46
1 Nə̀ń sʋgʋ tə, Ba-Yígúrə́-Jə-Tiu nə swɩ̀n Yɩɩ nii sʋ̀sʋ̀nʋ̀ Zweremi con, lʋʋ dwíə́ tə yuu wa.Dʋŋa dí dɩ̀àn Ezwipətə tɩ̀án yuu wa
2 Ba-Yígúrə́-Jə-Tiu swɩ̀n sʋgʋ kʋ tə Ezwipətə tɩ̀án yuu wa. Ʋ swɩ̀n kʋ Ezwipətə pɩ̀ʋ́ Farawon Neko kwatara púlí tə yuu wa, ba yà nə wulə Əfəratə mʋnaa tə yuu wa, Karəkemiswə nə. Kʋ yɩn máŋá tə wa Babɩlɔnə pɩ̀ʋ́ Nebukadənezarə nə ta ba ʋ də́, Zwida pɩ̀ʋ́ Yehoyakimə, ʋ nə yɩ Zozɩasə bìú pàrɩ̀ tə banɩa nii bɩnɩ tə wa.
3 «Á tana nàtànɩ̀ nəmabii də nəfaran,
á ga fwarɩ á yí, á ta kʋ̀ʋ̀!
4 Á kənə səsen səsen kòrə̀n nə,
səsendɩra-ba, á dɩa á səsen yuu!
Á naŋa á zɩgɩ də á lugu yupurən!
Á tana á cwiən,
á zwɩa á kwatara lugu gànàn!»
5 Bɛ̀ɛ̀ nə pɩn à na ba də ba vɩvaga?
Ba wulə ba twəni ba kəni ba kwa!
Dʋŋa tɩtaga ba kwatara babɩran tə!
Ba wulə ba dəri,
ba dəri, ba ba viviri ba pàlɩ̀ ba kwa!
Kʋ yɩ fən tɩa mama,
Ba-Yígúrə́-Jə-Tiu nii sʋgʋ nə!
6 Lìù tə ʋ nɛɛ nə lɩŋa tɩa bá wànɩ́ ʋ dəri ʋ jɛ́n!
Ladɩa də bá jon ʋ tɩ̀àn!
Ba wá sɩ̀rɩ́ ba tʋ
Əfəratə mʋnaa tə bibiru nə, Jɩzən saparʋ con.
7 Wàà nə dɩ̀ ndə Nilə buu tə nə,
ndə mʋnɛɛ nə, tə nɩ́á nə pupwin?
8 Kʋ yɩ Ezwipətə nə dɩ̀ ndə Nilə buu tə nə,
kʋ nɩ́á ga pupwin ndə mʋnɛɛ nə.
Kʋ swɩ̀n, kʋ wʋ́:
«À wá dɩ̀ à sun tɩa tə yuu nə,
à pa tɩan tə də tə wa lɩ̀à tə mama nyʋn lá.
9 Səsen-ba, á vələ kʋ̀ʋ̀!
Á dərə ndə nyɩnyanan nə, səsen kòrə̀n-ba!
Kwatara babɩran-ba, á naŋa!
Kuswəa də Putə tɩ̀án kwatara babɩran tə,
ba nə yə̀ə́ nətʋ tə, ba nə ja nàtànà ba tɛ kʋ̀ʋ̀!
Də Ludə tɩ̀án kwatara babɩran tə,
ba nə yə̀ə́ nətʋ tə, ba nə vaŋa twan ba dɩ̀,
ba ma tɛ kʋ̀ʋ̀!
10 Dɩɩn təntə yɩ Yuu-Tiu Ba-Yígúrə́-Jə-Tiu,
ʋ nə yɩ kwatara Yɩɩ dɩɩn,
yá kʋ yɩ lɩŋa fwiu dɩɩn!
Ʋ wá fwi ʋ lɩŋa, ʋ dʋŋa yuu wa.
Kwatara sɩ̀ʋ́ wá də́ kʋ sú, ndə wojənkədiu nə,
kʋ ga nyʋn ba jana kʋ sú, kʋ bʋbʋnɩ.
Cɩ́gá, kʋ yɩ joŋi kʋ pa Yuu-Tiu Ba-Yígúrə́-Jə-Tiu nə, ʋ nə yɩ kwatara Yɩɩ,
jɩzən saparʋ yuu lʋʋ nii tə wa, Əfəratə mʋnaa tə nii nə!
11 Á vələ Galadə, á pɩ̀à nʋga ka nə ywarɩ,
Ezwipətə tɩ̀án-ba!
Á yɩ á man tɩa á pɩ̀à tɩ̀án, á súrí lá tʋtʋ,
kʋ nədʋ mama bá jon aba.
12 Lʋʋ dwíə́ tə nì á cavɩra tə yoo,
yá á bubwiə tə súə́ tɩa yuu mama.
Cɩ́gá, kwatarʋ babɩʋ titiri ʋ don nɛɛ nə,
ba mɛ bələ nan ba tʋ.
Dʋŋa púə́ Ezwipətə nə də kʋ̀ʋ̀
13 Ba-Yígúrə́-Jə-Tiu swɩ̀n sʋgʋ kʋ tə Yɩɩ nii sʋ̀sʋ̀nʋ̀ Zweremi con, ʋ bɩrɩ də Babɩlɔnə pɩ̀ʋ́ Nebukadənezarə bɩ̀àn sə ʋ ta Ezwipətə lʋʋ nii tə. Ʋ swɩ̀n, ʋ wʋ́:
14 «Swɩan ŋwɛn tə á bɩrɩ Ezwipətə lʋʋ nii tə wa,
pɩan ba nì kʋ Ezwipətə tɩan tə wa,
pɩan ba nì kʋ Migədolə wa,
pɩan ba nì kʋ Nofə də Tapanɛsə wa!
Á swɩan, á wʋ́: “Á tana á tɩ̀àn,
á nan á zɩgɩ kʋ̀ʋ̀ zɩgʋ!”
Cɩ́gá, kwatara sɩ̀ʋ́ wulə á jənduən kʋ də́!
15 Bɛ̀ɛ̀ nə pɩn n woŋwanʋ Apisəb ma tʋ?
Kʋ wàrɩ̀ kʋ ciŋi kʋ zɩga.
Cɩ́gá, Ba-Yígúrə́-Jə-Tiu bwɩn kʋ ʋ dɩ.
16 Ʋ pɩn kwatara kapʋpʋ mà ba nɛɛ,
ba tʋ duən yuu, yá ba swɩ̀n ba wʋ́:
“Nə zaŋa nə pìí nə va nə dwíí lɩ̀à con,
nə nyɩna tɩʋ wa,
sə nə ya yiŋʋnɩ, kwatara sɩ̀ʋ́ fɩfɩan yáá nə!”
17 Ba dɩga yɩrɩ ba pa Ezwipətə pɩ̀ʋ́ Farawon nə,
ba boŋə wá “Zəzəgu zənzən, yá tʋtʋŋɩ ba tʋŋa!”
18 À dùə̀, à wulə!
À mʋ̀ pɩ̀ʋ́ tə à yɩrɩ nə yɩ Ba-Yígúrə́-Jə-Tiu,
à nə yɩ kwatara Yɩɩ nii sʋgʋ nə!
N nə yə̀ə́ Tabɔrə paan tə nə wulə pɛɛn wa nətʋ,
yá Karəmɛlə paan tə vàn don ga zʋ mʋʋ tə wa nətʋ,
mə nətʋ nə dʋŋʋ tə də cɩ́gá wá bà.
19 Á kənə á zɩla sə ba ja aba ba va yongaʋ,
Ezwipətə tɩ̀án-ba!
Cɩ́gá, Nofə tɩʋ tə wá cʋ̀gʋ̀ mɩ́ámɩ́án,
ba wa sʋ̀rɩ́ kʋ, yá lìù kʋ́ʋ̀ ba ya kʋ wa.
20 Ezwipətə yɩ ndə nacɩɩn nə, kʋ nə jə fɩra,
Yá nanjwɩ tə nə dɩŋɩ vàná,
naŋa jɩzən saparʋ con, tə bɩ̀àn kʋ nə.
21 Kʋ kwatara vərə, ba nə tʋŋa sə ba ŋwɩ́n ba,
də wulə kʋ titəŋi wa,
ndə nabalɩ nə, ba nə kʋ̀nɩ̀ tə tún nʋga.
Yá ba də mama viviri ba dəri,
ba wà ciŋi ba zɩgɩ.
Cɩ́gá, cʋcʋran ka tʋ ba yuu wá dɩɩn tə yí,
máŋá yí sə à zɩgɩ ba nə.
22 Kʋ fʋrɩ ndə dən nə, kʋ nə dəri sə kʋ jɛ́n.
Cɩ́gá, dʋŋa bɩ̀àn də kwatara púlí,
ba bɩ̀àn kʋ nə də dèrə́,
ndə lɩ̀à nə, ba nə goŋi tɩ̀án.
23 Ba goŋi kʋ pún tə,
naa nə swə ka wàrɩ̀ kʋ wa ka nɩŋɩ də.
À mʋ̀ Ba-Yígúrə́-Jə-Tiu nii sʋgʋ nə!
Cɩ́gá, ba dáá ba doni kayɩra,
ba wàrɩ̀ ba gàlɩ̀.
24 Kʋ yɩ cavɩra kʋ pa Ezwipətə lʋʋ nii nəzəŋu tə nə,
jɩzən saparʋ con lalʋʋ tə jɩɩn zʋa kʋ.»
25 Ba-Yígúrə́-Jə-Tiu, kwatara Yɩɩ tə nə yɩ Yɩzərayɛlə lɩ̀à Yɩɩ swɩ̀n, ʋ wʋ́: «Nə̀ń, à wá zɩgɩ Tebɛsə tɩ̀án woŋwanʋ Amon nə, də Ezwipətə lʋʋ nii tə nə, də kʋ woŋwanan tə nə, də kʋ pɛ̀gá tə nə, də Farawon nə, də lɩ̀à tə nə, ba nə vwe ba tɩ̀àn ʋ yɩra. 26 À wá kə ba lɩ̀à tə jɩɩn wa, ba nə pɩ̀à sə ba lɩ ba mɩɩ. À wá kə ba Babɩlɔnə pɩ̀ʋ́ Nebukadənezarə, də ʋ tʋ̀tʋ̀nà tə jɩɩn wa.
Yá kʋ kwa nə, lɩ̀à kʋ́ʋ̀ wá ya Ezwipətə wa, ndə fuən tə nə.» Ba-Yígúrə́-Jə-Tiu nii sʋgʋ nə!
Yɩzərayɛlə lɩ̀à nɩ jonu
27 «Yá n mʋ̀, à tʋtʋnʋ Zwakɔbə,
dàn ká pa fən jə mʋ́,
dàn ká vɩvaga, Yɩzərayɛlə!
Cɩ́gá, nə̀ń à wá jon mʋ́ lʋʋ nii wa, kʋ nə ŋʋ́ná,
á ga jon n dwíí tə də lʋʋ nii tə wa, ba nə yɩ ywə́ŋə́.
Zwakɔbə wá pìí ʋ bà, ʋ ya sìə́ də yazurə wa,
yá lìù mama kʋ́ʋ̀ bá wʋwalɩ wá.
28 N mʋ̀, à tʋtʋnʋ Zwakɔbə,
dàn ká pa fən ja mʋ́.
À mʋ̀ Ba-Yígúrə́-Jə-Tiu nii sʋgʋ nə!
Cɩ́gá, à wulə də mʋ́.
À wá cʋ̀gʋ̀ lʋʋ dwíə́ tə mama mɩ́ámɩ́án,
à yà nə dɩŋɩ mʋ́ à kə ba wa,
yá n mʋ̀, à ba cʋ̀gʋ̀ mʋ́ abada!
À dàń nə wá pá mʋ́ à kə cwəŋə wa, ndə kʋ nə mɛ nətʋ,
à wàrɩ̀ mʋ́ à yá ndə lìù nə ʋ nə wà yoo cʋ̀gʋ̀.»