Yɩɩ sʋgʋ tə nə zɩga Filisi tɩ̀án nə
47
1 Nə̀ń sʋgʋ tə Ba-Yígúrə́-Jə-Tiu nə swɩ̀n Yɩɩ nii sʋ̀sʋ̀nʋ̀ Zweremi con, Filisi tɩ̀án yuu wa, də Farawon tə wà ba tɩʋ Gaza tɛ.2 Nə̀ń kʋ tə Ba-Yígúrə́-Jə-Tiu nə swɩ̀n:
«Nɩ́á nə tə pwin tə nan jɩzən saparʋ con.
Tə jìgə̀ nacoru nəfarʋ,
tə piri lʋʋ nii tə,
də kʋ wa wiən tə mama yuu nə.
Tə púə́ tɩfaran tə, də tə wa lɩ̀à tə yuu nə.
Bara mà cə̀rí,
lʋʋ nii tə wa lɩ̀à tə mama bubwi.
3 Cɩ́gá, ba nə̀ń səsen napaŋɩ nə pə̀rɩ̀ tɩa,
də kʋ̀ʋ̀ səsen kòrə̀n zizigu,
tə nɛɛ nə wʋwaga.
Nyɩna-ba jɩ̀àn gwàrɩ̀,
kʋ pa ba yáá tə̀lə́ də ba bɩ̀á.
4 Cɩ́gá, dɩɩn bɩ̀àn,
Filisi lʋʋ nii tə mama nə wá cʋ̀gʋ̀,
ba wá gʋ lɩ̀à tə gɩganɩ tə mama,
ba yà nə wàá Tirə də Sidon tɩ̀án nə ba saŋa.
Cɩ́gá, Ba-Yígúrə́-Jə-Tiu wá cʋ̀gʋ̀ Filisi lʋʋ nii tə,
ʋ wá cʋ̀gʋ̀ ba mʋ̀ mʋʋ titəŋi wa lʋʋ nii tə,
ba nə boŋə Kafətɔrə, lɩ̀à tə gɩganɩ tə.
5 Gaza jìgə̀ puləpo,
Aswəkelon nyʋan lá.
Á mʋ̀ lɩ̀à tə nə ga ba vara tə wa,
á wá bɩ̀rɩ̀ á yɩra,
kʋ dán kʋ mɛ nətə?
6 “Aaa! Ba-Yígúrə́-Jə-Tiu kwatara sɩ̀ʋ́,
máŋá kwà wa nə, n wá zɩgɩ n sìí?
Zʋ n lɔ́ɔ́ wa,
zɩgɩ sənbwen, n ga kə sííí.”
7 Nətə nə kwatara sɩ̀ʋ́ təntə wá zɩgɩ kʋ sìí?
Ba-Yígúrə́-Jə-Tiu nə pɩn kʋ nii,
sə kʋ va Asəkalon,
də mʋʋ bibiru tə vàn con.
Mə lá nə ʋ te kʋ yáá, sə kʋ va.»