Yʋahazə pàrɩ̀ tə yoo
36
1 Lʋʋ nii tə lalʋʋ tə jɩn Zozɩasə bìú Yʋahazə ba tún, sə ʋ də́ pàrɩ̀ ʋ nyɩna tə yuu nə, Zwerizalɛmə nə. 2 Yʋahazə yà jə bɩna sapʋa də batwa, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ cànɩ̀ batwa Zwerizalɛmə nə.3 Ezwipətə pɩ̀ʋ́ Neko twi ʋ jon pàrɩ̀ tə ʋ con, Zwerizalɛmə tətə wa, ʋ ga pa dɩ bwaan lʋʋ nii tə yuu, ʋ pa ba ŋwɩ́n wárʋ́ tɔnə batwa, də sɩ́án kilo fɩtwa. 4 Ezwipətə pɩ̀ʋ́ tə tún Yʋahazə nubiu Eliyakimə, sə ʋ də́ pàrɩ̀ tə Zwida dwíí tə də Zwerizalɛmə tɩ̀án yuu wa. Ʋ lwàń Eliyakimə yɩrɩ tə ʋ kə Yehoyakimə. Neko jɩn ʋ nubiu Yʋahazə mʋ̀ ʋ ja va Ezwipətə.
Yehoyakimə pàrɩ̀ tə yoo
5 Yehoyakimə yà jə bɩna sapʋa də bonu, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fugə də nədʋ, Zwerizalɛmə nə. Ʋ tʋn kʋ tə nə lwara Ba-Yígúrə́-Jə-Tiu yáá con, ʋ nə yɩ ʋ Yɩɩ. 6 Babɩlɔnə pɩ̀ʋ́ Nebukadənezarə ta Zwida lʋʋ nii tə ʋ də́. Ʋ pɩn ba ja Zwida pɩ̀ʋ́ Yehoyakimə ba vwa də cɩnɩan banzala, ʋ ja va Babɩlɔnə. 7 Nebukadənezarə tì wiən yirə yirə Ba-Yígúrə́-Jə-Tiu dìə̀ tə wa, ʋ ja va ʋ kə ʋ padiə tə wa, Babɩlɔnə nə.
8 Ba pʋ́pʋ́nɩ́ Yehoyakimə yìə̀n tə gɩganɩ, də tʋtʋnkʋkwɩnan tə ʋ nə tʋn, də yoo tə nə yí wá, ba tún Yɩzərayɛlə də Zwida pɛ̀gá sagɩ tə wa. Ʋ bìú Yehoyakinə dí pàrɩ̀ tə ʋ yuu nə.
Yehoyakinə pàrɩ̀ tə yoo
9 Yehoyakinə yà jə bɩna nana, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ cànɩ̀ batwa də dɩan fugə, Zwerizalɛmə nə. Ʋ tʋn kʋ tə nə lwara Ba-Yígúrə́-Jə-Tiu yáá con.
10 Bɩnɩ tə yígúrə́ wa, pɩ̀ʋ́ Nebukadənezarə pɩn ba ja Yehoyakinə, də Ba-Yígúrə́-Jə-Tiu dìə̀ wozəŋə tə, ba bà Babɩlɔnə. Ʋ kúrí Yehoyakinə nyɩna nyánʋ́ Sedekɩasə, sə ʋ ya pɩ̀ʋ́ Zwerizalɛmə wa də Zwida dwíí tə yuu wa.
Zwida talɩkwa pɩ̀ʋ́ Sedekɩasə pàrɩ̀ tə yoo
11 Sedekɩasə yà jə bɩna sapʋa də nədʋ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fugə də nədʋ, Zwerizalɛmə nə. 12 Ʋ tʋn kʋ tə nə lwara Ba-Yígúrə́-Jə-Tiu yáá con, ʋ nə yɩ ʋ Yɩɩ. Ʋ wà ʋ tɩ̀àn mun Yɩɩ nii sʋ̀sʋ̀nʋ̀ Zweremi yáá con, Zweremi ga yɩ Ba-Yígúrə́-Jə-Tiu nə pɩn ʋ swɩ̀n.
13 Pɩ̀ʋ́ Nebukadənezarə yà pɩn Sedekɩasə dù durə də Yɩɩ yɩrɩ. Yá də kʋ mɛ, Sedekɩasə tə zàn ʋ zɩgɩ ʋ nə. Ʋ vɩga nii, ʋ tʋn zɩbaniu, ʋ wà sɛ̀ ʋ pìí ʋ bà Ba-Yígúrə́-Jə-Tiu con, ʋ nə yɩ Yɩzərayɛlə lɩ̀à Yɩɩ. 14 Joŋwana yun tɩ̀án tə mama, də lalʋʋ tə yáá tɩ̀án tə də mama zʋa dwíə́ nəkaran* tə tʋtʋnkʋkwɩnan tə fwaŋʋ wa. Ba ken durən Ba-Yígúrə́-Jə-Tiu dìə̀ tə wa, ʋ nə tún vàn nə, sə ka ya ʋ cɩcɩ nyiən, Zwerizalɛmə wa.
15 Ba-Yígúrə́-Jə-Tiu, ʋ nə yɩ ba nɩbara-ba Yɩɩ tʋn ʋ tʋntʋna, ʋ pa ba swɩ̀n ba con nɛɛ kapʋpʋ. Cɩ́gá, ʋ yà ba pɩ̀à sə ʋ cʋ̀gʋ̀ ʋ lalʋʋ tə, də ʋ wúlú bwálɩ́ tə. 16 Yá Yɩzərayɛlə lɩ̀à tə pwɛ́ Yɩɩ tʋntʋna tə, ba fʋfʋlɩ Yɩɩ sʋ̀ràn tə, ba ga mʋn Yɩɩ nii sʋ̀sʋ̀nà tə. Ba-Yígúrə́-Jə-Tiu lɩŋa dàń zàn ʋ lalʋʋ tə yuu wa, ba ga wàrɩ̀ won mama ba fwa, sə ba jɛ́n tə yáá nə.
17 Yá Ba-Yígúrə́-Jə-Tiu dàń pɩn Babɩlɔnə pɩ̀ʋ́ tə ta ba ʋ də́. Ʋ gʋa ba ləzwəndʋn tə, ʋ zʋ ʋ yí Yɩɩ wúlú bwálɩ́ tə wa. Ʋ wà ba bisɩmabarɩ, nə à yə̀ə́ bisɩmakanɩ, nə à yə̀ə́ nəkwɩna, nə à yə̀ə́ yukʋponə tɩ̀án tətə mɩɩ yá lʋʋ wa. Ʋ ken ba mama Babɩlɔnə pɩ̀ʋ́ tə jɩɩn wa. 18 Nebukadənezarə pɛ̀ Yɩɩ dìə̀ tə zɩla nəfaran tə, də nəmənbii tə mama, ʋ ja va Babɩlɔnə. Kʋ súrí Ba-Yígúrə́-Jə-Tiu dìə̀ jɩjə wiən tə nə, də pɩ̀ʋ́ tə də ʋ lʋʋ nii yáá tɩ̀án tə jɩjə wiən tə nə. 19 Ba dɩga mən Yɩɩ dìə̀ tə nə, ba gwɛrɩ Zwerizalɛmə bərətaŋʋ tə, ba dɩ mən dizəŋə tə mama nə, ba ga cʋ̀gʋ̀ wozəŋə tə mama. 20 Kʋ kwa nə, Nebukadənezarə jɩn lɩ̀à tə nə wà kʋ̀ʋ̀ tə wa tɩ, ʋ ja va Babɩlɔnə. Ba jìgə̀ ʋ ywə́ŋə́, ba ga ya ʋ bɩ̀á də ywə́ŋə́, kʋ va kʋ yí máŋá tə, Pɛrəsə payuu tə nə dí dɩ̀àn. 21 Mə kʋ zɩgɩ nətʋ, Ba-Yígúrə́-Jə-Tiu sʋgʋ tə nii ma sú. Ʋ yà twá ʋ nii sʋ̀sʋ̀nʋ̀ Zweremi nə, ʋ ma swɩ̀n, ʋ wʋ́: «Á wá nan á yá lʋʋ nii tə, bɩna sapwɩtwa də fugə, kʋ va kʋ yí máŋá tə, lʋʋ nii tə sìə́ bɩna* tə nə wá cé. Bɩna təntə wá zʋ sìə́ bɩna tə bʋʋ wa, á nə wà tə nii zìlí.»
Pɛrəsə pɩ̀ʋ́ Sirusə pɩn nii, sə ba pìí ba lwà Yɩɩ dìə̀ tə
22 Pɛrəsə pɩ̀ʋ́ Sirusə pàrɩ̀ tə təntən bɩnɩ tə wa, Ba-Yígúrə́-Jə-Tiu tún cwəŋə, sə ʋ ma pa kʋ tə, ʋ nə twá də ʋ nii sʋ̀sʋ̀nʋ̀ Zweremi, ʋ swɩ̀n tə, nii sú. Ʋ ken Pɛrəsə pɩ̀ʋ́ Sirusə pubʋŋa wa, sə ʋ pa ba bòrì yoo kʋ tə, ba ga pʋ́pʋ́nɩ́ kʋ ba tún, ʋ payuu tə mama wa: 23 Nə̀ń kʋ tə, Pɛrəsə pɩ̀ʋ́ Sirusə nə swɩ̀n. Ʋ swɩ̀n, ʋ wʋ́: «Ba-Yígúrə́-Jə-Tiu, Yɩɩ tə ʋ nə wulə lanworu wa, ken tɩa yuu payun tə mama à jɩɩn wa. Yá ʋ dàń pɩn nə nii, sə à lwà dìə̀ à pa wá, Zwerizalɛmə nə, kʋ nə wulə Zwida lʋʋ nii wa. Á lìù tə mama, ʋ nə yɩ ʋ lɩ̀à tə wa lìù, ʋ Yɩɩ tə wá ya də wá, sə ʋ pìí ʋ va Zwerizalɛmə.»