Ahazə jìgə̀ Zwida payuu tə pɩ̀ʋ́
16
1 Remalɩya bìú Peka pàrɩ̀ tə bɩna fugə də barpɛ nii bɩnɩ tə nə, Yotamə bìú Ahazə jìgə̀ Zwida payuu tə pɩ̀ʋ́. 2 Ahazə yà jə bɩna sapʋa, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fugə də bardʋ Zwerizalɛmə nə. Ʋ wà kʋ tə nə yɩ mənəmənə Ba-Yígúrə́-Jə-Tiu yáá con tʋn, ʋ nə yɩ ʋ Yɩɩ, ndə ʋ nɩbɛɛ Davidə mʋ̀ nə tʋn nətʋ. 3 Ʋ də yɩ ʋ vəli Yɩzərayɛlə pɛ̀gá tə nabwɩɩ wa. Ʋ tətə pɩn ba dɩ̀ ʋ bìú mən wa, ʋ ma fwa joŋi, ndə dwíə́ nəkaran* tə nə, Ba-Yígúrə́-Jə-Tiu nə dɩŋɩ ʋ yá lʋʋ nii tə nə, ʋ pa Yɩzərayɛlə lɩ̀à nə. Dwíə́ nəkaran tə də yà tʋŋa tʋtʋnkʋkwɩnan təntə. 4 Ʋ fwa jwəŋə, ʋ ga sʋ̀rɩ́ wusinə jwəŋə dədwələn* yuu, də pɛɛn yuu, də tɩ̀ʋ́ mama də̀ń, kʋ nə jə vʋran. 5 Siiri pɩ̀ʋ́ Resinə, də Remalɩya bìú Peka, ʋ nə yɩ Yɩzərayɛlə pɩ̀ʋ́, dàń vəli sə ba ta kʋ̀ʋ̀ də Zwerizalɛmə tɩ̀án. Ba púə́ Ahazə ba kə lá nə, yá ba wà wànɩ́ ba ta wá ba də́. 6 Kʋ máŋá təntə tətə wa, Siiri pɩ̀ʋ́ Resinə dí dɩ̀àn Elatə tɩ̀án yuu wa, kʋ pa Siiri tɩ̀án tɩ ba. Ʋ dɩŋɩ Zwida payuu lɩ̀à tə ʋ lɩ Elatə wa, yá Edomə tɩ̀án dàń twi ba wulə là, də zə̀n mama. 7 Ahazə tʋn tʋntʋna Asiiri pɩ̀ʋ́ Tigəlatə-Pilezɛrə con, ʋ swɩ̀n, ʋ wʋ́: «À yɩ n tʋtʋnʋ, à ga yɩ n bìú. Bà jon nə Siiri pɩ̀ʋ́, də Yɩzərayɛlə pɩ̀ʋ́ jɩɩn wa, ba nə zàn ba zɩga à nə.» 8 Ahazə tì wárʋ́ tə, də sɩ́án tə yà nə wulə Ba-Yígúrə́-Jə-Tiu dìə̀ tə wa, də padiə jɩjə wiən tə wa, ʋ tʋn Asiiri pɩ̀ʋ́ nə, ʋ ma də́ zìlə́ ʋ yuu wa. 9 Asiiri pɩ̀ʋ́ tə sɛ̀ Ahazə lòrí tə, yá ʋ vəli ʋ ta Damasə ʋ də́, ʋ ja tɩʋ tə tɩ̀án ʋ ja va Kirə, ʋ ga gʋ Siiri pɩ̀ʋ́ Resinə.10 Pɩ̀ʋ́ Ahazə vəli Damasə, sə ʋ jəri Asiiri pɩ̀ʋ́ Tigəlatə-Pilezɛrə. Ʋ nə nɩ joŋi bwálɩ́ tə Damasə nə, ʋ fwa kʋ nyɩnyɩga sagɩ wa, də kʋ nə mɛ sə kʋ fwa nətʋ mama, ʋ tʋn Yɩɩ joŋwanʋ Uri nə, sə ʋ lwà kʋ yiri. 11 Yɩɩ joŋwanʋ Uri dàń lwə̀ joŋi bwálɩ́ tə, ndə kʋ nyɩnyɩga tə tətə nə, pɩ̀ʋ́ Ahazə nə zɩgɩ Damasə nə, ʋ tʋn ʋ nə. Ʋ lwə̀ kʋ də Ahazə tə wà pìí ʋ nan Damasə ʋ bà. 12 Pɩ̀ʋ́ tə nə pìí ʋ nan Damasə ʋ bà, ʋ nɩ joŋi bwálɩ́ tə, ʋ bólí kʋ yɩra, ʋ dɩ̀ kʋ yuu wa. 13 Ʋ pɩn ba fwa ʋ joŋi tə ba nə sʋ̀rɩ́* kʋ yuu wa, kʋ súrí ʋ pupwən joŋi* nə, kʋ nə yɩ vàrʋ́ càlɩ̀ joŋi*, ʋ twɛ́n divɛn kʋ yuu wa, ʋ ga lwá nimarʋ jwəŋə vàná tə jana joŋi bwálɩ́ tə yuu wa. 14 Kʋ kwa nə, ʋ lɩ Yɩɩ joŋi bwálɩ́ tə mʋ̀, ba nə fwa də cɩnɩan, kʋ bwálɩ́ tə wa, kʋ yà nə wulə Ba-Yígúrə́-Jə-Tiu yáá con, Yɩɩ dìə̀ tə yáá con, Yɩɩ joŋi bwálɩ́ nədʋn tə də Ba-Yígúrə́-Jə-Tiu dìə̀ tə pwə́rə́ wa. Ʋ tún kʋ Yɩɩ joŋi bwálɩ́ nədʋn tə səpuni nə, jɩzən saparʋ yuu. 15 Pɩ̀ʋ́ Ahazə pɩn nii kʋ tə, Yɩɩ joŋwanʋ Uri nə, ʋ wʋ́: «Pa ba sʋ̀rɩ́ jɩjʋ jwəŋə tə ba nə sʋ̀rɩ́, də didəni pupwən jwəŋə tə, də pɩ̀ʋ́ joŋi tə ba nə sʋ̀rɩ́, də ʋ pupwən joŋi tə, də lʋʋ nii tə lalʋʋ tə mama joŋi tə ba nə sʋ̀rɩ́, də ba pupwən joŋi tə, Yɩɩ joŋi bwálɩ́ nəfarʋ tə yuu wa. N wá lwá ba vàrʋ́ càlɩ̀ joŋi tə, də divɛn jwəŋə tə, də jwəŋə tə ba nə sʋ̀rɩ́ jana tə mama, də jwəŋə tə duən jana tə mama kʋ yuu wa. Kʋ nə yɩ Yɩɩ joŋi bwálɩ́ tə mʋ̀, ba nə fwa də cɩnɩan, à tətə nə wá ywàń kʋ yuu. 16 Yɩɩ joŋwanʋ Uri tʋn kʋ tə mama, pɩ̀ʋ́ Ahazə nə pɩn nii sə ʋ tʋn.
17 Pɩ̀ʋ́ Ahazə tə lwə kwara tə də̀ń cɩnɩan zɩlan tə, ʋ ga zʋrɩ kwara tə yà nə wulə tə yuu wa. Ʋ zʋrɩ cɩnɩan kwarɩ nəfarʋ tə yà nə wulə cɩnɩan nɩan tə yuu wa, ʋ tún tɩa, kapana yuu wa. 18 Ʋ taa Asiiri pɩ̀ʋ́ tə yɩrɩ, ʋ lwàń sìə́ dɩɩn mimii tə, ba yà nə lwə̀ Ba-Yígúrə́-Jə-Tiu dìə̀ tə wa, də kàrá con mimii tə pɩ̀ʋ́ nə twá ʋ zwɩ.