2 Pɛ̀gá 10

Zwehu pɩn ba gʋ Akabə dìə̀ lɩ̀à mama

1 Akabə yà jə bɩ̀á sapwɩtwa də fugə Samari nə. Zwehu pʋ́pʋ́nɩ́ saga ʋ tʋn Samari nə, ʋ pa Zwizəreyɛlə pɛ̀gá tə nə, də tɩʋ tɩ̀án tə nə, də Akabə bɩ̀á tə karnyɩna-ba tə nə. Ʋ yà pʋ́pʋ́nɩ́ saga tə wa, ʋ wʋ́: 2 «Á mʋ̀ nə ywàŋá á yuu tíú tə bɩ̀á tə yuu, á jə səsen kòrə̀n də səsen, á wulə tɩʋ wa, ba nə lwə̀ ba kɩkarɩ də biritaŋʋ, á ga jə kwatarɩ zɩla də. Á nə zə́n á na à sagɩ tə, 3 sə á kúrí á yuu tíú tə bɩ̀á tə wa ləzwəzəŋu, ʋ ga yɩ təgətəgə, á jə̀ń ʋ nyɩna padaʋ tə yuu. Kʋ kwa nə, sə á tanɩ á tɩ̀àn, á ta á yuu tíú tə dìə̀ tə yɩrɩ.» 4 Fən zʋa ba zənzən, ba ga swɩ̀n, ba wʋ́: «Pɛ̀gá bələ nə wà wànɩ́ ba zɩgɩ ba ta Zwehu, nə mʋ̀ dàń wá fwa nətə, nə zɩgɩ nə ta wá?» 5 Padiə tə yáá tíú, də tɩʋ tíú, də nəkwɩna tə, də karnyɩna-ba tə tʋn ba swɩ̀n Zwehu con, ba wʋ́: «Nə yɩ n tʋ̀tʋ̀nà, yá nə wá tʋn kʋ tə mama n nə wá pa nii sə nə tʋn. Nə bá tún lìù mama, sə ʋ ya pɩ̀ʋ́! Tʋn kʋ tə nə ywàń də mʋ́.»

6 Zwehu ma kʋ́ʋ̀ pʋ́pʋ́nɩ́ sagɩ don ʋ pa ba, ʋ wʋ́: «Á cɩ́gá nə yɩ à mʋ̀ nə tɩ, á nə zìlí à nii, sə á goŋə á yuu tíú tə bɩ̀á tə mama yun, á ja bà à con jwɩan jɩjʋ nə, máŋá ka tə wa, Zwizəreyɛlə nə.» Pɩ̀ʋ́ tə bɩ̀á sapwɩtwa də fugə tə yà wulə tɩʋ tə ləzwənfaran con, ba kʋ̀nɩ̀ ba. 7 Máŋá tə sagɩ tə nə yí ba, ba jɩn pɩ̀ʋ́ tə bɩ̀á sapwɩtwa də fugə tə ba gʋ, ba goŋi ba yun ba kə fɩyaran wa, ba pa lɩ̀à ja va ba pa Zwehu nə, Zwizəreyɛlə nə. 8 Tʋntʋnʋ twi ʋ swɩ̀n Zwehu con, ʋ wʋ́: «Ba ja pɩ̀ʋ́ bɩ̀á tə yun tə ba bà.» Zwehu ma swɩ̀n, ʋ wʋ́: «Á túŋə́ tə púlə́ bələ, tɩʋ tə mimii nii nə, də tɩa ma pʋrɩ.» 9 Kʋ tɩpʋrɩ jɩjʋ nə, Zwehu nan ʋ zɩgɩ lalʋʋ tə mama yáá con, ʋ swɩ̀n, ʋ wʋ́: «Á mʋ̀ yɩ cɩ́gá tɩ̀án! À mʋ̀ nə zɩgɩ à yuu tíú tə nə, yá à gʋa wá. Wàà dàń nə gʋa ba tə də mama? 10 Á lwara də Ba-Yígúrə́-Jə-Tiu sʋgʋ nədʋ mama, ʋ nə swɩ̀n Akabə dìə̀ tə yuu wa, bá kwɛ̀. Ba-Yígúrə́-Jə-Tiu pɩn kʋ tə ʋ nə twá də ʋ tʋtʋnʋ Eli ʋ swɩ̀n tə nii sú.»

11 Zwehu gʋa Akabə dìə̀ lɩ̀à tə mama, ba nə ga Zwizəreyɛlə wa. Ʋ gʋa ʋ ləzwənfaran tə mama, də ʋ dwíí tɩ̀án tə, də ʋ joŋwana tə. Zwehu wà yá ʋ pa ba ladʋa tətə jɛ́n.

Zwehu pɩn ba gʋ pɩ̀ʋ́ Ahazɩa dwíí tɩ̀án

12 Kʋ kwa nə, Zwehu zʋa cwəŋə, ʋ vələ Samari. Máŋá tə ʋ nə vəli ʋ yí bwálɩ́ tə ba nə boŋə Bɛtə-Ekɛdə,^a 13 ʋ jəri Zwida pɩ̀ʋ́ Ahazɩa dwíí tɩ̀án, ʋ ma bwe ba, ʋ wʋ́: «Á mʋ̀ yɩ bə̀rə́?» Ba le wá, ba wʋ́: «Nə yɩ Ahazɩa dwíí tɩ̀án! Nə vələ sə nə jʋn pakan Zwezabɛlə bɩ̀á tə, də pɩ̀ʋ́ dìə̀ lɩ̀à tə duən tə.» 14 Zwehu swɩ̀n, ʋ wʋ́: «Á jana ba á ja bà də ba nəŋə!» Yá ba dàń jɩn ba də ba nəŋə, ba kə sɩ̀ʋ́ ba bɩan nə, ba ga tì ba tɩga tə ba dɩ Bɛtə-Ekɛdə nɩ́á gwàlʋ́ tə wa, kʋ də̀ń nə lu. Ba yɩn bara sapwilə də bələ, yá Zwehu wà ba ladʋa tətə yá ʋ pa ʋ jɛ́n.

Zwehu də Yonadabə jəri duən

15 Zwehu nə vəli yáá mancɩn, ʋ jəri Rekabə bìú Yonadabə, də ʋ vəli ʋ bɩ̀àn, sə ʋ jəri wá. Zwehu jʋn wá, ʋ ga bwe wá, ʋ wʋ́: «N bɩcan yɩ nəpwon də nə, ndə à bɩcan nə yɩ nəpwon də mʋ́ nətʋ?» Yonadabə le, ʋ wʋ́: «Awo!» Zwehu ma pìí ʋ swɩ̀n, ʋ wʋ́: «Kʋ nə yɩ nətʋ, sə n ja à jɩɩn nə.» Yonadabə jɩn ʋ jɩɩn nə, yá Zwehu van wá ʋ kə ʋ con, ʋ səsen kòrù tə wa. 16 Zwehu swɩ̀n Yonadabə con, ʋ wʋ́: «Bà twá à nə, yá n wá na à nə tʋŋa à pɩn Ba-Yígúrə́-Jə-Tiu nə də yawala nətʋ.» Zwehu ken wá ʋ səsen kòrù tə wa, ʋ ja vìí. 17 Ba nə vəli ba yí Samari, Zwehu gʋa Akabə dìə̀ lɩ̀à tə gɩganɩ tə, ba yà nə wulə lá. Ʋ gʋa ba mama mɩ́ámɩ́án, ndə Ba-Yígúrə́-Jə-Tiu yà nə swɩ̀n kʋ Eli con nətʋ.

Zwehu gʋa Baalə* joŋwana tə

18 Kʋ kwa nə, Zwehu ken lalʋʋ tə mama duən yáá, ʋ swɩ̀n ba con, ʋ wʋ́: «Akabə tʋn ʋ pa woŋwanʋ Baalə nə mancɩn, yá à mʋ̀ Zwehu wá tʋn à pa woŋwanʋ Baalə nə zənzən à doni. 19 Sɩ́ʋ́n nə, á boŋə woŋwanʋ Baalə nii sʋ̀sʋ̀nà tə mama, á pa ba bà à con. Á boŋə lɩ̀à tə mama nə pɩn dun woŋwanʋ Baalə nə, də kʋ joŋwana tə mama, ba ladʋa tətə dàn ká ga. Cɩ́gá, à pɩ̀à sə à fwa joŋi nəfarʋ, à pa woŋwanʋ Baalə nə. Lìù tə mama ʋ nə wà lá yɩn, ʋ yɩ ba wá gʋ.» Zwehu yà tʋŋa swɩan nətʋ, sə ʋ ma gʋ lɩ̀à tə mama mɩ́ámɩ́án, ba nə pɩn dun woŋwanʋ Baalə nə. 20 Zwehu swɩ̀n, ʋ wʋ́: «Á boŋə jə́rə́ nəfarʋ, sə á mama bà duən yáá, á pa dun woŋwanʋ Baalə nə.» Ba tʋn ba swɩ̀n jə́rə́ tə yoo. 21 Zwehu tʋn tʋntʋna Yɩzərayɛlə mama wa, yá lɩ̀à tə mama nə pɩn dun woŋwanʋ Baalə nə dàń twi. Ba ladʋa tətə wà gɛ, ʋ nə wà twi. Ba zʋa ba sú woŋwanʋ Baalə dìə̀ tə nii, kʋ nə zɩgɩ ka də̀ń con, kʋ va kʋ yí ka mimii nə. 22 Zwehu swɩ̀n lìù tə con, ʋ nə ywàŋá joŋwana gànàn tə yuu, ʋ wʋ́: «Lɩ gànàn n pa lɩ̀à tə mama nə, ba nə pɩn dun woŋwanʋ Baalə nə.» Lìù tə nə ywàŋá joŋwana gànàn tə yuu ma lɩ gànàn tə, ʋ pa ba. 23 Zwehu də Rekabə bìú Yonadabə dàń zʋa woŋwanʋ Baalə dìə̀ tə wa. Ʋ swɩ̀n lɩ̀à tə con, ba nə pɩn dun woŋwanʋ Baalə nə, ʋ wʋ́: «Á ywàŋá zəni, á jə́n də Ba-Yígúrə́-Jə-Tiu tʋtʋnʋ nə tə̀lə́ á wa. Kʋ mɛ sə á ya lɩ̀à tə cɩcɩ, á nə pɩn dun woŋwanʋ Baalə nə.» 24 Kʋ kwa nə, ba zʋa sə ba fwa jwəŋə, də jwəŋə ba nə sʋ̀rɩ́*. Zwehu yà zɩgɩ bara sapwɩnɩa kàrá wa, ʋ swɩ̀n ba con, ʋ wʋ́: «Á wa lìù nə pɩn bara tə à nə wá kə á jɩɩn wa nədʋ twá də wá ʋ jɛ́n, kʋ tíú wá tɩ bɛɛ təntə yuu nə ʋ nə jɛ́n.» 25 Máŋá tə ba nə fwa jwəŋə tə ba nə sʋ̀rɩ́ ba zwɛ̀, Zwehu swɩ̀n kwatara tə nə cɩ̀ pɩ̀ʋ́ nə, də ba yun tɩ̀án tə con, ʋ wʋ́: «Á zwɩa á gʋ ba, á dànà ká pa ba ladʋa tətə nan!» Yá ba dàń zʋa ba za ba də kwatara sɩ̀án ba gʋ. Kwatara tə nə cɩ̀ pɩ̀ʋ́ nə, də ba yun tɩ̀án tə dɩlɩ tɩga tə kàrá wa, tɩʋ tə kwa con, ba ga va tɩʋ tə wa, woŋwanʋ Baalə dìə̀ tə nə wulə lá. 26 Ba gùrì woŋwanʋ Baalə culu kapana tə, ba nə zɩ̀n ba zɩgɩ yɩɩ nə, ba dɩ mən wa. 27 Ba yigu kʋ culu kapan tə nə yɩ kʋ joŋi bwálɩ́ ba dɩ, ba gwɛrɩ kʋ dìə̀ tə, ba ga kʋ̀ banbʋʋ ka bwálɩ́ nə. Banbʋʋ təntə tə wulə lá, də zə̀n mama.

Zwehu jìgə̀ Yɩzərayɛlə pɩ̀ʋ́

28 Zwehu pɩn woŋwanʋ Baalə nyʋn Yɩzərayɛlə lʋʋ nii tə wa. 29 Yá də kʋ nətʋ mɛ, ʋ tə wà ʋ tɩ̀àn lɩ cʋna tə wa, Nabatə bìú Zwerobʋamə nə pɩn, Yɩzərayɛlə lɩ̀à tʋn. Kʋ mʋ̀ nə yɩ sɩ́án nabii tə nə wulə Betɛlə, də Dan nə.

30 Ba-Yígúrə́-Jə-Tiu swɩ̀n Zwehu con, ʋ wʋ́: «Kʋ tə à nə pɩ̀à sə kʋ tʋn, à yáá con tə, N tʋn kʋ zəni! N tʋn kʋ tə mama à yà nə pɩ̀à sə à tʋn Akabə dìə̀ tə yɩra. Kʋ mʋ̀ nə pɩn, n bɩ̀á, də n nɩ̀án, də n nanaga wá də́ Yɩzərayɛlə pàrɩ̀, kʋ va kʋ yí n dwíí tə dəkurən banɩa nii nyiən. 31 Yá də kʋ nətʋ mɛ, Zwehu wà Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nii nə twá də ʋ bɩcan mama. Ʋ wà ʋ tɩ̀àn lɩ cʋna tə wa, Zwerobʋamə nə pɩn, Yɩzərayɛlə lɩ̀à tʋn.

32 Kʋ máŋá təntə wa, Ba-Yígúrə́-Jə-Tiu sinti ʋ muŋə Yɩzərayɛlə lʋʋ nii tə. Ʋ pɩn Hazayɛlə ta Yɩzərayɛlə lɩ̀à ʋ də́, ba sɩswɩan tə mama wa. 33 Kʋ nə zɩgɩ Zʋrədɛn mʋnaa tə yɩɩ yipɩan con, ʋ dí dɩ̀àn Galadə nagwanaa tə mama wa, də Gadə nagwanaa tə wa, də Ribɛn nagwanaa tə wa, də Manase nagwanaa tə wa. Ʋ dí dɩ̀àn, kʋ nə zɩgɩ Aroyɛrə nə, Arənon nacoru tə nii nə, kʋ va kʋ yí Galadə də Baswan. 34 Ba pʋ́pʋ́nɩ́ Zwehu tʋ̀tʋ̀nán tə gɩganɩ, də kʋ tə mama ʋ nə fwa, də ʋ babarɩ nə yɩn nətʋ, ba tún Yɩzərayɛlə pɛ̀gá yìə̀n sagɩ tə wa. 35 Zwehu tɩga, yá ba gùrì wá Samari nə, ʋ nyɩna-ba con, ba nə dí yáá ba tɩ. Ʋ bìú Yʋahazə nə dí pàrɩ̀ tə ʋ yuu nə. 36 Zwehu dí Yɩzərayɛlə pàrɩ̀ tə Samari nə, bɩna sapʋa də nana.