Zʋasə jìgə̀ Zwida payuu pɩ̀ʋ́
24
1 Zʋasə yà jə bɩna barpɛ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna sapwilə Zwerizalɛmə nə. Ʋ nuu yɩ Bɛrəsweba tíú, ʋ yɩrɩ nə yɩ Sɩbɩa. 2 Zʋasə tʋn kʋ tə nə ziən Ba-Yígúrə́-Jə-Tiu yáá con, máŋá tə mama wa Yɩɩ joŋwanʋ Yehoyada nə yɩn lʋʋ wa. 3 Yehoyada swe kana bələ, ʋ pa Zʋasə nə. Zʋasə də ba lɩrɩ bibara kapʋpʋ, də bikana kapʋpʋ.Zʋasə pɩn ba kwɛn Yɩɩ dìə̀ tə
4 Kʋ kwa nə, Zʋasə ken sírí ʋ bɩcan wa, sə ʋ pa ba kwɛn Ba-Yígúrə́-Jə-Tiu dìə̀ tə. 5 Ʋ ken Yɩɩ joŋwana tə, də Levi dwíí tə duən yáá nə, ʋ swɩ̀n ba con, ʋ wʋ́: «Á naŋa, á twá Zwida tɩan tə wa, á lá səbiu Yɩzərayɛlə lɩ̀à tə mama con, sə á ma kwɛn á Yɩɩ dìə̀ tə, bɩnɩ mama. Á kənə dɩ̀àn, á tʋn kʋ yoo təntə lala.» Yá Levi dwíí tə wà bɩbarɩ, sə ba tʋn kʋ yoo tə. 6 Pɩ̀ʋ́ tə dàń ma bon Yɩɩ joŋwanʋ Yehoyada ʋ swɩ̀n ʋ con, ʋ wʋ́: «Bɛ̀ɛ̀ nə pɩn, n ma wà Levi dwíí tə kalɩ, sə ba jon lanpo tə, Ba-Yígúrə́-Jə-Tiu tʋtʋnʋ Moyizə də lalʋʋ tə nə dɩga Yɩzərayələ lɩ̀à yuu wa, sə kʋ ma kwɛn Yɩɩ wúlú gansili tə? 7 Cɩ́gá, Atali, kakʋkwɩʋn təntə də ʋ kwa lɩ̀à tə yá ba pa Yɩɩ dìə̀ tə cʋ̀gʋ̀. Kʋ tə nə dwə, ba tì Yɩɩ dìə̀ tə wa zɩla tə nə yɩ Yɩɩ cɩcɩ nyiən, ba ma tʋn ba pa woŋwanan Baalə tə nə.» 8 Pɩ̀ʋ́ tə pɩn ba fwa səbiu daka ba tún Ba-Yígúrə́-Jə-Tiu dìə̀ tə mimii nə, kàrá wa. 9 Ba pɩn ba bòrì Zwida lʋʋ nii tə wa, də Zwerizalɛmə wa, sə lìù mama ja lanpo tə ʋ bà, ʋ pa Ba-Yígúrə́-Jə-Tiu nə. Yɩɩ tʋtʋnʋ Moyizə nə dɩga kʋ lanpo təntə, Yɩzərayɛlə lɩ̀à tə yuu wa, kasɔɔ lanworu tə wa. 10 Yáá tɩ̀án tə mama, də lalʋʋ tə mama twi də pupwən, ba kə ba lanpo daka tə wa wuuu, ka kori ka sú. 11 Máŋá nə yí sə ba ja daka tə ba bà Levi dwíí tə con, sə pɩ̀ʋ́ tə na kʋ tə nə wulə ka wa, ba nə nɩ də səbiu dáá ka wa zənzən. Lìù tə nə pʋ́pʋ́nɩ́ pɩ̀ʋ́ saga tə, də lìù tə nə ywàŋá Yɩɩ joŋwana yun tɩ̀án nəkwɩa tʋ̀tʋ̀nán tə yuu nə, yàá bà ba lwá səbiu tə, ba ga pìí ba tún daka tə ka bwálɩ́ nə. Mə ba yà fwa nətʋ dɩɩn mama, yá ba ken səbiu zənzən duən yáá nə. 12 Pɩ̀ʋ́ tə, də Yehoyada pɩn səbiu tə tʋ̀tʋ̀nán tə yáá tɩ̀án tə nə, ba nə ywàŋá Ba-Yígúrə́-Jə-Tiu dìə̀ tə tʋ̀tʋ̀nán tə yuu nə. Ba də dàń yàá ja kʋ ba ma tì lɩ̀à tə nə sè kapana, də lɩ̀à tə sè dɛɛ, də ba tə nə tʋŋa də lugu, də cɩnɩan, sə ba kwɛn Ba-Yígúrə́-Jə-Tiu dìə̀ tə, ba pa ka ja dɩ̀àn. 13 Tʋ̀tʋ̀nà tə dàń yà tʋŋa tʋ̀tʋ̀nán tə, ba pɩn tə vəli yáá wuuu, Yɩɩ dìə̀ tə ga pìí ka jə dɩ̀àn, ndə ka fuən nə. 14 Máŋá tə tʋ̀tʋ̀nán tə nə zwɛ̀, ba ja səbiu tə gɩganɩ tə ba bà pɩ̀ʋ́ tə, də Yehoyada yáá con. Ba tì səbiu təntə ba ma fwa tʋtʋnzɩla, ba kə Ba-Yígúrə́-Jə-Tiu dìə̀ tə wa. Tə mʋ̀ nə yɩ wiən tə ba nə ma tʋŋa, də wiən tə ba nə ma fwa jwəŋə tə nə sʋrɩ*, də wùrú zwɩɩn, də sɩ́án zɩla, də wárʋ́ zɩla. Máŋá tə mama Yehoyada nə yɩn lʋʋ wa, ba fwa jwəŋə tə ba nə sʋ̀rɩ́ Ba-Yígúrə́-Jə-Tiu dìə̀ tə wa.
Zʋasə jìgə̀ lìù tə nə vɩ Yɩɩ nii
15 Yɩɩ joŋwanʋ Yehoyada kwɩn zənzən ʋ yí bɩna bíí də fɩtwa, ʋ ga zɩgɩ lá ʋ tɩ. 16 Ba gùrì wá pɛ̀gá libərə bwálɩ́ tə wa, Davidə sadiyuu tə wa. Cɩ́gá, ʋ tʋn zəni Yɩzərayɛlə lɩ̀à tə yɩra, ʋ ga tʋn kʋ tə nə pɩn dun Yɩɩ də ʋ dìə̀ tə nə. 17 Yehoyada tɩan kwa nə, Zwida dwíí pɛ̀gá tə twi ba na pɩ̀ʋ́ tə, ba ga tʋ ʋ yáá con, ba pa wá dun. Pɩ̀ʋ́ tə dàń cʋgʋ ba kwìə̀. 18 Yɩzərayɛlə lɩ̀à tə yá Ba-Yígúrə́-Jə-Tiu, ʋ nə yɩ ba nyɩna-ba Yɩɩ dìə̀ tə, ba ga tʋŋa ba pɩn woŋwanʋ Aswera*, də woŋwanan duən nə. Yɩɩ lɩŋa dàń zàn Zwida dwíí tə, də Zwerizalɛmə tɩ̀án yuu wa, yolwan təntə yɩrɩ ba nə tʋn. 19 Ba-Yígúrə́-Jə-Tiu tʋn ʋ nii sʋ̀sʋ̀nà, sə ba pa Yɩzərayɛlə lɩ̀à tə pìí ba bà ʋ con. Yɩɩ nii sʋ̀sʋ̀nà tə swɩ̀n ba con, yá ba lìù mama wà Yɩɩ nii sʋ̀sʋ̀nà tə con tan. 20 Yɩɩ Siŋu tə dàń cúə́ Yehoyada bìú Zakari yuu wa, ʋ ga nan lalʋʋ tə yáá con ʋ swɩ̀n ba con, ʋ wʋ́: «Á cʋga kʋ tə Yɩɩ nə swɩ̀n: “Bɛ̀ɛ̀ nə pɩn á ma vɩ à mʋ̀ Ba-Yígúrə́-Jə-Tiu yìə̀n tə, à nə pɩn nii tə yuu wa? Á bá na kʋ nywarɩ mancɩn tətə! Á vɩga nə, à də ga wá vɩ aba.”»
21 Lalʋʋ tʋn pwìí bələ yoo Zakari yɩra, yá pɩ̀ʋ́ tə pɩn ba dɩlɩ wá də kapana ba gʋ, Ba-Yígúrə́-Jə-Tiu dìə̀ tə dəwoo tə wa. 22 Pɩ̀ʋ́ Zʋasə swɛ̀ɛ́ Zakari nyɩna Yehoyada zəni tə mama ʋ nə tʋn, yá ʋ pɩn ba gʋ Zakari. Zakari tɩan máŋá wa, ʋ swɩ̀n, ʋ wʋ́: «Ba-Yígúrə́-Jə-Tiu wá na yoo kʋ tə, ʋ ga wá bwe mʋ́ kʋ də̀ń nə!»
Zʋasə pàrɩ̀ tə yígúrə́
23 Bɩnɩ tə yígúrə́ wa, Siiri tɩ̀án kwatara twi sə ba ta kʋ̀ʋ̀ də Zʋasə. Ba ta Zwida lʋʋ nii tə, də Zwerizalɛmə tɩ̀án ba də́. Ba gʋa lalʋʋ tə pɛ̀gá tə mama, ba ga pɛ̀ jɩjə wiən tə mama, ba tʋn ba pɩ̀ʋ́ tə nə, Damasə nə. 24 Kwatara təntə yà ba dáá, yá Ba-Yígúrə́-Jə-Tiu ken Zwida kwatara tə nə dáá ba jɩɩn wa, Zwida kwatara tə nə vɩga ʋ mʋ̀ Yɩɩ tə, ʋ nə yɩ ba nyɩna-ba Yɩɩ yɩrɩ. Mə kʋ zɩgɩ nətʋ ba ma kə Zʋasə càn wa. 25 Kʋ kwa nə, Siiri tɩ̀án kwatara tə vìí ba yá Zʋasə càn zənzən wa. Ʋ tʋ̀tʋ̀nà tə tʋn pwìí bələ yoo ʋ yɩra, Yɩɩ joŋwanʋ Yehoyada bìú tə tɩan tə yɩrɩ, yá ba gʋa wá ʋ gədo yuu wa. Ba gùrì wá Davidə sadiyuu tə wa, yá ba dàń nə wà wá gùrì pɛ̀gá libərə bwálɩ́ tə wa. 26 Lɩ̀à tə nə tʋn pwìí bələ yoo tə Zʋasə yɩra yà yɩ Zabadə, ʋ nuu yɩrɩ nə yɩ Swimeyatə, ʋ ga yɩ Amon dwíí tə bʋ̀á, də Yozabadə, ʋ nuu yɩrɩ nə yɩ Swiməri, ʋ ga yɩ Mʋabə dwíí tə bʋ̀á. 27 Ba pʋ́pʋ́nɩ́ Zʋasə bɩ̀á tə yɩra, də Yɩɩ nii sʋ̀ràn kapʋpʋ, ba nə swɩ̀n ba zɩgɩ ʋ nə, də nətʋ ʋ nə pɩn ba kwɛn Yɩɩ dìə̀ tə, ba tún pɛ̀gá sagɩ tə wa, kʋ nə gwìín pɛ̀gá yìə̀n də̀ń. Ʋ bìú Amasɩa nə dí pàrɩ̀ tə ʋ yuu nə.