Atali jon Zwida payuu tə pàrɩ̀
11
1 Ahazɩa nuu Atali nə nì də ʋ bìú tə tɩga, ʋ də pɩn ba gʋ padwii tə mama. 2 Yá pɩ̀ʋ́ Yoramə bʋ̀á Yehosweba, ʋ nə yɩ Ahazɩa nakʋa jɩn Ahazɩa bìú Zʋasə, ʋ səgə ʋ lɩ pàbɩ̀á tə wa, ba yà nə wulə ba gwɩ. Ʋ səgə bisɩmaa tə, də kan tə ʋ nə kʋ̀nɩ̀ wá, Yɩɩ dìə̀ tə dipənə don wa. Ba səgə bisɩmaa tə Atali yáá nə, kʋ pa ba wà ʋ mʋ̀ gwɩ. 3 Zʋasə də wá səgə Ba-Yígúrə́-Jə-Tiu dìə̀ tə wa, bɩna bardʋ. Kʋ máŋá təntə wa, Atali dàń yà nə də́ pàrɩ̀ lʋʋ nii tə wa.Ba tún Zʋasə sə ʋ ya pɩ̀ʋ́
4 Bɩna barpɛ nii bɩnɩ tə wa, Yɩɩ joŋwanʋ Yehoyada pɩn Kari tɩ̀án kwatara bíí yáá tɩ̀án, də kwatara tə nə cɩ̀ pɩ̀ʋ́ nə bà ʋ con. Ʋ ja ba ʋ zʋ Ba-Yígúrə́-Jə-Tiu dìə̀ tə wa. Ʋ tún nimarʋ də ba, ʋ pa ba dù durə Ba-Yígúrə́-Jə-Tiu dìə̀ tə wa, ʋ ga bɩrɩ ba pabiu tə. 5 Kʋ kwa nə, ʋ pɩn nii kʋ tə, ʋ wʋ́: «Á nəŋə kʋ tə á nə wá tʋn. Á púlí don yàá tʋn sìə́ dɩɩn nə. Kʋ púlí təntə wá pwɛ̀ pulibii batwa. Təntən púlí tə wá cɩ̀ pɩ̀ʋ́ dìə̀ tə nə. 6 Bələ nii púlí tə wá cɩ̀ Surə mimii tə nə. Yá batwa nii púlí tə wá cɩ̀ mimii tə nə, kʋ nə wulə kwatara tə nə cɩ̀ pɩ̀ʋ́ nə tə, kwa con. Á wá tún pulibii batwa təntə, sə tə cɩ̀ padiə tə nə, tə jon duən yuu nə. 7 Á kwatara púlə́ bələ tə duən tə nə ba sìə̀ dɩɩn nə tʋŋa tə, wá cɩ̀ pɩ̀ʋ́ tə nə, Ba-Yígúrə́-Jə-Tiu dìə̀ tə wa. 8 Á lìù mama kwatarɩ zɩla wá ya ʋ jɩɩn wa, á dàń ga cɩ̀ pɩ̀ʋ́ tə nə, á kɩkarɩ. Lìù mama nə dídə́n sə ʋ kalɩ ʋ yí á yɩra, sə á gʋ kʋ tíú. Á wá kɩkarɩ pɩ̀ʋ́ tə máŋá tə ʋ nə naŋa, də máŋá tə ʋ nə zwɩ.»
9 Kwatara bíí yáá tɩ̀án tə tʋn kʋ tə mama, Yɩɩ joŋwanʋ Yehoyada nə pɩn nii sə ba tʋn. Ba lìù mama ken ʋ kwatara tə nə tʋŋa sìə́ dɩɩn nə, də ba tə nə ba tʋŋa sìə́ dɩɩn nə duən yáá. Ba dàń vəli Yɩɩ joŋwanʋ Yehoyada con. 10 Yɩɩ joŋwanʋ tə pɩn pɩ̀ʋ́ Davidə cwiən tə, də ʋ natanan tə, tə yà nə wulə Ba-Yígúrə́-Jə-Tiu dìə̀ tə wa, kwatara bíí yáá tɩ̀án tə nə. 11 Kwatara tə nə cɩ̀ pɩ̀ʋ́ nə tə yà zɩga də kwatarɩ zɩla ba jɩɩn wa, kʋ nə zɩgɩ Yɩɩ dìə̀ tə jɩzən yuu, kʋ va kʋ yí ka jɩgwiə yuu. Ba yà zɩga Yɩɩ joŋi bwálɩ́ tə, də Yɩɩ dìə̀ tə yɩra, ba kɩkarɩ pɩ̀ʋ́ tə. 12 Yɩɩ joŋwanʋ tə pɩn pabiu tə nan. Ʋ púə́ payupuu pabiu tə yuu nə, ʋ ga kə pàrɩ̀ dansɩa wiən ʋ jɩɩn wa. Kʋ kwa nə, ʋ twɛ́n dun nʋga* ʋ yuu wa, ʋ ma tún wá sə ʋ ya pɩ̀ʋ́. Lalʋʋ tə mà jɩ̀àn ba pa pɩ̀ʋ́ tə nə, ba ga swɩ̀n, ba wʋ́: «Yɩɩ wá pa midarɩ pɩ̀ʋ́ tə nə!»
13 Atali nì kwatara tə nə cɩ̀ pɩ̀ʋ́ nə, də lalʋʋ tə zizigu tə, yá ʋ twi lalʋʋ tə con, Ba-Yígúrə́-Jə-Tiu dìə̀ tə wa. 14 Atali ywàń, də nə̀ń pɩ̀ʋ́ tə nə ʋ zɩga gárɩ́ tə yuu, ndə kʋ nə yɩ yofwamɩʋn nətʋ. Kwatara yáá tɩ̀án tə də nabwanwurə tə yà zɩga ʋ səpuni nə. Lʋʋ nii tə lalʋʋ tə mama yà wulə pupwən wa, gwàgá tə ga wúrí nabwanan. Atali kàrɩ́ ʋ tətə gànàn, ʋ ga baa, ʋ wʋ́: «Kʋ yɩ pwìí bələ yoo! Kʋ yɩ pwìí bələ yoo!» 15 Yɩɩ joŋwanʋ Yehoyada ma pa nii kwatara bíí yáá tɩ̀án tə nə, ba nə tɩ kwatara tə, ʋ wʋ́: «Á jana wá á lɩ nə wa. Lìù mama nə púə́ ʋ kwa, sə á za kʋ tíú á gʋ də kwatara sɩ̀ʋ́.» Cɩ́gá, Yɩɩ joŋwanʋ tə yà swɩ̀n, ʋ wʋ́: «Á dànà ká gʋ wá, Ba-Yígúrə́-Jə-Tiu dìə̀ tə wa.» 16 Ba van Atali ba ja twá səsen mimii tə ba nan. Máŋá tə ba nə ja wá ba yí padiə tə, ba gʋa wá, kʋ bwálɩ́ tə wa.
17 Yehoyada tún nimarʋ Ba-Yígúrə́-Jə-Tiu, də pɩ̀ʋ́ tə, də lalʋʋ tə pwə́rə́ wa, sə nimarʋ təntə pa lalʋʋ tə ya Ba-Yígúrə́-Jə-Tiu nə tɩ. Ʋ tə tún nimarʋ pɩ̀ʋ́ tə, də lalʋʋ tə pwə́rə́ wa. 18 Lʋʋ nii tə lalʋʋ tə mama zʋa woŋwanʋ Baalə* dìə̀ tə wa, ba gwɛrɩ kʋ, ba mà kʋ joŋi bwálá tə, də kʋ dɛ̀ɛ̀ ciciri tə ba lwa mɩ́ámɩ́án, ba ga gʋ Baalə joŋwanʋ Matan joŋi bwálá tə yáá con. Yá Yɩɩ joŋwanʋ Yehoyada dàń lɩ lɩ̀à ʋ tún, sə ba cɩ̀ Ba-Yígúrə́-Jə-Tiu dìə̀ tə nə. 19 Kʋ kwa nə, ʋ ken kwatara bíí yáá tɩ̀án tə, də Kari tɩ̀án kwatara tə, də kwatara tə nə cɩ̀ pɩ̀ʋ́ nə, də lalʋʋ tə mama duən yáá nə. Ba lɩ pɩ̀ʋ́ tə Ba-Yígúrə́-Jə-Tiu dìə̀ tə wa, ba ja twá kwatara tə nə cɩ̀ pɩ̀ʋ́ nə mimii tə ba nan, ba bà padiə tə wa. Zʋasə dàń dɩ̀gà ʋ jə̀ə́ padaʋ tə yuu wa. 20 Lʋʋ nii tə lalʋʋ tə mama dàń yà fwa pupwən, yá tɩʋ tə də ga wulə sìə́ wa. Yá ba gʋa Atali mʋ̀ də kwatara sɩ̀ʋ́ padiə tə wa.