Pɩ̀ʋ́ Ezekɩasə yɩga, yá ʋ pìí ʋ na yazurə
20
1 Kʋ máŋá təntə wa, Ezekɩasə tʋa ʋ mɩɩ yayɩgʋ. Yɩɩ nii sʋ̀sʋ̀nʋ̀ Ezayi, ʋ nə yɩ Amɔsə bìú twi ʋ na wá, ʋ ga swɩ̀n ʋ con, ʋ wʋ́: «Nə̀ń kʋ tə Ba-Yígúrə́-Jə-Tiu nə swɩ̀n: “Pa nii n dìə̀ lɩ̀à nə. Cɩ́gá, n wá tɩ, n yayɩgʋ tə bá zwɛ̀, sə n pìí n zàn.”» 2 Ezekɩasə viviri ʋ yáá ʋ pú bírə́ yɩra, ʋ ga lòrì Ba-Yígúrə́-Jə-Tiu, ʋ wʋ́: 3 «Ba-Yígúrə́-Jə-Tiu, à lòrì sə n lìí n tɩ̀àn, də à yɩn n yáá con də pùə́ nədʋ, də à bɩcan mama, à ga tʋn kʋ tə nə ziən n yáá con!» Yá Ezekɩasə dàń kwi zənzən.4 Ba-Yígúrə́-Jə-Tiu kʋ́ʋ̀ swɩ̀n sʋ̀ràn tə tə Ezayi con, də ʋ tə wà pɩ̀ʋ́ dəwoo tə wa nan, ʋ wʋ́: 5 «Pìí n va n swɩ̀n Ezekɩasə con, ʋ nə yɩ à lɩ̀à tə pɩ̀ʋ́, də à mʋ̀ Ba-Yígúrə́-Jə-Tiu, à nə yɩ ʋ nɩbɛɛ Davidə Yɩɩ swɩ̀n, à wʋ́: “À nì n lòrì tə, yá à nɩ n yɩnɩa tə. Nə̀ń, à wá zwɛ̀ n yayɩgʋ tə, yá batwa nii dɩɩn tə nə, n wá va à mʋ̀ Ba-Yígúrə́-Jə-Tiu dìə̀ tə wa. 6 À wá súrí bɩna fugə də bonu n mɩɩ tə bɩna nii nə, n nə wá fwa lʋʋ wa. À wá jon n də tɩʋ kʋ tə, Asiiri pɩ̀ʋ́ tə jɩɩn wa. À wá cɩ̀ tɩʋ kʋ tə nə, à tətə yɩrɩ, də à tʋtʋnʋ Davidə yɩrɩ.”»
7 Ezayi swɩ̀n, ʋ wʋ́: Á tíə́ kapɩra nəkʋra, á ja bà!» Ba tì kapɩra tə, ba gà ba kə Ezekɩasə nʋʋ tə nə, yá ʋ kʋ́ʋ̀ wà tɩ.
8 Ezekɩasə yà bwe Ezayi, ʋ wʋ́: «Mɩmɩnʋ kwà nə nə à wá twá à ma lwarɩ də, Ba-Yígúrə́-Jə-Tiu wá zwɛ̀ à yayɩgʋ tə, yá dɩan batwa nii nə, à wá va Ba-Yígúrə́-Jə-Tiu dìə̀ tə wa?» 9 Ezayi dàń ma le wá, ʋ wʋ́: «Nə̀ń mɩmɩnʋ tə, n nə wá twá kʋ nə n ma lwarɩ, də Ba-Yígúrə́-Jə-Tiu cɩ́gá wá tʋn kʋ tə ʋ nə swɩ̀n, ʋ pa kʋ nii sú: N pɩ̀à sə ywárɩ́ tə va yáá napɩra yiə fugə, nə à yə̀ə́ sə kʋ va kwa napɩra yiə fugə?» 10 Ezekɩasə le, ʋ wʋ́: «Kʋ yɩ mwálɩ́ sə ywárɩ́ tə va yáá napɩra yiə fugə! Kʋ mʋ̀ yɩrɩ, à pɩ̀à sə ywárɩ́ tə twən kʋ va kʋ kwa, napɩra yiə fugə!» 11 Yɩɩ nii sʋ̀sʋ̀nʋ̀ Ezayi dàń bon ʋ kə Ba-Yígúrə́-Jə-Tiu nə, yá Ba-Yígúrə́-Jə-Tiu pɩn ywárɩ́ tə twən kʋ va kʋ kwa, napɩra yiə fugə, Ahazə nacanɩ tə yuu wa.
Babɩlɔnə pɩ̀ʋ́ tʋntʋna twi Ezekɩasə con
(Ezayi 39)
12 Kʋ máŋá təntə wa, Baladan bìú Merodakə-Baladan, ʋ nə yɩ Babɩlɔnə pɩ̀ʋ́, pʋ́pʋ́nɩ́ sagɩ ʋ súrí zìlə́ won nə, ʋ tʋn Ezekɩasə nə. Cɩ́gá, ʋ yà nì Ezekɩasə yayɩgʋ tə yoo. 13 Ezekɩasə jon tʋntʋna tə də pupwən, ʋ ga bɩrɩ ba bwálɩ́ tə ʋ jɩjə wiən nə wulə. Ʋ bɩrɩ ba wárʋ́, də sɩ́án, də wusinə, də dun nʋga*, də ʋ kwatarɩ zɩla tə mama, də jɩjə wiən tə mama ʋ nə tún. Ʋ wà won mama səgə ba yáá nə, ʋ dìə̀ tə wa, də ʋ payuu tə wa.
14 Kʋ kwa nə, Yɩɩ nii sʋ̀sʋ̀nʋ̀ Ezayi twi pɩ̀ʋ́ Ezekɩasə con, ʋ bwe wá, ʋ wʋ́: «Bɛ̀ɛ̀ nə lɩ̀à təntə swɩ̀n n con? Yə̀n nə ba nan ba bà n con?» Ezekɩasə le, ʋ wʋ́: «Ba nan lʋʋ nii kʋ nə ŋʋna. Ba nan Babɩlɔnə ba bà sə ba na nə.» 15 Ezayi tə swɩ̀n, ʋ wʋ́: «Bɛ̀ɛ̀ nə ba nɩ n dìə̀ tə wa?» Ezekɩasə le, ʋ wʋ́: «Ba nɩ won tə mama nə wulə à dìə̀ tə wa. Won mama tə̀lə́ à jɩjə wiən tə wa, à nə wà pɩn ba na kʋ.» 16 Ezayi dàń ma swɩ̀n Ezekɩasə con, ʋ wʋ́: «Cʋgʋ kʋ tə Ba-Yígúrə́-Jə-Tiu nə swɩ̀n! 17 Nə̀ń máŋá don bɩ̀àn, ba nə wá pɛ̀ n dìə̀ wiən tə mama, də tə tə n nyɩna-ba nə tún, kʋ bà kʋ yí zə̀n, ba ja va Babɩlɔnə, won mama bá ga lá. Ba-Yígúrə́-Jə-Tiu nə swɩ̀n kʋ. 18 Yá ba wá ja n bɩ̀á tə wa bɩ̀á, n tətə nə lɩrɩ, ba ma fwa pɩ̀ʋ́ tʋ̀tʋ̀nà, Babɩlɔnə pɩ̀ʋ́ dìə̀ tə wa.» 19 Ezekɩasə swɩ̀n Ezayi con, ʋ wʋ́: «Ba-Yígúrə́-Jə-Tiu sʋgʋ tə n nə swɩ̀n yɩ yozəŋu.» Ʋ yà swɩ̀n ʋ waa con, ʋ wʋ́: «Cɩ́gá, sìə́ də yazurə wá ya lá, à mʋ̀ lʋʋ wúlú tə mama wa!»
20 Ba pʋ́pʋ́nɩ́ Ezekɩasə tʋ̀tʋ̀nán tə gɩganɩ, də ʋ babarɩ nə yɩn nətʋ mama, də nətʋ ʋ nə lwə̀ nɩ́á gwàlʋ́ nəfarʋ, ʋ ga kʋ̀ nɩ́á fiu tɩa də̀ń, ʋ pa càrʋ́ nɩ́á twá lá, tə bà tɩʋ tə wa, ba tún Zwida pɛ̀gá yìə̀n sagɩ tə wa. 21 Ezekɩasə tɩga, yá ba gùrì wá ʋ nyɩna-ba con, ba nə dí yáá ba tɩ. Ʋ bìú Manase nə dí pàrɩ̀ tə ʋ yuu nə.