2 Pɛ̀gá 17

Oze jìgə̀ Yɩzərayɛlə talɩkwa pɩ̀ʋ́

1 Zwida pɩ̀ʋ́ Ahazə pàrɩ̀ tə bɩna fugə də bələ nii bɩnɩ tə nə, Ela bìú Oze jìgə̀ Yɩzərayɛlə pɩ̀ʋ́ Samari nə. Ʋ dí pàrɩ̀ tə bɩna nʋgʋ. 2 Ʋ tʋn kʋ tə nə lwara Ba-Yígúrə́-Jə-Tiu yáá con. Ʋ dàń nə wà kʋ tʋn ndə Yɩzərayɛlə pɛ̀gá tə duən tə nə, ba nə yɩn ʋ yáá. 3 Asiiri pɩ̀ʋ́ Saləmanasarə vəli ʋ ta kʋ̀ʋ̀ də wá. Oze dàń ken ʋ tɩ̀àn Saləmanasarə jɩɩn wa, ʋ ga ŋwɩ́n lanpo ʋ pɩn wá. 4 Yá Asiiri pɩ̀ʋ́ tə lwarɩ də Oze tʋn pwìí bələ yoo ʋ yɩra. Oze yà tʋn tʋntʋna Ezwipətə pɩ̀ʋ́ So con, yá ʋ yà kʋ́ʋ̀ ba lanpo tə ŋwɩ́n ʋ pɩn Asiiri pɩ̀ʋ́ nə, bɩnɩ mama. Asiiri pɩ̀ʋ́ tə ma pa ba kə wá bandiə, ba vwa də banzala. 5 Kʋ kwa nə, Asiiri pɩ̀ʋ́ tə ta lʋʋ nii tə mama, ʋ ga va ʋ pú Samari tɩʋ tə nə də kʋ̀ʋ̀, ʋ ta kʋ bɩna batwa. 6 Oze pàrɩ̀ tə bɩna nʋgʋ nii bɩnɩ tə nə, Asiiri pɩ̀ʋ́ tə dí dɩ̀àn Samari tɩ̀án yuu wa, ʋ ga ja Yɩzərayɛlə lɩ̀à də dɩ̀àn, ʋ ja va Asiiri. Ʋ pɩn ba jə̀ń Hala nagwanaa tə wa, də Habɔrə mʋnaa tə nii nə, Gozan nagwanaa tə wa, də Medi tɩan tə wa.

Won tə nə pɩn Yɩzərayɛlə payuu tə tʋ

7 Yɩzərayɛlə lɩ̀à cʋna tə nə pɩn Yɩzərayɛlə payuu tə tʋ. Ba tʋn cʋna Ba-Yígúrə́-Jə-Tiu yáá con, ʋ nə yɩ ba Yɩɩ tə, ʋ nə jon ba Ezwipətə pɩ̀ʋ́ Farawon jɩɩn wa, ʋ pa ba nan Ezwipətə lʋʋ nii tə wa, ba vìí. Kʋ tə nə súrí lá, ba yà jʋnɩ woŋwanan də. 8 Ba zʋa dwíə́ nəkaran* tə tʋtʋnɛɛ tə wa, Ba-Yígúrə́-Jə-Tiu nə dɩŋɩ Yɩzərayɛlə lɩ̀à yáá con, ba ga twá Yɩzərayɛlə pɛ̀gá tə tʋtʋnɛɛ nə. 9 Yɩzərayɛlə lɩ̀à tə səgə ba tʋn yìə̀n, ba nə wà mɛ sə ba tʋn, ba zɩgɩ Ba-Yígúrə́-Jə-Tiu nə, ʋ nə yɩ ba Yɩɩ. Ba lwə̀ jwəŋə dədwələn* ba tɩan tə mama wa, kʋ nə zɩgɩ bwálá tə nə, ba nə dɩ̀ ba ma ywàŋá tɩʋ yuu, kʋ va kʋ yí tɩan tə, ba nə lwə̀ biritaŋʋ ba ma kɩkarɩ tə. 10 Ba zɩ̀n kapana ba zɩgɩ yɩɩ nə, ba cwɛn woŋwanʋ Aswera* daceli, paan mama yuu wa, tɩ̀ʋ́ mama də̀ń kʋ nə jə vʋran. 11 Yá ba sʋ̀rɩ́ wusinə jwəŋə dədwələn təntə mama yuu wa, ndə dwíə́ nəkaran tə nə Ba-Yígúrə́-Jə-Tiu nə dɩŋɩ ba yáá con. Ba fwa yokʋkwɩnan ba ma zɩ̀n Ba-Yígúrə́-Jə-Tiu lɩŋa. 12 Ba pɩn dun woŋwanan tə nə, Ba-Yígúrə́-Jə-Tiu nə swɩ̀n tə yoo ba con, ʋ wʋ́: «Á wà mɛ sə á tʋn kʋ yoo təntə.» 13 Ba-Yígúrə́-Jə-Tiu yà dí yáá ʋ twá ʋ nii sʋ̀sʋ̀nà tə mama nə, də ʋ yinara tə mama nə, ʋ swɩ̀n Yɩzərayɛlə lɩ̀à tə, də Zwida dwíí tə con, ʋ wʋ́: «Á pìrə́ á yá á tʋtʋnkʋkwɩnan tə, á ga zìlí yìə̀n tə, à nə pɩn aba nii tə yuu wa, də yìə̀n tə à nə pɩn tə pʋ́pʋ́nɩ́ tə tún, sə á twá tə nə, sə á ga twá à nii yìə̀n tə mama nə, à nə pɩn á nɩbara-ba nə, à ga pa à nii sʋ̀sʋ̀nà tə, ba nə yɩ à tʋ̀tʋ̀nà swɩ̀n á con.» 14 Yá ba vɩga sə ba cʋgʋ kʋ, ba ga tʋn yɩdɩʋ, ndə ba nɩbara-ba nə wà ba waa ken Ba-Yígúrə́-Jə-Tiu nə, ʋ nə yɩ ba Yɩɩ, ba ga tʋn kʋ nətʋ. 15 Ba vɩga yìə̀n tə ʋ pɩn tə pʋ́pʋ́nɩ́ tə tún, sə ba twá tə nə, də nimarʋ tə ʋ nə tún də ba nɩbara tə, də yìə̀n tə, ʋ nə dí yáá ʋ swɩ̀n ba con. Ba tì ba tɩ̀àn ba vwa wotʋtʋ yɩra, yá ba də tətə dàń jìgə̀ tʋtʋ. Ba zʋa dwíə́ nəkaran tə nə kɩkarɩ ba tʋtʋnɛɛ tə wa, Ba-Yígúrə́-Jə-Tiu yà nə swɩ̀n, sə ba dàn ká zʋ tə wa. 16 Ba dʋgʋ Ba-Yígúrə́-Jə-Tiu, ʋ nə yɩ ba Yɩɩ yìə̀n tə mama, ʋ nə pɩn nii tə yuu wa. Ba fwa lugu nabii bələ, ba fwa woŋwanʋ Aswera* daceli, ba jʋn wiən tə mama nə wulə lanworu tə wa, ba ga tʋn ba pa woŋwanʋ Baalə nə. 17 Ba pɩn ba sʋ̀rɩ́ ba bɩ̀á də ba bwɩ̀ɩ́, ba ma fwa jwəŋə. Ba mà kapana vʋra con, ba ga tʋn cɩrɩ yìə̀n. Ba tʋn yìə̀n tə nə lwara Ba-Yígúrə́-Jə-Tiu yáá con, ba ma zɩ̀n ʋ lɩŋa. 18 Ba-Yígúrə́-Jə-Tiu lɩŋa dàń zàn Yɩzərayɛlə lɩ̀à yuu wa zənzən, ʋ ga dɩŋa ba ʋ yáá con. Kʋ dàń ga Zwida dwíí tə cɩcɩ. 19 Yá Zwida dwíí tə tətə wà Ba-Yígúrə́-Jə-Tiu, ʋ nə yɩ ba Yɩɩ yìə̀n tə, ʋ nə pɩn nii tə yuu wa zìlí. Ba də yà zʋa Yɩzərayɛlə lɩ̀à tʋtʋnɛɛ tə wa. 20 Ba-Yígúrə́-Jə-Tiu vɩga Yɩzərayɛlə dwíí tə mama ʋ dʋgʋ. Ʋ pɩn dwíə́ tə nə vɩrɩ lɩ̀à wiən də́ dɩ̀àn ba yuu wa, ʋ pa ba də́ cavɩra, ʋ dàń ga dɩŋa ba, ʋ lɩ ʋ yáá con, ʋ kə yiŋʋnɩ. 21 Máŋá tə wa, Ba-Yígúrə́-Jə-Tiu nə pwɛ̀ Yɩzərayɛlə lɩ̀à, də Davidə dìə̀* tə duən nə, Yɩzərayɛlə lɩ̀à yà tún Nebatə bìú Zwerobʋamə, sə ʋ ya ba pɩ̀ʋ́. Yá Zwerobʋamə yà viviri Yɩzərayɛlə lɩ̀à ʋ yá Ba-Yígúrə́-Jə-Tiu, ʋ pa ba tʋn cʋna nəfarʋ. 22 Yɩzərayɛlə lɩ̀à zʋa Zwerobʋamə cʋna tə mama wa ʋ nə tʋn, ba wà pìí ba kə ba kwa, ba yá tə. 23 Kʋ nətʋ pɩn Ba-Yígúrə́-Jə-Tiu dɩŋa ba, ʋ lɩ ʋ yáá con, ʋ kə yiŋʋnɩ, ndə ʋ nə twá ʋ nii sʋ̀sʋ̀nà tə mama nə, ba nə yɩ ʋ tʋ̀tʋ̀nà, ʋ swɩ̀n kʋ nətʋ. Ba jɩn Yɩzərayɛlə lɩ̀à ba ja va yiŋʋnɩ, Asiiri lʋʋ nii wa, ba ga yá Yɩzərayɛlə lʋʋ nii tə nə. Yá ba dàń yɩn Asiiri lʋʋ nii wa, kʋ bà kʋ yí zə̀n.

Samari tɩ̀án dəkuu

24 Asiiri pɩ̀ʋ́ pɩn lɩ̀à nan Babɩlɔnə, də Kutə, də Ava, də Hamatə, də Sefarəvayimə ba bà. Ʋ pɩn ba jə̀ń Samari tɩfaran tə wa, Yɩzərayɛlə lɩ̀à tə bwálɩ́ nə. Ba dàń tɩnɩ Samari, ba wulə kʋ tɩfaran tə wa. 25 Máŋá tə wa, ba nə sinti ba jəni lá, ba yà ba Ba-Yígúrə́-Jə-Tiu fən dəri. Yá Ba-Yígúrə́-Jə-Tiu dàń tʋn gərən, ʋ pa tə gwɩ ba. 26 Ba swɩ̀n Asiiri pɩ̀ʋ́ tə con, ba wʋ́: «Dwíə́ tə n nə ja bà, n pa ba jə̀ə́ Samari tɩan tə wa, yəri lʋʋ nii tə yɩɩ jʋnʋ. Yá yɩɩ təntə dàń pɩn gərən bà tə gwɩ ba, ba nə yəri lʋʋ nii tə yɩɩ jʋnʋ yɩrɩ.» 27 Asiiri pɩ̀ʋ́ tə ma pa nii kʋ tə, ʋ wʋ́: «Á pɩan Yɩɩ joŋwana tə lìù don, ba nə ja nan Samari, pìí ʋ va lá. Á pɩan ʋ va ʋ ya lá, ʋ bɩrɩ ba lʋʋ nii tə yɩɩ jʋnʋ.» 28 Yɩɩ joŋwana tə lìù don, ba yà nə jɩn ba ja nan Samari, dàń twi ʋ wulə Betɛlə nə, ʋ bɩrɩ lɩ̀à tə, nətʋ ba nə mɛ sə ba zìlí Ba-Yígúrə́-Jə-Tiu.

29 Yá dwíə́ nəkaran* tə nədʋ mama lɩ̀à lwə̀ ba woŋwanan. Ba ken woŋwanan təntə jwəŋə dədwələn dìì tə wa, Samari tɩ̀án yà nə lwə̀ tɩan tə wa, dwíə́ nəkaran tə nədʋ mama yà nə wulə. 30 Lɩ̀à tə nə nan Babɩlɔnə fwa woŋwanʋ Sukotə-Benɔtə, lɩ̀à tə nə nan Kutə fwa woŋwanʋ Nɛrəgalə, lɩ̀à tə nə nan Hamatə fwa woŋwanʋ Aswima woŋwanʋ, 31 lɩ̀à tə nə nan Ava fwa woŋwanan Nibazə də Tarətakə, lɩ̀à tə nə nan Sefarəvayimə yà sʋ̀rɩ́ ba bɩ̀á mən wa, ba ma fwa jwəŋə, ba pɩn ba woŋwanan Adəramelɛkə də Anamelɛkə nə. 32 Ba yà p,in dun Ba-Yígúrə́-Jə-Tiu də nə, ba ga tún ba wa lɩ̀à, sə ba ya ba joŋwana, jwəŋə dədwələn dìì tə wa. 33 Kʋ nətʋ dàń pɩn ba yà pɩn dun Ba-Yígúrə́-Jə-Tiu nə, ba yà ga tə fwa jwəŋə ba tətə woŋwanan tə yuu, ndə dwíə́ tə ba nə nan tə wa yofwamɩnan tə nə yɩ nətʋ.

34 Də zə̀n mama, dwíə́ təntə tə yɩ ba twá ba fuən yofwamɩnan tə nə. Ba ba Ba-Yígúrə́-Jə-Tiu fən dəri, ba ga ba ba yìə̀n tə nə pʋ́pʋ́nɩ́ tə tún, də ba yofwamɩnan nə twá, ba ma ba Ba-Yígúrə́-Jə-Tiu nii tə, də yìə̀n tə ʋ nə pɩn nii tə yuu wa, Zwakɔbə bɩ̀á tə nə, nə twá. Mə Zwakɔbə nə Ba-Yígúrə́-Jə-Tiu dɩga ʋ yɩrɩ don Yɩzərayɛlə. 35 Ba-Yígúrə́-Jə-Tiu yà tún nimarʋ də ba, ʋ ga pa ba nii kʋ tə, ʋ wʋ́: «Á wà mɛ sə á zìlí woŋwanan, á wà mɛ sə á tʋ á nadwana yuu tə yáá con, á pa tə dun, á wà mɛ sə á tʋn á pa tə, á wà mɛ sə á fwa jwəŋə á pa tə. 36 Yá á dàń mɛ sə á dəri à mʋ̀ Ba-Yígúrə́-Jə-Tiu fən, à nə pɩn á nan Ezwipətə lʋʋ nii tə wa, kʋ twá də à vàn dɩ̀àn nəfarʋ tə. Mə à mʋ̀ yáá con nə á mɛ sə á tʋ á nadwana yuu, á pa nə dun, á ga fwa jwəŋə á pa nə. 37 Dɩɩn mama á mɛ sə á zìlí yìə̀n tə, à nə pɩn tə pʋ́pʋ́nɩ́ tə tún, də yìə̀n tə à nə bɩrɩ sə tə tʋn*, də à nii tə à nə pɩn, də à nii yoo tə, à nə pʋ́pʋ́nɩ́ à pa aba. Yá á nə dànà ká dəri woŋwanan fən. 38 Á dànà ká swɛ̀ɛ́ nimarʋ tə, à nə tún də aba, yá á dànà ká dəri woŋwanan fən. 39 Yá à mʋ̀ Ba-Yígúrə́-Jə-Tiu cɩcɩ, à nə yɩ á tíú Yɩɩ fən nə á mɛ sə á dəri, yá à wá jon aba á dʋŋa tə mama jɩɩn wa.» 40 Yá ba wà nii zìlí, ba yɩ ba tə twá ba fuən yofwamɩnan tə nə.

41 Kʋ nətʋ dàń pɩn dwíə́ nəkaran təntə dəri Ba-Yígúrə́-Jə-Tiu fən, ba ga tə tʋŋa ba pɩn ba woŋwanan tə nə. Də zə̀n mama, ba bɩ̀á də ba nɩ̀án yɩ ba tʋŋa, ndə ba nyɩna-ba nə tʋn nətʋ.