də ʋ kwatara finu tə, tə gʋ.
11 Ahazɩa kʋ́ʋ̀ tʋn kwatara finu yáá tíú don, də ʋ kwatara finu Eli con. Kwatara yáá tíú təntə də swɩ̀n Eli con, ʋ wʋ́: «Yɩɩ tʋtʋnʋ, pɩ̀ʋ́ tə pɩn nii sə n cú tɩa lala!» 12 Eli le ba, ʋ wʋ́: «À nə yɩ Yɩɩ tʋtʋnʋ, sə mən nan yɩɩ tə cú tə də́, n də kwatara finu tə, tə gʋ. Lala də Yɩɩ mən tə nan yɩɩ tə cú tə də́, ʋ də ʋ kwatara finu tə, tə gʋ.
13 Ahazɩa kʋ́ʋ̀ tʋn kwatara finu yáá tíú don, də ʋ kwatara finu, nɛɛ batwa nii nə. Nɛɛ batwa nii kwatara finu yáá tíú təntə nə dɩ̀gà ʋ yí Eli, ʋ tʋa Eli yáá con, ʋ ga lòrì wá, ʋ wʋ́: «Yɩɩ tʋtʋnʋ, à lòrì mʋ́ sə n pa à mɩɩ tə, də n tʋtʋnbara finu tə mɩa ja funə tə pa mʋ́! 14 À yə̀ə́ də mən nan yɩɩ nə tə cú tə də́ təntən kwatara finu yáá tɩ̀án bələ tə, də ba lìù mama kwatara finu tə. Yá à mʋ̀ dàń lòrì mʋ́, sə n pa à mɩɩ tə ja funə kʋ pa mʋ́!» 15 Ba-Yígúrə́-Jə-Tiu malɩka tə swɩ̀n Eli con, ka wʋ́: «Zàn sə n də wá cú. Dàn ká pa ʋ fən ja mʋ́.» Eli zàn ʋ də kwatara finu yáá tíú təntə cú pɩ̀ʋ́ tə con. 16 Eli swɩ̀n pɩ̀ʋ́ tə con, ʋ wʋ́: «Nə̀ń kʋ tə Ba-Yígúrə́-Jə-Tiu nə swɩ̀n. N nə tʋn tʋntʋna, sə ba va ba bwe Ekəron tɩ̀án woŋwanʋ Baalə-Zebubə tə, kʋ yɩ ndə Yɩɩ tə̀lə́ Yɩzərayɛlə lʋʋ wa, ba nə wàá yoo ba bwe ʋ con. Kʋ mʋ̀ yɩrɩ nə, n bá pìí n zàn n gədo tə yuu, n nə tígə́ n cú tɩa. Cɩ́gá, n wá tɩ, kʋ ba tʋ́tʋ̀ná jə.» 17 Ahazɩa cɩ́gá tɩga, ndə Ba-Yígúrə́-Jə-Tiu nə pɩn Eli swɩ̀n kʋ nətʋ. Ʋ yà ba bìú jə, yá ʋ nyánʋ́ Yoramə dàń nə dí pàrɩ̀ ʋ yuu nə. Zozafatə bìú Yoramə pàrɩ̀ tə bɩna bələ nii nə, ʋ jìgə̀ Zwida pɩ̀ʋ́. 18 Ba pʋ́pʋ́nɩ́ Ahazɩa tʋ̀tʋ̀nán tə gɩganɩ, də kʋ tə ʋ nə fwa, ba tún Yɩzərayɛlə pɛ̀gá yìə̀n sagɩ tə wa.