Asiiri pɩ̀ʋ́ Senakeribə ta Zwida payuu tə
32
1 Tə mʋ̀ yìə̀n təntə nə bɩrɩ də, Ezekɩasə yɩn pùə́ nədʋ tíú də Yɩɩ kwa nə, Asiiri pɩ̀ʋ́ Senakeribə twi Zwida payuu tə wa də kwatara. Ʋ púə́ tɩan tə ba nə lwə̀ biritaŋʋ ba ma kɩkarɩ tə, ʋ kə ʋ tɛ. 2 Ezekɩasə nə nɩ də Senakeribə yɩ ʋ twi də pubʋŋa sə ʋ ta Zwerizalɛmə, 3 ʋ də ʋ lʋʋ nii yáá tɩ̀án tə, də ʋ kwatara yáá tɩ̀án tə vʋrɩ duən nə, sə ba sún nɩ́á bwálá tə nə wulə tɩʋ tə kàrá con. Yá ba sɛ̀ kʋ nətʋ tə. 4 Lɩ̀à kapʋpʋ dàń twi ba san duən nə, ba sún nɩ́á bwálá tə mama, ba ga swɩn nɩ́á fìù tə, ba nə kʋa tɩa də̀ń, ba pa nɩ́á pàlɩ̀ kʋ wa, nagwanaa tə titəŋi wa. Ba yà swɩ̀n ba wʋ́: «Kʋ wà mɛ sə Asiiri tɩ̀án tə bà ba na nɩ́á zənzən yəbə.»5 Ezekɩasə dàn ʋ bɩcan, ʋ pìí ʋ lwà biritaŋʋ tə bwálá tə yà nə tʋa, ʋ ga kwɛn ʋ lwà biritaŋʋ tə yuu dəyuu dìì tə, ʋ pa tə jì nədaran. Kʋ kwa nə, ʋ tə lwə̀ biritaŋʋ don, kʋ don tə kwa con. Ʋ súrí Milo gárɩ́ tə dɩ̀àn, Davidə sadiyuu tə wa, ʋ ga pa ba fwa kwatarɩ zɩla kapʋpʋ, də natanan kapʋpʋ. 6 Ʋ kúrí kwatara yáá tɩ̀án, sə ba ya lalʋʋ tə yáá. Ʋ pɩn ba bà ʋ con, tɩʋ tə mimii nə. Ʋ swɩ̀n, ʋ dàn ba jɩɩn, ʋ wʋ́: 7 «Á daŋa á bɩcan, á ga dàn á jɩɩn. Dànà ká pa fən ja aba, á dànà ká vɩvaga Asiiri pɩ̀ʋ́ tə, də kwatara kapʋpʋ tə yɩrɩ ba nə wulə də wá. Cɩ́gá, dɩ̀àn tə nə wulə də nəba dwə dɩ̀àn tə nə wulə də wá. 8 Ʋ mʋ̀ yɩ ləzoni dɩ̀àn nə wulə də wá, yá nə mʋ̀ yɩ Ba-Yígúrə́-Jə-Tiu, ʋ nə yɩ nə Yɩɩ nə wulə də nəba. Ʋ mʋ̀ nə wá san nəba, ʋ ta kʋ̀ʋ̀ tə. Yá Zwida pɩ̀ʋ́ Ezekɩasə sʋ̀ràn təntə dàn lalʋʋ tə jɩɩn.
Senakeribə fugu Zwerizalɛmə tɩ̀án
9 Kʋ kwa nə, Asiiri pɩ̀ʋ́ Senakeribə tʋn ʋ lɩ̀à Zwerizalɛmə nə. Kʋ máŋá tə wa, də ʋ mʋ̀ də ʋ kwatara púlí tə mama yà wulə ba tɛ Lakiswə tɩ̀án. Ʋ tʋn ʋ lɩ̀à tə Zwida pɩ̀ʋ́ Ezekɩasə, də Zwida dwíí tə mama con, ba nə wulə Zwerizalɛmə nə, sə ba swɩ̀n ba con, ba wʋ́: 10 «Nəŋə kʋ tə Asiiri pɩ̀ʋ́ Senakeribə nə swɩ̀n. Bɛ̀ɛ̀ yuu wa nə á jələ, á tə ma wulə Zwerizalɛmə wa, kʋ̀ʋ̀ tə máŋá wa? 11 Ezekɩasə swɩ̀n á con də Ba-Yígúrə́-Jə-Tiu, ʋ nə yɩ á Yɩɩ tə wá jon aba, à jɩɩn wa. Yá ʋ yɩ ʋ gɩgarɩ aba, nɩan də nanyʋnɩ nə wá gʋ á mama. 12 Kʋ tà ʋ mʋ̀ Ezekɩasə nə pɩn Ba-Yígúrə́-Jə-Tiu jwəŋə dədwələn tə, də ʋ jwəŋə bwálá tə nyʋn lá naaa? Yá kʋ tà ʋ mʋ̀ nə swɩ̀n Zwida dwíí tə, də Zwerizalɛmə tɩ̀án con, sə ba jʋn ba Yɩɩ tə, Yɩɩ joŋi bwálɩ́ nədʋ yáá con, sə ba ga sʋ̀rɩ́ wusinə kʋ cɩcɩ yuu wa naaa? 13 Á yəri kʋ tə à də à nɩbara-ba nə ma tʋn dwíə́ tə mama, lʋʋ níə́ tə wa naaa? Dwíə́ təntə yɩa tə cɩ́gá wànɩ́ tə jon ba lʋʋ níə́ tə, à jɩɩn wa naaa? 14 Dwíə́ tə mama à nɩbara-ba nə cʋ̀gʋ̀ mɩ́ámɩ́án yà jə yɩa. Yá dwíə́ təntə yɩa tə mama wa, yɩɩ kʋ́kwà nə wànɩ́ kʋ lɩ̀à kʋ jon à jɩɩn wa, sə kʋ pa á də Yɩɩ tə wànɩ́ ʋ jon aba à jɩɩn wa? 15 Sɩ́ʋ́n nə, dànà ká pa Ezekɩasə gɩgarɩ aba ʋ dʋgʋ! Dànà ká pa cɩ́gá ʋ sʋ̀ràn tə nə, kʋ yɩ kʋ̀nkʋ̀n nə ʋ kʋ̀nɩ̀, ʋ bɩrɩ aba! Cɩ́gá, yɩɩ nədʋ tətə tə̀lə́ lʋʋ nii mama wa, nə à yə̀ə́ payuu nədʋ tətə wa, kʋ nə wànɩ́ kʋ jon kʋ lɩ̀à à jɩɩn wa, nə à yə̀ə́ à nɩbara-ba jɩɩn wa. Á də yɩa tə bá jon aba à jɩɩn wa! 16 Senakeribə tʋntʋna tə swɩ̀n, ba súrí lá, ba ma zɩgɩ Ba-Yígúrə́-Jə-Tiu nə, ʋ nə yɩ Yɩɩ, də ʋ tʋtʋnʋ Ezekɩasə nə.
Senakeribə twɩn Ba-Yígúrə́-Jə-Tiu
17 Senakeribə yà pʋ́pʋ́nɩ́ sagɩ ʋ ma twɩn Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ. Nə̀ń kʋ tə ʋ nə swɩ̀n sagɩ tə wa. «Lʋʋ níə́ tə duən yɩa tə wà wànɩ́ tə jon tə lʋʋ lɩ̀à tə, à jɩɩn wa, yá Ezekɩasə də Yɩɩ tə bá wànɩ́ ʋ jon ʋ lʋʋ lɩ̀à tə, à jɩɩn wa.» 18 Senakeribə tʋntʋna tə baa ba kə yɩɩ nə, də Ebərə-ba sʋgʋ, sə ba ma kə fən lɩ̀à tə waa, ba nə wulə Zwerizalɛmə biritaŋʋ tə yuu wa. Ba yà pɩ̀à sə Zwerizalɛmə tɩ̀án jɩ̀àn gwàrɩ̀, sə kʋ pa ba ta tɩʋ tə, ba də́ mwalɩ mwalɩ. 19 Senakeribə tʋntʋna yà swɩ̀n Zwerizalɛmə tɩ̀án Yɩɩ tə yoo, ndə ba nə swɩ̀n dwíə́ tə duən yɩa tə yoo nətʋ, tə nə yɩ ləzoni jɩ̀àn nə fwa.
Yɩɩ jon Zwerizalɛmə tɩ̀án Senakeribə jɩɩn wa
20 Pɩ̀ʋ́ Ezekɩasə, də Amɔsə bìú Ezayi, ʋ nə yɩ Yɩɩ nii sʋ̀sʋ̀nʋ̀ jʋn Yɩɩ kʋ yoo tə yɩrɩ. Ba bubwi ba kəni Yɩɩ nə. 21 Ba-Yígúrə́-Jə-Tiu dàń tʋn malɩka* ka bà ka gʋ kwatara babɩran tə mama, də kwatara yáá tɩ̀án tə mama, də lʋʋ nii yáá tɩ̀án tə mama, Asiiri pɩ̀ʋ́ tə kwatara púlí tə wa. Yá Asiiri pɩ̀ʋ́ tə dàń pìí ʋ va ʋ lʋʋ nii wa, də cavɩra nəfarʋ. Dɩɩn don nə, ʋ zʋa ʋ woŋwanʋ dìə̀ wa, yá ʋ tətə bɩ̀á gʋa wá lá nə, də kwatara sɩ̀ʋ́. 22 Mə kʋ zɩgɩ nətʋ, Ba-Yígúrə́-Jə-Tiu ma jon Ezekɩasə, də Zwerizalɛmə tɩ̀án, Asiiri pɩ̀ʋ́ Senakeribə jɩɩn wa, də ba dʋŋa tə mama jɩɩn wa. Yá ʋ dàń pɩn ba na sìə́, ba jənduən tə mama jɩɩn wa. 23 Lɩ̀à kapʋpʋ twi ba pa zìlə́ wiən Ba-Yígúrə́-Jə-Tiu nə, ba ga pa tə duən Zwida pɩ̀ʋ́ Ezekɩasə nə, Zwerizalɛmə wa. Kʋ nə zɩgɩ máŋá təntə wa, dwíə́ nəkaran* tə mama zìlí Ezekɩasə.
Ezekɩasə pàrɩ̀ tə yígúrə́
(2 Pɛ̀gá 20.1-21; Ezayi 38.1-8; 39)
24 Kʋ máŋá təntə wa, Ezekɩasə tʋa tɩan yayɩgʋ. Ʋ jʋn Yɩɩ, yá Yɩɩ le wá, ʋ ga bɩrɩ wá mɩmɩnʋ, də ʋ wá na yazurə. 25 Yá Ezekɩasə wà jwɩan yəni, zəni təntə yoo wa, Yɩɩ nə tʋn ʋ yɩra. Ʋ fwa fwìə́ ʋ bɩcan wa, kʋ pa Ba-Yígúrə́-Jə-Tiu lɩŋa zàn ʋ də Zwida dwíí tə, də Zwerizalɛmə tɩ̀án yuu wa. 26 Yá kʋ máŋá tə wa, Ezekɩasə də ʋ fwìə́ tə mɛ, ʋ də Zwerizalɛmə tɩ̀án mun ba tɩ̀àn Ba-Yígúrə́-Jə-Tiu yáá con, kʋ pa Ba-Yígúrə́-Jə-Tiu wà ʋ lɩŋa tə fwi ba yuu wa, máŋá tə mama wa, Ezekɩasə nə yɩn lʋʋ wa.
27 Ezekɩasə yà jə jɩjə nəfarʋ də dun. Ʋ yà lwə bwálá ʋ ma tún wárʋ́, də sɩ́án, də kapana tə nə jə funə, də wusinə tə lwán nə ywán, də natanan, də won tə mama kʋ nə jə funə. 28 Ʋ tə pɩn ba lwà bwálá, sə ʋ ma kə mɩna, də divɛn, də nʋga. Ʋ pɩn ba kə najɩra, sə ʋ nɩan ya lá, ba ga lwà pətun, sə ʋ vanmɩnɩ ya lá. 29 Ʋ pɩn ba lwà tɩan də tətə, ʋ ga na vanmɩnɩ kapʋpʋ, də vanfaran kapʋpʋ. Cɩ́gá, Yɩɩ yà pɩn wá jɩjə nəfarʋ.
30 Mə ʋ mʋ̀ Ezekɩasə nə kànɩ́ Gihon buu tə nɩ́á tə, ʋ pa tə pìí tə twá tɩa də̀ń fìù wa, tə pàlɩ̀ tə vəli Davidə sadiyuu tə yɩɩ yizwɩa con. Ezekɩasə tʋn ʋ tʋtʋŋɩ mama, ʋ pa kʋ nii sú. 31 Yá máŋá tə wa, Babilɔnə lʋʋ nii yáá tɩ̀án tə nə tʋn lɩ̀à ʋ con, sə ba lwarɩ yomɩlʋa tə də̀ń, kʋ nə tʋn ʋ lʋʋ nii tə wa, Yɩɩ yá sə ʋ tʋn ʋ fɩra, sə ʋ ma dídə́n wá, ʋ lwarɩ kʋ tə nə wulə ʋ bɩcan wa.
32 Ba pʋ́pʋ́nɩ́ Ezekɩasə tʋ̀tʋ̀nán tə gɩganɩ, də tə tə ʋ nə tʋn də pùə́ nədʋ, ba tún Yɩɩ nii sʋ̀sʋ̀nʋ̀ Ezayi, ʋ nə yɩ Amɔsə bìú sagɩ tə wa, kʋ nə yɩ yìə̀n tə Yɩɩ nə bɩrɩ wá sagɩ. Ba pʋ́pʋ́nɩ́ tə ba tún Zwida də Yɩzərayɛlə pɛ̀gá sagɩ tə də wa. 33 Ezekɩasə tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Davidə bɩ̀á tə libərə tə yuu con. Zwida dwíí tə mama də Zwerizalɛmə tɩ̀án pɩn wá dun, ʋ tɩan tə máŋá wa. Ʋ bìú Manase nə dí pàrɩ̀ tə ʋ yuu nə.