Zwida pɩ̀ʋ́ Sedekɩasə jìgə̀ Babɩlɔnə pɩ̀ʋ́ Nebukadənezarə yoŋu
52
1 Sedekɩasə yà jə bɩna sapʋa də nədʋ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fugə də nədʋ Zwerizalɛmə nə. Ʋ nuu yɩrɩ yà nə yɩ Hamutalə. Hamutalə yɩ Zweremi ʋ nə yɩ Libəna tíú bʋ̀á. 2 Sedekɩasə tʋn kʋ tə nə lwara Ba-Yígúrə́-Jə-Tiu yáá con yoo mama wa, ndə ʋ nyɩna Yehoyakimə nə tʋn nətʋ. 3 Yìə̀n təntə mama twi tə tʋn, Ba-Yígúrə́-Jə-Tiu nə fwi ʋ lɩŋa tə, Zwerizalɛmə tɩ̀án, də Zwida lʋʋ nii tə yuu wa, ʋ pa ba jɛ́n ʋ yáá con yɩrɩ. Sedekɩasə zàn ʋ vɩ Babɩlɔnə pɩ̀ʋ́ tə nii. 4 Sedekɩasə pàrɩ̀ tə nʋgʋ nii bɩnɩ tə, cànɩ̀ fugə nii cànà tə, dɩan fugə dɩɩn nə, Babɩlɔnə pɩ̀ʋ́ Nebukadənezarə ja ʋ kwatara tə mama ʋ bà, sə ʋ ta Zwerizalɛmə. Babɩlɔnə tɩ̀án ken tɩʋ tə ba titəŋi wa, ba ga lwà yisəgə bwálá, ba ja kɩkarɩ kʋ. 5 Ba púə́ tɩʋ tə nə də kʋ̀ʋ̀, yá kʋ zɩgɩ dɩ̀àn, kʋ va kʋ yí Sedekɩasə pàrɩ̀ tə bɩna fugə də nədʋ nii bɩnɩ tə. 6 Niən tə dàń yà jìgə̀ fìú tɩʋ tə wa. Wodiu yà kʋ́ʋ̀ tə̀lə́ sə lalʋʋ tə də́. Yá banɩa nii cànà tə dɩan nʋgʋ dɩɩn nə, 7 Babɩlɔnə kwatara pórí bʋʋ tɩʋ tə biritaŋʋ tə yɩra. Tɩtɩn nə, Pɩ̀ʋ́ Sedekɩasə də ʋ kwatara tə mama twá biritaŋan bələ mimii tə, kʋ nə wulə bwə́lə́ pɩ̀ʋ́ tɩ̀án kárá tə, ba nan ba dəri, ba tì Araba* digə cwəŋə tə. Yá Kaləde tɩ̀án tə yà kɩkarɩ tɩʋ tə. 8 Kaləde tɩ̀án kwatara tə dɩŋɩ pɩ̀ʋ́ Sedekɩasə ba ja Zweriko digə tə wa, yá ʋ kwatara tə mama dəri ba yá wá. 9 Kaləde tɩ̀án tə jɩn wá ba ja va Babɩlɔnə pɩ̀ʋ́ tə con, Ribəla nə, Hamatə lʋʋ nii tə wa, yá ba bʋ̀rɩ̀ ʋ bʋra. 10 Ba ken sɩ̀ʋ́ Sedekɩasə bɩ̀á tə bɩan nə, ʋ yɩ́á yuu. Ba ga gʋ Zwida tʋ̀tʋ̀nán yun tɩ̀án tə mama Ribəla nə. 11 Kʋ kwa nə, Babɩlɔnə pɩ̀ʋ́ tə pɩn ba ba zwa Sedekɩasə yɩ́á ba lá, ʋ ga pa ba vwa wá də cɩnɩan banzala, ba ja va Babɩlɔnə. Ba ken wá bàń dìə̀ wa, kʋ ja va kʋ yí ʋ tɩan dɩɩn. 12 Babɩlɔnə pɩ̀ʋ́ Nebukadənezarə pàrɩ̀ tə bɩna fugə nʋgʋ nii bɩnɩ tə, bonu nii cànà tə, fugə nii dɩɩn tə nə, Nebuzaradan, ʋ nə yɩ Babɩlɔnə pɩ̀ʋ́ sàń nəcɩra yuu tíú, ʋ ga yɩ ʋ tʋtʋnʋ də, twi Zwerizalɛmə wa. 13 Ʋ sʋ̀rɩ́ Ba-Yígúrə́-Jə-Tiu dìə̀ tə, də pɩ̀ʋ́ dìə̀ tə, də dìì tə mama Zwerizalɛmə wa. Ʋ sʋ̀rɩ́ dìì tə mama tə nə jə funə. 14 Kaləde tɩ̀án kwatara tə mama, ba yà nə wulə də kwatara yáá tíú tə gwɛrɩ biritaŋan tə mama, tə yà nə kɩkarɩ Zwerizalɛmə tɩʋ tə. 15 Pɩ̀ʋ́ sàń nəcɩra yuu tíú Nebuzaradan jɩn lalʋʋ tə wa labwana vàn don, də lalʋʋ tə gɩganɩ* tə yà nə wulə tɩʋ tə wa, ba tə yà nə pɩn ba tɩ̀àn Babɩlɔnə pɩ̀ʋ́ nə, də jɩɩn tʋ̀tʋ̀nán yənu tɩ̀án gɩganɩ tə, ʋ ja va Babɩlɔnə. 16 Yá ʋ yá lʋʋ nii tə yinənyɩna duən, sə ba ya lá, ba cwɛn divɛn tɩ̀án, ba ga vàrà kárɩ́. 17 Kaləde tɩ̀án tə nyʋnyʋgʋ cɩnɩan ywəŋə tə yà nə wulə Ba-Yígúrə́-Jə-Tiu dìə̀ tə wa, də tə də̀ń zɩlan tə, də cɩnɩan kwarɩ nəfarʋ tə yà nə wulə Ba-Yígúrə́-Jə-Tiu dìə̀ tə wa, ba ga pɛ̀ cɩnɩan tə mama, ba ja va Babɩlɔnə. 18 Ba pɛ̀ nəkəni tə, də pɛlə tə, də sɩ̀án tə, də nagwalan tə, də wùrú zwɩɩn tə, də cɩnɩan zɩla tə mama, ba yà nə ma tʋŋa Yɩɩ dìə̀ tə wa. 19 Babɩlɔnə kwatara yáá tíú tə tə pɛ̀ kwara tə, də wiən tə ba nə ma tùŋə̀ mən, də nagwalan tə, də nəkəni tə, də canzɩlan tə, də wùrú zwɩɩn tə, də nəvwe tə, də won tə mama, kʋ nə yɩ sɩ́án won, nə à yə̀ə́ wárʋ́ won. 20 Lìù yà yəri cɩnɩan ywəŋə bələ tə, də cɩnɩan kwarɩ nəfarʋ tə nə tígə́ cɩnɩan nɩan nyɩnyɩga fugə də bələ tə yuu wa, Salʋmʋn nə fwa, ʋ kə Ba-Yígúrə́-Jə-Tiu dìə̀ tə wa, dun nə mɛn nətʋ. 21 Yoŋi nədʋ mama yuu tɩa zɩgʋ yà yɩ jɩvaŋɩ yiə fugə də nana. Kʋ taŋa kɩkarʋ yà yɩ jɩvaŋɩ yiə fugə də bələ. Kʋ waa tə yà yɩ woru, yá kʋ lini yà yí jɩfwɩ banɩa. 22 Kʋ yuu con yà jə cɩnɩan kiru, yá kʋ nədʋ mama yuu tɩa zɩgʋ yà yɩ jɩvaŋɩ yiə bonu. Ba ga fwa gərenadə bɩ̀á nyɩnyɩga də cɩnɩan, ba ja kɩkarɩ kʋ. Mə bələ nii yoŋi tə də yɩn nətʋ. 23 Ba ja cɩnɩan ba ma fwa gərenadə bɩ̀á 96 banzala ba tún yoŋi tə yuu kiru tə yuu wa. Yá yoŋi tə yɩra gərenadə bɩ̀á tə mama dàń yà yɩ bíí. 24 Babɩlɔnə pɩ̀ʋ́ sàń nəcɩra yuu tíú tə jɩn Yɩɩ joŋwana yun tɩ̀án nəkwɩa* Seraya, də Sofoni ʋ nə daa Seraya nə, də mimii nəcɩra batwa tə. 25 Tɩʋ tə wa, ʋ jɩn pɩ̀ʋ́ sàń tʋtʋnʋ nədʋ, ʋ yà nə yɩ kwatara yáá tíú, də pɩ̀ʋ́ kàrá tə wa bara barpɛ, ba yà tə nə wulə tɩʋ tə wa. Ʋ tə jɩn lìù tə, ʋ nə pʋ́pʋ́nɩ́ Zwida kwatara yáá tíú tə saga, ʋ ga kúrí kwatara lalʋʋ tə wa. Ʋ tə jɩn bara sapwɩtwa, ba yà tə nə wulə tɩʋ tə wa. 26 Pɩ̀ʋ́ sàń nəcɩra yuu tíú Nebuzaradan ja ba, ʋ va ʋ pa Babɩlɔnə pɩ̀ʋ́ tə nə, Ribəla nə. 27 Babɩlɔnə pɩ̀ʋ́ tə dàń mà ba ʋ gʋ Ribəla nə, Hamatə lʋʋ nii tə wa. Mə kʋ zɩgɩ nətʋ, ba ma ja Zwida lʋʋ lɩ̀à tə ba va yiŋʋnɩ, ba yá ba lʋʋ nii tə nə. 28 Nə̀ń lɩ̀à tə nii pɩ̀ʋ́ Nebukadənezarə nə ja va yongaʋ, ʋ pàrɩ̀ tə barpɛ nii bɩnɩ tə wa. Ba yɩn Zwida lʋʋ lɩ̀à 3 023. 29 Pɩ̀ʋ́ Nebukadənezarə pàrɩ̀ tə bɩna fugə də nana nii bɩnɩ tə wa, ʋ jɩn lɩ̀à 832 Zwerizalɛmə wa, ʋ ja va yongaʋ. 30 Nebukadənezarə pàrɩ̀ tə bɩna sapʋa də batwa nii bɩnɩ tə wa, pɩ̀ʋ́ sàń nəcɩra yuu tíú Nebuzaradan jɩn Zwida lʋʋ lɩ̀à 745 ʋ va yongaʋ. Ba mama yɩn lɩ̀à 4 600. 31 Ba nə jɩn Zwida pɩ̀ʋ́ Yehoyakinə, ba ja va Babɩlɔnə bɩna fɩtwa də barpɛ nii bɩnɩ tə nə, Evilə-Merodakə jìgə̀ Babɩlɔnə pɩ̀ʋ́. Ʋ pàrɩ̀ tə təntən bɩnɩ tə, fugə bələ nii cànà tə, dɩan sapʋa də bonu dɩɩn nə, ʋ fwa pubwanʋ Zwida pɩ̀ʋ́ Yehoyakinə yɩra, ʋ pa ba lɩ wá bandiə tə wa. 32 Ʋ swɩ̀n Yehoyakinə con də pubwanʋ, ʋ ga tún wá, sə ʋ ya pɩ̀ʋ́ pɛ̀gá tə yuu wa, ba nə wulə də wá, Babɩlɔnə nə. 33 Evilə-Merodakə pɩn ba lɩ Yehoyakinə bandiə gànàn tə, yá ʋ dàń dí wodiu Babɩlɔnə pɩ̀ʋ́ tə con, ʋ lʋʋ wúlú tə mama wa. 34 Mə kʋ zɩgɩ nətʋ, Yehoyakinə ma na kʋ tə nə wá san wa, kʋ tə nə mɛ wá dɩɩn mama, Babɩlɔnə pɩ̀ʋ́ tə con, ʋ lʋʋ wúlú tə mama wa, kʋ va kʋ yí ʋ tɩan dɩɩn.