Pɩ̀ʋ́ Ezekɩasə yɩga yá ʋ pìí ʋ na yazurə
38
1 Kʋ máŋá təntə wa, Ezekɩasə tʋa ʋ mɩɩ yayɩgʋ. Yɩɩ nii sʋ̀sʋ̀nʋ̀ Ezayi, ʋ nə yɩ Amɔsə bìú twi ʋ na wá, ʋ ga swɩ̀n ʋ con, ʋ wʋ́: «Nə̀ń kʋ tə Ba-Yígúrə́-Jə-Tiu nə swɩ̀n: “Pa nii n dìə̀ lɩ̀à nə. Cɩ́gá, n wá tɩ, n yayɩgʋ tə bá zwɛ̀, sə n pìí n zàn.”»2 Ezekɩasə viviri ʋ yáá ʋ pú bírə́ yɩra, ʋ ga lòrì Ba-Yígúrə́-Jə-Tiu, 3 ʋ wʋ́: «Ba-Yígúrə́-Jə-Tiu, à lòrì sə n lìí n tɩ̀àn, də à yɩn n yáá con də pùə́ nədʋ, də à bɩcan mama, à ga tʋn kʋ tə nə ziən n yáá con!» Yá Ezekɩasə dàń kwi zənzən.
4 Ba-Yígúrə́-Jə-Tiu kʋ́ʋ̀ swɩ̀n sʋ̀ràn tə tə Ezayi con, ʋ wʋ́:
5 «Pìí n va n swɩ̀n Ezekɩasə con, də à mʋ̀ Ba-Yígúrə́-Jə-Tiu, à nə yɩ ʋ nɩbɛɛ Davidə Yɩɩ swɩ̀n, à wʋ́: “À nì n lòrì tə, yá à nɩ n yɩnɩa tə. Nə̀ń, à súrí bɩna fugə də bonu n mɩɩ tə bɩna nii nə, n nə wá fwa lʋʋ wa. 6 À wá jon n də tɩʋ kʋ tə, Asiiri pɩ̀ʋ́ tə jɩɩn wa. À wá cɩ̀ tɩʋ kʋ tə nə.”» 7 Ezayi swɩ̀n Ezekɩasə con, ʋ wʋ́: «Nə̀ń mɩmɩnʋ tə, n nə wá twá kʋ nə n ma lwarɩ, də Ba-Yígúrə́-Jə-Tiu cɩ́gá wá tʋn kʋ tə ʋ nə swɩ̀n, ʋ pa kʋ nii sú: 8 Nə̀ń, Ba-Yígúrə́-Jə-Tiu wá pa ywárɩ́ tə twən kʋ va kʋ kwa, napɩra yiə fugə, kʋ ga yá yɩcaʋ tə, Ahazə nacanɩ tə yuu wa.» Yá yɩcaʋ tə dàń twən kʋ va kʋ kwa, napɩra yiə fugə, nacanɩ tə yuu wa.
Pɩ̀ʋ́ Ezekɩasə yɩjʋnɩ, ʋ nə nɩ yazurə kwa nə
9 Zwida pɩ̀ʋ́ Ezekɩasə dɩga gwaran tə tə, ʋ nə tʋa yayɩgʋ, ʋ ga pìí ʋ na yazurə tə kwa nə:
10 «À yà swɩ̀n à waa con, à wʋ́:
Mə à dàń nə sinti à də́ lʋʋ ywánɩ́,
yá nə̀ń à nə, à wulə ciru* mimii nə,
à vìrí sə à yá lʋʋ!
À kwɩ̀n à bɩna tə gɩganɩ nə!
11 À yà swɩ̀n à waa con, à wʋ́:
À kʋ́ʋ̀ bá na Ba-Yígúrə́-Jə-Tiu,
ləzwənəŋə lʋʋ wa!
À kʋ́ʋ̀ bá balʋ ləzwənə mama,
lʋʋ ləzoni titəŋi wa!
12 Ba lɩ à mɩɩ tə ba ga yá nə,
ndə payɩrʋ gansili nə.
À pipini à mɩɩ tə, à yí kʋ yígúrə́,
ndə gantwasʋrʋ nə pipini gantwan,
ʋ yí ka yígúrə́, ʋ ga karɩ ka nii ŋoni nətʋ.
Kʋ nə zɩgɩ tɩpʋrɩ, kʋ ja vələ tɩtɩn,
n wá pa à mɩɩ zwɛ̀!
13 À pɩ́án, kʋ va kʋ yí jɩjʋ.
N nyʋnyʋgʋ à kurən tə mama, ndə gəru nə.
Kʋ nə zɩgɩ tɩpʋrɩ, kʋ ja vələ tɩtɩn,
n wá pa à mɩɩ zwɛ̀!
14 À sʋswɩ ndə kalɩnlara, nə à yə̀ə́ bə̀rí nə,
à ga kʋkwɩn ndə gunpwəzonu nə.
À zɩ̀n à yɩ́á à kə yɩɩ nə, à yɩra ga:
Yuu-Tiu, à yɩra ga, bà san nə!
15 Bɛ̀ɛ̀ nə à kʋ́ʋ̀ wá swɩ̀n?
Ʋ le nə, yá ʋ tətə nə tʋn kʋ nətʋ tə.
À mɩɩ tə wá ya yinəgə wa,
à bɩna tə mama wa, à nə wá fwa lʋʋ wa.
16 Yuu-Tiu, n pubwanʋ tə nə pɩn mɩɩ,
kʋ mʋ̀ nə pɩn à ma tə siŋə zə̀n nətən.
N pɩn nə yazurə,
n pìí n jon à mɩɩ n kə lʋʋ wa.
17 Nə̀ń kʋ nə, à yinəgə tə tətə lwàń ka jì sìə́.
Kʋ twá n tətə fɩra nə,
n ma jon à mɩɩ tə tɩan bʋʋ wa.
Cɩ́gá, n dɩlɩ à lwanɩ tə n dʋgʋ, n kwa con.
18 Cɩ́gá, kʋ tà ciru nə wá bʋ n nə,
kʋ tà tɩan nə wá bʋ n nə.
Lɩ̀à tə nə cwí tɩan bʋʋ wa
kʋ́ʋ̀ ba n nə yɩ pùə́ nədʋ tíú tə yala jə.
19 Ləzwənəŋu, ləzwənəŋu nə bwɩ n nə,
ndə à mʋ̀ nə, zə̀n kʋ tə.
Nyɩna bɩrɩ ʋ bɩ̀á nə,
n nə yɩ pùə́ nədʋ tíú nətʋ.
20 Ba-Yígúrə́-Jə-Tiu jon nə!
Nə pɩan ba nì nə gwaran zɩla kori
dɩɩn mama, nə lʋʋ wúlú tə wa,
Ba-Yígúrə́-Jə-Tiu dìə̀ tə wa!»
21 Ezayi yà swɩ̀n, ʋ wʋ́: «Á jana kapɩra nəkʋra, á bà, á gà á kə Ezekɩasə nʋʋ tə nə, yá ʋ kʋ́ʋ̀ bá tɩ!»
22 Ezekɩasə yà bwe Ezayi, ʋ wʋ́: «Mɩmɩnʋ kwà nə nə à wá twá à ma lwarɩ də, à wá va Ba-Yígúrə́-Jə-Tiu dìə̀ tə wa?»