Ahazɩa pàrɩ̀ tə yoo
22
1 Zwerizalɛmə tɩ̀án tún Yoramə bìú nəmaa Ahazɩa, sə ʋ də́ pàrɩ̀ tə ʋ nyɩna yuu nə. Cɩ́gá, Arabə kwatara púlí tə, kʋ nə zʋa Zwida dwíí kwatara tə wa yà gʋa ʋ bɩ̀á nəkwɩna tə mama. Mə kʋ zɩgɩ nətʋ, Yoramə bìú Ahazɩa ma jì Zwida payuu tə pɩ̀ʋ́. 2 Ahazɩa jìgə̀ pɩ̀ʋ́ də ʋ jə bɩna sapʋa də bələ. Yá ʋ dí pàrɩ̀ bɩnɩ nədʋ Zwerizalɛmə nə. Ʋ nuu yɩrɩ yà nə yɩ Atali. Atali yà yɩ Yɩzərayɛlə pɩ̀ʋ́ Oməri dwíí tə wa bʋ̀á. 3 Ahazɩa də twá Akabə dìə̀ lɩ̀à tə nabwɩɩ tə nə. Cɩ́gá, ʋ nuu tə yà pɩn wá kwìə̀ tə nə lwara. 4 Ʋ tʋn kʋ tə nə lwara Ba-Yígúrə́-Jə-Tiu yáá con, ndə Akabə dìə̀ lɩ̀à tə nə. Ʋ nyɩna tə tɩan kwa nə, kʋ yɩ Akabə dìə̀ lɩ̀à nə jìgə̀ ʋ kwenə, kʋ pa càn yí wá. 5 Mə ba kwìə̀ tə nə pɩn ʋ də Yɩzərayɛlə pɩ̀ʋ́ Akabə bìú Yoramə twá duən ba va Ramɔtə, Galadə nagwanaa tə wa, sə ba ta kʋ̀ʋ̀ də Siiri pɩ̀ʋ́ Hazayɛlə. Kʋ̀ʋ̀ tə máŋá wa, Siiri tɩ̀án caŋɩ Yoramə. 6 Ʋ ma pìí ʋ va Zwizəreyɛlə, sə ʋ ywarɩ ʋ nʋran tə, ba nə tún ʋ yɩra Rama nə, máŋá tə wa, ʋ nə ta Siiri pɩ̀ʋ́ Hazayɛlə. Yoramə bìú Ahazɩa, ʋ nə yɩ Zwida pɩ̀ʋ́, dàń vəli Zwizəreyɛlə, sə ʋ na Akabə bìú Yoramə, ba nə caŋɩ wá yɩrɩ.7 Yɩɩ twá Ahazɩa nə vəli sə ʋ na Yoramə tə nə, ʋ ma cʋ̀gʋ̀ Ahazɩa. Máŋá tə Ahazɩa nə yí Yoramə con, ba mɛ nan ba va sə ba jeri Niməswi bìú Zwehu. Yá Ba-Yígúrə́-Jə-Tiu yà tún Zwehu, sə ʋ mʋ̀ nə gʋ Akabə dìə̀ tə ʋ zwɛ̀. 8 Zwehu dàń yà wulə ʋ cʋ̀gà Akabə dìə̀ lɩ̀à tə, ndə Yɩɩ nə pɩn nii nətʋ. Ʋ jeri Zwida dwíí pàbɩ̀á tə, də Ahazɩa zʋna bɩ̀á tə, ba yà nə tʋŋa ba pɩn Ahazɩa nə, yá ʋ gʋa ba. 9 Kʋ kwa nə, ʋ pɩn ba twarɩ Ahazɩa, yá ba jɩn wá Samari nə, də ʋ yà vəli ʋ səgə lá. Ba ja wá ba bà Zwehu yáá con, yá ba gʋa wá. Yá də kʋ nətʋ mɛ, ba tì wá ba gùrì. Cɩ́gá, ba yà swɩ̀n də ʋ yɩ Zozafatə bìú, Zozafatə ga pɩ̀à Ba-Yígúrə́-Tiu, də ʋ bɩcan mama. Lìù mama kʋ́ʋ̀ wà Ahazɩa dwíí tə wa gɛ, ʋ nə wàá pàrɩ̀ ʋ də́.
Atali jon pàrɩ̀ tə də dɩ̀àn
10 Ahazɩa nuu Atali nə nì də ʋ bìú tə tɩga, ʋ də pɩn ba gʋ Zwida dwíí pàbɩ̀á tə mama. 11 Yá ba gʋrɩ tə máŋá wa, pɩ̀ʋ́ bʋ̀á Yehosweba səgə ʋ ja Ahazɩa bìú Zʋasə, də kan tə ʋ nə kʋ̀nɩ̀ wá, ʋ səgə Yɩɩ dìə̀ tə dipənə don wa. Kʋ nətʋ pɩn, Atali wà ʋ mʋ̀ gwɩ. Pɩ̀ʋ́ Yoramə bʋ̀á Yehoswaba, yà yɩ Yɩɩ joŋwanʋ Yehoyada kan, ʋ ga yɩ Zʋasə nakʋa. 12 Zʋasə də lɩ̀à tə nə ywàŋá ʋ yuu səgə Yɩɩ dìə̀ tə wa, bɩna bardʋ. Kʋ máŋá təntə wa, Atali dàń yà nə də́ pàrɩ̀ lʋʋ nii tə wa.