51
1 Nə̀ń kʋ tə Ba-Yígúrə́-Jə-Tiu nə swɩ̀n:
«À wá pa vʋʋ tə nə cʋ̀gà wiən
fuli kʋ zɩgɩ Babɩlɔnə tɩʋ tə nə,
kʋ wá fuli kʋ zɩgɩ Lɛbə-Kamayia tɩ̀án nə.
2 À wá sugu vərə à kə Babɩlɔnə nə,
à pa ba jàn kʋ, ndə vʋʋ nə jànɩ̀ wosanan.
Ba wá kòrí kʋ lʋʋ nii tə lɩ̀à tə, ba ga yá kʋ.
Cɩ́gá, ba wá cɩ̀ kʋ ba kə ba ta,
lɛɛ dɩɩn təntə nə.
3 Á dànà ká yá á pa á jarɩduən twan tárá tə wànɩ́ ba dɩ̀ ba twɛn,
nə à yə̀ə́ ba fwa fwìə́ ba kʋ̀ʋ̀ nàtànà gànàn wa!
Á dànà ká dəri ba balandʋra tə yinəgə,
á gwɩa ba kwatara tə mama mɩ́ámɩ́án*,
á ma pa nə dun!
4 Á caŋa ba á pa tɩan nə,
á larɩ tɩa, Kaləde tɩ̀án lʋʋ nii tə wa,
sə ba tɩga sú Babɩlɔnə coŋi tə yuu.
5 Cɩ́gá, ba lʋʋ nii tə súə́ də cʋna,
Yɩzərayɛlə lɩ̀à Yɩɩ tə, ʋ nə yɩ parɩ* yáá con.
Yá Yɩzərayɛlə də Zwida lʋʋ lɩ̀à wà ba Yɩɩ tə nə kwɩ̀n,
ʋ mʋ̀ Ba-Yígúrə́-Jə-Tiu, ʋ nə yɩ kwatara* Yɩɩ.
6 Á dərə á nan Babɩlɔnə tɩʋ tə wa,
sə lìù mama jon ʋ mɩɩ!
Á dànà ká pa á twá á tɩ, kʋ cʋna yɩrɩ.
Cɩ́gá, kʋ yɩ Ba-Yígúrə́-Jə-Tiu lɩŋa fwiu máŋá:
Ʋ wá ŋwɩ́n kʋ tə nə mɛ də kʋ, ʋ pa kʋ!
7 Babɩlɔnə yà yɩ ndə sɩ́án wùrú zʋŋa nə, Ba-Yígúrə́-Jə-Tiu jɩɩn wa,
ka nə nyɩn tɩa yuu ləzoni tə mama də sana,
ka pɩn ba bʋbʋnɩ.
Dwíə́ nəkaran* tə nyʋan ka divɛn tə,
kʋ mʋ̀ nə pɩn ba ma swɩ̀n sʋvɛɛ.
8 Babɩlɔnə tɩʋ tə tʋa kʋ lwa, naa nədʋ.
Á kwíə́ á pa kʋ,
á kənə nʋʋ nʋga kʋ nʋran tə nə,
kʋ wàá də kʋ wá na yazurə!
9 Nə dídə́n sə nə ywarɩ Babɩlɔnə,
yá kʋ wà yazurə nɩ.
Nə vɩa kʋ nə dʋgʋ,
sə nə lìù mama ga va ʋ lʋʋ nii wa.
Cɩ́gá, kʋ cʋna tə dɩ̀gà tə yí lanworu wa,
tə dɩ̀gà tə ja bakwan tə nə.
10 Ba-Yígúrə́-Jə-Tiu bʋ̀rɩ̀ ʋ pa nəba cɩ́gá,
á bɩ̀àn nə man kʋ tə mama,
Ba-Yígúrə́-Jə-Tiu, nə tíú Yɩɩ nə tʋn,
nə bɩrɩ Siyon tɩʋ tə wa.»
11 Á derə cɩan nii,
á kə á sú cwen!
Ba-Yígúrə́-Jə-Tiu sugu Medi lʋʋ nii pɛ̀gá tə,
ʋ kə Babɩlɔnə nə.
Cɩ́gá, ʋ tanɩ sə ʋ cʋ̀gʋ̀ kʋ.
Kʋ yɩ Ba-Yígúrə́-Jə-Tiu nə fwi ʋ lɩŋa,
ʋ fwi ʋ lɩŋa ʋ dìə̀ tə yɩrɩ.
12 Á zɩan kʋ̀ʋ̀ mɩmɩnʋ,
á zɩgɩ Babɩlɔnə biritaŋʋ tə nə!
Á pɩan kwatara kapʋpʋ, sə ba cɩ̀,
á pɩan kwatara tə nə ywàŋá tɩʋ yuu nə, cɩ̀ zəni,
á ga səgə kwatara duən kwa con,
sə ba ta tɩʋ tə, ba dɩ̀ kʋ yuu!
Cɩ́gá, Ba-Yígúrə́-Jə-Tiu tanɩ, sə ʋ tʋn yoo,
yá ʋ wá tʋn yoo tə ʋ nə kàn nii,
sə ʋ tʋn Babɩlɔnə tɩ̀án yɩra, ʋ pa kʋ nii sú.
13 N mʋ̀ Babɩlɔnə, tɩʋ tə nə wulə nɩ́á tə nə dáá nii nə,
n ga jə jɩjə kapʋpʋ,
n mɩɩ tə yígúrə́ máŋá yí,
n nɩ wiən tə mama n nə pɩ̀à, tə cé!
14 Ba-Yígúrə́-Jə-Tiu, ʋ nə yɩ kwatara Yɩɩ
dùə̀ də ʋ tətə, ʋ swɩ̀n, ʋ wʋ́:
«À wá pa dʋŋa sú n tɩʋ tə nii, ndə kayɩra nə,
yá ba wá mà kʋ̀ʋ̀ cə̀rí, ba zɩgɩ n nə.»
15 Ba-Yígúrə́-Jə-Tiu ja ʋ dɩ̀àn, ʋ ma fwa tɩa tə,
ʋ ja ʋ wʋbʋŋa ʋ ma dɩ̀ lʋʋ tə də̀ń,
ʋ ga ja ʋ yənu ʋ ma larɩ lanworu tə.
16 Ʋ nə súrí ʋ nii nə,
nɩ́á kapʋpʋ yàá kun duən nə, lanworu tə wa,
ʋ ga pa bakwan nan tɩa nii yígúrə́ wa, tə dɩ̀.
Ʋ yàá pa dwà pɩpɩlɩ sə ka nà,
ʋ ga pa dwavʋʋ nan bwálɩ́ tə wa, kʋ nə wulə.
17 Ləzwənə mama jìgə̀ ləyiru, ʋ ba yoo də̀ń nə̀ń.
Cavɩra jə cɩnayarʋ mama,
woŋwanʋ tə yɩrɩ, ʋ nə nyɩan lugu, ʋ ma fwa.
Cɩ́gá, ʋ woŋwanan tə yɩ kʋkʋn wiən,
siŋu mancɩn tətə tə̀lə́ tə nə.
18 Tə yɩ wovɛɛ, tə yɩ mʋmʋn wiən.
Dɩɩn tə Yɩɩ nə wá zɩgɩ tə nə, tə wá nyʋn lá.
19 Yá Zwakɔbə Yɩɩ tə mʋ̀ tà ndə tə nə.
Cɩ́gá, ʋ mʋ̀ nə fwa won mama,
yá Yɩzərayɛlə dwíí tə yɩ ʋ mʋ̀ nə tɩ.
Ʋ yɩrɩ nə yɩ Ba-Yígúrə́-Jə-Tiu, kwatara Yɩɩ*.
Babɩlɔnə tɩʋ tə tʋrɩ yoo
20 Ba-Yígúrə́-Jə-Tiu swɩ̀n Babɩlɔnə tɩʋ tə yoo, ʋ wʋ́:
«N yɩn ndə hama nə,
nə à yə̀ə́ ndə kwatarɩ zɩla nə, n pa nə.
À ja mʋ́ à tɩtaga dwíə́ nəkaran*,
à ja mʋ́ à cʋ̀gʋ̀ payun.
21 À ja mʋ́ à tɩtaga səsen, də tə nədɩra,
à ja mʋ́ à tɩtaga səsen kòrə̀n, də tə wa lɩ̀à.
22 À ja mʋ́ à tɩtaga bara də kana,
à ja mʋ́ à tɩtaga bazʋnan də balandʋra,
à ja mʋ́ à tɩtaga bisɩmabarɩ də bisɩmakanɩ.
23 À ja mʋ́ à tɩtaga payɩra də ba vàná,
à ja mʋ́ à tɩtaga vala də ba navala,
à ja mʋ́ à tɩtaga nagwanɛɛ yáá tɩ̀án,
də lɩ̀à tə nə bʋ̀rɩ̀ bʋra.
24 Yolwan tə mama Babɩlɔnə də
Kaləde tɩ̀án mama nə tʋn Siyon tɩ̀án yɩra,
à wá ŋwɩ́n kʋ jɩŋɩ ba yɩra, á yɩ́á yuu.
Ba-Yígúrə́-Jə-Tiu nii sʋgʋ nə!
25 À də mʋ́ bələ, n mʋ̀ cʋna paan təntə,
n yà nə cʋ̀gà tɩa tə mama!
Ba-Yígúrə́-Jə-Tiu nii sʋgʋ nə!
À wá zɩ̀n à jɩɩn à zɩgɩ n nə,
à wá pa n bəbəli, n nan pɩ̀ràn tə yuu wa, n tʋ,
à ga pa n jì ndə paan nə, ka nə kwé mən.
26 Lìù kʋ́ʋ̀ bá lɩ nigwancɩn kapana,
nə à yə̀ə́ kapana, ba nə ma túŋə́ dìə̀ dəkuu n wa.
Cɩ́gá, n wá cʋ̀gʋ̀ mɩ́ámɩ́án, máŋá mama wuuu.
Ba-Yígúrə́-Jə-Tiu nii sʋgʋ nə!
27 Á zɩan kʋ̀ʋ̀ mɩmɩnʋ, á zɩgɩ yɩɩ nə, lʋʋ nii tə wa!
Á wúrə́ nabwanan lʋʋ dwíə́ tə wa!
Á sugə dwíə́ nəkaran tə á kə,
sə ba ta Yɩɩ kʋ̀ʋ̀ də Babɩlɔnə!
Á boŋə Araratə, də Mini,
də Aswəkenazə payun tə, á kə kʋ nə!
Á túŋə́ kwatara yáá tɩ̀án,
sə ba kúrí kwatara ba ma ta kʋ!
Á pɩan kʋ̀ʋ̀ səsen va kʋ nə, ndə kayɩra nə!
28 Á sugə dwíə́ nəkaran tə á kə,
sə ba ta Yɩɩ kʋ̀ʋ̀ də Babɩlɔnə.
Á sugə Medi lʋʋ nii pɛ̀gá tə,
də ba nagwanɛɛ yáá tɩ̀án tə,
də ba lɩ̀à tə nə bʋ̀rɩ̀ bʋra tə mama,
də lʋʋ nii tə mama, ba nə də́ pàrɩ̀ kʋ wa,
á kə Babɩlɔnə nə.
29 Tɩa tə vuvugu, ka ga didigi,
máŋá tə wa Ba-Yígúrə́-Jə-Tiu nə tʋn yoo tə,
ʋ nə tanɩ ʋ zɩgɩ Babɩlɔnə nə,
ʋ pa kʋ nii sú.
Ʋ pɩn Babɩlɔnə lʋʋ nii tə cʋ̀gʋ̀ mɩ́ámɩ́án,
lìù mama kʋ́ʋ̀ tə̀lə́ kʋ wa.
30 Babɩlɔnə tɩ̀án kwatara tə yá kʋ̀ʋ̀ tɛgʋ nə,
ba ga zʋ ba wulə dɩ̀àn dəkuu bwálá wa.
Ba babarɩ tə nyʋan lá,
yá ba dàń jìgə̀ ndə kana nə.
Dʋŋa kɛ́n ba tɩʋ tə mimien tə,
ba zʋ ba dɩ mən ba dìì tə nə.
31 Tʋntʋna dəri ba jəri duən,
ba joŋə duən yuu nə,
ba ma ja ŋwɛn ba dəri ba vələ,
sə ba pa Babɩlɔnə pɩ̀ʋ́ nə,
də dʋŋa jon ʋ tɩʋ tə mama,
kʋ nə zɩgɩ kʋ nii don nə,
kʋ va kʋ nan kʋ don nə.
32 Ba cɩ̀gà bwálá tə mama nə,
ba nə twá ba ma bɩn bunɛɛ tə,
ba ga dɩ mən buun tə nii gaʋ tə nə,
yá fən dàń zʋa kwatara tə.
33 Nə̀ń kʋ tə Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ nə swɩ̀n:
«Babɩlɔnə tɩzəŋu tə yɩ ndə tʋa nə,
ba nə pàrɩ̀ sə ba ma mà mɩna,
yá máŋá mancɩn wa,
də kʋ mɩna deru máŋá yí.»
Yɩɩ wá fwi ʋ lɩ̀à tə lɩŋa, ʋ pa ba
34 Babɩlɔnə pɩ̀ʋ́ Nebukadənezarə dí nə ʋ zwɛ̀,
ʋ ga yá nə vàn nə, ndə zʋwoo nə.
ʋ liri nə, ndə tɩdən nə,
ʋ dí à wiən tə nə jə fɩra, ʋ sú ʋ pùə́,
ʋ ga vɩ nə ʋ dʋgʋ.
35 Siyon tɩ̀án swɩ̀n, ba wʋ́:
«Yɩɩ wá ŋwɩ́n Babɩlɔnə tɩ̀án yɩra,
dɩ̀àn tə jɩŋɩ, ba nə tʋn nə yɩra,
ba ma kə nəba càn wa!»
Zwerizalɛmə tɩ̀án swɩ̀n, ba wʋ́:
«Yɩɩ wá pa nə jana tə yoo
pìí kʋ zɩn Kaləde tɩ̀án yuu wa!»
36 Kʋ mʋ̀ nə pɩn Ba-Yígúrə́-Jə-Tiu ma swɩ̀n, ʋ wʋ́:
«À mʋ̀ nə wá zɩgɩ n jɩrɩmʋ,
à fwi n lɩŋa, à pa mʋ́!
À wá pa Babɩlɔnə mʋʋ tə kʋ̀,
à ga pa kʋ nabuliyii tə wʋ.
37 «À wá pa Babɩlɔnə jì kapana púlí,
cirəkuri bʋran bwálɩ́.
À wá pa kʋ jì yokəlu, də mʋmʋn won,
lìù mama ga kʋ́ʋ̀ bá ya lá.
38 Babɩlɔnə tɩ̀án mama yɩ ba baa, ndə gərən nə,
ba fʋrɩ, ndə gəbii nə.
39 Máŋá tə ba yɩra nə cɛn,
à wá tanɩ ba cànà, à pa ba,
à wá nyɩn ba də sana, à pa ba bʋbʋnɩ,
à ga pa ba tʋ dwiən wa, tə nə bá yígúrə́ jə,
yá ba kʋ́ʋ̀ bá pìí ba zàn.
À mʋ̀ Ba-Yígúrə́-Jə-Tiu nii sʋgʋ nə!
40 À wá ja ba à va nangʋra dìə̀ wa, ndə pəbii nə,
ndə pabɩran də bʋtɩlan nə.»
Lúə́ pucʋnɩ gwaran, Babɩlɔnə yɩrɩ
41 Kʋ tà cɩ́gá! Dʋŋa jon Sweswakə tɩʋ tə!
Ba dí dɩ̀àn lʋʋ mama dun tə yuu wa!
Kʋ tà cɩ́gá! Babɩlɔnə cʋ̀gʋ̀ mɩ́ámɩ́án,
lʋʋ dwíə́ tə wa.
42 Mʋʋ tə dɩ̀gà kʋ ja Babɩlɔnə,
kʋ nakulə kapʋpʋ tə púə́ kʋ yuu nə.
43 Kʋ tɩan tə cʋ̀gʋ̀ mɩ́ámɩ́án,
tə jì tɩkʋrʋ də digə lʋʋ nii,
lìù mama nə tə̀lə́ lá,
ləzwənə mama nə ba lá twá ʋ kɛ̀ń.
44 À wá zɩgɩ woŋwanʋ Bɛlə nə,
kʋ nə wulə Babɩlɔnə nə,
à wá pa kʋ pìí kʋ tʋnɩ kʋ tə kʋ nə liri,
yá lʋʋ dwíə́ tə kʋ́ʋ̀ bá bà kʋ con zənzən.
Babɩlɔnə biritaŋʋ tə tətə tʋa.
45 Á mʋ̀, à lɩ̀à tə, á naŋa kʋ wa,
sə lìù mama wànɩ́ ʋ jon ʋ mɩɩ,
à mʋ̀ Ba-Yígúrə́-Jə-Tiu lɩŋa nəfarʋ tə jɩɩn wa.
46 Á cɩa á tɩ̀àn nə, á dànà ká pa á jɩ̀àn gwàrɩ̀, sə fən zʋ aba, zizigu tə yɩrɩ, á nə wá nì lʋʋ nii tə wa! Cɩ́gá, bɩnɩ mama də kʋ yojanʋ! Ka tʋn dɩ̀àn duən yɩra wá ya lʋʋ nii tə wa, yá yáá tíú wʋlʋnyiən wá zàn ʋ zɩgɩ ʋ don yáá tíú wʋlʋnyiən nə.
47 Kʋ mʋ̀ nə pɩn, máŋá bɩ̀àn,
à nə wá zɩgɩ Babɩlɔnə tɩ̀án woŋwanan tə nə,
yá kʋ lʋʋ nii tə mama wá də́ cavɩra,
tɩga tə mama ga wá tʋ, tɩʋ tə titəŋi wa.
48 Lanworu tə də tɩa tə,
də wiən tə mama nə wulə tə wa
dàń wá mà pupwən cə̀rí, Babɩlɔnə tʋrɩ tə yɩrɩ.
Cɩ́gá, cʋcʋnyɩna tə wá nan jɩzən saparʋ con,
ba bà kʋ nə.
Ba-Yígúrə́-Jə-Tiu nii sʋgʋ nə!
49 Babɩlɔnə də mɛ sə kʋ tʋ,
Yɩzərayɛlə lɩ̀à tə yɩrɩ, kʋ nə gʋa.
Cɩ́gá, Babɩlɔnə nə pɩn lɩ̀à ma tɩ, tɩa yuu mama wa.
50 Á mʋ̀ lɩ̀à tə nə jɛ́n kwatara sɩ̀ʋ́ yáá nə,
á vìrə́, á dànà ká zɩgɩ!
Á zɩga yiŋʋnɩ, á lìə́ Ba-Yígúrə́-Jə-Tiu yoo,
á ga bʋ́n Zwerizalɛmə yoo, á bɩcanɩ wa.
51 Cavɩra yàá jə nəba,
də nə nə nì də ba twɩn nəba,
yá nə yàá na də ba fʋfʋlɩ nəba,
də vərə nə zʋa Ba-Yígúrə́-Jə-Tiu dìə̀ tə wa,
ʋ wúlú bwálɩ́ tə wa.
52 Kʋ mʋ̀ nə pɩn máŋá bɩ̀àn,
à nə wá zɩgɩ Babɩlɔnə tɩ̀án woŋwanan tə nə,
yá ba lʋʋ nii tə mama wa, ba wá nì lɩ̀à tə,
ba nə caŋɩ ba pa tɩan nə bubwiə.
Ba-Yígúrə́-Jə-Tiu nii sʋgʋ nə!
53 Yá Babɩlɔnə nə swə kʋ dɩ̀ kʋ yí lanworu wa,
kʋ nə swə kʋ pa kʋ dɩ̀àn dəkuu bwálá tə
yuu dara yɩɩ nə, tə wàrɩ̀ tə yí,
à tə wá pa cʋcʋnyɩna bà, ba cʋ̀gʋ̀ kʋ.
Ba-Yígúrə́-Jə-Tiu nii sʋgʋ nə!
54 Bubwiə naŋa Babɩlɔnə wa,
cʋcʋran nəfaran tʋa Kaləde tɩ̀án lʋʋ nii tə wa.
55 Cɩ́gá, Ba-Yígúrə́-Jə-Tiu wulə ʋ cʋ̀gà Babɩlɔnə,
ʋ wá pa kʋ zizigu nəfarʋ tə nyʋn lá.
Babɩlɔnə zizigu tə yà yɩ ndə navoo nəfarʋ nə,
kʋ nə pupwin.
56 Cɩ́gá, cʋcʋnyiən bɩ̀àn kʋ nə,
ʋ bɩ̀àn Babɩlɔnə nə.
Ba jɩn kʋ kwatara babɩran tə,
ba twɛn kɛ́n.
Cɩ́gá, Ba-Yígúrə́-Jə-Tiu yɩ Yɩɩ tə ʋ nə ŋwɩ́n jɩŋa,
ʋ yàá ŋwɩ́n lìù mama tʋtʋnɛɛ ŋwɩ́rán, ʋ pa wá.
57 À wá nyɩn Babɩlɔnə tʋ̀tʋ̀nán yun tɩ̀án tə, də kʋ wʋbʋnyɩna tə, də kʋ nagwanɛɛ yáá tɩ̀án tə, də kʋ lɩ̀à tə nə bʋ̀rɩ̀ bʋra, də kʋ kwatara babɩran də sana, à pa ba bʋbʋnɩ, à ga pa ba tʋ dwiən wa, tə nə bá yígúrə́ jə, yá ba kʋ́ʋ̀ bá pìí ba zàn. Pɩ̀ʋ́ tə, ʋ yɩrɩ nə yɩ Ba-Yígúrə́-Jə-Tiu, kwatara Yɩɩ nii sʋgʋ nə. 58 Ba-Yígúrə́-Jə-Tiu, ʋ nə yɩ kwatara Yɩɩ swɩ̀n, ʋ wʋ́:
«Dʋŋa wá gwɛrɩ Babɩlɔnə biritaŋan nəfaran tə mɩ́ámɩ́án,
ba ga dɩ mən kʋ bwə̀rə̀n nədaran tə nə.
Kʋ nətʋ wá pa lalʋʋ kapʋpʋ tə tʋtʋŋɩ tə jì tʋtʋ,
yá lʋʋ dwíə́ tə ga gwàrɩ̀ ba tɩ̀àn, ba pa mən nə.»
Sagɩ tə ba nə dɩga Əfəratə mʋnaa tə wa yoo
59 Nə̀ń nii tə Yɩɩ nii sʋ̀sʋ̀nʋ̀ Zweremi nə pɩn Neriya bìú Seraya nə, ʋ nə yɩ Maseya nàʋ́, máŋá tə wa, ʋ nə twá Zwida pɩ̀ʋ́ Sedekɩasə nə, ʋ va Babɩlɔnə, ʋ pàrɩ̀ tə banɩa nii bɩnɩ tə wa. Seraya yà yɩ pɩ̀ʋ́ sàń tʋ̀tʋ̀nà tə yuu tíú. 60 Zweremi pʋ́pʋ́nɩ́ lɛɛ tə mama nə mɛ sə tə yí Babɩlɔnə, ʋ kə sagɩ nədʋ wa. Tə mʋ̀ nə yɩ sʋ̀ràn tə mama, ʋ nə dí yáá ʋ swɩ̀n ʋ zɩgɩ Babɩlɔnə nə, ʋ ga pa ba pʋ́pʋ́nɩ́ tə, ba kə sagɩ wa. 61 Zweremi swɩ̀n Seraya con, ʋ wʋ́: «Máŋá tə n nə yí Babɩlɔnə, sə n kə dɩ̀àn n kàrɩ̀ sʋ̀ràn tə tə mama, 62 n ga swɩ̀n, n wʋ́: “Ba-Yígúrə́-Jə-Tiu, n mʋ̀ tətə nə swɩ̀n bwálɩ́ kʋ tə yoo, də n wá cʋ̀gʋ̀ kʋ mɩ́ámɩ́án, sə ləzwənə, nə à yə̀ə́ vànɩ́ kʋ́ʋ̀ dàn ká ya kʋ wa, yá kʋ dàń wá cʋ̀gʋ̀ mɩ́ámɩ́án, máŋá mama wuuu.” 63 Yá n nə kàrɩ̀ sagɩ kʋ tə, n zwɛ̀ kwa nə, n wá vwa kʋ kapan nə, n dɩ Əfəratə mʋnaa tə titəŋi wa, 64 n ga swɩ̀n, n wʋ́: “Mə nətən nə Babɩlɔnə wá jɛ́n, yá kʋ kʋ́ʋ̀ bá pìí kʋ nan lɛɛ tə wa, à nə wá kə kʋ nə.” Ba dɩ̀àn wá zwɛ̀, ba ga tʋ.»
Mə Zweremi sʋ̀ràn tə máŋá nə yəbə.