2 Pɛ̀gá 9

Ba tún Zwehu sə ʋ ya Yɩzərayɛlə pɩ̀ʋ́

1 Yɩɩ nii sʋ̀sʋ̀nʋ̀ Elize bon Yɩɩ nii sʋ̀sʋ̀nà púlí tə wa lìù don ʋ swɩ̀n ʋ con, ʋ wʋ́: «Vwa voru n tàŋá nə, n ga tì nʋga kúnkwə́lə́ ka tə, n ja n jɩɩn wa, n ja va Ramɔtə, Galadə nagwanaa wa. 2 N wá va n na Zwehu lá nə. Ʋ yɩ Zozafatə bìú, ʋ ga yɩ Niməswi nàʋ́. N wá va n pa ʋ zàn ʋ nubɩa tə wa, n ja wá nan dìə̀ don wa, kwa con. 3 N wá lwá nʋga kúnkwə́lə́ tə ʋ yuu wa, n ga swɩ̀n də Ba-Yígúrə́-Jə-Tiu swɩ̀n ʋ wʋ́: “À tún mʋ́ sə n ya Yɩzərayɛlə pɩ̀ʋ́!” Kʋ kwa nə, n wá súrí bòrù tə, n nan n dəri, kʋ́ʋ̀ dàn ká dàn.» 4 Balandʋrʋ təntə ʋ nə yɩ Yɩɩ nii sʋ̀sʋ̀nʋ̀ nan ʋ va Ramɔtə nə, Galadə nagwanaa wa. 5 Ʋ nə yí lá máŋá tə wa, də kwatara yun tɩ̀án tə yà jə̀ə́ duən yáá. Ʋ ma swɩ̀n, ʋ wʋ́: «Pɩ̀ʋ́, à jə sʋgʋ sə à swɩ̀n n con.» Zwehu bwe wá, ʋ wʋ́: «Nə wàà con nə, n pɩ̀à sə n swɩ̀n?» Yɩɩ nii sʋ̀sʋ̀nʋ̀ tə ma le, ʋ wʋ́: «N tətə pɩ̀ʋ́ con.» 6 Zwehu zàn, ʋ də Yɩɩ nii sʋ̀sʋ̀nʋ̀ tə zʋ dìə̀ tə wa, yá Yɩɩ nii sʋ̀sʋ̀nʋ̀ tə lwá nʋga tə ʋ yuu wa, ʋ ga swɩ̀n ʋ con, ʋ wʋ́: «Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ swɩ̀n də ʋ kúrí mʋ́ ʋ tún, sə n ya Yɩzərayɛlə lɩ̀à tə, ba nə yɩ ʋ mʋ̀ lɩ̀à pɩ̀ʋ́. 7 N mʋ́ nə wá gʋ n yuu tíú Akabə dìə̀ lɩ̀à tə. Yá à dàń wá fwi à lɩŋa Zwezabɛlə yuu wa, à nii sʋ̀sʋ̀nà tə, ba nə yɩ à tʋ̀tʋ̀nà jana tə yɩrɩ, də à mʋ̀ Ba-Yígúrə́-Jə-Tiu tʋ̀tʋ̀nà tə mama jana tə yɩrɩ, ʋ nə lwá. 8 Akabə dìə̀ lɩ̀à tə mama mɛ sə ba tɩ. À tə wá pa Akabə dwíí wa bara tə mama nə tɩ ba tɩ̀àn, də ba tə nə yɩ ywə́ŋə́ tɩ ba zwɛ̀ Yɩzərayɛlə wa. 9 Yá à dàń wá pa Akabə dìə̀ tə jì ndə Nebatə bìú Zwerobʋamə dìə̀ tə nə, də Ahɩya bìú Bayeswa dìə̀ tə nə. 10 Kukuri wá də́ Zwezabɛlə Zwizəreyɛlə kárá tə wa, lìù mama ba gùrì wá.» Kʋ kwa nə, ʋ súrí mimii tə, ʋ nan ʋ dəri ʋ vìí.

11 Máŋá tə Zwehu nə nan ʋ duən pɩ̀ʋ́ tʋ̀tʋ̀nà tə con, ba bwe wá, ba wʋ́: «Kʋ yɩ yazurə? Bɛ̀ɛ̀ nə pɩn nyɩnyaŋʋ ʋ tə ma bà n con?» Zwehu le ba, ʋ wʋ́: «Á tətə yə̀ə́ bɛɛ wa tə sʋ̀ràn nə yɩ nətʋ.» 12 Yá ba tə bwɛ́ ba swɩ̀n Zwehu con, ba wʋ́: «Kʋ yɩ kʋ̀nkʋ̀n n kʋ̀nɩ̀! Swɩ̀n kʋ tə nə tʋn tə, n bɩrɩ nəba.» Zwehu dàń ma swɩ̀n, ʋ wʋ́: «Nəŋə kʋ tə bɛɛ tə nə swɩ̀n à con. Ʋ swɩ̀n də, Ba-Yígúrə́-Jə-Tiu kúrí nə ʋ tún, sə à ya pɩ̀ʋ́ Yɩzərayɛlə lɩ̀à yuu wa.» 13 Lala də ba lìù mama lɩ ʋ gànʋ̀ ʋ kə Zwehu nɛɛ də̀ń, mimii tə nacana tə yuu. Ba wúrí nabwanʋ ba swɩ̀n, ba wʋ́: «Zwehu yɩ pɩ̀ʋ́!»

Zwehu gʋa Yɩzərayɛlə pɩ̀ʋ́ Yoramə

14 Kʋ máŋá tə wa, Zozafatə bìú Zwehu, ʋ nə yɩ Niməswi nàʋ́ zàn ʋ zɩgɩ pɩ̀ʋ́ Yoramə nə. Yoramə də Yɩzərayɛlə lɩ̀à tə mama yà nə tɛ sə ba cɩ̀ Ramɔtə tɩʋ tə nə, Galadə Nagwanaa tə wa, Siiri pɩ̀ʋ́ Hazayɛlə dàn ká jon kʋ. 15 Yá pɩ̀ʋ́ Yoramə mʋ̀ yà pìí ʋ va Zwizəreyɛlə, sə ba ywarɩ ʋ nʋran tə, Siiri tɩ̀án nə ta wá ba tún ʋ yɩra, máŋá tə wa, ʋ nə wulə ʋ tɛ Siiri pɩ̀ʋ́ Hazayɛlə. Zwehu swɩ̀n, ʋ wʋ́: «Də á nii nə wulə à kwa, sə á cɩ̀ sə lìù mama dàn ká nan tɩʋ tə wa, ʋ va ʋ pa yoo kʋ tə ŋwɛn Zwizəreyɛlə wa.» 16 Kʋ kwa nə, Zwehu zʋa ʋ səsen kòrù wa, ʋ va Zwizəreyɛlə. Mə tɩʋ təntə wa nə Yoramə yà tígə́, yá Zwida pɩ̀ʋ́ Ahazɩa də yà twi sə ʋ na wá.

17 Lìù tə nə wulə Zwizəreyɛlə dəyuu didarʋ tə yuu, ʋ ywàŋá tɩʋ tə nə, nɩ lɩ̀à púlí tə, ba də Zwehu nə bɩ̀àn, ʋ ma bon ʋ kə, ʋ wʋ́: «À na lɩ̀à púlí!» Yoramə ma swɩ̀n, ʋ wʋ́: «Tʋn səsədɩrʋ sə ʋ va ʋ jəri ba, ʋ bwe ʋ jə́n, kʋ yɩ yazurə naaa?» 18 Səsədɩrʋ tə vəli ʋ jəri Zwehu, ʋ swɩ̀n, ʋ wʋ́: «Pɩ̀ʋ́ tə bwe sə ʋ jə́n, kʋ yɩ yazurə naaa?» Zwehu ma le wá, ʋ wʋ́: «N nii nan yə̀n yazurə yoo wa? Vəvəri n bà, n pú à kwa.» Lìù tə nə wulə dəyuu didarʋ tə yuu, ʋ ywàŋá tɩʋ tə nə pìí ʋ swɩ̀n, ʋ wʋ́: «Tʋntʋnʋ tə vəli ʋ yí ba, yá ʋ ba pìí ʋ bɩ̀àn.» 19 Yoramə kʋ́ʋ̀ tʋn bələ nii səsədɩrʋ, ʋ va ʋ yí ba, ʋ swɩ̀n, ʋ wʋ́: «Pɩ̀ʋ́ tə bwe sə ʋ jə́n, kʋ yɩ yazurə naaa?» Zwehu ma le, ʋ wʋ́: «N nii nan yə̀n yazurə yoo wa? Vəvəri n bà, n pú à kwa.» 20 Lìù tə nə wulə dəyuu didarʋ tə yuu ʋ ywàŋá tɩʋ tə nə, kʋ́ʋ̀ swɩ̀n, ʋ wʋ́: «Tʋntʋnʋ təntə də vəli, ʋ yí ba, yá ʋ ba pìí ʋ bɩ̀àn. Ba yáá tíú tə vəli yɩ ndə Niməswi nàʋ́ Zwehu vəli nə. Cɩ́gá, ʋ yɩ ʋ vəli ndə nyɩnyaŋʋ nə.»

21 Yoramə dàń ma swɩ̀n, ʋ wʋ́: «À tana à səsen kòrù tə.» Ba ma tanɩ ʋ səsen kòrù tə. Yɩzərayɛlə pɩ̀ʋ́ Yoramə dàń zʋa ʋ səsen kòrù wa, Zwida pɩ̀ʋ́ Ahazɩa də zʋ ʋ səsen kòrù wa, ba ga nan ba vələ, sə ba jəri Zwehu. Ba vəli ba yí wá Nabɔtə, ʋ nə yɩ Zwizəreyɛlə tíú kárá tə wa.

Yɩzərayɛlə pɩ̀ʋ́ Yoramə tɩan yoo

22 Yoramə nə zə́n ʋ na Zwehu, ʋ swɩ̀n, ʋ wʋ́: «Kʋ yɩ yazurə, Zwehu?» Zwehu le, ʋ wʋ́: «Yazurə wá fwa nətə tə ya lá, də n nuu Zwezabɛlə nə wà woŋwanan tə jʋnʋ, də cɩrɩ yìə̀n kapʋpʋ tə nə yá?» 23 Yoramə viviri ʋ dəri ʋ vìrí, ʋ ga swɩ̀n Ahazɩa con, ʋ wʋ́: «Cɩ̀ n tɩ̀àn nə Ahazɩa, kʋ yɩ pwìí bələ yoo!» 24 Yá Zwehu ja ʋ twan, ʋ ma ta Yoramə. Cɩɩn tə jɩn Yoramə vaparan bələ tə pwə́rə́ wa, kʋ pórí ʋ bɩcan kʋ nan ʋ yáá con, yá Yoramə tʋa ʋ səsen kòrù tə wa, ʋ tɩ. 25 Zwehu swɩ̀n Bidəkarə con, ʋ nə daa ʋ nə, ʋ wʋ́: «Lɩ ʋ tɩgɩ tə n dɩ Nabɔtə, ʋ nə yɩ Zwizəreyɛlə tíú kárá tə wa. Cɩ́gá, lìí n tɩ̀àn də máŋá tə à də mʋ́ nə yɩn səsen kòrù wa, nə ja twá ʋ nyɩna Akabə nə, Ba-Yígúrə́-Jə-Tiu swɩ̀n yoo kʋ tə ʋ zɩgɩ ʋ nə, ʋ wʋ́:

26 “À dɩ̀ɩ̀n nɩ Nabɔtə də ʋ bɩ̀á tə n nə gʋa, jana tə. Yá à wá ŋwɩ́n kʋ jɩŋɩ n yɩra, kárá təntə tətə wa. À mʋ̀ Ba-Yígúrə́-Jə-Tiu nii sʋgʋ nə!” Sɩ́ʋ́n nə, n dàń lɩ Yoramə tɩgɩ tə, n dɩlɩ kárá ka tə wa, ndə Ba-Yígúrə́-Jə-Tiu nə swɩ̀n kʋ nətʋ.»

Zwehu gʋa Zwida pɩ̀ʋ́ Ahazɩa

27 Zwida lʋʋ nii pɩ̀ʋ́ Ahazɩa nə nɩ kʋ nətʋ tə, ʋ tì Bɛtə-Hagan cwəŋə tə, ʋ dəri ʋ vìrí, yá Zwehu púə́ ʋ kwa ʋ dɩŋɩ. Zwehu swɩ̀n, ʋ wʋ́: «Á gwɩa ʋ də, ʋ səsen kòrù tə wa.» Yá ba dàń caŋɩ wá Gurə cwəŋə dədolu tə yuu, Yibəleyamə nii nə. Ahazɩa wànɩ́ ʋ dəri ʋ yí Megido, yá mə lá nə ʋ tɩga. 28 Ʋ tʋ̀tʋ̀nà tə tì ʋ tɩgɩ tə də ʋ səsen kòrù tə, ba ja va Zwerizalɛmə. Ba gùrì wá ʋ nyɩna-ba libəri tə wa, Davidə sadiyuu tə wa. 29 Akabə bìú Yoramə pàrɩ̀ tə bɩna fugə də nədʋ nii bɩnɩ tə nə nə, Ahazɩa jìgə̀ Zwida payuu tə pɩ̀ʋ́.

Zwehu pɩn ba gʋ Zwezabɛlə

30 Zwehu zʋa Zwizəreyɛlə wa. Zwezabɛlə nə nì kʋ, ʋ tún kalɩ ʋ yɩ́á nə, ʋ kwɛn ʋ yuu, ʋ ga twá təkurə ʋ ywàŋá. 31 Máŋá tə Zwehu nə zʋa tɩʋ tə mimii tə wa, Zwezabɛlə bon ʋ kə ʋ nə, ʋ wʋ́: «Kʋ yɩ yazurə, Ziməri ləzwənyiri, lìù tə nə gʋa ʋ yuu tíú?» 32 Zwehu zɩ̀n ʋ yáá ʋ te təkurə tə con, ʋ ga swɩ̀n, ʋ wʋ́: «Wàà nii nə wulə à kwa? Wàà nə?» Pɩ̀ʋ́ tʋ̀tʋ̀nà bələ, nə à yə̀ə́ batwa yà zɩga baan, ba ywàŋá ʋ con tɩa. 33 Zwehu ma swɩ̀n ba con, ʋ wʋ́: «Á yigə wá á dɩ tɩa.» Ba ma yigu Zwezabɛlə ba dɩ tɩa. Ʋ tʋa ʋ lá, ʋ jana fan tə tà bírə́ tə, də səsen tə. Yá Zwehu nɩŋɩ wá ʋ kɛ̀ń. 34 Zwehu zʋa pɩ̀ʋ́ sàń tə wa, ʋ də́ ʋ ga nyʋn, yá ʋ swɩ̀n, ʋ wʋ́: «Á naŋa á ywàń kan təntə con, zɩra nə wulə ʋ yuu wa, sə á gùrì wá. Cɩ́gá, ʋ yɩ pabʋa.» 35 Ba nan sə ba tì wá ba gùrì, yá ba wà ʋ nandaʋ don mama nɩ, də kʋ nə tà ʋ yukolu tə, də ʋ napɩra tə də ʋ jɩtala tə cɩcɩ. 36 Ba pìí ba bà ba swɩ̀n kʋ Zwehu con, yá ʋ Zwehu swɩ̀n, ʋ wʋ́: Mə kʋ sʋgʋ təntə nə Ba-Yígúrə́-Jə-Tiu twá də ʋ tʋtʋnʋ Eli, ʋ nə yɩ Tiswəbe tíú, ʋ swɩ̀n, ʋ wʋ́: “Kukuri wá də́ Zwezabɛlə Zwizəreyɛlə kárá tə wa. 37 Zwezabɛlə tɩgɩ tə wá jì pùrú Zwizəreyɛlə kárá tə wa, yá lìù mama bá wànɩ́ ʋ swɩ̀n də kʋ yɩ Zwezabɛlə.”»