Ahazə pàrɩ̀ tə sinti yoo
28
1 Ahazə yà jə bɩna sapʋa, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fugə də bardʋ, Zwerizalɛmə nə. Ʋ wà kʋ tə nə yɩ mənəmənə Ba-Yígúrə́-Jə-Tiu yáá con tʋn, ndə ʋ nɩbɛɛ Davidə mʋ̀ nə tʋn nətʋ. 2 Ʋ yɩ ʋ vəli Yɩzərayɛlə pɛ̀gá tə nabwɩɩ wa. Ʋ nyɩan lugu ʋ ma fwa woŋwanan tətə, sə ʋ ma tʋn ʋ pa woŋwanan Baalə nə. 3 Ʋ sʋ̀rɩ́ wusinə jwəŋə Hinomə vara tə wa, ʋ ga sʋ̀rɩ́ ʋ bɩ̀á ʋ ma fwa jwəŋə, ndə dwíə́ nəkaran* tə nə, Ba-Yígúrə́-Jə-Tiu nə dɩŋɩ ʋ yá lʋʋ nii tə nə, ʋ pa Yɩzərayɛlə lɩ̀à nə. Dwíə́ nəkaran tə də yà tʋŋa tʋtʋnkʋkwɩnan təntə. 4 Ʋ fwa jwəŋə, ʋ ga sʋ̀rɩ́ wusinə jwəŋə dədwələn* yuu, də pɛɛn yuu, də tɩ̀ʋ́ mama də̀ń, kʋ nə jə vʋran.5 Ba-Yígúrə́-Jə-Tiu, ʋ nə yɩ ʋ Yɩɩ tə ken wá Siiri pɩ̀ʋ́ tə jɩɩn wa. Siiri tɩ̀án ta wá ba də́, ba ja ʋ lɩ̀à kapʋpʋ ba ja va yongaʋ, Damasə nə. Yɩɩ tə ken wá Yɩzərayɛlə pɩ̀ʋ́ tə jɩɩn wa, ʋ də ga də́ dɩ̀àn zənzən ʋ yuu wa. 6 Dɩɩn nədʋ wa, Remalɩya bìú Peka gʋa Zwida dwíí tə babɩran 120 000, ba nə vɩga Ba-Yígúrə́-Jə-Tiu, ʋ nə yɩ ba nyɩna-ba Yɩɩ, ba dʋgʋ yɩrɩ. 7 Zikəri ʋ nə yɩ Efərayimə dwíí tə babɩʋ gʋa Maseya, ʋ nə yɩ Zwida pɩ̀ʋ́ tə bìú, ʋ gʋa Azərikamə, ʋ nə yɩ padiə tə yáá tíú, ʋ gʋa Ɛləkana ʋ yà nə dà pɩ̀ʋ́ tə nə. 8 Yɩzərayɛlə lɩ̀à tə jɩn ba nubɩa Zwida dwíí tə kana də ba bɩ̀á ba ma fwa ywə́ŋə́. Ba mama yà yɩ lɩ̀à 200 000. Ba tə jon jɩjə wiən zənzən ba con, ba ja va Samari.
9 Ba-Yígúrə́-Jə-Tiu nii sʋ̀sʋ̀nʋ̀ yà wulə Samari nə, ʋ yɩrɩ nə yɩ Odɛdə. Ʋ nan ʋ jeri Yɩzərayɛlə lɩ̀à kwatara tə də ba pìí ba bɩ̀àn Samari tɩʋ tə wa, ʋ swɩ̀n ba con, ʋ wʋ́: «Ba-Yígúrə́-Jə-Tiu, ʋ nə yɩ á nyɩna-ba Yɩɩ ken Zwida dwíí tə á jɩɩn wa, ʋ lɩŋa nə zaŋa ba yuu wa yɩrɩ. Yá á dàń gʋa ba zənzən də nyaʋ yiri don, kʋ pa ba yoo dɩ̀ kʋ yí lanworu wa. 10 Sɩ́ʋ́n nə, á bʋŋa sə á ja Zwerizalɛmə tɩ̀án, də Zwida dwíí bara təntə, də kana təntə á ma fwa ywə́ŋə́! Kʋ nətʋ bá pa á tətə tʋn cʋna, á zɩgɩ Ba-Yígúrə́-Jə-Tiu nə, ʋ nə yɩ á Yɩɩ naaa? 11 Á dàń cʋga à con, sə á dʋgʋ ywə́ŋə́ təntə, á nə jɩn á nubɩa Zwida dwíí tə wa. Cɩ́gá, Ba-Yígúrə́-Jə-Tiu lɩŋa pupwin á yuu wa.» 12 Efərayimə dwíí tə yáá tɩ̀án duən dàń zɩgɩ ba tə nə, ba nə nan kʋ̀ʋ̀ tə ba bɩ̀àn. Yáá tɩ̀án təntə nə yɩ Yohanan bìú Azarɩya, də Meswilemɔtə bìú Berekɩa, də Swalumə bìú Ezekɩasə, də Hadəlayi bìú Amasa. 13 Ba swɩ̀n ba tə nə nan kʋ̀ʋ̀ tə ba bɩ̀àn tə con, ba wʋ́: «Á dànà ká ja ywə́ŋə́ təntə á bà yəbə. Cɩ́gá, kʋ wá pa nə tʋn cʋna nəfarʋ nə zɩgɩ Ba-Yígúrə́-Jə-Tiu nə. Kʋ yɩ á pɩ̀à sə á kwɛn á súrí nə cʋna tə naaa? Nə cʋna tə dí yáá tə dáá, Yɩɩ lɩŋa ga pupwin nə mʋ̀ Yɩzərayɛlə lɩ̀à yuu wa.» 14 Kwatara tə dʋgʋ ywə́ŋə́ tə, də wiən tə ba nə ta ba jon, yáá tɩ̀án tə də lalʋʋ tə mama yáá con. 15 Ba kúrí lɩ̀à sə ba ywàń ywə́ŋə́ tə yuu nə. Lɩ̀à təntə lɩ gànàn də natɩra wiən tə wa, ba nə ta ba jon, ba pa lɩ̀à tə nə, ba yà nə ba gànàn jə. Ba pɩn ba mama də́, ba ga nyʋn. Ba ywarɩ ba tə, ba nə caŋɩ, ba ga kə ba tə mama, ba nə wàrɩ̀ ba vəli, bɩnɛ yuu, ba kwé ba, ba ja va ba dwíí tɩ̀án tə con, Zweriko nə, kʋra tɩʋ tə wa. Kʋ kwa nə, ba pìí ba bà Samari.
Pɩ̀ʋ́ Ahazə lòrì Asiiri tɩ̀án sáŋʋ́
16 Kʋ máŋá təntə wa, pɩ̀ʋ́ Ahazə lòrì Asiiri pɛ̀gá tə, sə ba bà ba san wá. 17 Cɩ́gá, Edomə tɩ̀án kʋ́ʋ̀ twi ba ta Zwida payuu tə, ba ja ywə́ŋə́. 18 Filisi tɩ̀án tə də ta Zwida tɩan tə nə wulə Swefela* nagwanaa tə wa, də Zwida lʋʋ nii Negɛbə tə wa, ba də́. Ba jon Bɛtə-Swemɛswə, də Ayalon, də Gederɔtə, də Soko də kʋ nii tɩbii tə, də Timəna də kʋ nii tɩbii tə, də Giməzo də kʋ nii tɩbii tə. Yá ba dàń wulə tɩan təntə wa. 19 Cɩ́gá, Ba-Yígúrə́-Jə-Tiu mun Zwida dwíí payuu tə Yɩzərayɛlə pɩ̀ʋ́ Ahazə yɩrɩ. Ʋ mʋ̀ nə pɩn ba tʋn cʋna ba zɩgɩ Ba-Yígúrə́-Jə-Tiu nə, ʋ tətə ga wà Yɩɩ nii zìlí mɩ́ámɩ́án. 20 Asiiri pɩ̀ʋ́ Tigəlatə-Pilezɛrə twi ʋ ta Ahazə, ʋ wà wá san. 21 Cɩ́gá, Ahazə yà tì Ba-Yígúrə́-Jə-Tiu dìə̀ tə jɩjə wiən tə faan, də padiə tə jɩjə tə, də yáá tɩ̀án tə jɩjə tə, ʋ ma də́ zìlə́ Asiiri pɩ̀ʋ́ tə yuu wa. Yá də kʋ nətʋ mɛ, Ahazə tə wà sáŋʋ́ mama nɩ, Asiiri pɩ̀ʋ́ tə con. 22 Ahazə yà tə vɩ Ba-Yígúrə́-Jə-Tiu nii, də ʋ yà nə wulə pucʋnɩ wa tə mɛ. 23 Ʋ fwa jwəŋə ʋ pa Damasə tɩ̀án woŋwanan tə nə, tə nə dí dɩ̀àn ʋ yuu wa, ʋ ga swɩ̀n, ʋ wʋ́: «Siri tɩ̀án pɛ̀gá tə yɩ ba woŋwanan tə nə saŋa ba, à wá fwa jwəŋə à pa tə, sə tə san à də nə.» Yá tə mʋ̀ woŋwanan təntə pɩn, ʋ də Yɩzərayɛlə lalʋʋ tə mama tʋ.
24 Ahazə ken Yɩɩ dìə̀ tə zɩla tə duən yáá nə, ʋ nyʋnyʋgʋ tə, ʋ ga tagʋ Yɩɩ dìə̀ tə mimii. Kʋ kwa nə, ʋ lwə̀ woŋwanan jwəŋə bwálá, Zwerizalɛmə tɩʋ tə kanpwərən tə mama wa. 25 Ʋ tə lwə̀ jwəŋə dədwələn* Zwida lʋʋ nii tɩan tə mama wa, sə ʋ ma sʋ̀rɩ́ wusinə ʋ pa dwíə́ nəkaran* woŋwanan tə nə. Mə ʋ tʋn nətʋ, ʋ ma zɩ̀n Ba-Yígúrə́-Jə-Tiu, ʋ nə yɩ ʋ nyɩna-ba Yɩɩ tə lɩŋa.
26 Ba pʋ́pʋ́nɩ́ Ahazə tʋ̀tʋ̀nán tə nə sinti nətʋ, kʋ va kʋ yɩ tə yígúrə́, ba tún Zwida də Yɩzərayɛlə pɛ̀gá sagɩ tə wa. 27 Ahazə tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Zwerizalɛmə nə, yá ba dàń nə wà wá gùrì Yɩzərayɛlə pɛ̀gá libərə tə wa. Ʋ bìú Ezekɩasə nə dí pàrɩ̀ tə ʋ yuu nə.