Ba tún Zʋasə sə ʋ ya pɩ̀ʋ́
23
1 Bɩna barpɛ nii bɩnɩ tə wa, Yɩɩ joŋwanʋ Yehoyada tʋn wʋdɩʋ yoo. Ʋ pɩn ʋ də kwatara bíí yáá tɩ̀án tə tún nimarʋ. Ba mʋ̀ nə yɩ Yerohamə bìú Azarɩya, də Yohanan bìú Yɩsəmayɛlə, də Obɛdə bìú Azarɩya, də Adaya bìú Maseya, də Zikəri bìú Eliswafatə. 2 Ba mʋ̀ yáá tɩ̀án təntə twá Zwida tɩan tə mama wa, ba kə Levi dwíí tə, də Yɩzərayɛlə dìì tɩ̀án tə duən yáá nə, ba də ba mɛ pìí ba bà Zwerizalɛmə. 3 Yá lalʋʋ tə mama tún nimarʋ də pɩ̀ʋ́ tə, Yɩɩ dìə̀ tə wa. Yehoyada swɩ̀n ba con, ʋ wʋ́: « Nəŋə pɩ̀ʋ́ bìú Zʋasə. Ʋ mʋ̀ nə mɛ sə ʋ də́ pàrɩ̀ tə, ndə Ba-Yígúrə́-Jə-Tiu nə kàn nii sə kʋ ya nətʋ, Davidə bɩ̀á tə yuu wa. 4 Nəŋə kʋ tə á nə wá tʋn. Á wá pwɛ̀ Yɩɩ joŋwana tə, də Levi dwíí tə nə tʋŋa sìə́ dɩɩn tə nə, pulibii batwa. Təntən púlí tə wá cɩ̀ Yɩɩ dìə̀ tə mimien tə nə. 5 Bələ nii púlí tə wá ya pɩ̀ʋ́ dìə̀ tə wa, batwa nii púlí tə ga wá ya Yesodə mimii tə nə. Lalʋʋ tə mama wá ya Ba-Yígúrə́-Jə-Tiu dìə̀ tə dəwoo tə wa. 6 Lìù mama dàn ká zʋ Ba-Yígúrə́-Jə-Tiu dìə̀ tə wa, də kʋ nə tà Yɩɩ joŋwana tə, də Levi dwíí tə nə tʋŋa là. Cɩ́gá, ba mʋ̀ nə yɩ Yɩɩ cɩcɩ nyiən. Lalʋʋ tə mama mɛ sə ba zìlí kʋ sʋgʋ təntə. 7 Levi dwíí tə wá kɩkarɩ pɩ̀ʋ́ tə ba kə ba titəŋi wa, ba lìù mama ga jə ʋ kwatarɩ zɩla ʋ jɩɩn wa. Lìù tə mama ʋ nə zʋa Yɩɩ dìə̀ tə wa, ba mɛ sə ba gʋ wá. Á mɛ sə á ya pɩ̀ʋ́ tə səpuni nə, bwálɩ́ tə mama wa, ʋ nə vələ.»8 Levi dwíí tə, də Zwida dwíí lɩ̀à tə mama tʋn kʋ tə Yɩɩ joŋwanʋ Yehoyada nə pɩn nii sə ba tʋn. Yáá tíú mama ken ʋ kwatara tə nə tʋŋa sìə́ dɩɩn nə, də ba tə nə tʋn ba cú sìə́ dɩɩn nə duən yáá. Cɩ́gá, Yɩɩ joŋwanʋ Yehoyada yà wà sìə́ pɩn púlí nədʋ mama nə. 9 Yɩɩ joŋwanʋ Yehoyada tə pɩn pɩ̀ʋ́ Davidə cwiən tə də ʋ natanan nəfaran də nəmənbii tə, tə yà nə wulə Ba-Yígúrə́-Jə-Tiu dìə̀ tə wa, kwatara bíí yáá tɩ̀án tə nə. 10 Ʋ zɩgɩ kwatara tə, də kwatarɩ zɩla ba jɩɩn wa. Ba nə zɩgɩ dìə̀ tə jɩzən yuu, ba tɩɩn ba va ba yí ka jɩgwiə yuu, Yɩɩ joŋi bwálɩ́ tə yɩra, sə ba ma kɩkarɩ pɩ̀ʋ́ tə.
11 Ba pɩn pabiu tə nan, ba pú payupu ʋ yuu nə, ba ga kə Yɩɩ nimarʋ sagɩ tə ʋ jɩɩn wa. Kʋ kwa nə, ba tún wá sə ʋ ya pɩ̀ʋ́, Yehoyada də ʋ bɩ̀á tə ga twɛ́n dun nʋga* ʋ yuu wa. Ba mà cə̀rí ba swɩ̀n, ba wʋ́: «Pɩ̀ʋ́ tə wulə!»
12 Atali nì lalʋʋ tə zizigu, ba nə dəri də ba bwɩ pɩ̀ʋ́ tə nə. Yá ʋ dàń twi lalʋʋ tə con, Ba-Yígúrə́-Jə-Tiu dìə̀ tə wa.
13 Ʋ ywàń, də nə̀ń pɩ̀ʋ́ tə nə ʋ zɩga gárɩ́ tə yuu, Yɩɩ dìə̀ tə mimii nə. Kwatara yáá tɩ̀án tə, də nabwanwurə tə yà zɩga ʋ səpuni nə. Lʋʋ nii tə lalʋʋ tə mama yà wulə pupwən wa, gwàgá tə ga wúrí nabwanan, yá ba duən ga nuŋə də ba dwí gwaran zɩla ba ma bwɩ pɩ̀ʋ́ tə nə. Atali kàrɩ́ ʋ tətə gànàn, ʋ ga baa, ʋ wʋ́: «Kʋ yɩ pwìí bələ yoo! Kʋ yɩ pwìí bələ yoo!» 14 Yɩɩ joŋwanʋ Yehoyada ma pa kwatara bíí yáá tɩ̀án tə, ba nə tɩ kwatara tə bà, ʋ ga swɩ̀n ba con, ʋ wʋ́: «Á jana wá á lɩ á pwə́rə́ wa. Lìù mama nə púə́ ʋ kwa, sə á za kʋ tíú á gʋ də sɩ̀ʋ́.» Cɩ́gá, Yɩɩ joŋwanʋ tə yà swɩ̀n, ʋ wʋ́: «Á dànà ká gʋ wá, Ba-Yígúrə́-Jə-Tiu dìə̀ tə wa.» 15 Ba van Atali ba ja twá səsen mimii tə ba nan. Máŋá tə, ba nə ja wá ba yí padiə tə, ba gʋa wá kʋ bwálɩ́ tə wa.
16 Yehoyada tún nimarʋ ʋ tətə, də pɩ̀ʋ́ tə, də lalʋʋ tə pwə́rə́ wa, sə kʋ nimarʋ təntə pa lalʋʋ tə ya, Ba-Yígúrə́-Jə-Tiu nyiən. 17 Lalʋʋ tə mama zʋa woŋwanʋ Baalə dìə̀ tə wa, ba gwɛrɩ kʋ, ba mà kʋ joŋi bwálá tə, də kʋ dɛɛ ciciri tə ba lwà, ba ga gʋ Baalə joŋwanʋ Matan, joŋi bwálá tə yáá con. 18 Kʋ kwa nə, Yehoyada tún Levi dwíí Yɩɩ joŋwana tə, sə ba cɩ̀ Ba-Yígúrə́-Jə-Tiu dìə̀ tə nə. Davidə yà tún ba púlə́ púlə́, sə ba fwa jwəŋə tə ba nə sʋ̀rɩ́*, ba pa Ba-Yígúrə́-Jə-Tiu nə, Yɩɩ dìə̀ tə wa, ndə kʋ nə pʋ́pʋ́nɩ́ nətʋ Yɩɩ nii sagɩ tə wa, ʋ nə pɩn Moyizə nə. Ʋ yà pɩn ba nii, sə ba tʋn kʋ tʋtʋŋɩ tə də pupwən nwín. 19 Yehoyada ken mimii nəcɩra tə Ba-Yígúrə́-Jə-Tiu dìə̀ tə mimien tə nii nə, sə durən lìù mama dàn ká zʋ lá. 20 Yehoyada kʋ́ʋ̀ ken kwatara bíí yáá tɩ̀án tə, də dìì tɩ̀án tə, də lalʋʋ tə yáá tɩ̀án tə, də lalʋʋ tə mama duən yáá nə. Ba lɩ pɩ̀ʋ́ tə Ba-Yígúrə́-Jə-Tiu dìə̀ tə wa, ba ja twá baan mimii tə ba nan, ba bà padiə tə wa. Ba dàń jə̀ń Zʋasə padaʋ tə yuu wa. 21 Lʋʋ nii tə lalʋʋ tə mama dàń yà fwa pupwən, yá tɩʋ tə də ga wulə sìə́ wa. Yá ba gʋa Atali mʋ̀ də kwatara sɩ̀ʋ́.