Ɛsədərasə
ZOROBABƐLƏ DƏ ZWIDA DWII TƏ PII BA NAN YONGAƲ BA BÀ
Sirusə pɩn nii, sə ywə́ŋə́ va ba lʋʋ
1
1 Pɛrəsə pɩ̀ʋ́ Sirusə pàrɩ̀ tə təntən bɩnɩ tə wa, Ba-Yígúrə́-Jə-Tiu tún cwəŋə, sə ʋ ma pa kʋ tə, ʋ nə twá də ʋ nii sʋ̀sʋ̀nʋ̀ Zweremi, ʋ swɩ̀n tə, nii sú. Ʋ ken Pɛrəsə pɩ̀ʋ́ Sirusə pubʋŋa wa, sə ʋ pa ba bòrì yoo kʋ tə, ba ga pʋ́pʋ́nɩ́ kʋ ba tún, ʋ payuu tə mama wa. 2 Nə̀ń kʋ tə, Pɛrəsə pɩ̀ʋ́ Sirusə nə swɩ̀n. Ʋ swɩ̀n, ʋ wʋ́: «Ba-Yígúrə́-Jə-Tiu, Yɩɩ tə, ʋ nə wulə lanworu wa, ken tɩa yuu payun tə mama, à jɩɩn wa. Yá ʋ dàń pɩn nə nii, sə à lwà dìə̀, à pa wá Zwerizalɛmə nə, kʋ nə wulə Zwida lʋʋ nii tə wa. 3 Á wa lìù tə mama, ʋ nə yɩ ʋ lɩ̀à tə wa lìù, ʋ Yɩɩ tə nə wá ya də wá, sə ʋ pìí ʋ va Zwerizalɛmə, kʋ nə wulə Zwida lʋʋ nii tə wa, ʋ lwà Yɩzərayɛlə lɩ̀à Yɩɩ, Ba-Yígúrə́-Jə-Tiu dìə̀ tə. Mə ʋ mʋ̀ nə yɩ Yɩɩ tə, ʋ nə wulə Zwerizalɛmə nə. 4 Bwálɩ́ tə mama wa, Yɩzərayɛlə lɩ̀à tə nə wulə, kʋ tɩ̀án mɛ, sə ba san ba də wárʋ́, də sɩ́án, də jɩjə wiən, də vàná, ba ga pa ba zìlə́ wiən, Yɩɩ dìə̀ tə yɩrɩ, ka nə wulə Zwerizalɛmə nə.Zwifə-ba tə kəni ba sírí, sə ba vìí
5 Zwida dwíí dìì tɩ̀án tə, də Bɛnzwamɛn dwíí dìì tɩ̀án tə, də Yɩɩ joŋwana tə, də Levi dwíí tə, də ba tə mama, Yɩɩ nə swɩ̀n ba pubʋŋa wa, dàń zàn, sə ba pìí ba va, ba lwà, Ba-Yígúrə́-Jə-Tiu dìə̀ tə, Zwerizalɛmə nə. 6 Ba jənduən tə mama san ba, də wárʋ́ tʋtʋnzɩla, də sɩ́án tʋtʋnzɩla, də jɩjə wiən, də vàná, kʋ tə súrí zìlə́ wiən tə mama nə, ba nə pɩn.
7 Pɩ̀ʋ́ Sirusə pɩn, ba lɩ Ba-Yígúrə́-Jə-Tiu dìə̀ tʋtʋnzɩla tə, Nebukadənezarə nə ja nan Zwerizalɛmə, ʋ bà, ʋ kə ʋ woŋwanʋ dìə̀ tə wa. 8 Pɛrəsə pɩ̀ʋ́ Sirusə pɩn Mitəredatə, ʋ nə ywàŋá jɩjə wiən tə yuu, lɩ tə, ʋ gàlà, ʋ pa Swɛswəbasarə nə, ʋ nə yɩ Zwida dwíí tə pabiu. 9 Nəŋə tʋtʋnzɩla təntə, nə mɛ nətʋ. Tə yɩ sɩ́án tasaran 30, də wárʋ́ tasaran 1000, də sɩ̀án 29, 10 də sɩ́án wùrú zwɩɩn 30, də wárʋ́ wùrú zwɩɩn 410, də tʋtʋnzɩla duən 1000. 11 Sɩ́án tʋtʋnzɩla tə, də wárʋ́ tʋtʋnzɩla tə mama yà yɩ 5400. Sweswəbasarə pɛ̀ tə mama, ʋ ja vìí, máŋá tə wa, ʋ də ʋ duən tə nə pìí, ba nan Babɩlɔnə yongaʋ tə, ba bà Zwerizalɛmə.