Zozɩasə pàrɩ̀ tə yoo
34
1 Zozɩasə yà jə bɩna nana, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fɩtwa də nədʋ Zwerizalɛmə nə. 2 Ʋ tʋn kʋ tə nə ywán də Ba-Yígúrə́-Jə-Tiu, ʋ twá ʋ nɩbɛɛ Davidə nabwɩɩ tə nə, ʋ wà yori ʋ kə ʋ jɩzən, nə à yə̀ə́ ʋ jɩgwiə.3 Ʋ pàrɩ̀ tə bɩna nana nii nə, də ʋ tə yɩ ləzwəndʋn, ʋ sinti ʋ pɩ̀à ʋ nɩbɛɛ Davidə Yɩɩ tə. Ʋ pàrɩ̀ tə bɩna fugə də bələ nii nə, ʋ sinti ʋ kwɛn Zwida lʋʋ nii tə də Zwerizalɛmə, ʋ lɩ durən wa. Ʋ pɩn woŋwanan jwəŋə dədwələn tə, də Aswera daceli* tə, də woŋwanan tə ba nə sə̀, də woŋwanan tə ba nə nyɩan lugu ba ma fwa nyʋn lá. 4 Ba gwɛrɩ woŋwanan Baalə jwəŋə bwálá tə, ba ga mà wusinə nəvwe tə yà nə wulə tə yuu con ba lwa. Ba goŋi woŋwanʋ Aswera daceli* tə, ba ga cʋ̀gʋ̀ woŋwanan tə ba nə sə̀, də tə tə ba nə nyɩan lugu ba ma fwa. Ba nyɩnyʋgʋ tə mama ʋ yáá con, ba pa tə jì pùrú, yá ba lwá pùrú təntə lɩ̀à tə ba yà nə fwa jwəŋə ba pɩn tə, libərə tə yuu wa. 5 Ʋ sʋ̀rɩ́ woŋwanan joŋwana tə kurən, ba woŋwanan jwəŋə bwálá tə yuu wa. Mə kʋ zɩgɩ nətʋ, ʋ ma kwɛn Zwida lʋʋ nii tə də Zwerizalɛmə, ʋ lɩ durən wa. 6 Kʋ kwa nə, ʋ vəli Manase, də Efərayimə, də Simeyon tɩan tə wa, də Nɛfətali tɩan tə də tətə wa, ʋ kɩkarɩ tə nii nagwanɛɛ tə wa, ʋ ma gwɛrɩ woŋwanan jwəŋə bwálá tə, 7 də ʋ goŋi Aswera daceli* tə, də ʋ cʋ̀gà woŋwanan tə ba nə sə̀, də ʋ mà wusinə nəvwe tə, ʋ lwe. Ʋ nyʋnyʋgʋ tə mama, ʋ pa tə jì pùrú, Yɩzərayɛlə lʋʋ nii tə mama wa. Kʋ kwa nə, ʋ pìí ʋ bà Zwerizalɛmə wa.
Yɩɩ joŋwana yun tɩ̀án nəkwɩa tə nɩ Yɩɩ nii sagɩ tə, Yɩɩ dìə̀ tə wa
8 Zozɩasə pàrɩ̀ tə bɩna fugə də nana nii bɩnɩ tə nə, də ʋ tə wulə ʋ kwɛn lʋʋ nii tə də Yɩɩ dìə̀ tə ʋ lɩ durən wa, ʋ tʋn Asalɩa bìú Swafan, də Maseya, ʋ nə ywàŋá tɩʋ tə yuu nə, də Yʋahazə bìú Yʋa, ʋ nə joŋə pɩ̀ʋ́ nii sʋ̀ràn ʋ swɩ̀n, sə ba va ba kwɛn Ba-Yígúrə́-Jə-Tiu, ʋ nə yɩ ʋ Yɩɩ dìə̀ tə. 9 Lɩ̀à təntə vəli ba yí Yɩɩ joŋwana yun tɩ̀án nəkwɩa Hiləkiya, ba pa wá səbiu tə Levi dwíí tə, ba nə cɩ̀ mimii tə nə, nə nɩ. Səbiu təntə yɩ zìlə́ wiən, Manase dwíí tə, də Efərayimə dwíí tə, də Yɩzərayɛlə lɩ̀à tə gɩganɩ tə mama, də Zwida dwíí tə mama, də Bɛnzwamɛn dwíí tə, də Zwerizalɛmə tɩ̀án nə ja bà Yɩɩ dìə̀ tə wa. 10 Ba pɩn səbiu təntə lɩ̀à tə nə, ba nə ywàŋá Ba-Yígúrə́-Jə-Tiu dìə̀ tə kwɩan tʋ̀tʋ̀nán tə yuu. Ba də jon kʋ ba pa lɩ̀à tə nə, ba yà nə tʋŋa tʋ̀tʋ̀nán tə, sə ba ma kwɛn Ba-Yígúrə́-Jə-Tiu dìə̀ tə, sə ba súrí ka dɩ̀àn. 11 Ba pɩn kʋ dìlwə̀rə́ tə, də lɩ̀à tə nə sə̀ dɛ̀ɛ̀ tə, də tʋ̀tʋ̀nà tə duən tə nə, sə ba ma yə̀ kapana ba nə sə̀, də daran tə ba nə wá ma kwɛn dìì tə, Zwida pɛ̀gá tə nə yá ba pa tə cʋ̀gʋ̀. 12 Bara təntə tʋn tʋ̀tʋ̀nán tə də pùə́ nədʋ. Yahatə də Abədɩasə, ba nə yɩ Levi dwíí, Merari dìə̀ tə wa, də Zakari də Meswulamə, ba nə yɩ Kehatə dwíí, yà nə ywàŋá tʋ̀tʋ̀nà tə yuu nə. Levi dwíí tɩ̀án duən, ba nə jə gwaran zɩla dwíú yənu, 13 yà nə ywàŋá lɩ̀à tə nə zɩŋa zɩla tə, də tʋ̀tʋ̀nà tə duən tə mama yuu nə, ba lìù mama də ʋ tʋtʋŋɩ. Levi dwíí tɩ̀án duən də yɩn lá, ba nə pʋ́pʋ́nɩ́ saga, ba duən ga yɩ tʋ̀tʋ̀nán yáá tɩ̀án, də mimii nicɩra.
14 Máŋá tə ba nə wulə ba lɩ səbiu tə, ba nə ja bà Ba-Yígúrə́-Jə-Tiu dìə̀ tə wa, Yɩɩ joŋwanʋ Hiləkiya nɩ Ba-Yígúrə́-Jə-Tiu nii sagɩ tə, ʋ nə twá də Moyizə ʋ pa. 15 Hiləkiya dàń swɩ̀n Swafan con, ʋ nə pʋ́pʋ́nɩ́ saga, ʋ wʋ́: «À nɩ Yɩɩ nii sagɩ tə Ba-Yígúrə́-Jə-Tiu dìə̀ tə wa!» Yá Hiləkiya dàń pɩn sagɩ tə Swafan nə. 16 Swafan ja sagɩ tə ʋ va ʋ pa pɩ̀ʋ́ tə nə, ʋ ga tún ʋ nii ʋ con, ʋ wʋ́: «N tʋ̀tʋ̀nà tə wulə ba tʋŋa kʋ tə mama, n nə pɩn ba nii sə ba tʋn, sə kʋ nii sú. 17 Ba kòrí səbiu tə nə yɩn Ba-Yígúrə́-Jə-Tiu dìə̀ tə wa, ba pa tʋ̀tʋ̀nán yáá tɩ̀án tə, də tʋ̀tʋ̀nà tə nə.» 18 Swafan tə swɩ̀n pɩ̀ʋ́ tə con ʋ súrí lá, ʋ wʋ́: «Yɩɩ joŋwanʋ Hiləkiya pɩn nə sagɩ kʋ tə.» Yá Swafan dàń kàrɩ̀ kʋ, pɩ̀ʋ́ tə yáá con.
Zozɩasə pɩn ba bwe Yɩɩ, Yɩɩ nii sʋsʋnkana Huləda con
19 Máŋá tə pɩ̀ʋ́ Zozɩasə nə nì Yɩɩ nii sagɩ tə sʋ̀ràn tə, ʋ kàrɩ́ ʋ gànàn. 20 Ʋ pɩn ba bon Hiləkiya, də Swafan bìú Ahikamə, də Miswe bìú Abədon, də Swafan ʋ nə pʋ́pʋ́nɩ́ saga, də pɩ̀ʋ́ tʋtʋnʋ Asaya, ʋ pa ba nii kʋ tə, ʋ wʋ́: 21 «Á vələ á bwe Ba-Yígúrə́-Jə-Tiu, á pa à mʋ̀ də lalʋʋ tə nə, nə nə ga Yɩzərayɛlə də Zwida lʋʋ níə́ tə wa, sagɩ kʋ tə ba nə nɩ tə, sʋ̀ràn tə yɩrɩ. Cɩ́gá, Ba-Yígúrə́-Jə-Tiu lɩŋa zaŋa nə yuu wa zənzən, nə nɩbara-ba nə wà Ba-Yígúrə́-Jə-Tiu sʋ̀ràn tə nii zìlí, ba ga wà sagɩ kʋ tə sʋ̀ràn tə mama nii nə twá, ba ma tʋn yɩrɩ.»
22 Hiləkiya, də lɩ̀à tə pɩ̀ʋ́ nə tʋn, vəli ba yí Yɩɩ nii sʋsʋnkana Huləda, ʋ nə wulə Zwerizalɛmə sadʋn tə wa. Ʋ yɩ Tokəhatə bìú Swalumə kan. Swalumə yɩ Hasəra nàʋ́, ʋ mʋ̀ ga nə ywàŋá Yɩɩ joŋwana tə culən gànàn tə yuu. Tʋntʋna tə dàń tún ba nii Yɩɩ nii sʋsʋnkana tə con, ndə kʋ nə mɛ nətʋ. 23 Yá Huləda swɩ̀n ba con, ʋ wʋ́: «Nəŋə kʋ tə Ba-Yígúrə́-Jə-Tiu, Yɩzərayɛlə lɩ̀à Yɩɩ nə swɩ̀n bɛɛ tə con, ʋ nə tʋn aba à con. 24 Ba-Yígúrə́-Jə-Tiu swɩ̀n, ʋ wʋ́: “À wá pa càn bà bwálɩ́ kʋ tə də kʋ wa lɩ̀à tə yuu wa, kʋ twá zɩra tə mama nə, ndə kʋ nə pʋ́pʋ́nɩ́ sagɩ tə wa nətʋ, ba nə kàrɩ̀ Zwida pɩ̀ʋ́ tə yáá con. 25 Cɩ́gá, ba vɩga nə ba dʋgʋ, ba ga sʋ̀rɩ́ wusinə ba pa woŋwanan nə, sə ba ma zɩ̀n à lɩŋa, kʋ twá kʋ tə mama nə, ba nə tʋŋa. Kʋ mʋ̀ nə pɩn, à lɩŋa zaŋa bwálɩ́ kʋ tə lɩ̀à tə yuu zənzən, yá tə bá tʋ. 26 Yá á dàń wá swɩ̀n Zwida pɩ̀ʋ́ tə con, ʋ nə tʋn aba, sə á bwe Ba-Yígúrə́-Jə-Tiu, də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ swɩ̀n, ʋ wʋ́: N nì sagɩ kʋ tə wa sʋ̀ràn tə də̀ń. 27 Yá n nə nì sʋ̀ràn tə, à nə swɩ̀n à zɩgɩ bwálɩ́ kʋ tə, də kʋ wa lɩ̀à tə nə, tə dí n bɩcan nə, n ga mun n tɩ̀àn, à yáá con. Yá n nə kàrɩ́ n gànàn, n ga kwi à yáá con yɩrɩ, à də nì n kori. À mʋ̀ Ba-Yígúrə́-Jə-Tiu nii sʋgʋ nə! 28 Kʋ mʋ̀ nə pɩn, à wá yá mʋ́ sə n tɩ də bɩcan sìə́. Ba wá gùrì mʋ́ n nyɩna-ba con, ba nə dí yáá ba tɩ, də n wà càn təntə mama nɩ, à nə swɩ̀n də à wá pa tə bà bwálɩ́ kʋ tə də kʋ wa lɩ̀à tə yuu wa.”» Tʋntʋna tə pìí ba va ba swɩ̀n sʋ̀ràn təntə pɩ̀ʋ́ tə con.
Zozɩasə tún nimarʋ nədʋn də Yɩɩ
29 Pɩ̀ʋ́ tə tʋn ʋ pa ba bon Zwida payuu tə tɩʋ tɩ̀án tə mama, də Zwerizalɛmə tɩʋ tɩ̀án tə mama, ʋ pa ba bà ba kun duən nə. 30 Ʋ zàn ʋ va Ba-Yígúrə́-Jə-Tiu dìə̀ tə wa, ʋ də Zwida payuu bara tə mama, də Zwerizalɛmə tɩ̀án mama, də Yɩɩ joŋwana tə, də Levi dwíí tə, də lalʋʋ tə mama, kʋ nə zɩgɩ nəkwɩa nə, kʋ va kʋ yí bisɩmaa. Ʋ kàrɩ̀ nimarʋ*a sagɩ tə sʋ̀ràn tə mama, ba nə nɩ Ba-Yígúrə́-Jə-Tiu dìə̀ tə wa, ʋ pa ba mama cʋgʋ. 31 Pɩ̀ʋ́ tə zɩgɩ ʋ yizɩga nə, Ba-Yígúrə́-Jə-Tiu yáá con, ʋ pìí ʋ kwɛn ʋ tún nimarʋ tə, ʋ ga bɩrɩ də ba mɛ sə ba twá Ba-Yígúrə́-Jə-Tiu nə, də ba wá tʋn yìə̀n tə Yɩɩ nə pɩn nii tə yuu wa, də ba twá ʋ coŋi tə, də ʋ yìə̀n tə nə, ʋ nə pɩn tə pʋ́pʋ́nɩ́ tə tún sə tə tʋn, də ba waa mama, də ba pubʋŋa mama, sə ba ma zìlí sʋ̀ràn tə mama nii, tə nə pʋ́pʋ́nɩ́ nimarʋ sagɩ tə wa. 32 Pɩ̀ʋ́ tə pɩn lɩ̀à tə mama, ba nə wulə Zwerizalɛmə də Bɛnzwamɛn dwíí tə wa, sɛ̀ ba zʋ nimarʋ təntə wa. Yá kʋ nə zɩgɩ máŋá təntə wa, Zwerizalɛmə tɩ̀án dàń zìlí ba nɩbara-ba Yɩɩ nimarʋ tə nii. 33 Zozɩasə pɩn tʋtʋnkʋkwɩnan tə mama nyʋn Yɩzərayɛlə nagwanɛɛ tə mama wa. Ʋ kalɩ lɩ̀à tə mama nə wulə Yɩzərayɛlə wa, ʋ pa ba tʋn ba pa Ba-Yígúrə́-Jə-Tiu nə, ʋ nə yɩ ba Yɩɩ. Ʋ lʋʋ wúlú mama wa, ba wà pìí ba yá Ba-Yígúrə́-Jə-Tiu, ʋ nə yɩ ba nɩbara-ba Yɩɩ.