Yɩɩ sʋgʋ tə nə zɩga Amon dwíí tə nə
49
1 Nə̀ń kʋ tə Ba-Yígúrə́-Jə-Tiu nə swɩ̀n Amon dwíí tə yuu wa:«Yɩzərayɛlə lɩ̀à ba bɩ̀á jə naaa?
Ba ba dwíí jə sə ba tɩnɩ Yɩzərayɛlə tɩan tə naaa?
Bɛ̀ɛ̀ dàń nə pɩn woŋwanʋ Molɔkə ma jon Gadə nagwanaa tə?
Bɛ̀ɛ̀ nə pɩn Amon dwíí tə ma wulə Yɩzərayɛlə tɩan tə wa?
2 Kʋ mʋ̀ nə pɩn, máŋá bɩ̀àn,
à nə wá pa ba nì kʋ̀ʋ̀ cə̀rə́ Raba wa,
kʋ nə yɩ Amon dwíí tə patɩʋ.
À mʋ̀ Ba-Yígúrə́-Jə-Tiu nii sʋgʋ nə!
Raba wá jì dibwərən dədolu,
yá kʋ nii tɩbii tə wá də́ mən.
Yá Yɩzərayɛlə lɩ̀à dàń wá pìí ba jon
kʋ tə yà nə yɩ ba mʋ̀ nyiən.»
Ba-Yígúrə́-Jə-Tiu nə swɩ̀n kʋ.
3 Á bubwiə, Ɛswəbon tɩ̀án-ba!
Cɩ́gá, Ayi tɩʋ tə cʋ̀gʋ̀!
Á kwíə́, Raba nii tɩbii tɩ̀án-ba,
á zwɩa pucʋnɩ gànàn,
á ga nun lúə́ gwaran,
á ja twá lá á ywan biritaŋʋ tə wa!
Woŋwanʋ Molɔkə vələ yongaʋ,
kʋ də kʋ joŋwana tə, də kʋ pàbɩ̀á tə.
4 Bɛ̀ɛ̀ nə pɩn á bwɩ á tɩ̀án nə, á varɩnɛɛ tə yɩrɩ?
Á vara tə jə jɩjə wiən,
yá á jələ tə yuu wa,
á mʋ̀ dwíí tə nə yɩ zɩbanənyɩna.
Á swɩ̀n, á wʋ́:
«Wàà nə wá dídə́n sə ʋ bà ʋ ta nəba?»
5 Ba-Yígúrə́-Jə-Tiu swɩ̀n, ʋ wʋ́:
«Nə̀ń, à pɩn bɩcapuri naŋa tɩan tə mama wa,
tə nə kɩkarɩ mʋ́, tə bɩ̀àn á nə!
À mʋ̀ Yuu-Tiu Ba-Yígúrə́-Jə-Tiu,
à nə yɩ kwatara Yɩɩ nii sʋgʋ nə!
À wá dɩŋa aba à lɩ,
à pa á lìù mama va ʋ gayaa,
yá lìù bá ya lá sə ʋ ja lɩ̀à tə nə dəri,
ʋ bà duən yáá nə.
6 Yá kʋ kwa nə,
à wá pa Amon dwíí ywə́ŋə́ tə pìí ba bà.
Ba-Yígúrə́-Jə-Tiu nii sʋgʋ nə!
Yɩɩ sʋgʋ tə nə zɩga Edomə tɩ̀án nə
7 Nə̀ń kʋ tə Ba-Yígúrə́-Jə-Tiu,
ʋ nə yɩ kwatara yɩɩ nə swɩ̀n Edomə tɩ̀án yuu wa:
«Wʋbʋŋa kʋ́ʋ̀ tə̀lə́ Teman tɩʋ tə wa naaa?
Kwìə̀ jɛ́n yənu tɩ̀án tə con naaa?
Ba wʋbʋŋa tə gugurə naaa?
8 Á pìrə́, á dərə,
á dərə á zʋ á səgə pɛɛn bʋran wa,
Dedan tɩ̀án-ba!
Cɩ́gá, à pɩn cʋcʋran bɩ̀àn Ezayu dwíí tə yuu wa,
máŋá yí sə à zɩgɩ ba nə.
9 Lɩ̀à tə nə pʋ̀rɩ́ divɛn tɩ̀án lənə
nə zʋa n divɛn tɩ̀án kárá wa,
ba bá yá wogunə.
Yá ŋwɩna nə zʋa tɩtɩn nə,
ba wá cʋ̀gʋ̀ cʋcʋran ba dɩ̀àn máŋá.
10 Cɩ́gá, à mʋ̀ nə wá vɩrɩ Ezayu dwíí tə,
à wá lɩ ba jɩjə wiən tə nə səgə, à kə poni nə,
yá ba kʋ́ʋ̀ bá wànɩ́ ba səgə tə.
À wá pa dʋŋa cʋ̀gʋ̀ Ezayu dwíí tə,
də ba nubɩa tə, də ba jənduən tə,
yá lìù kʋ́ʋ̀ bá ya lá
11 sə ʋ swɩ̀n ʋ wʋ́:
“Á yágá á bitara tə sə à ywàń ba yuu,
sə ba mɩɩ ya lʋʋ wa,
sə á kadənə tə ga jələ à yuu wa.”»
12 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n:
«Nə̀ń, bʋra jɩn lɩ̀à tə ba yà nə wà mɛ sə ba nyʋn à lɩŋa tə, ndə wùrú zʋŋa wa won nə, yá sɩ́ʋ́n nə, ba də dàń wá nyʋn tə. Yá á mʋ̀ Edomə tɩ̀án dàń bʋŋa də à wá jələ aba ndə lɩ̀à nə, ba nə wà yoo cʋ̀gʋ̀ naaa? Á də wá nyʋn à lɩŋa tə. 13 Cɩ́gá, à dùə̀ də à tətə! À mʋ̀ Ba-Yígúrə́-Jə-Tiu nii sʋgʋ nə! Bɔsəra wá cʋ̀gʋ̀ mɩ́ámɩ́án, kʋ jì dibwərən, də cavɩra, də zɩra bwálɩ́, yá kʋ nii tɩan tə mama wá jì dibwərən, máŋá mama wuuu.»
14 Ba-Yígúrə́-Jə-Tiu pɩn à nì ŋwɛn,
ʋ tʋn tʋntʋnʋ lʋʋ dwíə́ tə wa, ʋ wʋ́:
«Á bɩ̀án duən yáá! Á vələ á ta Edomə!
N jìgə̀ dwíí ba nə wá fʋfʋlɩ ləzoni wa.
16 N yɩrʋ tə də n bɩcan fwìə́ tə gɩgarɩ mʋ́ tə dʋgʋ,
n mʋ̀ dwíí tə nə wulə pɩ̀ràn kwə̀lə́ wa,
yá n larɩ n jon pɛɛn yuparɩ.
N nə swə n kə n pwalʋ pɛɛn yuparɩ wa,
baan baan ndə zənpuu nə,
à tə wá zɩgɩ lá nə, à yigu mʋ́ à dɩ tɩa.
Ba-Yígúrə́-Jə-Tiu nii sʋgʋ nə!
17 Edomə wá cʋ̀gʋ̀ mɩ́ámɩ́án. Lìù mama nə twá kʋ nii nə ʋ kɛ̀ń, kʋ wá gwárɩ́ wá, ʋ ga cʋcwɩ cʋcʋran tə mama yɩrɩ tə nə yí kʋ. 18 Edomə wá cʋ̀gʋ̀ ndə Sodɔmə, də Gomɔrə, də tə nii tɩan tə nə cʋ̀gʋ̀ nətʋ. Ba-Yígúrə́-Jə-Tiu nə swɩ̀n kʋ. Lìù mama kʋ́ʋ̀ ba ya kʋ wa, ləzwənə mama kʋ́ʋ̀ ba jə̀ń lá.
19 N nə yə̀ə́ gəru nə nyɩ́n kʋ nan
Zʋrədɛn mʋnaa tə nii tuni wa,
kʋ va vàná gaʋ wa, vàná nə ba lá kwɛ̀,
mə nətʋ nə à wá pa Edomə tɩ̀án mɛ dəri ba yá kʋ,
ndə yii nə púə́ kʋ ga súrí nə.
Yá kʋ kwa nə, à dàń wá tún pɩ̀ʋ́ tə
à nə kúrí, Edomə wa.
Cɩ́gá, wàà nə yɩ ndə à nə?
Wàà nə wàá ʋ pɩn à túŋə́ à nii?
Yáá tíú wàà nə wàá à yáá nə ʋ zɩga,
ndə payɩrʋ nə gəru yáá con?»
20 Kʋ mʋ̀ yɩrɩ, á cʋga yoo tə
Ba-Yígúrə́-Jə-Tiu nə tanɩ,
sə ʋ tʋn Edomə tɩ̀án yɩra,
də pubʋŋa tə ʋ nə ja zɩga Teman tɩ̀án nə!
Cɩ́gá mama, ba wá tùrì ba tɩa ndə pəbii nə,
ba ga cʋ̀gʋ̀ ba lʋʋ nii tə nə yɩ ndə vàná gaʋ nə,
kʋ ba tʋ́tʋ̀ná jə.
21 Ba tʋrɩ zizigu wá pa tɩa tə vuvugu,
ba bubwiə ga va ka nan Mɩncanɩ mʋʋ tə nə.
22 Dʋŋʋ tə yɩ ndə zənpuu nə, kʋ nə piri kʋ dɩ̀ baan, kʋ yɩyarɩ, kʋ ga larɩ kʋ vànà Bɔsəra yuu con. Kʋ dɩɩn tə nə, Edomə tɩ̀án babɩran tə bɩcan wá ya ndə kan bɩcan nə, ʋ pùə́ nə yɩ̀ sə ʋ lɩra.
Yɩɩ sʋgʋ tə nə zɩga Damasə tɩ̀án nə
23 Nə̀ń kʋ tə Ba-Yígúrə́-Jə-Tiu nə swɩ̀n Damasə tɩ̀án yuu wa:
«Cavɩra zʋa Hamatə də Arəpadə tɩ̀án.
Cɩ́gá, ba nì ŋwɛn kʋkwɩʋn,
yá ba vɩvaga ndə mʋʋ nə,
kʋ nə wàrɩ̀ sənbwen kʋ pə̀ní.
24 Damasə tɩ̀án jɩ̀àn gwàrɩ̀.
Ba viviri sə ba dəri,
yá vɩvagʋ zʋa ba.
Twara də càn yí ba,
ndə kan nə pɩ̀à sə ʋ lɩra.
25 Kʋ twá nətə ba ma vɩ kʋ ba dʋgʋ,
kʋ mʋ̀ tɩʋ tə nə yɩ à dun tɩʋ,
kʋ mʋ̀ tɩʋ tə nə yɩ à pupwən tɩʋ?
26 Mə kʋ wá twá nətʋ, kʋ ləzwəndʋn tə ma tʋ kʋ kanpwərən tə wa, kʋ kwatara tə mama ga nyʋn lá, kʋ dɩɩn tə nə. Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə! 27 À wá dɩ mən Damasə biritaŋʋ tə nə, yá tə wá də́ Bɛn-Hadadə padii tə.»
Yɩɩ sʋgʋ tə nə zɩga Arabə dwíə́ tə nə
28 Nə̀ń kʋ tə Ba-Yígúrə́-Jə-Tiu nə swɩ̀n Kedarə tɩʋ tə də Hasɔrə payun tə yuu wa, Babɩlɔnə pɩ̀ʋ́ Nebukadənezarə nə ta ʋ də́:
«Á zaŋa! Á vələ á ta Kedarə!
Á cʋga yɩɩ yipɩan con dwíə́!
29 Ba vɩra ba gansilə tə də ba vàná tə,
ba gansilə gantwɛn tə də ba tʋtʋnzɩla tə mama!
Ba joŋə ba nyʋgʋmɛ tə,
ba ga mà cə̀rí ba yuu wa,
ba swɩ̀n ba wʋ́: “Fən tɩa mama!”
30 Á dərə! Á zɩan á nɛɛ á dəri lala!
Á kwɩa bʋran á zʋ á səgə tə wa,
Hasɔrə tɩ̀án-ba!
À mʋ̀ Ba-Yígúrə́-Jə-Tiu nii sʋgʋ nə!
Babɩlɔnə pɩ̀ʋ́ Nebukadənezarə tanɩ
sə ʋ tʋn yoo á yɩra,
ʋ jə pubʋŋa yoo ʋ ja zɩga á nə.
31 Á zaŋa! Á vələ á ta dwíí tə nə wulə sìə́ wa,
won mama yoo nə ba ba wʋwalɩ!
Ba-Yígúrə́-Jə-Tiu nii sʋgʋ nə!
Ba tɩʋ tə wà lwè kʋ kɩkarɩ də biritaŋʋ,
kʋ ba mimii nii bòrù, nə à yə̀ə́ borusɔɔ jə,
yá ba yɩ ba wulə kwa con, ba cɩcɩ!
32 Ba wá vɩrɩ ba nyʋgʋmɛ tə,
yá ba vàná kapʋpʋ tə wá ya wiən,
dʋŋa nə ta ba jon kʋ̀ʋ̀ wa.
À wá cə̀rì ba, à laga vʋʋ mama wa,
ba mʋ̀ lɩ̀à tə nə fɩnɩ ba twanjərən,
yá à wá pa lɛɛ yí ba tɩa mama.
Ba-Yígúrə́-Jə-Tiu nii sʋgʋ nə!
33 Hasɔrə tɩʋ tə wá jì cirəkuri bwálɩ́,
kʋ wá cʋ̀gʋ̀ mɩ́ámɩ́án, máŋá mama wuuu.
Lìù mama kʋ́ʋ̀ bá ya kʋ wa,
ləzwənə mama kʋ́ʋ̀ bá jə̀ń lá.»
Yɩɩ sʋgʋ tə nə zɩga Elamə tɩ̀án nə
34 Nə̀ń sʋ̀ràn tə Ba-Yígúrə́-Jə-Tiu nə swɩ̀n Yɩɩ nii sʋ̀sʋ̀nʋ̀ Zweremi con, Elamə tɩʋ tə yuu wa, Zwida pɩ̀ʋ́ Sedekɩasə pàrɩ̀ tə sinti wa: 35 Nə̀ń kʋ tə Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n:
«À wá nyʋnyʋgʋ Elamə tɩ̀án twan tə,
ka mʋ̀ nə pɩn ba jə dɩ̀àn.
36 À wá pa vʋʋ yirə banɩa nan
lʋʋ sapara banɩa tə mama wa,
kʋ bà Elamə nə.
À wá cə̀rì ba, à laga vʋʋ təntə mama wa,
yá lʋʋ nii ba ya lá,
Elamə tɩ̀án nə bá va ba ya vərə,
ba twá ba jə̀ń lá.
37 À wá pa Elamə tɩ̀án vɩvaga ba dʋŋa yáá con,
də lɩ̀à tə nə pɩ̀à sə ba lɩ ba mɩɩ yáá con.
À wá pa lɛɛ tʋ ba yuu wa:
Tə mʋ̀ nə yɩ à lɩŋa tə nə pupwin.
Ba-Yígúrə́-Jə-Tiu nii sʋgʋ nə!
À wá kə kwatara sɩ̀ʋ́ ba kwa,
à kori à gʋ ba mama, à zwɛ̀ mɩ́ámɩ́án.
38 À wá tún à padaʋ tə Elamə wa,
yá à wá pa pɩ̀ʋ́ tə də tʋ̀tʋ̀nán yun tɩ̀án tə nyʋn lá.
Ba-Yígúrə́-Jə-Tiu nii sʋgʋ nə!
39 Yá máŋá tə wa ka nə bɩ̀àn,
à wá pa Elamə tɩ̀án tə,
ba nə ja va yongaʋ tə, pìí ba bà.»
Ba-Yígúrə́-Jə-Tiu nii sʋgʋ nə!