Amasɩa pàrɩ̀ tə yoo
25
1 Amasɩa yà jə bɩna sapʋa də bonu, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna sapʋa də nʋgʋ Zwerizalɛmə nə. Ʋ nuu yɩrɩ nə yɩ Yʋadan, ʋ yɩ Zwerizalɛmə tɩ̀án bʋ̀á. 2 Amasɩa tʋn kʋ tə nə yɩ mənəmənə Ba-Yígúrə́-Jə-Tiu yáá con, yá ʋ dàń nə wà tʋn də ʋ bɩcan mama. 3 Amasɩa pàrɩ̀ tə nə twi kʋ jə dɩ̀àn zənzən máŋá tə wa, ʋ gʋa tʋ̀tʋ̀nà tə nə gʋa ʋ nyɩna, pɩ̀ʋ́ Zʋasə. 4 Yá ʋ wà ba bɩ̀á tə gwɩ. Cɩ́gá, kʋ yà pʋ́pʋ́nɩ́ Yɩɩ nii sagɩ tə wa, ʋ nə pɩn Moyizə nə, kʋ wʋ́: «Kʋ wà mɛ, sə ba gʋ nyɩna-ba, ba bɩ̀á cʋna yɩrɩ, kʋ ga wà mɛ, sə ba gʋ bɩ̀á, ba nyɩna-ba cʋna yɩrɩ. Kʋ mɛ sə ba gʋ lìù mama, ʋ tətə cʋna yɩrɩ.»5 Amasɩa ken Zwida dwíí bara tə, də Bɛnzwamɛn dwíí bara tə duən yáá nə, ʋ ga tún kwatara mʋ̀rʋ̀ yáá tɩ̀án, də kwatara bíí yáá tɩ̀án, ba dwíə́ tə yuu wa. Ʋ pɩn ba gàlà bara tə nə yí bɩna sapʋa, də ba tə nə dwə nətʋ, yá ba nɩ bara mʋ̀rʋ̀ biətwa, ba nə wàá kʋ̀ʋ̀ ba tɛ də cwiin, də natana. 6 Amasɩa tə lɩ wárʋ́ tɔnə batwa, ʋ ma tì kwatara babɩran mʋ̀rʋ̀ sapʋa, Yɩzərayɛlə lɩ̀à payuu tə wa. 7 Yá Yɩɩ tʋtʋnʋ don twi ʋ swɩ̀n ʋ con, ʋ wʋ́: «À nyɩna pɩ̀ʋ́, dàn ká pa Yɩzərayɛlə lɩ̀à kwatara tə duən twá n nə, ba va kʋ̀ʋ̀ tə. Cɩ́gá, Ba-Yígúrə́-Jə-Tiu tə̀lə́ də Yɩzərayɛlə payuu lɩ̀à tə nə yɩ Efərayimə dwíí. 8 Ba nə kwé mʋ́, n nə swə n jə dɩ̀àn nətʋ mama, Yɩɩ wá pa n tʋ n dʋŋa yáá con. Cɩ́gá, Yɩɩ wàá ʋ pɩn lìù də́ dɩ̀àn, ʋ ma wàá ʋ pɩn ba də́ dɩ̀àn lìù yuu wa.» 9 Amasɩa swɩ̀n Yɩɩ tʋtʋnʋ tə con, ʋ wʋ́: «Bɛ̀ɛ̀ nə à dàń wá fwa də wárʋ́ tə mama, à nə pɩn Yɩzərayɛlə kwatara təntə nə? Yɩɩ tʋtʋnʋ tə le wá, ʋ wʋ́: «Ba-Yígúrə́-Jə-Tiu wàá won ʋ pɩn mʋ́, kʋ doni nətʋ.» 10 Amasɩa dàń pwɛ̀ Efərayimə dwíí kwatara tə ʋ lɩ, ʋ pa ba pìí ba va ba bwálɩ́ nə. Yá ba lɩŋa zàn Zwida dwíí tə yuu wa zənzən, ba ja pìí ba vìí. 11 Amasɩa dán ʋ jɩɩn, ʋ ja ʋ kwatara púlí tə ʋ va Nəkuə vara tə wa, ʋ ma gʋ Seyirə dwíí tə kwatara mʋ̀rʋ̀ fugə. 12 Zwida dwíí tə jɩn Seyirə dwíí tə kwatara mʋ̀rʋ̀ fugə don, ba ja dɩ̀ pɩ̀ʋ̀ nədarʋ yuu wa, ba ga yigu ba, ba dʋgʋ woru wa. Yá Seyirə dwíí kwatara təntə mama tʋa ba mʋmʋnɩ.
13 Kwatara púlí tə Amasɩa nə pɩn ba pìí, sə ba dàn ká twá ʋ nə ba va kʋ̀ʋ̀ tə, vəli ba sú Zwida tɩan tə, kʋ nə zɩgɩ Samari, kʋ va kʋ yí Bɛtə-Horon. Ba gʋa lɩ̀à mʋ̀rʋ̀ batwa, ba ga pɛ̀ jɩjə wiən zənzən ba ja vìí.
Zʋasə dí dɩ̀àn Amasɩa yuu wa
14 Máŋá tə Amasɩa nə ta Edomə tɩ̀án tə ʋ də́, ʋ pìí ʋ bà, ʋ jɩn Seyirə dwíí tə woŋwanan, ʋ kə lá ʋ bà. Ʋ jɩn tə ʋ ma ʋ fwa ʋ tətə woŋwanan, ʋ pɩn tə dun, də ʋ fwa jwəŋə ʋ pɩn tə. 15 Ba-Yígúrə́-Jə-Tiu lɩŋa zàn Amasɩa yuu wa zənzən, ʋ ga tʋn Yɩɩ nii sʋ̀sʋ̀nʋ̀ ʋ con, ʋ wʋ́: «Bɛ̀ɛ̀ nə pɩn n ma pìí n twá dwíí təntə woŋwanan tə nə, tə ga wà wànɩ́ tə jon ba lalʋʋ tə n jɩɩn wa?» 16 Máŋá tə ʋ nə wulə ʋ swɩ̀n nətʋ, Amasɩa goŋi ʋ sʋgʋ tə wa, ʋ bwe wá, ʋ wʋ́: «Wàà nə tún mʋ́ sə n ya pɩ̀ʋ́ kwenu? Pú n nii, də n nə ba pɩ̀à sə ba mà mʋ́.» Yɩɩ nii sʋ̀sʋ̀nʋ̀ tə swɩ̀n ʋ zwɛ̀, ʋ wʋ́: «À yə̀ə́ də Yɩɩ ken sírí, sə ʋ cʋ̀gʋ̀ mʋ́, n nə tʋn kʋ nətʋ tə, n ga vɩ sə n cʋgʋ à kwìə̀ tə yɩrɩ.»
17 Zwida pɩ̀ʋ́ Amasɩa jon lɩ̀à duən kwìə̀, ʋ ga tʋn lɩ̀à Yʋahazə bìú Zʋasə con, ʋ nə yɩ Zwehu nàʋ́, ʋ ga yɩ Yɩzərayɛlə pɩ̀ʋ́, ʋ wʋ́: «Bà nə jəri duən, nə ta kʋ̀ʋ̀!» 18 Yɩzərayɛlə pɩ̀ʋ́ Zʋasə ma tʋn ʋ swɩ̀n Zwida pɩ̀ʋ́ Amasɩa con, ʋ wʋ́: «Liban seni nə swɩ̀n Liban sɩsaban tɩ̀ʋ́ con, kʋ wʋ́: “Pa n bʋ̀á tə, sə ʋ ya à bìú kan!” Yá Liban ganaŋʋ twi kʋ nɩŋa seni tə, kʋ lagaa.» 19 Zʋasə swɩ̀n ʋ súrí lá, ʋ wʋ́: «N ta Edomə tɩ̀án n də́, kʋ pa n yuu zàn. Fwa pupwən də n dun tə, n ja mɛn n bwálɩ́ nə sənbwen. Bɛ̀ɛ̀ nə pɩn n ma pɩ̀à n ta kʋ̀ʋ̀, kʋ nə wá cʋ̀gʋ̀ mʋ́? N də Zwida dwíí kwatara tə mɛ wá tʋ kʋ̀ʋ̀ tə wa.» 20 Yá Amasɩa wà Zʋasə kwìə̀ tə jon. Cɩ́gá, Yɩɩ yà pɩn kʋ yɩ nətʋ, sə ʋ ma cʋ̀gʋ̀ Amasɩa də ʋ kwatara tə, ba nə pìí ba twá Edomə tɩ̀án woŋwanan tə nə yɩrɩ. 21 Yɩzərayɛlə pɩ̀ʋ́ Zʋasə dàń zàn ʋ va jəri Zwida pɩ̀ʋ́ Amasɩa Bɛtə-Swemɛswə nə, kʋ nə wulə Zwida lʋʋ nii wa, ba wulə ba tɛ duən. 22 Yɩzərayɛlə kwatara tə ta Zwida kwatara tə ba də́, Zwida kwatara tə mama ga dəri ba va ba sànɩ́ wa. 23 Yɩzərayɛlə pɩ̀ʋ́ Zʋasə jɩn Zwida pɩ̀ʋ́ Amasɩa, ʋ nə yɩ Zʋasə bìú, ʋ ga yɩ Yʋahazə nàʋ́, ʋ kə bandiə, Bɛtə-Swemɛswə nə. Ʋ ja wá ʋ va Zwerizalɛmə. Zʋasə gwɛrɩ Zwerizalɛmə biritaŋʋ tə, kʋ danɩ yí jɩvaŋɩ yiə biənɩa, kʋ nə zɩgɩ Efərayimə mimii tə nə, kʋ va kʋ yí nigwancɩn mimii tə. 24 Ʋ tì sɩ́án tə mama, də wárʋ́ tə mama, də wozəŋə tə mama, tə yà nə wulə Yɩɩ dìə̀ tə wa, Obɛdə-Edomə con, də pɩ̀ʋ́ dìə̀ jɩjə wiən tə wa. Ʋ tə jɩn lɩ̀à də ʋ súrí lá, ʋ ja pìí ʋ va Samari.
Amasɩa pàrɩ̀ tə yígúrə́
25 Yʋahazə bìú Zʋasə, ʋ nə yɩ Yɩzərayɛlə pɩ̀ʋ́ tɩan kwa nə, Zʋasə bìú Amasɩa tə fwa bɩna fugə də bonu lʋʋ wa. 26 Ba pʋ́pʋ́nɩ́ Amasɩa tʋ̀tʋ̀nán tə gɩganɩ, tə nə sinti nətʋ, kʋ va kʋ yí tə yígúrə́, ba tún Zwida də Yɩzərayɛlə pɛ̀gá sagɩ tə wa. 27 Kʋ nə zɩgɩ máŋá tə nə, Amasɩa nə pìí ʋ yáá Ba-Yígúrə́-Jə-Tiu, lɩ̀à zàn ba tʋn pwìí bələ yoo ʋ yɩra Zwerizalɛmə nə, ʋ ma dəri ʋ va Lakiswə. Yá ba dɩŋɩ ʋ kwa, ba va ba gʋ wá lá. 28 Ba zɩn ʋ tɩgɩ tə də səsen, ba ja bà ba gùrì Zwida tɩʋ tə wa, ʋ nyɩna-ba con, ba nə dí yáá ba tɩ.