Zozɩasə pɩn ba də́ Pakə cànà
35
1 Zozɩasə pɩn ba də́ Pakə cànà tə Zwerizalɛmə nə, ba ma pa dun Ba-Yígúrə́-Jə-Tiu nə. Yá ba gʋa Pakə cànà vàná tə, bɩnɩ tə təntən cànà tə dɩan də fugə də banɩa dɩɩn nə. 2 Zozɩasə ken Yɩɩ joŋwana tə ba tʋ̀tʋ̀nán wa, ʋ ga dàn ba jɩɩn, sə ba tʋn Ba-Yígúrə́-Jə-Tiu dìə̀ tʋ̀tʋ̀nán tə. 3 Kʋ kwa nə, ʋ swɩ̀n Levi dwíí tə con, ba yà nə ken ba vàn nə, ba pa Ba-Yígúrə́-Jə-Tiu cɩcɩ nə, ba yà nə kàrɩ̀ lalʋʋ tə, ʋ wʋ́: «Á kənə Yɩɩ nimarʋ culu daka tə Yɩɩ dìə̀ tə wa, Davidə bìú Salʋmʋn, ʋ nə yɩ Yɩzərayɛlə pɩ̀ʋ́ nə lwə̀. Á kʋ́ʋ̀ bá zɩn ka á para wa. Sɩ́ʋ́n nə, á dàń tʋŋa á pa Ba-Yígúrə́-Jə-Tiu nə, ʋ nə yɩ á Yɩɩ, də Yɩzərayɛlə lɩ̀à tə nə, ba nə yɩ ʋ lɩ̀à. 4 Á pwɩa púlə́ púlə́, kʋ twá á dìì tə, də tʋ̀tʋ̀nán tə nə, à nə tʋŋa, ndə Yɩzərayɛlə pɩ̀ʋ́ Davidə, də ʋ bìú Salʋmʋn nə pʋ́pʋ́nɩ́ ba tún nətʋ. 5 Á zɩga púlə́ púlə́ Yɩɩ wúlú bwálɩ́ tə wa, ndə Levi dìì tə nə pwɛ̀ nətʋ, á ma tʋn á pa á nubɩa Yɩzərayɛlə dwíə́ tə duən tə nə. 6 Á gwɩa Pakə joŋi vàná tə, á kwɛn á tɩ̀àn, á lɩ durən yìə̀n wa, á ga san á nubɩa Yɩzərayɛlə lɩ̀à tə nə, sə ba də́ cànà tə, kʋ twá ndə nətʋ nə, Ba-Yígúrə́-Jə-Tiu nə twá də Moyizə ʋ pa nii, sə kʋ tʋn.»7 Zozɩasə lɩ pəbii də bʋbii 30 000, də nɩan 3 000 ʋ tətə vàná wa, ʋ pa lalʋʋ tə mama nə, sə ba ma fwa Pakə cànà joŋi tə. 8 Ʋ lʋʋ nii yáá tɩ̀án tə də lɩ vàná, ba ma də́ zìlə́ lalʋʋ tə, də Yɩɩ joŋwana tə, də Levi dwíí tə yuu wa. Hiləkiya, də Zakari, də Yehiyɛlə, ba nə yɩ Yɩɩ dìə̀ tə yáá tɩ̀án pɩn pəbii də bʋbii 2 600, də nɩan 300 Yɩɩ joŋwana tə nə, sə ba ma fwa Pakə cànà joŋi tə. 9 Konanɩa də ʋ nubɩa Swemaya, də Netaneyɛlə, də Haswabɩa, də Yeyɛlə, də Yozabadə, ba nə yɩ Levi dwíí tə yáá tɩ̀án pɩn pəbii də bʋbii 5 000, də nɩan 500 Levi dwíí tə nə, sə ba ma fwa Pakə cànà joŋi tə.
10 Nə̀ń nətʋ tə, ba nə tanɩ tʋ̀tʋ̀nán tə: Yɩɩ joŋwana tə yà zɩga ba bwálá nə, Levi dwíí tə ga wulə ba púlə́ tə wa, ndə pɩ̀ʋ́ tə nə pɩn nii nətʋ. 11 Ba gʋa Pakə cànà vàná tə, Yɩɩ joŋwana tə jon vàná tə, jana tə Levi dwíí tə con, ba lwá Yɩɩ joŋi bwálɩ́ tə yuu wa, Levi dwíí tə ga pwànà vàná tə. 12 Ba lɩ vàná tə nə mɛ, sə tə ya joŋi tə ba nə sʋ̀rɩ́*, ba tún vàn nə, ba pa Yɩzərayɛlə dwíə́ púlə́ tə nə, sə ba yɩyarɩ tə Ba-Yígúrə́-Jə-Tiu yáá con, ndə kʋ nə pʋ́pʋ́nɩ́ Moyizə sagɩ tə wa nətʋ. Mə ba tə fwa nətʋ də nabɩran tə də. 13 Ba wùə̀ Pakə cànà pəbii tə mən wa, ndə kʋ nə mɛ sə kʋ tʋn nətʋ, ba ga sàn pupwən jwəŋə tə duən nàŋá tə kwara wa, də nagwalan wa, də nəkəni duən wa. Ba tarɩ tə lala ba pa lalʋʋ tə mama nə. 14 Kʋ kwa nə, ba sàn tə tə nə yɩ ba tətə də Yɩɩ joŋwana tə nyiən. Cɩ́gá, Aron bɩ̀á Yɩɩ joŋwana tə tʋn wuuu tɩa yì, ba ma sʋ̀rɩ́ jwəŋə tə, də tə nanwɩɩ tə. Kʋ mʋ̀ nə pɩn, Levi dwíí tə ma sàn ba tətə də Aron bɩ̀á Yɩɩ joŋwana tə nyiən.
15 Asafə bɩ̀á gwàgá tə də yà wulə ba tʋ̀tʋ̀nán wa, ndə Davidə, də Asafə, də Eman, də Yedutunə, ʋ nə yɩ pɩ̀ʋ́ Yɩɩ yinarʋ, nə pɩn nii nətʋ. Mimii nəcɩra tə də yà zɩga mimii mama nə, ba wà ba tʋ̀tʋ̀nán yá. Cɩ́gá, ba nubɩa Levi dwíí tə sàn ba də tori, ba pa ba. 16 Kʋ dɩɩn tə nə, mə nətʋ nə ba tanɩ Ba-Yígúrə́-Jə-Tiu tʋ̀tʋ̀nán tə mama, sə ba ma də́ Pakə cànà tə, ba ga sʋ̀rɩ́ jwəŋə Ba-Yígúrə́-Jə-Tiu joŋi bwálɩ́ tə yuu wa, ndə pɩ̀ʋ́ Zozɩasə nə pɩn nii nətʋ.
17 Yɩzərayɛlə lɩ̀à tə ba nə yɩn lá, dí Pakə cànà tə, kʋ máŋá tə wa, də cànà tə, ba nə də́ də dipɛn tə nə wà sabwarɩ ken, dɩan barpɛ. 18 Ba yà tə wà Pakə cànà dí, ndə Pakə cànà təntə nə Yɩzərayɛlə wa, kʋ nə zɩgɩ Yɩɩ nii sʋ̀sʋ̀nʋ̀ Samiyɛlə máŋá wa. Yɩzərayɛlə pɩ̀ʋ́ mama yà tə wà Pakə cànà dí, ndə ka tə nə, Zozɩasə də Yɩɩ joŋwana tə, də Levi dwíí tə, də Zwida dwíí tə, də Yɩzərayɛlə lɩ̀à tə ba nə yɩn lá, də Zwerizalɛmə tɩ̀án tə mama nə dí.
19 Kʋ yɩn Zozɩasə pàrɩ̀ tə bɩna fugə də nana nii bɩnɩ tə wa nə, ba dí Pakə cànà təntə.
Zozɩasə pàrɩ̀ tə yígúrə́
20 Tə mʋ̀ yìə̀n tə mama kwa nə, Zozɩasə nə kwɛn Yɩɩ dìə̀ tə ʋ zwɛ̀, Ezwipətə pɩ̀ʋ́ Neko twá Əfəratə mʋnaa tə yuu, ʋ va sə ʋ ta kʋ̀ʋ̀ də Karəkemiswə tɩ̀án. Yá Zozɩasə nan ʋ cɩ̀ Ezwipətə tɩ̀án tə yáá nə. 21 Neko tʋn lɩ̀à sə ba swɩ̀n ʋ con, ba wʋ́: «Zwida pɩ̀ʋ́, bɛ̀ɛ̀ nə n nii pɩ̀à à yìə̀n wa? Kʋ tà n mʋ̀ nə à bɩ̀àn sə à ta zə̀n. Kʋ yɩ à dʋŋʋ don à pɩ̀à à ta. Yɩɩ swɩ̀n à con, sə à va lala. Dàn ká cɩ̀ Yɩɩ tə ʋ nə wulə də nə, yoo yáá nə. Kʋ nə tà nətʋ, ʋ wá pa n tɩ.» 22 Yá Zozɩasə tə wà sɛ̀ ʋ yá Neko, sə ʋ kɛ̀ń. Ʋ lwàń ʋ gànàn, ʋ va sə ʋ ta Neko, ʋ wà Neko sʋ̀ràn tə cʋgʋ, tə ga yɩ tə naŋa Yɩɩ tətə con. Ʋ vəli sə ʋ ta wá, Megido vara tə wa. 23 Kʋ̀ʋ̀ tə máŋá wa, catara tə ta cɩɩn, kʋ ja pɩ̀ʋ́ Zozɩasə, yá ʋ swɩ̀n ʋ tʋ̀tʋ̀nà tə con, ʋ wʋ́: «Ba caŋɩ nə zənzən, à jana nə á vìí.» 24 Ʋ tʋ̀tʋ̀nà tə lɩ wá ʋ kʋ̀ʋ̀ səsen kòrù tə wa, ba kə ʋ səsen kòrù don wa, ba ja va Zwerizalɛmə. Ʋ tɩga, yá ba gùrì wá ʋ nyɩna-ba libəri tə wa. Zwida dwíí tə mama, də Zwerizalɛmə tɩ̀án mama kwi Zozɩasə lúə́. 25 Yɩɩ nii sʋ̀sʋ̀nʋ̀ Zweremi dɩga lúə́ pucʋnɩ gwaran Zozɩasə tɩan tə yɩrɩ. Gwàgá də kagwaga dɩga lúə́ pucʋnɩ gwaran Zozɩasə tɩan tə yɩrɩ, kʋ nə zɩgɩ kʋ máŋá tə wa, kʋ bà kʋ yí zə̀n. Yá kʋ nətʋ tə dàń yà jìgə̀ yofwamɩʋn Yɩzərayɛlə wa. Ba pʋ́pʋ́nɩ́ gwaran təntə ba tún pucʋnɩ gwaran sagɩ tə wa.
26-27 Ba pʋ́pʋ́nɩ́ Zozɩasə tʋ̀tʋ̀nán tə gɩganɩ, tə nə sinti nətʋ, kʋ va kʋ yɩ tə yígúrə́, ba tún Yɩzərayɛlə də Zwida pɛ̀gá sagɩ tə wa. Sagɩ təntə bɩrɩ nətʋ, Zozɩasə nə twá kʋ tə nə pʋ́pʋ́nɩ́ Ba-Yígúrə́-Jə-Tiu nii sagɩ tə wa, də pùə́ nədʋ.