Babɩlɔnə tʋrɩ, də Yɩzərayɛlə ka tɩnɩ ka tɩ̀àn yoo
50
1 Nə̀ń sʋgʋ tə Ba-Yígúrə́-Jə-Tiu nə pɩn ʋ nii sʋ̀sʋ̀nʋ̀ Zweremi swɩ̀n Babɩlɔnə tɩʋ tə yuu wa, də Kaləde tɩ̀án lʋʋ nii tə yuu wa. Ʋ swɩ̀n ʋ wʋ́:á pɩan ba nì tə,
Á zɩan dɩrapo yɩɩ nə, á ma bɩrɩ kʋ!
Á pɩan ba nì kʋ, á dànà ká səgə kʋ!
Á swɩ̀án də ba ta Babɩlɔnə ba də́!
Cavɩra zʋa kʋ kapana ciciri tə,
fən bɛlʋ kʋ woŋwanan tə!
Cavɩra zʋa woŋwanʋ Bɛlə,
fən bɛlʋ woŋwanʋ Merodakə!
3 Cɩ́gá, dwíí don nan jɩzən saparʋ con,
ba bɩ̀àn kʋ nə.
Ba wá cʋ̀gʋ̀ kʋ lʋʋ nii tə mɩ́ámɩ́án,
lìù kʋ́ʋ̀ ba ya kʋ wa.
Ləzoni tə də vàná tə mama wá ywan.
4 Dɩan təntə nə yí máŋá tə wa,
Yɩzərayɛlə də Zwida lʋʋ lɩ̀à tə wá pìí
ba twá duən ba bà.
Ba-Yígúrə́-Jə-Tiu nii sʋgʋ nə!
Ba wá vəli də ba kwi,
ba ma pɩ̀à Ba-Yígúrə́-Jə-Tiu, ba Yɩɩ tə.
5 Ba wá bwe Siyon cwəŋə nə,
ba ga viviri ba yáá ba te kʋ con.
Ba wá bà, ba vwa ba tɩ̀àn Ba-Yígúrə́-Jə-Tiu nə,
kʋ ga wá ya nimarʋ máŋá mama wuuu,
ba nə bá swɛ̀ kʋ yoo də mama.
6 À lɩ̀à tə yà yɩ ndə pee nə, tə nə jɛ́n.
Ba payɩra tə yà dʋgʋ ba,
ba pa ba ywaŋa pɛɛn yuu wa.
Ba yàá nan paan yuu wa,
ba va ka don yuu wa,
ba ga swɛ̀ɛ́ ba sìə́ bwálɩ́ tə yoo.
7 Lɩ̀à tə mama ba nə nɩ ba, yàá lìrə̀ ba,
yá ba jarɩduən yàá swɩ̀n, ba wʋ́:
“Nə wà yolwan tʋn!
Cɩ́gá, ba mʋ̀ nə tʋn cʋna
ba zɩgɩ Ba-Yígúrə́-Jə-Tiu nə,
ʋ nə yɩ cɩ́gá tíú,
ʋ ga yɩ ba nɩbara-ba yala.”
8 Á dərə á nan Babɩlɔnə wa,
á naŋa á yá Kaləde tɩ̀án lʋʋ nii tə,
á ga ya ndə bʋtɩlan nə,
tə nə wulə vanmɩnɩ yáá!
9 Cɩ́gá, à tətə wá pa dwíə́ nəfaran kə nimarʋ,
ba nan jɩzən saparʋ con lʋʋ nii tə wa,
ba bà ba ta Babɩlɔnə.
Ba wá tɩɩn duən nə, ba ta kʋ̀ʋ̀ də Babɩlɔnə,
yá ba wá ta kʋ ba də́.
Ba cɩan yɩ ndə kwatarʋ babɩʋ cɩan nə,
ʋ nə ba pìí ʋ twi də jɩkʋrɩkɛ.
10 Ba wá vɩrɩ Kaləde lʋʋ nii tə wiən,
yá lɩ̀à tə mama nə wá vɩrɩ kʋ, wá sú.
Ba-Yígúrə́-Jə-Tiu nii sʋgʋ nə!
11 Ɔɔn, á fwa pupwən, á ga jwɛ,
á mʋ̀ lɩ̀à tə, á nə vɩrɩ à lɩ̀à tə!
Ɔɔn, á faŋa ndə nacɩɩn nə gaʋ wa.
Á sɩsɩan ndə səsen nə, tə nə jə dɩ̀àn!
12 Cavɩra nəfarʋ yí á nuu tə,
kan tə ʋ nə lɩrɩ aba, wulə pucʋnɩ wa.
Nə̀ń kʋ nə, kʋ jìgə̀ talɩkwa, lʋʋ dwíə́ tə wa:
Kʋ yɩ kasɔɔ lanworu, tɩkʋrʋ, də digə.»
13 Ba-Yígúrə́-Jə-Tiu lɩŋa tə yɩrɩ,
lìù kʋ́ʋ̀ bá ya kʋ wa,
kʋ mama wá cʋ̀gʋ̀ mɩ́ámɩ́án.
Lìù mama nə twá kʋ nii nə, ʋ kɛ̀ń,
kʋ wá gwárɩ́ wá, ʋ ga cʋcwɩ,
cʋcʋran tə mama yɩrɩ, tə nə yí kʋ.
14 Á mʋ̀ lɩ̀à tə mama nə tɛ twan,
á bɩ̀án á tɩɩn duən nə,
á kɩkarɩ Babɩlɔnə, á ta kʋ.
Á tɛga kʋ, á dànà ká pa cɩan ga á cwan wa!
Cɩ́gá, Babɩlɔnə tʋn cʋna,
kʋ zɩgɩ Ba-Yígúrə́-Jə-Tiu nə.
15 Á maga kʋ̀ʋ̀ cə̀rí tɩa mama, á kɩkarɩ kʋ!
Kʋ pɩn kʋ tɩ̀àn,
kʋ ywəŋə tə buburi duən yuu,
ba gwɛrɩ kʋ biritaŋʋ tə.
Cɩ́gá, Ba-Yígúrə́-Jə-Tiu nə fwi ʋ lɩŋa.
Á fwiə á lɩŋa kʋ yuu wa!
Á ŋwɩ́án kʋ tə, kʋ nə tʋn jɩŋɩ kʋ yɩra.
16 Á lɩa lìù tə nə dwì wiən Babɩlɔnə wa,
də lìù tə nə dèrì də sɩkwara, woceri máŋá wa!
Lìù mama dəri lagʋrɩ sɩ̀ʋ́ tə yáá nə,
ʋ va ʋ dwíí lɩ̀à con,
lìù mama dəri ʋ va ʋ lʋʋ nii wa.
17 Yɩzərayɛlə yɩ ndə piə nə, ka nə jɛ́n,
gərən nə dɩŋɩ sə tə ja.
Asiiri pɩ̀ʋ́ tə nə yɩn təntən, ʋ də́ ka.
Yá talɩkwa lìù tə nə kɛ́n ka kurən,
nə yɩ Babɩlɔnə pɩ̀ʋ́ Nebukadənezarə.
18 Kʋ mʋ̀ nə pɩn Ba-Yígúrə́-Jə-Tiu,
kwatara Yɩɩ* tə nə yɩ Yɩzərayɛlə lɩ̀à Yɩɩ swɩ̀n, ʋ wʋ́:
«Nə̀ń, à wá zàn à zɩgɩ Babɩlɔnə pɩ̀ʋ́ də ʋ lʋʋ nii tə nə,
ndə à nə zàn à zɩgɩ Asiiri pɩ̀ʋ́ nə nətʋ.
19 À wá pa Yɩzərayɛlə lɩ̀à pìí ba va ba bwálɩ́ nə.
Ba wá pìí ba tɩnɩ Karəmɛlə də Baswan gaʋ tə,
ba ga wá də́ ba sú,
Efərayimə pɛɛn nagwanaa tə wa,
də Galadə nagwanaa tə wa.
20 Dɩan təntə nə yí máŋá tə wa,
ba wá pɩ̀à Yɩzərayɛlə lɩ̀à yolwan,
yá ba bá na kʋ.
Ba wá pɩ̀à Zwida lʋʋ lɩ̀à cʋna,
yá ba bá na tə.
Cɩ́gá, à wá kwɛn ba gɩganɩ* tə,
à nə yá cʋna à lɩ, à də ba pwə́rə́ wa.
À mʋ̀ Ba-Yígúrə́-Jə-Tiu nii sʋgʋ nə!
21 Vəli n ta Meratayimə lʋʋ nii tə,
vəli n ta kʋ də Pekodə tɩ̀án!
Gʋ ba gɩganɩ tə mama mɩ́ámɩ́án*,
n ma pa nə dun.
À mʋ̀ Ba-Yígúrə́-Jə-Tiu nii sʋgʋ nə!
Tʋn kʋ tə mama,
à nə pɩn mʋ́ nii kʋ yuu wa!
22 Kʋ yɩ kʋ̀ʋ̀ cə̀rí lʋʋ nii tə wa,
yá kʋ yɩ cʋcʋran nəfarʋ!
23 Kʋ tà cɩ́gá!
Hama tə nə lwe tɩa tə mama,
pʋpʋgʋ, kʋ nyʋnyʋgʋ!
Kʋ tà cɩ́gá!
Babɩlɔnə cʋ̀gʋ̀ mɩ́ámɩ́án, lʋʋ dwíə́ tə wa!
24 À ken nyalɩ n nɛɛ də̀ń nə,
yá kʋ jɩn mʋ́ də n yəri, Babɩlɔnə!
Ba nɩ mʋ́ ba ja,
n nə tɛ n zɩga à mʋ̀ Ba-Yígúrə́-Jə-Tiu nə yɩrɩ.»
25 Ba-Yígúrə́-Jə-Tiu súrí ʋ kwatarɩ zɩla bwálɩ́ tə nii,
yá ʋ van ʋ lɩŋa tə nə fʋrɩ kwatarɩ zɩla tə, ʋ lɩ.
Cɩ́gá, Ba-Yígúrə́-Jə-Tiu, ʋ nə yɩ kwatara Yɩɩ
tʋtʋŋɩ wulə Kaləde tɩ̀án lʋʋ nii tə wa.
26 Á naŋa lʋʋ nii yígúrə́ wa, á bà kʋ nə!
Á súrə́ kʋ pulən tə!
Á pwíə́ kʋ duən yuu, ndə wogugunə nə!
Á cʋga kʋ mama mɩ́ámɩ́án, á ma pa nə dun,
á dànà ká pa won mama ga kʋ wa!
27 Á jana kʋ nàtànɩ́a tə mama,
á va nangʋra bwálɩ́ nə, á gʋ!
Nə̀ń kʋ lɛɛ nyɩɛn kʋ pa ba nʋ̀ʋ̀!
Cɩ́gá, ba dɩɩn nan, máŋá yí sə à zɩgɩ ba nə.
28 Á cʋga! Kʋ yɩ lɩ̀à tə nə dəri,
də ba tə nə wànɩ́ ba ja ba mɩɩ ba dəri
ba jɛ́n Babɩlɔnə lʋʋ nii tə wa, bubwiə.
Ba mʋ̀ nə ja ŋwɛn ba bɩ̀àn,
sə ba swɩ̀n, ba bɩrɩ Siyon* tɩʋ tə wa,
də Ba-Yígúrə́-Jə-Tiu, nə tíú Yɩɩ fwi ʋ lɩŋa,
ʋ fwi lɩŋa ʋ dìə̀ tə yɩrɩ!
29 Á boŋə twan tárá, á kə Babɩlɔnə tɩ̀án nə,
ba mʋ̀ lɩ̀à tə mama nə vaŋa twan ba dɩ̀!
Á pwíə́ tɩʋ tə á kə,
á dànà ká yá á pa lìù mama dəri ʋ jɛ́n!
Á ŋwɩ́án kʋ tʋtʋnɛɛ tə jɩŋɩ kʋ yɩra,
á tʋŋa kʋ tə mama, kʋ nə tʋn tɩan duən yɩra, kʋ də yɩra!
Cɩ́gá, kʋ jɩn yigwənə Ba-Yígúrə́-Jə-Tiu yáá con,
Yɩzərayɛlə lɩ̀à Yɩɩ tə, ʋ nə yɩ parɩ*.
30 Kʋ mʋ̀ nə pɩn, kʋ ləzwəndʋn tə mama wa tʋ kʋ kanpwərən tə wa, yá kʋ kwatara tə mama wá nyʋn lá, kʋ dɩɩn tə nə. Ba-Yígúrə́-Jə-Tiu nii sʋgʋ nə!
31 Nə̀ń, à panɩ n nə, yigwənə tíú!
Yuu-Tiu Ba-Yígúrə́-Jə-Tiu,
ʋ nə yɩ kwatara Yɩɩ nii sʋgʋ nə!
Cɩ́gá, n dɩɩn nan, máŋá yí sə à zɩgɩ n nə.
32 Yigwənə tíú tə wá mà ʋ naa, ʋ tʋ,
yá lìù mama ba ja wá, ʋ zɩ̀n.
À wá sʋ̀rɩ́ mən ʋ tɩfaran tə nə,
yá tə wá də́ tə nii tɩbii tə mama.
33 Nə̀ń kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n:
«Ba fɩfɩn Yɩzərayɛlə də Zwida lʋʋ lɩ̀à mɛ.
Lɩ̀à tə mama nə jɩn ba ba va yongaʋ,
kán ba nə, ba ga vɩ sə ba dʋgʋ ba.
34 Yá ba jonu* tə jə dɩ̀àn,
ʋ yɩrɩ nə Yuu-Tiu Ba-Yígúrə́-Jə-Tiu,
ʋ yɩ kwatara Yɩɩ.
Ʋ joŋə ba yuu kʋ̀ʋ̀ ʋ tɛ,
sə ʋ pa sìə́ ya lʋʋ nii tə wa,
ʋ ga pa Babɩlɔnə tɩ̀án vɩvaga.»
Ba-Yígúrə́-Jə-Tiu tanɩ tana, ʋ zɩgɩ Babɩlɔnə nə
35 Kwatara sɩ̀ʋ́ tʋa Kaləde tɩ̀án tə wa!
Kʋ tʋa Babɩlɔnə tɩ̀án tə wa,
ba də ba tʋ̀tʋ̀nán yun tɩ̀án, də ba wʋbʋnyɩna!
Ba-Yígúrə́-Jə-Tiu nii sʋgʋ nə!
36 Kwatara sɩ̀ʋ́ tʋ ba vʋra tə wa,
sə kʋ pa ba swɩ̀n sʋvɛɛ!
Kwatara sɩ̀ʋ́ tʋ ba kwatara babɩran tə wa,
sə kʋ pa bɩcapuri zʋ ba!
37 Kwatara sɩ̀ʋ́ tʋ ba səsen tə, də ba səsen kòrə̀n tə wa,
də dwíə́ yiri duən tə mama wa,
ba nə wulə Babɩlɔnə tɩʋ tə wa!
Ba jiə labwana, ndə kana nə!
Kwatara sɩ̀ʋ́ tʋ ba jɩjə wiən tə wa,
sə kʋ pa dʋŋa vɩrɩ tə!
38 Dwakʋrɩ tʋ ba buun tə wa,
sə kʋ pa tə wʋ!
Cɩ́gá, kʋ yɩ woŋwanan lʋʋ nii,
yá ba wolwana tə pɩn ba swɩ̀n sʋvɛɛ.
39 Kʋ mʋ̀ nə pɩn, cirəkuri də buyurən nə wá ya lá,
yá tɛɛtɛɛ wá ja kʋ tə fwa tə yipaa bwálɩ́.
Lìù kʋ́ʋ̀ ba ya kʋ wa mɩ́ámɩ́án,
yá máŋá də máŋá mama wuuu,
lìù kʋ́ʋ̀ ba ya lá də mama.
40 Kʋ wá ya ndə Sodɔmə də Gomɔrə, də tə nii tɩan tə nə,
Yɩɩ nə buburi duən yuu.
Ba-Yígúrə́-Jə-Tiu nii sʋgʋ nə!
Lìù mama kʋ́ʋ̀ ba ya kʋ wa,
ləzwənə mama kʋ́ʋ̀ ba jə̀ń lá.
41 Lalʋʋ don nan jɩzən saparʋ con, kʋ bɩ̀àn,
kʋ yɩ dwíí nəfarʋ, də pɛ̀gá ba nə jə dɩ̀àn,
nə zàn lʋʋ nii yígúrə́ con, ba bɩ̀àn.
42 Ba zɩ̀n ba twɛn də ba cwiən yɩɩ nə,
ba ma maŋa babarɩ.
Ba yɩ wʋlʋnyɩna, ba ba ləzwənə yinəŋə dəri.
Ba zizigu yɩ ndə mʋʋ nə fʋrɩ.
Ba dɩ̀gà səsen,
ba tɩn duən nə, ndə ləzwəndʋa nə,
sə ba ta kʋ̀ʋ̀ də n mʋ̀ Babɩlɔnə tɩzəŋu tə!
43 Babɩlɔnə pɩ̀ʋ́ nì ŋwɛn tə,
yá ʋ jɩ̀àn gwàrɩ̀,
kʋ ga jì twara kʋ pa wá,
ndə kan nə, ʋ pùə́ nə yɩ̀ sə ʋ lɩra.
44 N nə yə̀ə́ gəru nə nyɩ́n kʋ nan
Zʋrədɛn mʋnaa tə nii tuni wa,
kʋ va vàná gaʋ wa, vàná nə ba lá kwɛ̀,
mə nətʋ nə, à wá pa Babɩlɔnə tɩ̀án mɛ dəri ba yá kʋ,
ndə yii nə púə́ kʋ ga súrí nə.
Yá kʋ kwa nə, à dàń wá tún pɩ̀ʋ́ tə
à nə kúrí, Babɩlɔnə wa.
Cɩ́gá, wàà nə yɩ ndə à nə?
Wàà nə wàá ʋ pɩn à túŋə́ à nii?
Yáá tíú wàà nə wàá à yáá nə ʋ zɩga,
ndə payɩrʋ nə gəru yáá con?»
45 Kʋ mʋ̀ yɩrɩ, á cʋga yoo tə,
Ba-Yígúrə́-Jə-Tiu nə tanɩ,
sə ʋ tʋn Babɩlɔnə yɩra,
də pubʋŋa tə ʋ nə ja zɩga
Kaləde tɩ̀án lʋʋ nii tə nə!
Cɩ́gá mama, ba wá tùrì ba tɩa ndə pəbii nə,
ba ga cʋ̀gʋ̀ ba lʋʋ nii tə nə yɩ ndə vàná gaʋ,
kʋ ba tʋ́tʋ̀ná.
46 Babɩlɔnə tʋrɩ tə zizigu pɩn tɩa tə vuvugu,
lɩ̀à ga mà pupwən cə̀rí lʋʋ dwíə́ tə wa.