Zozɩasə jìgə̀ Zwida payuu tə pɩ̀ʋ́
22
1 Zozɩasə yà jə bɩna nana, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fɩtwa də nədʋ Zwerizalɛmə nə. Ʋ nuu yɩrɩ nə Yedida. Yedida yà yɩ Adaya ʋ nə yɩ Bosəkatə tíú bʋ̀á. 2 Ʋ tʋn kʋ tə nə yɩ mənəmənə Ba-Yígúrə́-Jə-Tiu yáá con, yá ʋ twá kʋ tə mama nə, ʋ nɩbɛɛ Davidə nə twá kʋ nə, ʋ wà yori ʋ va jɩzən, nə à yə̀ə́ jɩgwiə.Yɩɩ joŋwana yun tɩ̀án nəkwɩa tə nɩ Yɩɩ nii sagɩ tə, Yɩɩ dìə̀ tə wa
3 Zozɩasə pàrɩ̀ tə bɩna fugə də nana nii bɩnɩ tə nə, ʋ tʋn Asalɩa bìú Swafan, ʋ nə yɩ Meswulamə nàʋ́, ʋ nə pʋ́pʋ́nɩ́ saga, Ba-Yígúrə́-Jə-Tiu dìə̀ tə wa, ʋ swɩ̀n, ʋ wʋ́: 4 «Vəli Yɩɩ joŋwana yun tɩ̀án nəkwɩa Hiləkiya con, sə ʋ bɩrɩ mʋ́ səbiu tə nii, ba nə ja bà Ba-Yígúrə́-Jə-Tiu dìə̀ tə wa, mimii nəcɩra tə nə jon lalʋʋ tə con. 5 Ba wá kə kʋ lɩ̀à tə jɩɩn wa, ba nə mɛ sə ba tʋn Ba-Yígúrə́-Jə-Tiu dìə̀ tə tʋ̀tʋ̀nán tə. Ba wá ja kʋ ba ma ŋwɩ́n tʋ̀tʋ̀nà tə nə wá kwɛn Yɩɩ dìə̀ tə bwálá tə nə cʋ̀gʋ̀. 6 Tʋ̀tʋ̀nà təntə nə yɩ lɩ̀à tə nə sə̀ dɛ̀ɛ̀, də dìlwə̀rə́ tə, də ba tʋtʋnbɩa. Ba tə wá ja səbiu tə ba ma yə̀ daran, də kapana ba nə sə̀ tə mɛ, sə ba ma kwɛn dìə̀ tə. 7 Yá ba dàn ká bwe tʋ̀tʋ̀nán yáá tɩ̀án tə, ba nə kəni səbiu tə ba jɩɩn, kʋ tə yuu wa ba nə ja səbiu tə ba ma tʋn. Cɩ́gá, tʋ̀tʋ̀nán yáá tɩ̀án tə tʋŋa də pùə́ nədʋ.»
8 Yɩɩ joŋwana yun tɩ̀án nəkwɩa Hiləkiya dàń swɩ̀n Swafan con, ʋ nə pʋ́pʋ́nɩ́ saga, ʋ wʋ́: «À nɩ Yɩɩ nii sagɩ tə Ba-Yígúrə́-Jə-Tiu dìə̀ tə wa!» Hiləkiya pɩn sagɩ tə Swafan nə, ʋ kàrɩ̀. 9 Kʋ kwa nə, Swafan ʋ nə pʋ́pʋ́nɩ́ saga tə vəli pɩ̀ʋ́ tə con. Ʋ tún ʋ nii ʋ bɩrɩ pɩ̀ʋ́ tə nə, ʋ wʋ́: «N tʋ̀tʋ̀nán tə lwá səbiu tə, kʋ yà nə wulə dìə̀ tə wa, ba pa tʋ̀tʋ̀nán yáá tɩ̀án tə nə, ba nə mɛ sə ba kwɛn Ba-Yígúrə́-Jə-Tiu dìə̀ tə.» 10 Swafan ʋ nə pʋ́pʋ́nɩ́ saga tə swɩ̀n ʋ bɩrɩ pɩ̀ʋ́ tə nə, ʋ wʋ́: «Yɩɩ joŋwanʋ Hiləkiya pɩn nə sagɩ.» Yá Swafan dàń kàrɩ̀ sagɩ tə pɩ̀ʋ́ tə yáá con.
Zozɩasə pɩn ba bwe Yɩɩ nii sʋsʋnkana Uləda
11 Máŋá tə pɩ̀ʋ́ Zozɩasə nə nì Yɩɩ nii sagɩ tə sʋ̀ràn tə, ʋ kàrɩ́ ʋ gànàn. 12 Pɩ̀ʋ́ tə pɩn nii kʋ tə Yɩɩ joŋwanʋ Hiləkiya, də Swafan bìú Ahikamə, də Miswe bìú Akəbɔrə, də Swafan ʋ nə pʋ́pʋ́nɩ́ saga, də pɩ̀ʋ́ tʋtʋnʋ Asaya nə, ʋ wʋ́: 13 «Á vələ á bwe Ba-Yígúrə́-Jə-Tiu, á pa à mʋ̀ də lalʋʋ tə, də Zwida dwíí tə nə, sagɩ kʋ tə ba nə nɩ sʋ̀ràn tə yɩrɩ. Cɩ́gá, Ba-Yígúrə́-Jə-Tiu lɩŋa zàn nə yuu wa zənzən, nə nɩbara-ba nə wà sagɩ kʋ tə sʋ̀ràn tə mama zìlí, ba ga wà kʋ wa yìə̀n tə nə twá ba ma tʋn yɩrɩ.»
14 Yɩɩ joŋwanʋ Hiləkiya, də Ahikamə, də Akəbɔrə, də Swafan, də Asaya vəli ba yí Yɩɩ nii sʋsʋnkana Huləda, ʋ nə wulə Zwerizalɛmə sadʋn tə wa. Ʋ yɩ Tikəva bìú Swalumə kan. Swalumə yɩ Arasə nàʋ́, ʋ mʋ̀ ga nə ywàŋá Yɩɩ joŋwana tə culən gànàn tə yuu. Ba nə tún ba nii Huləda con ba zwɛ̀ kwa nə, 15 Huləda swɩ̀n ba con, ʋ wʋ́: «Nəŋə kʋ tə Ba-Yígúrə́-Jə-Tiu, Yɩzərayɛlə lɩ̀à Yɩɩ nə swɩ̀n bɛɛ tə con, ʋ nə tʋn aba à con. 16 Ba-Yígúrə́-Jə-Tiu swɩ̀n, ʋ wʋ́: “À wá pa càn bà bwálɩ́ kʋ tə də kʋ wa lɩ̀à tə yuu wa, kʋ twá sagɩ tə sʋ̀ràn tə mama nə, Zwida pɩ̀ʋ́ tə nə kàrɩ̀. 17 Cɩ́gá, ba vɩga nə ba dʋgʋ, ba ga sʋ̀rɩ́ wusinə ba pa woŋwanan nə, sə ba ma zɩ̀n à lɩŋa, kʋ twá kʋ tə mama nə, ba nə tʋŋa. Kʋ mʋ̀ nə pɩn, à lɩŋa zaŋa bwálɩ́ kʋ tə lɩ̀à tə yuu zənzən, yá tə bá tʋ.” 18 Yá á dàń wá swɩ̀n Zwida pɩ̀ʋ́ tə con, ʋ nə tʋn aba sə á bwe Ba-Yígúrə́-Jə-Tiu, də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ swɩ̀n, ʋ wʋ́: “N nì sagɩ kʋ tə wa sʋ̀ràn tə də̀ń. 19 N nə nì kʋ tə à nə swɩ̀n à zɩgɩ bwálɩ́ kʋ tə, də kʋ wa lɩ̀à tə nə, kʋ dí n bɩcan nə, n ga mun n tɩ̀àn à mʋ̀ Ba-Yígúrə́-Jə-Tiu yáá con. À swɩ̀n də zɩra də càn wá yí kʋ bwálɩ́ tə wa lɩ̀à tə. Yá n nə kàrɩ́ n gànàn, n ga kwi à yáá con tə yɩrɩ, à də nì n kori. À mʋ̀ Ba-Yígúrə́-Jə-Tiu nii sʋgʋ nə! 20 Kʋ mʋ̀ nə pɩn, à wá yá mʋ́ sə n tɩ də bɩcan sìə́, də n wà càn təntə mama nɩ, à nə swɩ̀n də à wá pa tə bà bwálɩ́ kʋ tə wa. Yá ba wá gùrì mʋ́ n nyɩna-ba con, ba nə dí yáá ba tɩ.”» Tʋntʋna tə pìí ba va ba swɩ̀n sʋ̀ràn təntə pɩ̀ʋ́ tə con.