Ozɩasə pàrɩ̀ tə yoo
26
1 Zwida lalʋʋ tə mama kúrí Ozɩasəa, də ʋ jə bɩna fugə də bardʋ. Ba tún wá sə ʋ ya pɩ̀ʋ́, ʋ nyɩna Amasɩa yuu nə. 2 Mə ʋ mʋ̀ nə ta Elatə tɩʋ tə ʋ jon, ʋ ga pìí ʋ lwà kʋ, ʋ pa Zwida dwíí tə nə, ʋ nyɩna tə tɩan kwa nə. 3 Ozɩasə yà jə bɩna fugə də bardʋ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna finu də bələ, Zwerizalɛmə nə. Ʋ nuu yɩrɩ nə Yekolɩya, ʋ yɩ Zwerizalɛmə tɩ̀án bʋ̀á. 4 Ozɩasə tʋn kʋ tə nə ziən Ba-Yígúrə́-Jə-Tiu yáá con, ndə ʋ nyɩna Amasɩa nə tʋn nətʋ.Ozɩasə zìlí Yɩɩ nii, ʋ ga pìí ʋ vɩ Yɩɩ nii
5 Zakari yà yɩ lìù tə, ʋ nə yə̀ə́ Yɩɩ yìə̀n tə də̀ń ʋ nə na, yá ʋ dàń bɩrɩ ka dəri Yɩɩ fən Ozɩasə nə. Kʋ nətʋ tə pɩn Ozɩasə kə dɩ̀àn ʋ twá Ba-Yígúrə́-Jə-Tiu nə, Yɩɩ də ga pa ʋ won mama jì, kʋ pa wá, máŋá tə mama wa, Zakari nə yɩn lʋʋ wa. 6 Ozɩasə vəli ʋ ta kʋ̀ʋ̀ də Filisi tɩ̀án, ʋ tún lulwərən Gatə tɩ̀án biritaŋʋ yɩra, də Yabəne tɩ̀án biritaŋʋ yɩra, də Asədɔdə tɩ̀án biritaŋʋ yɩra. Yá ʋ lwə̀ tɩan Asədɔdə nagwanaa tə wa, də Filisi tɩ̀án lʋʋ nii tə wa. 7 Yɩɩ san wá ʋ ta Filisi tɩ̀án, də Arabə-ba, ba yà nə wulə Gurə-Baalə nə, də Mawon tɩ̀án. 8 Mawon tɩ̀án yà ŋwɩ́n lanpo ba pɩn Ozɩasə nə. Yá Ozɩasə dàń jìgə̀ dɩ̀àn tíú zənzən, ʋ yɩrɩ ga nan kʋ va kʋ yí Ezwipətə sɩswɩan tə. 9 Ʋ lwə̀ dəyuu dìì Zwerizalɛmə biritaŋʋ tə yuu, tə nə yɩ dɩ̀àn dəkuu bwálá, nigwancɩn mimii tə yuu con, də vara mimii tə yuu con, də bírə́ tə gʋgɔɔ tə yuu con. 10 Ʋ tə lwə̀ dəyuu dìì kasɔɔ lanworu tə wa, ʋ ga kʋ̀ nɩ́á gwàlán kapʋpʋ, tə də̀ń nə lu. Cɩ́gá, ʋ yà jə vàná zənzən Swefela* nagwanaa tə wa, də vara tə wa. Ʋ yà jə vala, də lɩ̀à tə nə ywàŋá divɛn tɩ̀án yuu, pɛɛn tə wa, də divɛn tɩ̀án kárɩ́ tə wa. Cɩ́gá, ʋ yà swə gaʋ tʋ̀tʋ̀nán. 11 Ozɩasə yà jə kwatara púlí, ba nə ta kʋ̀ʋ̀ ba mɩ̀n. Yeyɛlə, ʋ nə pʋ́pʋ́nɩ́ saga, də tʋ̀tʋ̀nán yáá tíú Maseya nə gàlɩ̀ kwatara təntə, ndə pɩ̀ʋ́ tʋ̀tʋ̀nà yáá tíú Hananɩa nə pɩn nii, sə ba tʋn kʋ nətʋ. 12 Dìì tɩ̀án 2 600 yà nə kəni kwatara babɩran təntə cwəŋə nə. 13 Ba mʋ̀ yà nə jə nii kwatara 307 500 yuu wa. Ba yà jə dɩ̀àn də wʋdɩʋ zənzən, sə ba ma ta ba zɩgɩ pɩ̀ʋ́ tə dʋŋa nə. 14 Ozɩasə pɩ̀à natanan, də cwiən, də yukwələ, də kwatara lugu gànàn, də twɛn, də kapandɩlɩ kapana, ʋ pa ba kwatara púlí tə mama nə. 15 Ʋ pɩn tʋ̀tʋ̀nán yənu tíú fwa kwatarɩ zɩla nəfaran, ba tún dəyuu dìì tə yuu wa, ba ma tɛ cɩan, də ba ma dɩlɩ kapana nəfaran. Yɩɩ san Ozɩasə nə zənzən, kʋ pa ʋ jì dɩ̀àn nəfarʋ tíú, ʋ yɩrɩ nə nan kʋ va yiŋʋnɩ.
16 Yá máŋá tə ʋ nə jìgə̀ dɩ̀àn tíú, ʋ bɩcan súə́ də fwiə, kʋ ga cʋ̀gʋ̀ wá. Ʋ tʋn cʋna ʋ zɩgɩ Ba-Yígúrə́-Jə-Tiu nə, ʋ nə yɩ ʋ Yɩɩ. Dɩɩn don nə, ʋ zʋa Ba-Yígúrə́-Jə-Tiu dìə̀ tə wa, sə ʋ sʋ̀rɩ́ wusinə, wusinə joŋi bwálɩ́ tə yuu wa. 17 Yɩɩ joŋwanʋ Azarɩya púə́ ʋ kwa ʋ zʋ, də Ba-Yígúrə́-Jə-Tiu joŋwana wʋdanyɩna sapwɩnɩa. 18 Ba zɩgɩ pɩ̀ʋ́ Ozɩasə yáá con ba swɩ̀n, ba wʋ́: «Kʋ ta n mʋ̀ Ozɩasə nə mɛ sə n sʋ̀rɩ́ wusinə, n pa Ba-Yígúrə́-Jə-Tiu nə. Kʋ yɩ Yɩɩ joŋwana tə, ba nə yɩ Aron dwíí nə Yɩɩ tún, sə ba tʋn kʋ. Vəli n nan kàrá! Kʋ yɩ culu n wulə n cʋ̀gà, kʋ nə bá pa mʋ́ dun Ba-Yígúrə́-Jə-Tiu yáá con, ʋ nə yɩ Yɩɩ.» 19 Ozɩasə lɩŋa zàn zənzən Yɩɩ joŋwana tə yuu wa, ʋ ga jə won tə nə sʋ̀rɩ́ wusinə tə, ʋ jɩɩn wa. Kʋ máŋá təntə tətə wa, dayaan pɛ́n ka nan ʋ təli nə, Yɩɩ joŋwana tə yáá con, Ba-Yígúrə́-Jə-Tiu dìə̀ tə wa, wusinə joŋi bwálɩ́ tə səpuni nə. 20 Yɩɩ joŋwana yun tɩ̀án nəkwɩa Azarɩya, də Yɩɩ joŋwana tə duən tə mama, ba yà nə ywàŋá wá, nɩ dayaan tə ka pɛ́n ʋ təli nə. Ba dɩŋɩ wá ba lɩ kàrá wa lala, ʋ tətə ga bɩbarɩ ʋ nan, ʋ nə lwarɩ də Ba-Yígúrə́-Jə-Tiu mà wá yɩrɩ.
Ozɩasə pàrɩ̀ tə yígúrə́
21 Pɩ̀ʋ́ Ozɩasə yɩn dayarʋ wuuu, kʋ va kʋ yí ʋ tɩan dɩɩn. Ʋ nə yɩn dayarʋ tə pɩn ʋ yà wulə dìə̀ wa, ka nə wulə kwa con, ʋ kʋ́ʋ̀ wà mɛ sə ʋ va Ba-Yígúrə́-Jə-Tiu dìə̀ tə wa. Ba tún ʋ bìú Yotamə, ʋ nə ywàŋá padiə tə yuu nə, sə ʋ ywàń lʋʋ nii tə lalʋʋ tə yuu nə. 22 Amɔsə bìú Ezayi, ʋ nə yɩ Yɩɩ nii sʋ̀sʋ̀nʋ̀ nə pʋ́pʋ́nɩ́ Ozɩasə tʋ̀tʋ̀nán tə gɩganɩ, tə nə sinti nətʋ, kʋ va kʋ yí tə yígúrə́, ʋ tún. 23 Ozɩasə tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá pɛ̀gá libərə bwálɩ́ tə wa, yá ba dàń nə wà wá gùrì ʋ nyɩna-ba libəri tə wa, ʋ yà nə yɩ dayarʋ yɩrɩ. Ʋ bìú Yotamə nə dí pàrɩ̀ tə ʋ yuu nə.