Yɩɩ sʋgʋ tə nə zɩga Mʋabə tɩ̀án nə
48
1 Nə̀ń sʋgʋ tə Ba-Yígúrə́-Jə-Tiu, kwatara Yɩɩ* tə nə yɩ Yɩzərayɛlə lɩ̀à Yɩɩ nə swɩ̀n, Mʋabə tɩ̀án yuu wa:«Lɛɛ yí Nebo tɩ̀án! Cɩ́gá, kʋ cʋ̀gʋ̀ mɩ́ámɩ́án!
Kiriyatayimə tɩʋ tə wulə cavɩra wa,
ba ta kʋ ba də́!
Misəgabə tɩʋ tə wulə cavɩra də jɩgwarʋ wa.
2 Mʋabə lʋʋ nii tə dun zwɛ̀.
Ɛswəbon tɩʋ tə wa, ba wulə ba vʋrɩ
lɛɛ tə yoo, tə nə wá yí Mʋabə tɩ̀án:
“Nə vələ nə pa kʋ jɛ́n lʋʋ dwíə́ tə titəŋi wa!”
N mʋ̀ Madəmɛn tɩʋ tə də wá nyʋn lá,
kwatara sɩ̀ʋ́ wulə n kwa.
3 Bubwiə naŋa Horonayimə tɩʋ tə wa nə,
ba bubwi ba wʋ́: “Cʋcʋran kapʋpʋ,
kʋ mama buburi duən yuu!”
4 Mʋabə lʋʋ nii tə lwə,
kʋ bɩ̀á bubwiə naŋa!
5 Cɩ́gá, ba kwi yinɩa ba ja dɩ̀ Luhitə cwəŋə dədolu tə,
yá ba nə zìní Horonayimə zizinu tə,
ba nì jɩgwarʋ də yinəgə kwirə,
ba nə kwi ba wʋ́:
6 “Á dərə, á joŋə á mɩɩ tə,
á ga ya ndə gaʋ bɩ̀nà nə, kasɔɔ lanworu wa!”
7 Cɩ́gá, n nə jələ n tʋ̀tʋ̀nán tə,
də n jɩjə wiən tə yuu wa yɩrɩ,
ba wá ja n də,
yá ba wá ja woŋwanʋ Kemoswə,
də kʋ joŋwana tə, də kʋ tʋ̀tʋ̀nán yun tɩ̀án tə,
ba va yongaʋ.
8 Cʋcʋnyiən tə wá zʋ tɩʋ mama wa,
yá tɩʋ nədʋ mama bá jɛ́n.
Vara tə wá kʋ̀, yá digə tə wá cʋ̀gʋ̀.»
Mə kʋ nə Ba-Yígúrə́-Jə-Tiu swɩ̀n.
9 Á pɩan vànà Mʋabə tɩ̀án nə,
sə ba piri ba jɛ́n!
Ba tɩan tə wá cʋ̀gʋ̀ mɩ́ámɩ́án,
lɩ̀à kʋ́ʋ̀ ba ya tə wa.
10 Zɩra wulə lìù tə yuu wa,
ʋ nə tʋŋa Ba-Yígúrə́-Jə-Tiu tʋtʋŋɩ tə də yasurə!
Zɩra wulə lìù tə yuu wa,
ʋ nə ba sɛ̀ sə jana tà ʋ kwatara sɩ̀ʋ́!
11 Mʋabə lʋʋ nii tə yà wulə sìə́ wa,
kʋ nə zɩgɩ kʋ zandʋan mama.
Kʋ yà sìí kʋ dəkuu bwálɩ́ wa,
ndə divɛn nə tígə́ kʋ də̀ń durən yuu.
Kʋ wà yɩn ndə kwarɩ waa won nə,
ba nə lwá ba kə kʋ don wa,
ba wà kʋ lɩ̀à ja va yongaʋ.
Kʋ nətʋ tə dàń pɩn, kʋ ywánɩ́ tə mɛn lá,
yà kʋ lwán tə də wà lwàń.
12 Kʋ mʋ̀ nə pɩn dɩan bɩ̀àn,
à nə wá tʋn lɩ̀à, à pa ba lwá ba.
Ba wá kɩrɩ ba kwara tə,
ba ga lwa ba wùrə́n tə.
Ba-Yígúrə́-Jə-Tiu nii sʋgʋ nə!
13 Woŋwanʋ Kemoswə cavɩra wá ja Mʋabə tɩ̀án,
ndə woŋwanʋ tə yà nə wulə Betɛləa nə,
cavɩra nə jɩn Yɩzərayɛlə lɩ̀à nətʋ,
kʋ yà nə yɩ won, ba nə jə kʋ dɩ̀àn.
14 Mʋabə tɩ̀án-ba,
á fwa nətə á ma swɩ̀n, á wʋ́:
«Nə yɩ kwatara babɩran,
bara, ba nə tanɩ sə ba ta kʋ̀ʋ̀?»
15 Mʋabə lʋʋ nii tə cʋ̀gʋ̀,
kʋ tɩfaran tə mən ŋwɩn dɩ̀ yɩɩ.
Dʋŋa ja kʋ ləzwəndʋn tə wa babɩran tə,
ba vələ nangʋra sàń.
Pɩ̀ʋ́ tə ʋ yɩrɩ nə yɩ Ba-Yígúrə́-Jə-Tiu,
ʋ nə yɩ kwatara Yɩɩ nii sʋgʋ nə!
16 Mʋabə lʋʋ nii tə cʋna máŋá yí,
lɛɛ bɩbarɩ tə bɩ̀àn kʋ nə.
17 Á kənə kʋ pupuə,
á mʋ̀ dwíə́ tə mama nə kɩkarɩ kʋ,
á mʋ̀ tə mama nə yə̀ə́ kʋ yɩrɩ!
Á swɩan, á wʋ́: «Kʋ yɩ kʋ twá nətə,
kʋ mʋ̀ pɛ̀gá dɩ̀àn dafɩla tə ma nyʋnyʋgʋ,
kʋ mʋ̀ dafɩla tə nə jə dun?»
18 Zaŋa á dun tə yuu,
á cú á jə̀ń tɩpɩrɩ wa,
Dibon tɩ̀án-ba!
Cɩ́gá, cʋcʋnyiən tə nə cʋ̀gʋ̀ Mʋabə, bɩ̀àn á də nə,
ʋ wá cʋ̀gʋ̀ á dɩ̀àn dəkuu bwálá tə.
19 Zɩga cwəŋə yuu, á pàlɩ̀,
Arɔwɛrə tɩ̀án-ba!
Á bwiə ba tə nə dəri,
də ba tə nə dəri ba jon ba mɩɩ,
á jə́n kʋ yɩ bɛ̀ɛ̀?
20 Ba wá le aba, də kʋ yɩ cavɩra
də jɩgwarʋ nə yí Mʋabə tɩ̀án!
Á bubwiə, á maga cə̀rí!
Á bwərə Arənon nacoru tə nii nə,
á swɩ̀n də Mʋabə cʋ̀gʋ̀!
21 Ba-Yígúrə́-Jə-Tiu bʋra jɩn digə yuu lʋʋ nii tə, də Holon, də Yahatə, də Mefatə tɩan tə, 22 də Dibon, də Nebo, də Bɛtə-Dibəlatayimə tɩan tə, 23 də Kiriyatayimə, də Bɛtə-Gamulə, də Bɛtə-Mewon tɩan tə, 24 də Keriyɔtə, də Bɔsəra, də Mʋabə lʋʋ nii tɩan tə mama, tə tə nə ŋʋ́ná, də tə tə nə bwə́lə́.
25 Mʋabə lʋʋ nii tə dɩ̀àn zwɛ̀,
kʋ vànà kɛ́n.
Ba-Yígúrə́-Jə-Tiu nii sʋgʋ nə!
26 Mʋabə tɩ̀án zàn ba zɩgɩ Ba-Yígúrə́-Jə-Tiu nə, kʋ mʋ̀ yɩrɩ, á nyɩan ba də sana, á pa ba sú, ba pə̀ń ba tʋtʋnan wa, ba tə̀gə̀, yá lɩ̀à dàń wá pwɛ́ ba də. 27 Mʋabə tɩ̀án-ba, á də yà wà Yɩzərayɛlə lɩ̀à pwɛ́ naaa? Á nɩ ba ŋwɩna wa naaa, á yà ma nə swɩ̀n ba yoo mama, kʋ yɩ á swɩ̀n də á kəni sisiu?
28 Mʋabə tɩ̀án-ba, á naŋa á yá tɩan tə,
á ga va á ya pɩ̀ràn kwə̀lə́ wa.
Á yana ndə gunpwənə nə,
ka nə sʋa ka pwalʋ bʋʋ nəfarʋ nii nə.
29 Nə nì Mʋabə tɩ̀án fwìə́ tə yoo:
Ba jə fwìə́ ba ja lɛ tɩa nə!
Ba jə yɩrʋ! Ba jə fwiə!
Ba swə ka bɩrɩ tɩ̀àn!
Ba swə fafalɩ sʋ̀ràn!
30 À də yə̀ə́ ba wʋliru tə, də ba sʋvɛɛ tə, də ba tʋtʋntaran tə yoo. Ba-Yígúrə́-Jə-Tiu nii sʋgʋ nə!
31 Kʋ mʋ̀ nə pɩn,
à ma dɩ lúə́ gwaran Mʋabə yɩrɩ,
à bubwi Mʋabə lʋʋ nii tə mama yɩrɩ,
à kwi à sisigə Kirə-Herɛsə tɩ̀án yɩrɩ.
32 Sibəma tɩ̀án divɛn tɩ̀án kárá, à kwi à pɩn mʋ́,
à doni Yazɛrə tɩ̀án nə kwi ba pa mʋ́.
N naywalan yà kɛ̀ń mʋʋ tə,
tə yà vəli tə yí Yazɛrə mʋʋ tə.
Yá cʋcʋnyiən tə zʋa ʋ cʋ̀gʋ̀ n kárɩ́ wiən tə,
də n divɛn tɩ̀án lənə tə.
33 Pupwən də jwɩa nyʋan tɩ̀án kárá tə,
də Mʋabə lʋʋ nii tə wa.
À pɩn divɛn wʋ divɛn gwàlán tə wa,
ba kʋ́ʋ̀ ba divɛn tɩ̀án bɩ̀á nɩŋɩ də pupwən cə̀rí.
Cə̀rí tə kʋ́ʋ̀ tà pupwən cə̀rí.
34 Ɛswəbon tɩ̀án bubwiə vəli ka nan Eleyale nə. Ba kori vəli kʋ yí Yahasə. Kʋ zɩgɩ Sʋarə nə, kʋ va kʋ yí Horonayimə də Egəlatə-Sweliswiya. Cɩ́gá, Nimərimə nɩ́á tə də tətə wá wʋ.
35 Lɩ̀à tə nə vəli jwəŋə dədwələn* yuu, ba sʋ̀rɩ́ jwəŋə də wusinə, ba pɩn Mʋabə tɩ̀án woŋwanʋ tə nə, à wá pa ba jɛ́n Mʋabə wa. Ba-Yígúrə́-Jə-Tiu nii sʋgʋ nə!
36 Kʋ mʋ̀ nə pɩn, à bɩcan wʋwanɩ ndə lúə́ wíí nə, Mʋabə lʋʋ nii tə yuu wa, yá à bɩcan wʋwanɩ ndə lúə́ wíí nə, Kirə-Herɛsə tɩ̀án yuu wa, jɩjə wiən tə ba nə tanɩ ba tún nə jìgə̀ bwàná yɩrɩ. 37 Cɩ́gá, lɩ̀à tə mama pàrɩ́ ba yun, ba ga fɩna ba twaŋa. Ba la gwɛɛn ba jɩ̀àn nə, ba ga vwa ganlwaran ba tàŋɩ́ nə. 38 Mʋabə tɩ̀án dəyun tə mama wa, də ba kanpwərən tə mama wa, kʋ yɩ lwíí ba kwi. Cɩ́gá, à lwə Mʋabə ndə won nə, kʋ nə kʋ́ʋ̀ ba funə jə. Ba-Yígúrə́-Jə-Tiu nii sʋgʋ nə! 39 Nə̀ń kʋ nə ken fən kʋ wa nətʋ! Á bubwiə! Nə̀ń Mʋabə tɩ̀án nə viviri ba kwa də cavɩra nətʋ! Mʋabə jìgə̀ won, kʋ jənduən mama pwɛ́, də ba ma swì lɩ̀à.
40 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n: «Dʋŋʋ tə yɩ ndə zənpuu nə, kʋ nə piri, kʋ yɩyarɩ, kʋ ga larɩ kʋ vànà Mʋabə lʋʋ nii tə yuu con.»
41 Dʋŋa jon Keriyɔtə tɩʋ tə,
ba ta dɩ̀àn dəkuu bwálá tə ba də́.
Yá Mʋabə tɩ̀án kwatara babɩran tə bɩcanɩ yɩ ndə kan pùə́ nə yɩ̀ sə ʋ lɩra bɩcan nə yàá yɩ nətʋ, kʋ dɩɩn təntə nə.
42 Mʋabə wá nyʋn lá,
kʋ kʋ́ʋ̀ ba ya lá ndə lʋʋ nii nə:
Cɩ́gá, kʋ bʋ́n də kʋ mʋ̀ nə dwə Ba-Yígúrə́-Jə-Tiu.
43 «Fən, də bʋʋ, də gəgəlu:
tə mʋ̀ wiən təntə mama yɩ á mʋ̀ nyiən,
Mʋabə tɩ̀án-ba!
Ba-Yígúrə́-Jə-Tiu nii sʋgʋ nə!
44 Lìù tə ʋ nə dəri fən tə yáá nə,
wá tʋ bʋʋ tə wa.
Ʋ nə pìí ʋ nan,
gəgəlu tə wá ja wá.
Cɩ́gá, à pɩn bɩnɩ bà ʋ yuu wa,
Mʋabə yuu wa, à nə wá fɩrɩ.
Ba-Yígúrə́-Jə-Tiu nii sʋgʋ nə!
45 Lɩ̀à tə nə dəri sə ba jon ba mɩɩ wá bà
sə ba kwálɩ́ ba yun Ɛswəbon nə,
ba nə gwarɩ yɩrɩ,
yá mən wá pwin tə nan tɩʋ tə wa,
Sihon padiə tə wa,
tə də́ ba mʋ̀ lɩ̀à tə nə swə jara lʋʋ nii tə,
kʋ nə zɩgɩ kʋ sɩswɩan nə,
kʋ va kʋ yí kʋ pɛɛn tə yuparɩ wa.
46 Nə̀ń kʋ lɛɛ nyɩɛn kʋ pa mʋ́ nʋ̀ʋ̀, Mʋabə!
Woŋwanʋ Kemɔswə lalʋʋ tə jɛ́n.
Cɩ́gá, ba jɩn n bɩ̀á də n bwɩ̀ɩ́ ba va yongaʋ.
47 Yá máŋá tə yígúrə́ wa,
à wá pa Mʋabə tɩ̀án tə nə yɩ ywə́ŋə́ pìí ba bà.»
Ba-Yígúrə́-Jə-Tiu nii sʋgʋ nə!
Mə yəbə nə kʋ tə Ba-Yígúrə́-Jə-Tiu nə swɩ̀n ʋ zɩgɩ Mʋabə nə gúrí.