Ezekɩasə jìgə̀ Zwida payuu tə pɩ̀ʋ́
18
1 Oze bìú Ela, ʋ nə yɩ Yɩzərayɛlə pɩ̀ʋ́ pàrɩ̀ tə bɩna batwa nii bɩnɩ tə nə, Ahazə bìú Ezekɩasə jìgə̀ Zwida payuu tə pɩ̀ʋ́. 2 Ʋ yà jə bɩna sapʋa də bonu, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna sapʋa də nʋgʋ Zwerizalɛmə nə. Ʋ nuu yɩrɩ nə yɩ Abɩ, ʋ ga yɩ Zakari bʋ̀á. 3 Ʋ tʋn kʋ tə nə yɩ mənəmənə Ba-Yígúrə́-Jə-Tiu yáá con yoo mama wa, ndə ʋ nɩbɛɛ Davidə nə tʋn nətʋ. 4 Ʋ pɩn jwəŋə dədwələn* tə nyʋn lá, ʋ mà culu kapana* tə ba nə zɩ̀n ba zɩgɩ yɩɩ nə ʋ lwa, ʋ goŋə woŋwanʋ Aswera* daceli tə, ʋ ga nyʋnyʋgʋ cɩnɩan dən tə, Moyizə yà nə fwa. Cɩ́gá, Yɩzərayɛlə lɩ̀à yà tə sʋ̀rɩ́ wusinə dən təntə yáá con, ba nə boŋə Nehuswətanə. 5 Ʋ ken ʋ waa Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. Yá Zwida dwíí pɛ̀gá tə mama ba nə yɩn ʋ kwa, də ba tə nə dí ʋ yáá, lìù wà ba wa yɩn ʋ nə yɩn ndə ʋ nə. 6 Ʋ vwə ʋ tɩ̀àn Ba-Yígúrə́-Jə-Tiu nə, ʋ wà pìí ʋ kə ʋ kwa, ʋ ga zìlí yìə̀n tə Ba-Yígúrə́-Jə-Tiu nə pɩn nii tə yuu wa, ʋ ga pʋ́pʋ́nɩ́ ʋ pa Moyizə nə. 7 Yá Ba-Yígúrə́-Jə-Tiu dàń yɩn də wá. Won tə mama Ezekɩasə nə ken sírí sə ʋ tʋn, ʋ yàá tʋn kʋ ʋ pa kʋ nii sú. Ʋ zàn ʋ vɩ Asiiri pɩ̀ʋ́ tə nii, yá kʋ nə mɛ kʋ nə, ʋ kʋ́ʋ̀ wà pìí ʋ sɛ̀ ʋ nii. 8 Ʋ mʋ̀ nə ta Filisi tɩ̀án tə ʋ də́, ʋ va ʋ yí Gaza, də kʋ nagwanaa tə, kʋ nə zɩgɩ bwálá tə nə ba nə dɩ̀ ba ma ywàŋá tɩʋ yuu, kʋ va kʋ yí tɩan tə ba nə lwə̀ biritaŋʋ ba ma kɩkarɩ tə.Nətʋ tə ba nə ta Samari tɩʋ tə ba də́
9 Ezekɩasə pàrɩ̀ tə bɩna banɩa nii bɩnɩ tə nə, Asiiri pɩ̀ʋ́ Salamanazarə twi ʋ pú Samari tɩʋ tə nə də kʋ̀ʋ̀, sə ʋ ta kʋ. Kʋ yɩn Ela bìú Oze pàrɩ̀ tə bɩna barpɛ nii bɩnɩ tə nə, Yɩzərayɛlə payuu tə yuu wa. 10 Ʋ ta Samari ʋ də́ bɩna batwa nii nə, Ezekɩasə pàrɩ̀ tə bardʋ nii bɩnɩ tə nə. Yɩzərayɛlə pɩ̀ʋ́ Oze pàrɩ̀ tə bɩna nʋgʋ nii bɩnɩ tə nə nə, ʋ ta Samari ʋ də́. 11 Asiiri pɩ̀ʋ́ tə jɩn Yɩzərayɛlə lɩ̀à tə, ʋ ja va Asiiri lʋʋ nii. Ʋ pɩn ba va ba wulə Hala nagwanaa tə, də Habɔrə mʋnaa tə nii nə, Gozan nagwanaa tə wa, də Medi tɩ̀án tɩan tə wa. 12 Kʋ nətʋ tʋn, ba nə wà Ba-Yígúrə́-Jə-Tiu ʋ nə yɩ ba Yɩɩ sʋgʋ cʋgʋ, ba ga cʋ̀gʋ̀ ʋ nimarʋ tə yɩrɩ. Cɩ́gá, ba wà kʋ tə mama, Ba-Yígúrə́-Jə-Tiu tʋtʋnʋ Moyizə nə pɩn nii sə ba tʋn cʋgʋ, ba ga wà kʋ tʋn.
Senakeribə ta Zwida payuu tə
13 Pɩ̀ʋ́ Ezekɩasə pàrɩ̀ tə bɩna fugə banɩa nii bɩnɩ tə nə, Asiiri pɩ̀ʋ́ Senakeribə vəli ʋ ta Zwida payuu tɩan tə mama, ba nə lwə̀ ba kɩkarɩ də biritaŋʋ, ʋ jon ʋ tɩnɩ. 14 Zwida pɩ̀ʋ́ Ezekɩasə tʋn ʋ swɩ̀n Asiiri pɩ̀ʋ́ tə con Lakiswə nə, ʋ wʋ́: «À tʋn yolwan! Yá, dàn ká ta nə. À sɛ̀ sə à ŋwɩ́n kʋ tə mama n nə wá pa nii sə à ŋwɩ́n.» Asiiri pɩ̀ʋ́ tə dàń ma pa nii Zwida pɩ̀ʋ́ Ezekɩasə nə, sə ʋ ŋwɩ́n wárʋ́ kilo mʋ̀rʋ̀ nʋgʋ, də sɩ́án kilo biənʋgʋ. 15 Ezekɩasə pɩn wárʋ́ tə mama kʋ yà nə wulə Ba-Yígúrə́-Jə-Tiu dìə̀ tə wa, də padiə tə jɩjə wiən tə wa. 16 Kʋ máŋá tə wa, Ezekɩasə lɩ Ba-Yígúrə́-Jə-Tiu dìə̀ bòrə̀n tə, də ka mimii yuu daran tə, ʋ pa Asiiri pɩ̀ʋ́ tə nə. Yá ʋ mʋ̀ Zwida pɩ̀ʋ́ Ezekɩasə tətə yà nə pɩn ba mwàlɩ̀ tə də sɩ́án.
Lìù tə nə daa pɩ̀ʋ́ Senakeribə nə nii sʋgʋ
17 Asiiri pɩ̀ʋ́ tə zɩgɩ Lakiswə nə, ʋ tʋn kwatara yun tɩ̀án bələ, də lìù tə nə daa ʋ nə, də kwatara púlí nəfarʋ, pɩ̀ʋ́ Ezekɩasə con, Zwerizalɛmə nə. Ba dàń vəli ba yí Zwerizalɛmə. Máŋá tə ba nə dɩ̀gà ba yí lá, ba vəli ba zɩga baan con nɩ́á gwàlʋ́ nəfarʋ tə nii nə, cwəŋə tə wa, ka nə vəli lìù tə nə li wiən bwɩran wa kárá tə con. 18 Ba bon pɩ̀ʋ́ tə, yá Hiləkiya bìú Eliyakimə ʋ nə ywàŋá padiə tə yuu, nan ʋ jəri ba, ʋ də Swebəna, ʋ nə pʋ́pʋ́nɩ́ saga, də Azafə bìú Yʋa, ʋ nə túŋə́ padiə tə saga. 19 Lìù tə nə daa Asiiri pɩ̀ʋ́ nə tə ma swɩ̀n ba con, ʋ wʋ́: «À lòrì aba, á vələ á swɩ̀n sʋgʋ kʋ tə, Asiiri pɩ̀ʋ́ nəfarʋ tə nə swɩ̀n Ezekɩasə con. Ʋ swɩ̀n, ʋ wʋ́: “Bɛ̀ɛ̀ yuu wa nə n jələ? 20 N bʋŋa də sʋ̀ràn cɩcɩ wàá tə bɩrɩ nətʋ tə, ba nə tanɩ kʋ̀ʋ̀, tə ga pɩn wʋdɩʋ, sə ba ma ta kʋ̀ʋ̀ naaa? Yá sɩ́ʋ́n nə, wàà yuu wa nə n jələ, n ma vɩ à nii? 21 Nə̀ń, n yɩ Ezwipətə tɩ̀án sáŋʋ́ yuu wa nə n jələ. Kʋ yɩ ndə mɩʋ nə, kʋ nə kɛ́n, kʋ ga zwe lìù mama jɩɩn wa, ʋ nə nyɩ́n kʋ yuu wa. Mə Ezwipətə pɩ̀ʋ́ Farawon yɩ nətʋ, ʋ pa lɩ̀à tə mama nə, ba nə jələ ʋ yuu wa. 22 Dɩɩn don, á wá swɩ̀n à con, də kʋ yɩ Ba-Yígúrə́-Jə-Tiu, ʋ nə yɩ á tíú Yɩɩ yuu wa nə á jələ. Yá kʋ yɩ ʋ mʋ̀ Ezekɩasə nə pɩn ʋ jwəŋə dədwələn tə, də ʋ jwəŋə bwálá tə nyʋn lá. Ʋ mʋ̀ nə pɩn nii Zwida dwíí tə də Zwerizalɛmə tɩ̀án nə, sə ba tʋ ba nadwana yuu, Yɩɩ joŋi bwálɩ́ təntə yáá con Zwerizalɛmə nə, ba jʋn Yɩɩ.” 23 Sɩ́ʋ́n nə, n dàń mà caca də à yuu tíú, Asiiri pɩ̀ʋ́ tə, yá à wá pa mʋ́ səsen mʋ̀rʋ̀ bələ, də n nə wàá səsədɩra n nɩ, n pɩn ba dɩ̀ tə. 24 Nətə nə n wá fwa, n ma dɩŋa tʋtʋnʋ nədʋ tətə, ʋ nə mun, à yuu tíú tə tʋ̀tʋ̀nà tə wa, n mʋ̀ lìù tə n nə jələ Ezwipətə tɩ̀án yuu wa, sə ba pa mʋ́ səsen kòrə̀n də səsədɩra? 25 Kʋ tə nə dwə, kʋ tà Ba-Yígúrə́-Jə-Tiu fɩra, sə à bà à ta bwálɩ́ kʋ tə à cʋ̀gʋ̀ naaa? Ba-Yígúrə́-Jə-Tiu nə swɩ̀n à con, sə à bà à ta lʋʋ nii kʋ tə à cʋ̀gʋ̀.»
26 Hiləkiya bìú Eliyakimə, də Swebəna, də Yʋa swɩ̀n lìù tə con, ʋ nə daa Asiiri pɩ̀ʋ́ nə, ba wʋ́: «Nə lòrì mʋ́ sə n swɩ̀n nə mʋ̀ n tʋ̀tʋ̀nà tə con, də Aramə tɩ̀án sʋgʋ. Cɩ́gá, nə nə̀ń kʋ sʋgʋ təntə. Dàn ká swɩ̀n nə con də Zwifə-ba sʋgʋ tə, sə lɩ̀à tə mama nə wulə biritaŋʋ tə yuu nì.» 27 Lìù tə nə daa Asiiri pɩ̀ʋ́ nə tə le ba, ʋ wʋ́: «N bʋŋa də kʋ yɩ n də n yuu tíú tə cɩcɩ yɩrɩ nə, à yuu tíú tə tʋn nə, sə à swɩ̀n sʋ̀ràn tə tə naaa? Sʋgʋ tə yɩ lɩ̀à təntə mama yɩrɩ, ba nə wulə biritaŋʋ tə yuu wa. Ba də á mʋ̀ mɛ nə wá də́ á bàń, á ga nyʋn á fɩan.»
28 Kʋ kwa nə, lìù tə nə daa Asiiri pɩ̀ʋ́ nə tə zàn ʋ baa də ʋ dɩ̀àn mama, də Zwifə-ba sʋgʋ, ʋ wʋ́: «Á cʋga pɩ̀ʋ́ nəfarʋ tə sʋgʋ, Asiiri pɩ̀ʋ́ sʋgʋ! 29 Pɩ̀ʋ́ nəfarʋ tə swɩ̀n, ʋ wʋ́: “Á dànà ká pa Ezekɩasə gɩgarɩ aba. Cɩ́gá, ʋ wàrɩ̀ aba ʋ joŋə à jɩɩn wa. 30 Dànà ká twá Ezekɩasə nə, á jələ Ba-Yígúrə́-Jə-Tiu yuu wa, də ʋ nə swɩ̀n á con də cɩ́gá mama, Ba-Yígúrə́-Jə-Tiu wá jon aba, ʋ ga cɩ̀, sə à mʋ̀ Asiiri pɩ̀ʋ́ dàn ká də́ dɩ̀àn á tɩʋ tə yuu wa. 31 Á dànà ká tan Ezekɩasə con, á cʋga kʋ tə à mʋ̀ Asiiri pɩ̀ʋ́ nə swɩ̀n. Á sɩa sə sìə́ ya nə pwə́rə́ wa, á ga kə á tɩ̀àn à jɩɩn wa. Yá á lìù mama wá də́ ʋ divɛn tɩ̀án lənə, də ʋ kapɩran lənə, ʋ ga wá nyʋn ʋ nɩ́á gwàlʋ́ kʋ də̀ń nə lu nɩ́á. 32 Kʋ kwa nə, à wá bà à ja aba à ja va lʋʋ nii don wa, kʋ nə yɩ ndə á lʋʋ nii tə nə. Kʋ lʋʋ nii təntə jə dipɛn mɩna də divɛn tɩ̀án kárɩ́. Kʋ jə dipɛn də divɛn, də olivə bɩ̀á nʋga də tʋ̀ràn. Yá kʋ nətʋ dàń wá pa á mɩɩ ya lʋʋ wa, á dàn ká tɩ. Á kʋ́ʋ̀ dànà ká tan Ezekɩasə con. Cɩ́gá, ʋ yɩ ʋ gɩgarɩ aba, də ʋ nə swɩ̀n də Ba-Yígúrə́-Jə-Tiu wá jon aba. 33 Dwíə́ nəkaran* tə yɩa tə wànɩ́ tə jon ba lìù mama lʋʋ nii, à mʋ̀ Asiiri pɩ̀ʋ́ jɩɩn wa naaa? 34 Hamatə tɩ̀án, də Arəpadə tɩ̀án yɩa tə wa yə̀n nə? Sefarəvayimə tɩ̀án, də Hena tɩ̀án, də Yɩva tɩ̀án yɩa tə wa yə̀n nə? Tə jon Samari tɩ̀án à jɩɩn wa naaa? 35 Lʋʋ níə́ tə mama yɩa tə wa, yɩɩ kwà nə jon ba lʋʋ nii, à jɩɩn wa? Nətə nə Ba-Yígúrə́-Jə-Tiu mʋ̀ wá jon Zwerizalɛmə tɩ̀án, à jɩɩn wa?”»
36 Lɩ̀à tə mama púə́ ba nii, ba wà yoo nədʋ tətə le. Cɩ́gá, pɩ̀ʋ́ Ezekɩasə yà pɩn nii, sə ba dàn ká le wá. 37 Hiləkiya bìú Eliyakimə ʋ nə ywàŋá padiə tə yuu, də Swebəna, ʋ nə pʋ́pʋ́nɩ́ saga, də Azafə bìú Yʋa ʋ nə túŋə́ padiə tə saga, kàrɩ́ ba gànàn, ba ga pìí ba va pɩ̀ʋ́ Ezekɩasə con. Ba tún lìù tə nə daa Asiiri pɩ̀ʋ́ nə sʋ̀ràn tə, ba bɩrɩ wá.