Manase jìgə̀ Zwida payuu tə pɩ̀ʋ́
21
1 Manase yà jə bɩna fugə də bələ máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna finu də bonu Zwerizalɛmə nə. Ʋ nuu yɩrɩ nə yɩ Hɛfəsiba. 2 Ʋ tʋn kʋ tə nə lwara Ba-Yígúrə́-Jə-Tiu yáá con. Ʋ tʋn dwíə́ nəkaran* tə tʋtʋnkʋkwɩnan tə ba yà nə tʋŋa, kʋ pa Ba-Yígúrə́-Jə-Tiu dɩŋa ba, ʋ yá lʋʋ nii tə nə, ʋ pa Yɩzərayɛlə lɩ̀à nə. 3 Ʋ pìí ʋ lwà jwəŋə dədwələn* tə, ʋ nyɩna Ezekɩasə yà nə pɩn tə nyʋn lá. Ʋ lwà jwəŋə bwálá ʋ pa woŋwanʋ Baalə* nə. Ʋ fwa woŋwanʋ Aswera* dacelə, ndə Yɩzərayɛlə pɩ̀ʋ́ Akabə nə fwa nətʋ. Yá ʋ tʋa ʋ nadwana yuu, ʋ pa dun lanworu tə wa wiən tə mama nə. 4 Ʋ lwə̀ joŋi bwálá Ba-Yígúrə́-Jə-Tiu dìə̀ tə wa, Ba-Yígúrə́-Jə-Tiu yà nə swɩ̀n ka yoo, ʋ wʋ́: «Kʋ yɩ Zwerizalɛmə wa nə, à wá pa à yɩrɩ ya.» 5 Ʋ lwə̀ joŋi bwálá ʋ pa lanworu tə wa wiən tə mama nə, Ba-Yígúrə́-Jə-Tiu dìə̀ tə dəwee bələ tə wa. 6 Ʋ tətə pɩn ba dɩ ʋ bìú mən wa, ʋ ma fwa joŋi. Ʋ yà twarɩ mɩmɩnan, ʋ ma lwarɩ yìə̀n, ʋ ga tʋŋa cɩrɩ yìə̀n. Ʋ tún lɩ̀à, ʋ pa ba boŋə tɩga nii, ba ga swɩ̀n jwɩan yìə̀n. Ʋ tʋn kʋ tə nə lwara Ba-Yígúrə́-Jə-Tiu yáá con máŋá mama, ʋ ma zɩ̀n Ba-Yígúrə́-Jə-Tiu lɩŋa. 7 Ʋ ken woŋwanʋ Aswera ciciru tə, ʋ nə fwa, dìə̀ tə wa Ba-Yígúrə́-Jə-Tiu nə swɩ̀n ka yoo Davidə də ʋ bìú Salʋmʋn con, ʋ wʋ́: «Mə dìə̀ ka tə nə à kúrí Zwerizalɛmə nə, Yɩzərayɛlə dwíə́ tə mama wa, sə à yɩrɩ tə ya lá máŋá mama wuuu. 8 Yɩzərayɛlə lɩ̀à nə zìlí à nii yìə̀n tə mama, à nə pɩn à tʋtʋnʋ Moyizə nə, də yìə̀n tə à nə pɩn ʋ pʋ́pʋ́nɩ́ ʋ tún sə ba tʋn, də yìə̀n tə à nə bɩrɩ sə tə tʋn, à kʋ́ʋ̀ bá pa ba va yiŋʋnɩ, ba yá lʋʋ nii tə nə, à nə pɩn ba nɩbara-ba nə. 9 Yá ba wà à nii zìlí. Manase pɩn ba jɛ́n, kʋ pa ba tʋn yolwana ba doni dwíə́ nəkaran tə, Ba-Yígúrə́-Jə-Tiu nə cʋ̀gʋ̀ Yɩzərayɛlə lɩ̀à yáá con.10 Ba-Yígúrə́-Jə-Tiu dàń ma twá ʋ tʋ̀tʋ̀nà tə nə, ba nə yɩ ʋ nii sʋ̀sʋ̀nà ʋ swɩ̀n, ʋ wʋ́: 11 «Zwida payuu pɩ̀ʋ́ Manase nə tʋn tʋtʋnkʋkwɩnan təntə, ʋ ga tʋn tə ʋ doni Amɔrə dwíí tə, ba nə dí yáá ba tʋn tə, ʋ ga pa Zwida dwíí tə də twá də woŋwanan ba ma tʋn cʋna yɩrɩ, 12 Ba-Yígúrə́-Jə-Tiu ʋ nə yɩ Yɩzərayɛlə lɩ̀à Yɩɩ swɩ̀n, ʋ wʋ́: «À wá pa càn bà Zwerizalɛmə tɩ̀án, də Zwida dwíí tə yuu wa, kʋ nə wá pa lìù mama nə nì kʋ, ʋ zɩan wá cʋrɩ. 13 À wá cʋ̀gʋ̀ Zwerizalɛmə, ndə à nə cʋ̀gʋ̀ Samari də Akabə dìə̀ tə nətʋ. À wá sɩ̀n Zwerizalɛmə tɩ̀án, ndə ba nə sɩ̀n zʋŋa, ba viviri ba pú. 14 À wá vɩ à lɩ̀à tə gɩganɩ tə à dʋgʋ. Yá à wá kə ba ba dʋŋa jɩɩn wa, ba dʋŋa tə ga wá jon ba wiən mama də dɩ̀àn. 15 À wá tʋn kʋ nətʋ tə, ba nə tʋn kʋ tə nə lwara à yáá con, ba ma zɩ̀n à lɩŋa, kʋ nə zɩgɩ dɩɩn tə nə, ba nɩbara-ba nə nan ba yá Ezwipətə lʋʋ nii tə, kʋ bà kʋ yí zə̀n tə yɩrɩ.»
16 Manase tə gʋa lɩ̀à zənzən, ba nə wà yoo cʋ̀gʋ̀, ba jana lwá tə sú Zwerizalɛmə mama, kʋ dàń súrí cʋna tə nə, ʋ nə pɩn Zwida dwíí tə tʋn, kʋ ga yɩ yoo tə nə lwara, Ba-Yígúrə́-Jə-Tiu yáá con.
17 Ba pʋ́pʋ́nɩ́ Manase tʋ̀tʋ̀nán tə gɩganɩ, də kʋ tə mama ʋ nə fwa, də cʋna tə ʋ nə tʋn, ba tún Zwida pɛ̀gá yìə̀n sagɩ tə wa. 18 Manase tɩga, yá ba gùrì wá ʋ nyɩna-ba con ba nə dí yáá ba tɩ. Ba gùrì wá ʋ padiə tə tɩ̀án kárá tə wa, bə nə boŋə Uza tɩ̀án kárá. Ʋ bìú Amon nə dí pàrɩ̀ tə ʋ yuu nə.
Amon jìgə̀ Zwida payuu tə pɩ̀ʋ́
19 Amon yà jə bɩna sapʋa də bələ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna bələ Zwerizalɛmə nə. Ʋ nuu yɩrɩ nə Meswulemɛtə, ʋ yɩ Harusə, ʋ nə yɩ Yotəba tíú bʋ̀á. 20 Ʋ tʋn kʋ tə nə lwara Ba-Yígúrə́-Jə-Tiu yáá con, ndə ʋ nyɩna Manase nə. 21 Ʋ tʋn kʋ tə mama, ʋ nyɩna tə nə tʋn. Ʋ tʋn ʋ pa woŋwanan tə nə, ʋ nyɩna tə nə tʋn ʋ pa tə, ʋ ga tʋ tə yáá con, ʋ pa tə dun. 22 Amon dʋgʋ Ba-Yígúrə́-Jə-Tiu, ʋ nə yɩ ʋ nɩbara-ba Yɩɩ, ʋ wà ʋ cwəŋə tə nə twá.
23 Pɩ̀ʋ́ Amon tʋ̀tʋ̀nà tə tʋn pwìí bələ yoo ʋ yɩra, yá ba gʋa wá ʋ dìə̀ wa. 24 Yá Zwida lʋʋ lɩ̀à tə gʋa lɩ̀à tə mama, ba nə tʋn pwìí bələ yoo tə pɩ̀ʋ́ Amon yɩra. Yá ba dàń tún ʋ bìú Zozɩasə, sə ʋ də́ pàrɩ̀ tə ʋ yuu nə.