Yotamə pàrɩ̀ tə yoo
27
1 Yotamə jìgə̀ pɩ̀ʋ́ də ʋ jə bɩna sapʋa də bonu, yá ʋ dí pàrɩ̀ bɩna fugə də bardʋ, Zwerizalɛmə nə. Ʋ nuu yɩrɩ nə Yeruswa, ʋ yɩ Sadɔkə bʋ̀á. 2 Yotamə tʋn kʋ tə nə yɩ mənəmənə Ba-Yígúrə́-Jə-Tiu yáá con yoo mama wa, ndə ʋ nyɩna Ozɩasə nə tʋn nətʋ. Yá ʋ mʋ̀ wà Ba-Yígúrə́-Jə-Tiu dìə̀ tə wa zwɩ. Yá lalʋʋ tə mʋ̀ yà tə wulə jɩ́ʋ́n wa. 3 Mə Yotamə nə lwə̀ Ba-Yígúrə́-Jə-Tiu dìə̀ tə mimii nəfarʋ tə, ʋ ga kwɛn Ofɛlə sanii tə bírə́ tə bwálá kapʋpʋ. 4 Ʋ lwə̀ tɩan Zwida pɛɛn nagwanaa tə wa, ʋ ga lwà dəyuu dìì, də dɩ̀àn dəkuu bwálá pún nagwanaa tə wa. 5 Yotamə ta kʋ̀ʋ̀ də Amon dwíí pɩ̀ʋ́ tə, yá Yotamə ta ba ʋ də́. Kʋ bɩnɩ tə nə, Amon dwíí tə ŋwɩ́n lanpo wárʋ́ tɔnə batwa, də dipɛn mɩna tɔnə mʋ̀rʋ̀ batwa, də dipɛn mɩna yiri don tɔnə mʋ̀rʋ̀ batwa. Bɩna bələ tə nə danɩ lá, ba tə ŋwɩ́n lanpo təntə. 6 Yotamə jìgə̀ dɩ̀àn nəfarʋ tíú, ʋ nə twá kʋ tə nə ziən Ba-Yígúrə́-Jə-Tiu yáá con nə, ʋ nə yɩ ʋ Yɩɩ tə yɩrɩ.7 Ba pʋ́pʋ́nɩ́ Yotamə tʋ̀tʋ̀nán tə gɩganɩ, kʋ̀ʋ̀ tə ʋ nə ta, də kʋ tə mama ʋ nə fwa, ba tún Yɩzərayɛlə də Zwida pɛ̀gá sagɩ tə wa. 8 Yotamə jìgə̀ pɩ̀ʋ́ də ʋ jə bɩna sapʋa də bonu, yá ʋ dí pàrɩ̀ bɩna fugə də bardʋ, Zwerizalɛmə nə. 9 Yotamə tɩga, yá ba gùrì wá Davidə sadiyuu tə wa, ʋ nyɩna-ba con, ba nə dí yáá ba tɩ. Ʋ bìú Ahazə nə dí pàrɩ̀ tə ʋ yuu nə.